ຂ່າວຫຼ້າສຸດ

ນາຊາຍທອງ ຕະລຸມບອນທຳລາຍແຫຼ່ງເພາະພັນຍຸງ

230 12 ກ.ລ. 2019 ຂ່າວໜ້າ​ໜຶ່ງ
ນາຊາຍທອງ ຕະລຸມບອນທຳລາຍແຫຼ່ງເພາະພັນຍຸງ

    ອຳ­ນາດ​ການ​ປົກ­ຄອງ​ເມືອງ​ນາ​ຊາຍ​ທອງ ຮ່ວມ​ກັບ​ຫ້ອງ­ການ​ສາ­ທາ­ລະ­ນະ​ສຸກ ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ ເປີດ​ຂະ​ບວນ​ການ​ຕະ­ລຸມ­ບອນ​ທຳ­ລາຍ​ແຫຼ່ງ​ເພາະ​ພັນ​ຂອງ​ຍຸງ ເພື່ອ​ຕ້ານ ແລະ ຄວບ​ຄຸມ​ການ​ລະ­ບາດ​ຂອງ​ພະ­ຍາດ​ໄຂ້­ຍຸງ​ລາຍ ນຳ​ໂດຍ​ທ່ານ ວິ­ລະ​ສັກ ນາມ​ມຸນ­ຕີ ເຈົ້າ­ເມືອງ​ນາ​ຊາຍ​ທອງ ທ່ານ ຄຳ​ພັນ ຂັນ​ຕິ​ລາດ ຮອງ​ຫົວ­ໜ້າ​ຫ້ອງ­ການ​ສາ­ທາ­ລະ­ນະ​ສຸກ​ເມືອງ​ນາ​ຊາຍ​ທອງ ພ້ອມ​ດ້ວຍ​ຕາງ­ໜ້າ​ພະ​ແນກ​ສາ­ທາ­ລະ­ນະ​ສຸກ ນວ ພະ­ນັກ­ງານ​ຫ້ອງ­ການ​ອ້ອມ​ຂ້າງ​ເມືອງ ກອງ​ບັນ­ຊາ​ການ​ທະ­ຫານ​ເມືອງ ປກສ ເມືອງ ເລ­ຂາ​ຄະ­ນະ​ພັກ​ຮາກ​ຖານ​ກຸ່ມ​ບ້ານ ນາຍ­ບ້ານ ອາ­ສາ​ສະ­ໝັກ​ບ້ານ​ທັງ​ໝົດ.

    ທ່ານ ຄຳ​ພັນ ຂັນ​ຕິ​ລາດ ຮອງ​ຫົວ­ໜ້າ​ຫ້ອງ­ການ​ສາ­ທາ­ລະ­ນະ​ສຸກ ເມືອງ​ນາ​ຊາຍ​ທອງ ກ່າວ​ວ່າ: ນັບ​ແຕ່​ອາ­ທິດ​ທີ 1 ຮອດ​ອາ­ທິດ​ທີ 28 ທົ່ວ​ເມືອງ​ນາ​ຊາຍ​ທອງ ມີ​ຄົນ​ເຈັບ​ໄຂ້­ຍຸງ​ລາຍ​ສະ​ສົມ​ທັງ​ໝົດ 100 ກໍ­ລະ­ນີ ເສຍ​ຊີ­ວິດ 1 ຄົນ ທຽບ­ໃສ່​ປີ 2013 ເຫັນ​ວ່າ​ສະ­ພາບ​ໄຂ້­ຍຸງ​ລາຍ​ປີ​ນີ້​ມີ​ທ່າ​ອ່ຽງ​ເພີ່ມ​ຂຶ້ນ ສົມ­ທົບ​ກັບ​ສະ­ພາບ​ອາ­ກາດ​ມີ​ການ​ປ່ຽນ­ແປງ ເປັນ​ສິ່ງ​ເອື້ອ​ອຳ­ນວຍ​ໃຫ້​ຍຸງ​ມີ​ການ​ວາງ​ໄຂ່ ແລະ ຂະ­ຫຍາຍ​ພັນ​ຢ່າງ​ໄວ­ວາ ສະ­ແດງ​ໃຫ້​ເຫັນ​ໃນ​ອາ­ທິດ​ທີ່​ຜ່ານ​ມາ​ທີມ​ງານ​ແພດ ແລະ ອສບ ບ້ານ ທົ່ວ​ເມືອງ​ໄດ້​ລົງ​ສຳ​ຫຼວດ​ຄວາມ​ໜາ​ແໜ້ນ​ຂອງ​ຍຸງ ໃນ 29 ບ້ານ ຜ່ານ​ການ​ສຳ​ຫຼວດ​ເຫັນ​ວ່າ​ໜອນ​ຍຸງ​ໃນ 100 ຫຼັງ​ເຮືອນ ແມ່ນ​ມີ 10 ຫຼັງ­ຄາ​ເຮືອນ​ມີ​ໜອນ​ຍຸງ ຕໍ່​ກັບ​ສະ­ພາບ​ຄື​ດັ່ງ­ກ່າວ ອົງ­ຄະ​ນະ​ພັກ​ເມືອງ​ໄດ້​ຊີ້​ນຳ​ໃຫ້​ຫ້ອງ​ວ່າ​ການ­ເມືອງ ສົມ­ທົບ​ກັບ​ຫ້ອງ­ການ​ສາ­ທາ­ລະ­ນະ​ສຸກ​ເມືອງ ປະ­ສານ​ກັບ​ຫ້ອງ­ການ​ຕ່າງໆ​ອ້ອມ​ຂ້າງ​ເມືອງ ບັນ­ດາ​ກຸ່ມ​ບ້ານ ບ້ານ ໃຫ້​ເພີ່ມ​ທະ­ວີ​ມາດ​ຕະ­ການ​ຄວບ​ຄຸມ ເພື່ອ​ບໍ່​ໃຫ້​ມີ​ການ​ລະ­ບາດ​ຂອງ​ພະ­ຍາດ​ໄຂ້­ຍຸງ​ລາຍ ໂດຍ​ໃຫ້​ທຸກ​ພາກ­ສ່ວນ​ມີ​ສ່ວນ​ຮ່ວມ ແລະ ເປັນ​ເຈົ້າ​ການ​ໃນ​ການ​ທຳ­ລາຍ​ແຫຼ່ງ​ເພາະ​ພັນ​ຂອງ​ຍຸງ​ແບບ​ຕະ­ລຸມ­ບອນ ພ້ອມ​ສ້າງ​ຂະ​ບວນ​ການ​ວັນ​ເສົາ​ແດງ ຖື​ເອົາ​ວຽກ​ປ້ອງ​ກັນ​ໄຂ້­ຍຸງ​ລາຍ ເປັນ​ວຽກ​ບຸ­ລິ­ມະ­ສິດ​ຕິດ­ຕໍ່​ກັນ 4 ອາ­ທິດ ເພື່ອ​ຫຼຸດ​ປະ­ລິ­ມານ​ຈຳ­ນວນ​ຍຸງ​ລົງ ເປັນ​ການ​ຕ້ານ ແລະ ຄວບ​ຄຸມ​ການ​ລະ­ບາດ​ຂອງ​ໄຂ້­ຍຸງ​ລາຍ​ໃຫ້​ຫຼຸດ​ໜ້ອຍ​ຖອຍ​ລົງ ແລະ ກັບ​ສູ່​ສະ­ພາບ​ປົກ­ກະ­ຕິ.

ຂ່າວທີ່ກ່ຽວຂ້ອງ