ເບິ່ງບ້ານເຂົາເອົາບົດຮຽນ 16-07-2019

259 16 ກ.ລ. 2019 ຫົວຂໍ້ຂ່າວອື່ນໆ

    ພົບ​ກັນ​ວັນ​ນີ້ ມີ​ຂ່າວ​ກ່ຽວ​ກັບ​ວິ­ທີ​ການ​ຂອງ ເກາະ​ໄຕ້​ຫວັນ ແລະ ນະ­ຄອນ­ຫຼວງ​ຮ່າ​ໂນ້ຍ ໃນ​ການ​ດຶງ​ດູດ​ນັກ​ທ່ອງ​ທ່ຽວ​ຕ່າງ­ປະ­ເທດ ແລະ ຂ່າວ​ກ່ຽວ​ກັບ​ກົດ­ໝາຍ​ນ້ຳ­ມັນ​ເຊື້ອ​ໄຟ​ຂອງ​ກຳ­ປູ­ເຈຍ.

    ທີ່ ເກາະ​ໄຕ້​ຫວັນ: ການ​ຍົກ­ເວັ້ນ​ວີ​ຊາ ແມ່ນ​ຮູບ​ການ​ດຶງ​ດູດ​ໜຶ່ງ​ທີ່​ທາງ​ການ​ເກາະ​ໄຕ້​ຫວັນ ໃຊ້​ອ່ອຍ​ເອົາ​ນັກ​ທ່ອງ​ທ່ຽວ​ຕ່າງ­ປະ­ເທດ​ເຂົ້າ​ໄປ​ທ່ອງ​ທ່ຽວ​ເກາະ​ນັບ​ມື້​ຫຼາຍ​ຂຶ້ນ ເຊິ່ງ​ຫວ່າງ​ບໍ່​ດົນ​ມາ​ນີ້ ກໍ​ມີ​ຂ່າວ​ວ່າ: ນັກ​ທ່ອງ​ທ່ຽວ​ຈາກ 4 ປະ­ເທດ ເຊິ່ງ​ໄດ້­ແກ່ ໄທ ຟິ​ລິບ​ປິນ ບຼູ​ໄນ ແລະ ຣັດ​ເຊຍ ໄດ້​ເດີນ­ທາງ​ໄປ​ທ່ອງ​ທ່ຽວ​ເກາະ​ແຫ່ງ​ນີ້​ເພີ່ມ​ຂຶ້ນ 13,61% ໃນ​ປີ 2018 ທຽບ​ກັບ​ປີ 2017 ເຊິ່ງ​ສ່ວນ​ໜຶ່ງ​ກໍ​ແມ່ນ​ມາ​ຈາກ​ນະ­ໂຍ­ບາຍ​ຍົກ­ເວັ້ນ​ວີ​ຊາ​ໃຫ້​ນັກ​ທ່ອງ​ທ່ຽວ​ຈາກ 4 ປະ­ເທດ​ນີ້ ດັ່ງ­ນັ້ນ ທາງ​ການ​ເກາະ​ໄຕ້​ຫວັນ ຈຶ່ງ​ປະ­ກາດ​ສືບ­ຕໍ່​ຍົກ­ເວັ້ນ​ວີ​ຊາ​ຕື່ມ​ອີກ 1 ປີ ໃຫ້​ນັກ​ທ່ອງ​ທ່ຽວ​ຈາກ 4 ປະ­ເທດ​ນີ້.

