ຂ່າວຫຼ້າສຸດ

ຮ່ຳຮຽນເອົາທັດສະນະຫຼັກໝັ້ນການເມືອງ ທີ່ໜັກແໜ້ນຂອງປະທານ ສຸພານຸວົງ

422 11 ກ.ລ. 2019 ຂ່າວໜ້າ​ໜຶ່ງ
ຮ່ຳຮຽນເອົາທັດສະນະຫຼັກໝັ້ນການເມືອງ ທີ່ໜັກແໜ້ນຂອງປະທານ ສຸພານຸວົງ

    ຄະ­ນະ​ໂຄ­ສະ­ນາ​ອົບ­ຮົມ​ສູນ​ກາງ​ພັກ ຮ່ວມ​ກັບ​ສູນ​ກາງ​ແນວ​ລາວ​ສ້າງ​ຊາດ ຈັດ​ພິ­ທີ​ປາ­ຖະ­ກະ­ຖາ ລະ­ນຶກ​ວັນ​ຄ້າຍ​ວັນ​ເກີດ​ຂອງ​ປະ­ທານ ສຸ​ພາ­ນຸ​ວົງ ຄົບ­ຮອບ 110 ປີ (13/7/1909-13/7/2019) ພາຍ​ໃຕ້​ຫົວ­ຂໍ້ “ປະ­ທານ ສຸ​ພາ­ນຸ​ວົງ ນັກ­ຮົບ​ປະ­ຕິ­ວັດ​ທີ່​ກ້າ­ແກ່ນ ຜູ້­ນຳ​ທີ່​ດີ­ເດັ່ນ ແລະ ເຄົາ­ລົບ​ຮັກ​ຂອງ​ປະ­ຊາ­ຊົນ​ລາວ​ບັນ­ດາ­ເຜົ່າ” ຂຶ້ນ​ວັນ​ທີ 10 ກໍ­ລະ­ກົດ 2019 ຢູ່​ຄະ­ນະ​ໂຄ­ສະ­ນາ​ອົບ­ຮົມ​ສູນ​ກາງ​ພັກ ໂດຍ​ການ​ປາ­ຖະ­ກະ­ຖາ​ຂອງ​ທ່ານ ໄຊ​ສົມ​ພອນ ພົມ­ວິ­ຫານ ປະ­ທານ​ສູນ​ກາງ​ແນວ​ລາວ​ສ້າງ​ຊາດ ມີ​ບັນ­ດາ​ຮອງ​ເລ­ຂາ​ຄະ­ນະ​ພັກ ຄະ­ນະ​ນຳ ກະ­ຊວງ ອົງ­ການ​ແນວ​ລາວ​ສ້າງ​ຊາດ ອົງ​ການ­ຈັດ­ຕັ້ງ​ມະ­ຫາ­ຊົນ ຄະ­ນະ​ພັກ ຄະ­ນະ​ນຳ​ນະ­ຄອນ­ຫຼວງ​ວຽງ​ຈັນ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ໄຊ​ສົມ​ພອນ ພົມ­ວິ­ຫານ ໄດ້​ຍົກ​ໃຫ້​ເຫັນ​ຊີ­ວິດ ແລະ ການ­ເຄື່ອນ­ໄຫວ​ປະ­ຕິ­ວັດ​ຜົນ­ງານ ແລະ ຄວາມ​ດີ​ຂອງ​ປະ­ທານ ສຸ​ພາ­ນຸ​ວົງ ເຊິ່ງ​ທ່ານ​ໄດ້​ເປັນ​ຜູ້­ນຳ​ທີ່​ມີ​ຄວາມ​ຈົງ​ຮັກ​ພັກ­ດີ ຕໍ່​ອຸ­ດົມ​ການ​ປະ­ຕິ­ວັດ​ຢ່າງ​ເດັດ­ຂາດ ຕໍ່­ສູ້​ຢ່າງ​ກ້າ­ແກ່ນ ພິ­ລະ​ອາດ​ຫານ ຍາມ​ໃດ​ກໍ​ຍົກ​ສູງ​ສະ­ຕິ​ລະ­ບຽບ​ວິ­ໄນ​ຕໍ່​ການ­ຈັດ­ຕັ້ງ​ຕະ­ຫຼອດ​ຊີ­ວິດ​ຂອງ​ປະ­ທານ ສຸ​ພາ­ນຸ​ວົງ ໄດ້​ອຸ­ທິດ​ໝົດ​ຈິດ​ໝົດ​ໃຈ ໝົດ​ຄວາມ​ສາ­ມາດ ແລະ ຫົວ­ຄິດ​ປະ­ດິດ​ສ້າງ​ຂອງ​ຕົນ​ໃຫ້​ພາ­ລະ­ກິດ​ປົກ​ປັກ​ຮັກ­ສາ ແລະ ສ້າງ­ສາ​ປະ­ເທດ​ຊາດ ເພື່ອ​ເອ­ກະ­ລາດ ອະ­ທິ­ປະ​ໄຕ​ຂອງ​ຊາດ ແລະ ຄວາມ​ສົມ­ບູນ​ພູນ​ສຸກ​ຂອງ​ປະ­ຊາ­ຊົນ ເດີນ​ຕາມ​ເສັ້ນ­ທາງ​ຂອງ​ພັກ ຄວາມ​ສາ­ມາດ ຄຸນ​ນະ​ທຳ ແລະ ອິດ​ທິ​ພົນ​ຂອງ​ທ່ານ ໄດ້​ກາຍ­ເປັນ​ສິ່ງ​ຊຸກ­ຍູ້ ປຸກ­ລະ­ດົມ ດຶງ​ດູດ​ປະ­ຊາ­ຊົນ ຊັ້ນ​ຄົນ​ຕ່າງໆ​ຢູ່​ພາຍ​ໃນ ແລະ ຕ່າງ­ປະ­ເທດ ປະ­ກອບ­ສ່ວນ​ສ້າງ​ກ້ອນ​ກຳ­ລັງ​ສາ­ມັກ­ຄີ​ເປັນ​ອັນ​ໜຶ່ງ​ອັນ​ດຽວ​ກັນ ໃນ​ແນວ​ໂຮມ​ເອ­ກະ​ພາບ​ແຫ່ງ​ຊາດ ອັນ​ໄດ້​ກາຍ­ເປັນ​ໜຶ່ງ​ໃນ​ບັນ­ດາ​ປັດ​ໄຈ​ສຳ­ຄັນ ທີ່​ຮັບ­ປະ­ກັນ​ໄຊ­ຊະ­ນະ​ຂອງ​ການ​ປະ­ຕິ­ວັດ​ປະ­ເທດ​ໃນ​ແຕ່​ລະ​ໄລ­ຍະ ແລະ ເພິ່ນ​ເຄີຍ​ຕັກ­ເຕືອນ​ພະ­ນັກ­ງານ ສະ­ມາ­ຊິກ​ພັກ​ຢູ່​ສະ­ເໝີ​ວ່າ: “ຕ້ອງ​ຮູ້­ຈັກ​ສົມ­ທົບ​ນ້ຳ­ໃຈ​ຮັກ​ຊາດ​ອັນ​ເລິກ­ເຊິ່ງ ກັບ​ນ້ຳ­ໃຈ​ສາ­ກົນ​ອັນ​ແທ້​ຈິງ” ຍາມ​ໃດ​ເພິ່ນ​ກໍ​ເອົາ­ໃຈ­ໃສ່​ຖະ­ໜຸ­ຖະ­ໜອມ ການ​ພົວ­ພັນ​ມິດ­ຕະ­ພາບ​ຖານ​ອ້າຍ​ນ້ອງ ເພິ່ນ​ເປັນ​ນັກ​ການ­ເມືອງ​ທີ່​ເກ່ງ​ກ້າ ສະ­ຫຼາດ​ສະ­ຫຼຽວ ມີ​ພິບ­ໄຫວ​ໃນ​ການ​ວາງ​ຍຸດ​ໂທ​ບາຍ​ດ້ານ​ການ​ຕໍ່­ສູ້ ການ­ເມືອງ ແລະ ການ​ຕ່າງ­ປະ­ເທດ ແຕ່​ລະ​ໄລ­ຍະ.

