ຂ່າວຫຼ້າສຸດ

ນົກຍາງຂາວລົງກິນນ້ຳ

167 15 ກ.ລ. 2019 ຫົວຂໍ້ຂ່າວອື່ນໆ

    ຫົວ­ຂໍ້​ທີ່​ຜູ້​ຂຽນ​ເກິ່ນ​ຂຶ້ນ​ນີ້ ຢາກ​ໝາຍ​ເຖິງ​ບັນ­ດາ​ນັກ­ຮຽນ​ມໍ​ຕົ້ນ-ມໍ​ປາຍ ຕະ­ຫຼອດ​ນັກ​ສຶກ​ສາ​ວິ­ຊາ​ຊີບ​ຂອງ​ໂຮງ­ຮຽນ​ອາ­ຊີ­ວະ​ສຶກ​ສາ-ວິ­ທະ­ຍາ­ໄລ-ມະ­ຫາ­ວິ­ທະ­ຍາ­ໄລ ກໍ​ຄື​ສະ​ຖາ​ບັນ​ການ​ສຶກ​ສາ​ຕ່າງໆ​ທີ່​ນຸ່ງ​ເຄື່ອງ​ແບບ (ເສື້ອ​ຂາວ) ເຊິ່ງ​ມີ​ເຄື່ອງ­ໝາຍ (ໂລ​ໂກ​ໂຮງ­ຮຽນ​ຕົ້ນ​ສັງ­ກັດ) ເຫັນ​ກາ​ໝາຍ-ຊື່-ນາມ­ສະ­ກຸນ-ເລກ​ທະ­ບຽນ... ເຂົ້າ​ໃຊ້​ບໍ­ລິ­ການ​ຕາມ​ຮ້ານ​ກິນ​ດື່ມ​ຕະ­ຫຼອດ​ຮອດ​ສະ­ຖານ​ບັນ­ເທີງ​ຕ່າງໆ ອັນ​ທີ່​ໜ້າ​ເປັນ​ຫ່ວງ​ກໍ​ຄື​ບາງ​ຄົນ​ອາ­ຍຸ​ບໍ່​ທັນ​ຮອດ 18 ປີ​ຊ້ຳ.

    ບັນ­ຫາ​ທີ່​ຜູ້​ຂຽນ​ກ່າວ​ມາ​ຂ້າງ​ເທິງ ໄດ້​ກາຍ­ເປັນ​ປະ­ກົດ​ການ​ຫຍໍ້­ທໍ້​ມາ​ຫຼາຍ​ປີ​ແລ້ວ ເຊິ່ງ​ທຸກ​ພາກ­ສ່ວນ​ທີ່​ກ່ຽວ­ຂ້ອງ ກໍ​ໄດ້​ມີ​ຄວາມ​ພະ­ຍາ­ຍາມ​ແກ້​ໄຂ​ບັນ­ຫາ​ດັ່ງ­ກ່າວ​ມາ​ໂດຍ​ຕະ­ຫຼອດ ແຕ່​ກໍ​ຍັງ​ເລັດ​ລອດ​ເກີດ​ມີ​ປະ­ກົດ​ໃຫ້​ເຫັນ​ຜ່ານ​ຮູບ​ພາບ-ພາບ​ວິ​ດີ​ໂອ​ຄລິບ​ໃນ​ໂລກ​ອອນ​ລາຍ (ເຟ​ສ​ບຸ໋ກ) ເຊິ່ງ​ເຫດ­ການ​ທີ່​ພົ້ນ​ເດັ່ນ​ໃນ​ໄລ­ຍະ​ຜ່ານ​ມາ​ຫວ່າງ​ມໍ່ໆມານີ້ ກໍ​ຄື​ຜົນ​ເນື່ອງ​ມາ​ຈາກ​ບັ້ນ​ສອບ­ເສັງ​ຈົບ​ຊັ້ນ​ມໍ 7 ຂອງ​ບັນ­ດາ​ນ້ອງໆ​ນັກ­ຮຽນ ໄດ້​ພາ­ກັນ​ເຂົ້າ​ດື່ມ­ນ້ຳ​ເມົາ​ສະ­ຫຼອງ​ທີ່​ຕົນ​ເອງ​ເສັງ​ຈົບ ແລະ ມີ​ການ​ເຊັນ​ຊື່-ຂຽນ​ຂໍ້­ຄວາມ​ສົ່ງ​ທ້າຍ​ໃສ່​ເສື້ອ​ຂາວ​ຂອງ​ກັນ ແລະ ກັນ​ຈົນ​ກິດ­ຈະ­ກຳ​ນີ້ ໄດ້​ກາຍ­ເປັນ​ຄ່າ​ນິ­ຍົມ​ໜຶ່ງ​ໄປ​ແລ້ວ​ໃນ​ສັງ­ຄົມ​ບ້ານ​ເມືອງ​ເຮົາ.