    ທີ່ ຫວຽດ­ນາມ: ໃນ​ຂະ­ນະ​ທີ່­ຢູ່​ປະ­ເທດ​ລາວ​ພວກ​ເຮົາ ພວມ​ປະ​ເຊີນ​ກັບ​ບັນ­ຫາ​ການ​ດຶງ​ດູດ​ນັກ​ທ່ອງ​ທ່ຽວ ໃຫ້​ໄດ້​ຕາມ​ລະ­ດັບ​ຄາດ­ໝາຍ​ທີ່​ວາງ​ອອກ ຍ້ອນ​ວ່າ​ຈຳ­ນວນ​ນັກ​ທ່ອງ​ທ່ຽວ​ເຂົ້າ​ລາວ ມີ​ທ່າ​ອ່ຽງ​ຫຼຸດ​ລົງ​ດ້ວຍ​ຫຼາຍ​ເງື່ອນ­ໄຂ​ນັ້ນ ຢູ່​ປະ­ເທດ​ອ້ອມ­ແອ້ມ​ຜັດ​ສາ­ມາດ​ດຶງ​ດູດ​ນັກ​ທ່ອງ​ທ່ຽວ​ເຂົ້າ​ປະ­ເທດ​ນັບ​ມື້​ເພີ່ມ​ຂຶ້ນ ບໍ່​ວ່າ​ຈະ​ເປັນ ກຳ­ປູ­ເຈຍ ໄທ ແລະ ປະ­ເທດ​ອື່ນໆ​ໃນ​ອາ​ຊຽນ ສ່ວນ​ຢູ່​ຫວຽດ­ນາມ​ນັ້ນ ເວົ້າ​ສະ­ເພາະ​ນັກ​ທ່ອງ​ທ່ຽວ​ຕ່າງ­ປະ­ເທດ​ທີ່​ເຂົ້າ​ໄປ​ທ່ຽວ​ນະ­ຄອນ­ຫຼວງ​ຮ່າ​ໂນ້ຍ​ນັ້ນ ກໍ​ມີ​ຈຳ­ນວນ​ສູງ​ເຖິງ 3,3 ລ້ານ​ເທື່ອ​ຄົນ ໃນ 6 ເດືອນ​ຕົ້ນ​ປີ​ນີ້ ເທົ່າ​ກັບ​ຈຳ­ນວນ​ນັກ​ທ່ອງ​ທ່ຽວ​ຕ່າງ­ປະ­ເທດ​ມາ​ທ່ຽວ​ລາວ ໃນ​ປີ 2018 ເຊິ່ງ​ເປັນ​ປີ​ທ່ອງ​ທ່ຽວ​ລາວ​ແທ້ໆ.

    ຂ່າວ​ໄດ້​ບອກ​ຕື່ມ​ວ່າ: ວິ­ທີ​ດຶງ​ດູດ​ນັກ​ທ່ອງ​ທ່ຽວ​ຂອງ​ນະ­ຄອນ­ຫຼວງ​ຮ່າ​ໂນ້ຍ​ນັ້ນ ລວມ​ມີ: ເພີ່ມ​ທະ­ວີ​ການ​ໂຄ­ສະ­ນາ​ຢ່າງ​ແຂງ­ແຮງ ໂດຍ​ນຳ​ໃຊ້​ເຄືອ​ຄ່າຍ​ໂທລະ­ພາບ ຊີ​ເອັນ​ເອັນ (CNN) ຂອງ​ສະ­ຫະ­ລັດ​ອາ​ເມ​ຣິ​ກາ ເນື້ອ​ໃນ​ການ​ໂຄ­ສະ­ນາ ກໍ​ມີ​ການ​ຄັດ​ເລືອກ​ຢ່າງ​ເໝາະ​ສົມ ເຊັ່ນ: ເນັ້ນ​ເນື້ອ​ໃນ​ຄຸນ­ຄ່າ​ທາງ​ວັດ­ທະ­ນະ­ທຳ ປະ­ຫວັດ­ສາດ ແລະ ວິ­ຖີ​ຊີ­ວິດ​ຂອງ​ຊາວ​ນະ­ຄອນ­ຫຼວງ ພະ​ແນກ​ທ່ອງ​ທ່ຽວ​ນະ­ຄອນ­ຫຼວງ​ຮ່າ​ໂນ້ຍ ຕັ້ງ­ໜ້າ​ຜັນ​ຂະ­ຫຍາຍ​ສັນ­ຍາ​ການ​ຮ່ວມ​ມື​ກັບ​ບໍ­ລິ­ສັດ​ການ­ບິນ​ຫວຽດ­ນາມ ຮ່ວມ​ມື​ກັບ​ບັນ­ດາ​ນັກ​ສຳ​ຫຼວດ​ຍີ່­ປຸ່ນ ອົດ​ສະ​ຕຣາ​ລີ ແລະ ຈາກ​ບັນ­ດາ​ປະ­ເທດ​ເອີ​ຣົບ ເພື່ອ​ສ້າງ​ລາຍ​ການ­ທ່ອງ­ທ່ຽວ “ລະ­ດູ​ໜາວ​ເອີ​ຣົບ” ນອກ­ຈາກ​ນັ້ນ ທາງ​ພະ​ແນກ​ກໍ​ຍັງ​ໄດ້​ຊຸກ­ຍູ້​ບັນ­ດາ​ຕົວ​ເມືອງ​ຢູ່​ເຂດ​ນະ­ຄອນ­ຫຼວງ ໃຫ້​ຜະ­ລິດ​ສິນ­ຄ້າ​ທ່ອງ​ທ່ຽວ ຕິດ​ພັນ​ກັບ​ຄວາມ​ສາ­ມາດ​ບົ່ມ​ຊ້ອນ​ດ້ານ​ການ­ທ່ອງ­ທ່ຽວ ເຊັ່ນ: ສະ­ຖານ­ທີ່ ທີ່​ເປັນ​ມໍ­ລະ­ດົກ ປະ­ເພ­ນີ ບຸນ​ປະ­ຈຳ​ບ້ານ ອາ­ຊີບ​ຂອງ​ຄົນ​ທ້ອງ­ຖິ່ນ ອາ­ຫານ​ທີ່​ເປັນ​ເອ­ກະ­ລັກ ວຽກ​ງານ​ກະ­ສິ­ກຳ ແລະ ການ­ທ່ອງ­ທ່ຽວ​ຊຸມ​ຊົນ.

