ສະຫຼຸບໂຄງການປະຕິສັງຂອນພະທາດຫຼວງ ຈະຈັດຂຶ້ນທ້າຍປີນີ້

202 12 ກ.ລ. 2019 ຂ່າວໜ້າ​ໜຶ່ງ

    ກອງ​ປະ­ຊຸມ​ຄະ­ນະ​ຮັບ­ຜິດ­ຊອບ​ລະ­ດັບ​ຊາດ ໂຄງ­ການ​ປະ­ຕິ­ສັງ­ຂອນ​ພິ​ພິ​ທະ​ພັນ​ຫໍ­ພະ­ແກ້ວ ຄັ້ງ​ທີ III ແລະ ພິ​ພິ​ທະ​ພັນ​ພະ​ທາດ­ຫຼວງ ຄັ້ງ​ທີ IV ຈັດ​ຂຶ້ນ​ວັນ​ທີ 9 ກໍ­ລະ­ກົດ 2019 ຢູ່​ຫ້ອງ​ວ່າ­ການ​ປົກ­ຄອງ ນະ­ຄອນ­ຫຼວງ​ວຽງ​ຈັນ (ນວ) ໂດຍ​ເປັນ​ປະ­ທານ​ຂອງ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ ນວ ປະ­ທານ​ຄະ­ນະ​ຮັບ­ຜິດ­ຊອບ​ລະ­ດັບ​ຊາດ ໂຄງ­ການ​ປະ­ຕິ­ສັງ­ຂອນ​ພິ​ພິ​ທະ​ພັນ​ຫໍ­ພະ­ແກ້ວ ຄັ້ງ​ທີ III ແລະ ພິ​ພິ​ທະ​ພັນ​ພະ​ທາດ­ຫຼວງ ຄັ້ງ​ທີ IV ມີ​ຄະ­ນະ​ຮັບ­ຜິດ­ຊອບ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ຄຳ​ປະ­ດິດ ເຂັມ​ມາ­ນິດ ຫົວ­ໜ້າ​ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ (ຖວ​ທ ນວ) ຫົວ­ໜ້າ​ອະ­ນຸ​ກຳ­ມະ­ການ​ກອງ​ເລ­ຂາ​ງົບ­ປະ­ມານ ພິ­ທີ­ການ ແລະ ຂອງ­ຂວັນ ກ່າວ​ວ່າ: ປັດ­ຈຸ­ບັນ ຫຼາຍ​ໜ້າ​ວຽກ​ທີ່​ຕົກ­ລົງ​ກັນ​ຢູ່​ໃນ​ກອງ​ປະ­ຊຸມ​ຄະ­ນະ​ຊີ້​ນຳ​ລະ­ດັບ​ຊາດ ເພື່ອ​ປະ­ຕິ­ສັງ­ຂອນ​ພິ​ພິ​ທະ​ພັນ​ພະ​ທາດ­ຫຼວງ ຄັ້ງ​ທີ IV ວັນ​ທີ 18 ມີ­ນາ 2019 ມີ​ຜົນ­ສຳ­ເລັດ​ເປັນ​ກ້າວໆ ໃນ​ນີ້ ໄດ້​ສຳ­ເລັດ​ວຽກ​ປັບ­ປຸງ​ຮ່ອງ​ລະ­ບາຍ​ນ້ຳ ບໍ­ລິ­ເວນ​ອ້ອມ​ຮອບ​ເດີ່ນ​ກົມ​ມະ​ລຽນ​ພະ​ທາດ­ຫຼວງ ສຳ­ເລັດ​ວຽກ​ປະ­ມວນ​ຮູບ​ພາບ​ແຖ່ນ​ພະ ເພື່ອ​ເປັນ​ການ​ລະ­ດົມ​ຜູ້​ທີ່​ມີ​ສັດ­ທາ​ຢາກ​ສ້າງ­ສາ​ແຖ່ນ​ພະ ວຽກ​ຈັດ​ວາງ­ສະ­ແດງ​ວັດ­ຖຸ​ພັນ ສ້າງ​ແຖ່ນ​ພະ ແລະ ຮູບ­ແຕ້ມ​ສີ­ນ້ຳ­ມັນ​ພາຍ​ໃນ​ກົມ​ມະ​ລຽນ​ຄືບ​ໜ້າ 50% ສ່ວນ​ການ​ຊຳ­ລະ​ເງິນ​ຄ່າ​ປະ­ຕິ­ສັງ­ຂອນ​ຫໍ­ພະ­ແກ້ວ 1,2 ຕື້​ກີບ ພະ​ທາດ­ຫຼວງ 8,19 ຕື້​ກີບ ຍັງ​ບໍ່​ທັນ​ຊຳ­ລະ 12,9 ຕື້​ກີບ ໄດ້​ສະ­ເໜີ​ຍ້ອງ­ຍໍ​ໃຫ້​ຄະ­ນະ​ຮັບ­ຜິດ­ຊອບ​ໂຄງ­ການ ສ່ວນ​ວຽກ​ທີ່​ຈະ​ສືບ­ຕໍ່​ປະ­ຕິ­ບັດ​ໃຫ້​ສຳ­ເລັດ​ໃນ­ຕໍ່­ໜ້າ ແມ່ນ​ສືບ­ຕໍ່​ຊຳ­ລະ​ເງິນ​ໃຫ້​ບໍ­ລິ­ສັດ​ຮັບ​ເໝົາ​ຕາມ​ໜ້າ​ວຽກ​ທີ່​ໄດ້​ກວດ­ກາ​ແລ້ວ ແຕ່​ຍັງ​ບໍ່​ທັນ​ໄດ້​ຊຳ­ລະ​ຄົບ​ຖ້ວນ ກະ­ກຽມ​ຈັດ​ພິ­ທີ​ສະ­ຫຼຸບ ແລະ ປິດ​ໂຄງ­ການ​ປະ­ຕິ­ສັງ­ຂອນ​ດັ່ງ­ກ່າວ ສືບ­ຕໍ່​ຈັດ​ຕັ້ງ​ປະ­ຕິ­ບັດ​ວຽກ​ສ້າງ​ແຖ່ນ​ພະ ແຕ້ມ​ຮູບ​ສີ­ນ້ຳ­ມັນ ເພື່ອ​ວາງ­ສະ­ແດງ​ໄວ້​ທີ່​ກົມ​ມະ​ລຽນ ພິ​ພິ​ທະ​ພັນ​ພະ​ທາດ­ຫຼວງ ແລະ ຕູ້​ວາງ­ສະ­ແດງ​ວັດ­ຖຸ​ພັນ ເພື່ອ​ວາງ­ສະ­ແດງ​ໄວ້​ທີ່​ຫໍ­ພະ­ແກ້ວ ສືບ­ຕໍ່​ສ້າງ​ເອ­ກະ­ສານ​ທີ່​ຍັງ​ບໍ່​ຄົບ​ຖ້ວນ ເພື່ອ​ເຮັດ​ໃຫ້​ໂຄງ­ການ​ຖືກ­ຕ້ອງ​ຕາມ​ລະ­ບຽບ​ການ.