    ໝວດ​ທີ 5 ຂອງ​ດຳ­ລັດ​ສະ­ບັບ​ເລກ​ທີ 315/ລບ ລົງ​ວັນ​ທີ 2 ຕຸ­ລາ 2017 ວ່າ​ດ້ວຍ​ການ​ບັນ­ເທີງ ໄດ້​ເວົ້າ​ເຖິງ​ຂໍ້​ຫ້າມ​ສຳ­ລັບ​ຫົວ­ໜ່ວຍ​ທຸ­ລະ​ກິດ​ການ​ບັນ­ເທີງ ເປັນ­ຕົ້ນ​ແມ່ນ​ດຳ­ເນີນ​ທຸ­ລະ​ກິດ​ບັນ­ເທີງ​ໂດຍ​ບໍ່​ໄດ້​ຮັບ​ອະ­ນຸ­ຍາດ ບໍ­ລິ­ການ​ບັນ­ເທີງ​ໂດຍ​ບໍ່​ໄດ້​ຮັບ​ອະ­ນຸ­ຍາດ ນຳ​ໃຊ້​ສະ­ຖານ­ທີ່​ບັນ­ເທີງ​ເປັນ​ບ່ອນ​ຄ້າ­ຂາຍ ຈຳ­ໜ່າຍ ເສບ ມົ້ວ​ສຸມ​ສິ່ງ​ເສບ​ຕິດ ການ​ພະ­ນັນ ໂສ­ເພ­ນີ ຄ້າ​ມະ­ນຸດ ແລະ ອາ­ວຸດ​ທຸກ​ຊະ­ນິດ ອະ­ນຸ­ຍາດ​ເດັກ­ນ້ອຍ​ອາ­ຍຸ​ຕ່ຳ​ກວ່າ 18 ປີ​ເຂົ້າ​ໃຊ້​ບໍ­ລິ­ການ ມີ​ອາ­ວຸດ ສິ່ງ​ເສບ​ຕິດ ວັດ­ຖຸ​ເຄ​ມີ​ເບື່ອ​ເມົາ ແລະ ສິ່ງ​ທີ່​ເປັນ​ອັນ­ຕະ­ລາຍ​ທຸກ​ຊະ­ນິດ​ທີ່​ມີ​ຜົນ​ຕໍ່​ຊີ­ວິດ ສຸ­ຂະ­ພາບ​ຮ່າງ­ກາຍ ຈິດ ແລະ ປະ­ສາດ​ຂອງ​ມະ­ນຸດ ແຕ່ງ​ກາຍ​ດ້ວຍ​ຊຸດ​ຂອງ​ນັກ­ຮຽນ ຊຸດ​ນັກ​ສຶກ​ສາ ຊຸດ​ທາງ​ການ ຊຸດ​ການ​ແພດ ຊຸດ​ທາງ​ສາ­ສະ­ໜາ ຊຸດ​ທີ່​ມີ​ສັນ­ຍະ­ລັກ​ຂອງ​ສະ​ຖາ​ບັນ ຫຼື ອົງ​ການ­ຈັດ­ຕັ້ງ​ໃດ​ໜຶ່ງ​ທາງ​ສັງ­ຄົມ ແລະ ອື່ນໆ​ທີ່​ຂັດ​ກັບ​ສິ­ລະ​ທຳ ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ຊາດ ກົດ­ໝາຍ ແລະ ລະ­ບຽບ​ການ ເຕັ້ນ​ລຳ ຟ້ອນ ແລະ ການ­ສະ­ແດງ​ຕ່າງໆ​ທີ່​ມີ​ລັກ­ສະ­ນະ​ໂປ້​ເປືອຍ ເຢົ້າ​ຢວນ ຫຼື ລາ­ມົກ​ອາ­ນາ​ຈານ ມີ​ພຶດ­ຕິ​ກຳ ແລະ ການ­ເຄື່ອນ­ໄຫວ​ທີ່​ສົ່ງ​ຜົນ​ກະ­ທົບ​ດ້ານ​ລົບ​ຕໍ່​ຄວາມ​ສະ­ຫງົບ ປອດ​ໄພ ເສດ­ຖະ­ກິດ ວັດ­ທະ­ນະ­ທຳ-ສັງ­ຄົມ ແລະ ສິ່ງ­ແວ­ດລ້ອມ ສົ່ງ​ສຽງ​ເນືອງ​ນັນ​ລົບ​ກວນ​ບຸກ­ຄົນ ຫຼື ສັງ­ຄົມ​ພາຍ​ນອກ​ສະ­ຖານ­ທີ່​ບັນ­ເທີງ ສ້າງ​ບັນ­ຫາ​ກີດ­ຂວາງ​ການ​ສັນ­ຈອນ ຫຼື ການ​ຈະ­ລາ­ຈອນ​ຕາມ​ທ້ອງ​ຖະ­ໜົນ​ສາ­ທາ­ລະ­ນະ ນຳ​ໃຊ້​ສະ­ຖານ­ທີ່​ກໍ່​ຄວາມ​ວຸ່ນ­ວາຍ ອາ​ລະ​ວາດ​ຕີ​ກັນ ຫຼື ທຳ­ຮ້າຍ​ຮ່າງ­ກາຍ ຊັກ​ຈູງ ຊີ້​ນຳ-ນຳ­ພາ ຕົວະ​ຍົວະ​ຫຼອກ​ລວງ ບັງ­ຄັບ​ນາບ​ຂູ່ ຊຸກ­ຍູ້​ສົ່ງ­ເສີມ​ບຸກ­ຄົນ ຫຼື ພະ­ນັກ­ງານ​ພາຍ​ໃນ​ສະ­ຖານ­ທີ່​ບັນ­ເທີງ​ເຄື່ອນ​ໄຫວ ໃຊ້​ພຶດ­ຕິ​ກຳ​ບໍ­ລິ­ການ​ທາງ​ເພດ ຫຼື ຝ່າ­ຝືນ​ກົດ­ໝາຍ ແລະ ລະ­ບຽບ​ການ ຂັດ​ຂືນ ຝ່າ­ຝືນ ຕໍ່­ຕ້ານ ຫຼື ປະ­ຕິ­ເສດ​ຄຳ​ສັ່ງ​ຂອງ​ເຈົ້າ​ໜ້າ­ທີ່ ຫຼື ການ­ຈັດ­ຕັ້ງ​ທີ່​ຕົນ​ຂຶ້ນ​ກັບ ມີ​ພຶດ­ຕິ​ກຳ​ອື່ນ​ທີ່​ຂັດ​ກັບ​ກົດ­ໝາຍ ແລະ ລະ­ບຽບ​ການ.