    ທີ່ ກຳ­ປູ­ເຈຍ: ໃນ​ທີ່​ສຸດ​ຮ່າງ​ກົດ­ໝາຍ​ວ່າ​ດ້ວຍ​ແຫຼ່ງ​ນ້ຳ­ມັນ​ເຊື້ອ​ໄຟ​ຂອງ​ກຳ­ປູ­ເຈຍ ທີ່​ລິ​ເລີ່ມ​ຮ່າງ​ມາ​ແຕ່​ປີ 1996 ກໍ​ໄດ້​ຖືກ​ຮັບ­ຮອງ​ເອົາ​ຢູ່​ກອງ​ປະ­ຊຸມ​ສະ­ພາ​ກຳ­ປູ­ເຈຍ ໃນ​ກາງ​ເດືອນ​ມິ­ຖຸ­ນາ​ປີ​ນີ້ ກົດ­ໝາຍ​ທີ່​ປະ­ກອບ​ດ້ວຍ 9 ໝວດ 72 ມາດ­ຕາ ມີ­ໜ້າ​ທີ່​ຊຸກ­ຍູ້​ສົ່ງ­ເສີມ​ການ​ຂຸດ​ຄົ້ນ ແລະ ພັດ­ທະ­ນາ​ແຫຼ່ງ​ນ້ຳ­ມັນ​ເຊື້ອ​ໄຟ​ແບບ​ຍືນ​ຍົງ ແລະ ມີ​ປະ­ສິດ­ທິ­ພາບ ຄາດ​ວ່າ​ກົດ­ໝາຍ ຈະ​ເປັນ​ແມ່​ແຮງ​ດຶງ​ດູດ​ການ​ລົງ­ທຶນ​ໃນ​ຂະ­ແໜງ​ນ້ຳ­ມັນ​ເຊື້ອ​ໄຟ​ໄດ້​ຫຼາຍ​ຂຶ້ນ ເພື່ອ​ທົດ​ແທນ​ສະ­ພາບ​ອີງ​ອາ­ໄສ​ການ​ນຳ​ເຂົ້າ​ນ້ຳ­ມັນ​ເຊື້ອ​ໄຟ​ຈາກ​ຕ່າງ­ປະ­ເທດ ເຊິ່ງ​ມີ​ເຖິງ 2,5 ລ້ານ​ໂຕນ​ຕໍ່​ປີ.

ຂ່າວທີ່ກ່ຽວຂ້ອງ