ເປີດໂຄງການຄູ່ຮ່ວມງານ ເພື່ອຕ້ານອາຊະຍາກຳສັດປ່າຢູ່ລາວ

263 16 ກ.ລ. 2019 ຂ່າວໜ້າ​ໜຶ່ງ

    ໃນ​ໂອ­ກາດ​ວັນ​ອະ­ນຸ​ຮັກ​ສັດ​ນ້ຳ-ສັດ­ປ່າ​ແຫ່ງ​ຊາດ (13 ກໍ­ລະ­ກົດ) ອົງ­ການ​ອະ­ນຸ​ຮັກ​ສັດ­ປ່າ (WCS) ໄດ້​ຮ່ວມ​ກັບ​ກອງ​ທຶນ​ອະ­ນຸ​ຮັກ​ສັດ­ປ່າ (LCTW) ເປີດ​ໂຄງ­ການ​ຄູ່​ຮ່ວມ​ງານ​ເພື່ອ​ຕ້ານ​ອາ​ຊະ​ຍາ​ກຳ​ສັດ­ປ່າ ຢູ່​ສວນ­ສັດ​ບ້ານ​ເກິນ ເມືອງ​ທຸ­ລະ­ຄົມ ແຂວງ​ວຽງ​ຈັນ ມີ​ທ່ານ​ນາງ ມະ­ໂນ​ລີ ສີ​ສະ­ຫວັນ ຮອງ​ຜູ້­ອຳ­ນວຍ­ການ​ອົງ­ການ​ອະ­ນຸ​ຮັກ​ສັດ­ປ່າ ປະ­ຈຳ​ລາວ ທ່ານ ຄຳ​ຜຸຍ ເທບ​ວົງ­ສາ ຫົວ­ໜ້າ​ພະ​ແນກ​ກວດ­ກາ​ສັດ​ນ້ຳ-ສັດ­ປ່າ ກົມ​ກວດ­ກາ​ປ່າ­ໄມ້ ພ້ອມ​ຜູ້­ຕາງ­ໜ້າ​ຈາກ​ສະ­ຫະ­ພາບ​ເອີ​ຣົບ ປະ­ຈຳ​ລາວ ສະ­ຖານ­ທູດ​ເຢຍ​ລະ​ມັນ ອົງ­ການ​ສະ­ຫະ​ປະ­ຊາ​ຊາດ ເພື່ອ​ການ​ພັດ­ທະ­ນາ ປະ­ຈຳ​ລາວ ຫ້ອງ­ການ ສປຊ ຕ້ານ​ຢາ​ເສບ​ຕິດ ແລະ ອາ​ຊະ​ຍາ​ກຳ ແລະ ອົງ­ການ WWF ເຂົ້າ​ຮ່ວມ.