    ໃນ​ແງ່​ກົດ­ໝາຍ​ແລ້ວ ກົດ­ໝາຍ​ວ່າ​ດ້ວຍ​ການ​ຄວບ​ຄຸມ​ເຄື່ອງ​ດື່ມ​ທີ່​ມີ​ທາດ​ເຫຼົ້າ​ແຫ່ງ ສປປ ລາວ ມາດ­ຕາ 53 ວ່າ​ດ້ວຍ​ຂໍ້​ຫ້າມ​ສຳ­ລັບ​ຜູ້​ດຳ­ເນີນ​ທຸ­ລະ​ກິດ​ທີ່​ມີ​ທາດ​ເຫຼົ້າ ໃນ​ນັ້ນ​ຂໍ້​ທີ 11 ໄດ້​ລະ­ບຸ​ໄວ້​ວ່າ: ຫ້າມ​ຈຳ­ໜ່າຍ​ເຄື່ອງ​ດື່ມ​ທີ່​ມີ​ທາດ​ເຫຼົ້າ​ໃຫ້​ແກ່​ຜູ້​ທີ່​ມີ​ອາ­ຍຸ​ຕ່ຳ​ກວ່າ 18 ປີ ຜູ້​ມຶນ­ເມົາ ບຸກ­ຄົນ​ໃສ່­ເຄື່ອງ​ແບບ ແລະ ຜູ້​ຂັບ​ຂີ່...” ເຊິ່ງ​ລ້ວນ​ແຕ່​ໝາຍ​ເຖິງ​ຖັນ​ແຖວ​ນ້ອງໆ​ນັກ­ຮຽນ-ນັກ​ສຶກ​ສາ​ທັງ​ນັ້ນ. ສ່ວນ​ກົດ­ໝາຍ​ວ່າ​ດ້ວຍ​ການ​ສຶກ​ສາ​ແຫ່ງ ສປປ ລາວ ມາດ­ຕາ 70 (ປັບ­ປຸງ​ໃໝ່) ວ່າ​ດ້ວຍ​ຂໍ້​ຫ້າມ​ສຳ­ລັບ​ຜູ້​ຮຽນ​ໃນ​ນັ້ນ​ຂໍ້​ທີ 4 ໄດ້​ລະ­ບຸ​ໄວ້​ວ່າ: “...ຫ້າມ​ພົວ­ພັນ ຊື້-ຂາຍ​ສິ່ງ​ເສບ​ຕິດ ສິ່ງ​ມຶນ­ເມົາ ສິ່ງ​ລາ­ມົກ​ອະ­ນາ­ຈານ ຫຼິ້ນ​ການ​ພະ­ນັນ​ທຸກ​ປະ­ເພດ​ຢູ່​ສະ­ຖານ​ການ​ສຶກ​ສາ ແລະ ສະ­ຖານ­ທີ່​ອື່ນ​ເຊັ່ນ: ຮ້ານ​ກິນ​ດື່ມ ຮ້ານ​ສະ­ນຸກ​ເກີ ຮ້ານ​ເກມ ຮ້ານ​ບັນ­ເທີງ ແລະ ນຸ່ງ​ເຄື່ອງ​ແບບ​ນັກ­ຮຽນ​ເຂົ້າ​ໃນ​ສະ­ຖານ­ທີ່​ດັ່ງ­ກ່າວ...”.

ໂດຍ: ມະ­ຕິ​ຊົນ

ຂ່າວທີ່ກ່ຽວຂ້ອງ