    ຜູ້​ເຂົ້າ​ຮ່ວມ​ຍັງ​ໄດ້​ປຶກ­ສາ​ຫາ­ລື​ແກ້​ໄຂ​ບັນ­ຫາ​ໃນ­ຕໍ່­ໜ້າ ເປັນ­ຕົ້ນ ການ​ຈັດ​ສັນ​ເຂດ​ເດີ່ນ​ວັດ​ທາດ­ຫຼວງ​ເໜືອ ຂອງ​ບໍ­ລິ­ສັດ ຊີ​ເອັນ​ພີ ກ່ຽວ​ກັບ​ເຮືອນ​ຊົງ​ລາວ​ທີ່​ຫ້ອງ­ການ​ກະ­ຊວງ ຖວທ ແຈ້ງ​ການ​ບໍ່​ໃຫ້​ຍົກ­ຍ້າຍ ການ​ແກ້​ໄຂ​ເງິນ​ບໍ­ລິ­ຫານ​ຂອງ​ພິ​ພິ​ທະ​ພັນ​ສະ­ຖານ​ບູ­ຮານ ທີ່​ຍັງ​ບໍ່​ທັນ​ໄດ້​ມາ​ແຕ່​ຕົ້ນ​ປີ 2019 ເຮັດ​ໃຫ້­ການ​ເຮັດ​ວຽກ​ມີ​ຄວາມ​ຫຍຸ້ງ­ຍາກ ບັນ­ຫາ​ບໍ­ລິ­ສັດ​ຜູ້​ຮັບ​ເໝົາ​ໂຄງ­ການ​ສະ­ເໜີ​ຂໍ​ການ​ຊຳ­ລະ​ໜີ້​ທີ່​ຍັງ​ຄ້າງ ບັນ­ຫາ​ການ​ປ້ອງ​ກັນ​ເວນ­ຍາມ ພິ​ພິ​ທະ​ພັນ​ພະ​ທາດ­ຫຼວງ ການ​ສ້ອມ­ແປງ​ຮົ້ວ ແລະ ປະ­ຕູ​ເຂົ້າ-ອອກ ການ​ແບ່ງ​ຄວາມ​ຮັບ­ຜິດ­ຊອບ ການ​ເຮັດ​ບໍ­ລິ­ການ​ຢູ່​ເດີ່ນ​ກົມ​ມະ​ລຽນ​ພະ​ທາດ­ຫຼວງ​ຂອງ​ສອງ​ບໍ­ລິ­ສັດ ການ​ຍົກ­ຍ້າຍ​ຫ້ອງ­ການ​ໜ່ວຍ​ກູ້​ໄພ​ອອກ​ຈາກ​ເດີ່ນ​ກົມ​ມະ​ລຽນ​ພະ​ທາດ­ຫຼວງ ແລະ ອື່ນໆ ໂດຍ​ລວມ​ແລ້ວ​ບັນ­ຫາ​ທີ່​ສະ­ເໜີ​ຂຶ້ນ​ບາງ​ບັນ­ຫາ​ໄດ້​ເປັນ​ເອ­ກະ​ພາບ ແລະ ບາງ​ບັນ­ຫາ​ກໍ​ຈະ​ໄດ້​ນຳ­ໄປ​ຄົ້ນ­ຄວ້າ​ຕື່ມ​ອີກ ເພື່ອ​ເຮັດ​ໃຫ້​ການ­ຈັດ­ຕັ້ງ​ປະ­ຕິ­ບັດ​ມີ​ຜົນ­ສຳ­ເລັດ ເມື່ອ​ໂຄງ­ການ​ນີ້​ສຳ­ເລັດ ຈະ​ເຮັດ​ໃຫ້​ສະ­ຖານ­ທີ່​ທ່ອງ​ທ່ຽວ​ວັດ­ທະ­ນະ­ທຳ​ແຫ່ງ​ນີ້ ສາ­ມາດ​ດຶງ​ດູດ​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງ­ປະ­ເທດ​ນັບ​ມື້​ຫຼາຍ​ຂຶ້ນ.

ຂ່າວທີ່ກ່ຽວຂ້ອງ