    ທ່ານ ໄຊ​ສົມ​ພອນ ພົມ­ວິ­ຫານ ໄດ້​ຮຽກ­ຮ້ອງ​ໃຫ້​ຜູ້​ເຂົ້າ​ຮ່ວມ ຈົ່ງ​ຮຽນ​ເອົາ​ທັດ­ສະ­ນະ​ຫຼັກ​ໝັ້ນ​ການ­ເມືອງ​ທີ່​ໜັກ​ແໜ້ນ ເຊື່ອ​ໝັ້ນ​ຕໍ່​ການ​ນຳ­ພາ​ຂອງ​ພັກ ກໍ​ຄື ແນວ­ທາງ​ປ່ຽນ­ແປງ​ໃໝ່ ເອົາ­ໃຈ­ໃສ່​ເຝິກ­ຝົນ​ຕົນ​ເອງ ໃຫ້​ກາຍ­ເປັນ​ພະ­ນັກ­ງານ​ຮຸ່ນ​ສືບ​ທອດ​ທີ່​ຈົງ​ຮັກ​ພັກ­ດີ​ຕໍ່​ພັກ ແລະ ປະ­ເທດ​ຊາດ ອອກ­ແຮງ​ສຶກ​ສາ​ຮ່ຳ­ຮຽນ​ທິດ​ສະ​ດີ ມາກ-ເລ​ນິນ ເຕັກ­ນິກ​ວິ­ທະ­ຍາ­ສາດ ພາ­ສາ​ຕ່າງ­ປະ­ເທດ ແລະ ວິ­ຊາ​ຊີບ​ຂະ­ແໜງ­ການ​ຕ່າງໆ ເພື່ອ​ໃຫ້​ຕົນ​ເອງ​ມີ​ຄວາມ​ຮູ້-ຄວາມ​ສາ­ມາດ​ສູງ ປະ­ກອບ­ສ່ວນ​ໃນ​ການ​ສ້າງ­ສາ​ພັດ­ທະ­ນາ​ປະ­ເທດ​ຊາດ ໃຫ້​ມີ​ຄວາມ​ສີ­ວິ­ໄລ​ເປັນ​ກ້າວໆ.

ຂ່າວທີ່ກ່ຽວຂ້ອງ