    ທ່ານ​ນາງ ມະ­ໂນ​ລີ ສີ​ສະ­ຫວັນ ກ່າວ​ວ່າ: ໂຄງ­ການ​ຄູ່​ຮ່ວມ​ງານ​ເພື່ອ​ຕ້ານ​ອາ​ຊະ​ຍາ​ກຳ​ສັດ­ປ່າ​ນີ້ ມີ​ກຳ­ນົດ​ເວ­ລາ 4 ປີ ເລີ່ມ​ປີ 2019 ເປັນ­ຕົ້ນ​ໄປ ໂດຍ​ການ​ຮ່ວມ​ມື​ກັບ​ສູນ​ການ​ອະ­ນຸ​ຮັກ​ສັດ­ປ່າ​ສວນ­ສັດ​ບ້ານ​ເກິນ ເຊິ່ງ​ເປັນ​ອົງ​ການ­ຈັດ­ຕັ້ງ​ສາ­ກົນ​ທີ່​ບໍ່​ຫາ​ຜົນ​ກຳ­ໄລ ໂດຍ​ຈະ​ເຮັດ​ວຽກ​ຮ່ວມ​ກັບ​ອົງ­ການ​ອະ­ນຸ​ຮັກ​ສັດ­ປ່າ ເພື່ອ​ຈັດ​ຕັ້ງ​ໂຄງ­ການ​ນີ້​ຢູ່​ລາວ ໂຄງ­ການ​ນີ້​ໄດ້​ຈັດ​ຕັ້ງ​ຮ່ວມ​ກັນ 7 ປະ­ເທດ ຄື: ຈີນ ມາ​ເລ​ເຊຍ ແລະ ປະ­ເທດ​ລຸ່ມ​ແມ່­ນ້ຳ​ຂອງ ກຳ­ປູ­ເຈຍ ມຽນ​ມາ ລາວ ຫວຽດ­ນາມ ແລະ ໄທ ເຊິ່ງ​ວຽກ​ງານ​ຫຼັກ​ຂອງ​ໂຄງ­ການ​ເສີມ​ສ້າງ​ຄວາມ​ອາດ​ສາ­ມາດ ຂອງ​ການ​ເປັນ​ອົງ​ການ­ຈັດ­ຕັ້ງ​ທີ່​ບໍ່​ຫວັງ​ຜົນ​ກຳ­ໄລ​ຢູ່​ໃນ​ລາວ ໃຫ້​ມີ​ການ​ຮ່ວມ​ມື​ກັນ ແລະ ຊຸກ­ຍູ້​ຊ່ວຍ­ເຫຼືອ​ກິດ­ຈະ­ກຳ​ຂອງ​ລັດ­ຖະ­ບານ ໃນ​ການ​ຕ້ານ​ການ​ຄ້າ­ຂາຍ​ສັດ­ປ່າ​ຢູ່​ລາວ ໂດຍ​ການ​ສ້າງ​ຄວາມ​ເຂັ້ມ­ແຂງ​ໃຫ້​ແກ່​ລັດ­ຖະ­ບານ ເພື່ອ​ບັງ­ຄັບ​ໃຊ້​ກົດ­ໝາຍ​ສັດ​ນ້ຳ-ສັດ­ປ່າ ນອກ​ນີ້ ຍັງ​ຈະ​ຊຸກ­ຍູ້​ການ​ພົວ­ພັນ​ຮ່ວມ​ມື​ລະ­ຫວ່າງ​ປະ­ເທດ ທີ່­ຢູ່​ພາກ​ພື້ນ​ຂອງ​ໂຄງ­ການ​ໃຫ້​ເຈົ້າ​ໜ້າ­ທີ່​ແຕ່​ລະ​ປະ­ເທດ ເຂົ້າ​ມາ​ເຮັດ​ວຽກ​ຮ່ວມ​ກັນ ເພື່ອ​ຕ້ານ ແລະ ສະ­ກັດ​ກັ້ນ​ບັນ­ຫາ​ດັ່ງ­ກ່າວ​ນີ້.

    ປີ 2018 ນາ­ຍົກ​ລະ­ຖະ​ມົນ­ຕີ​ລາວ ໄດ້​ອອກ​ຄຳ​ສັ່ງ​ວ່າ​ດ້ວຍ​ການ​ເພີ່ມ​ທະ­ວີ​ຄວາມ​ເຂັ້ມ​ງວດ​ໃນ​ການ​ຄຸ້ມ​ຄອງ ແລະ ກວດ­ກາ​ສັດ­ປ່າ ແລະ ພືດ​ປ່າ​ປະ­ເພດ​ຫວງ​ຫ້າມ ແລະ ສາຍ​ພັນ​ສັດ­ປ່າ ແລະ ພືດ​ປ່າ​ທີ່­ຢູ່​ໃນ​ບັນ­ຊີ​ສົນ­ທິ­ສັນ­ຍາ​ສາ­ກົນ CITES ຢູ່​ລາວ ແລະ ການ­ຈັດ­ຕັ້ງ​ປະ­ຕິ­ບັດ​ສົນ­ທິ­ສັນ­ຍາ​ສາ­ກົນ CITES ສັດ­ປ່າ​ບາງ​ສາຍ​ພັນ​ທີ່​ຖືກ​ຄ້າ­ຂາຍ​ຢູ່​ໃນ​ລາວ ຢ່າງ​ເປັນ​ປະ­ຈຳ ເຊັ່ນ: ຊ້າງ ເສືອ ລິ່ນ ແລະ ເຕົ່າ​ນ້ຳ​ຈືດ ກໍ​ຢູ່​ໃນ​ບັນ­ຊີ ແລະ ຫວງ​ຫ້າມ ພາຍ​ໃຕ້​ກົດ­ໝາຍ​ຂອງ​ລາວ ພ້ອມ​ກັນ​ນີ້ ລັດ­ຖະ­ບານ​ລາວ ຍັງ​ໄດ້​ເຜີຍ­ແຜ່​ກົດ­ໝາຍ​ອາ­ຍາ​ພ້ອມ​ຂະ­ຫຍາຍ​ເວ­ລາ ແລະ ເຂັ້ມ​ງວດ​ການ​ລົງ­ໂທດ​ຕໍ່​ການ​ກະ­ທຳ​ຜິດ ແລະ ອາ​ຊະ​ຍາ​ກຳ​ທີ່​ກ່ຽວ­ຂ້ອງ​ກັບ​ສັດ­ປ່າ.

ຂ່າວທີ່ກ່ຽວຂ້ອງ