ນັກກີລາຍົກນ້ຳໜັກຄົນພິການລາວ ເຂົ້າຮ່ວມແຂ່ງຂັນ ຊີງແຊັມໂລກ 2019

732 17 ກ.ລ. 2019 ວົງຈອນກີລາ
ນັກກີລາຍົກນ້ຳໜັກຄົນພິການລາວ ເຂົ້າຮ່ວມແຂ່ງຂັນ ຊີງແຊັມໂລກ 2019

    ທ້າວ ເປ້ຍ ເຫຼົາ​ພັກ­ດີ ເຈົ້າ​ຂອງ​ຫຼຽນ​ຄຳ​ປະ­ຫວັດ­ສາດ ກີ­ລາ​ຍົກ​ນ້ຳ­ໜັກ​ຄົນ​ພິ­ການ ງານ​ມະ​ຫະ​ກຳ​ກີ­ລາ​ເອ​ຊຽນ​ພາ​ຣາ​ເກມ 2018 ຮຸ່ນ​ນ້ຳ­ໜັກ 49 ກິ​ໂລ ແລະ ນາງ ລັດ­ສະ­ໝີ ສີ​ປະ­ເສີດ ນັກ­ກີ­ລາ​ດາວ​ຮຸ່ງ ຍົກ​ນ້ຳ­ໜັກ​ຍິງ​ທີມ​ຊາດ​ລາວ ຮຸ່ນ​ນ້ຳ­ໜັກ 41 ກິ​ໂລ ອອກ​ເດີນ­ທາງ​ແລ້ວ ໃນ​ວັນ​ທີ 10 ກໍ­ລະ­ກົດ 2019 ທີ່​ສະ­ໜາມ​ບິນ​ສາ­ກົນ​ວັດ​ໄຕ ເພື່ອ​ເຂົ້າ​ຮ່ວມ​ແຂ່ງ­ຂັນ​ກີ­ລາ​ຍົກ​ນ້ຳ­ໜັກ​ຄົນ​ພິ­ການ ຊີງ​ແຊັມ​ໂລກ ປະ­ຈຳ​ປີ 2019 ທີ່​ປະ­ເທດ​ກາ​ຊັກ​ສະ­ຖານ ເປັນ​ເຈົ້າ­ພາບ ລະ­ຫວ່າງ​ວັນ​ທີ 12-21 ກໍ­ລະ­ກົດ 2019.

    ທ້າວ ເປ້ຍ ເຫຼົາ​ພັກ­ດີ ໄດ້​ໃຫ້​ສຳ­ພາດ​ຕໍ່​ສື່​ມວນ​ຊົນ​ກ່ອນ​ເດີນ­ທາງ ວ່າ: ປັດ­ຈຸ­ບັນ​ຖື​ວ່າ​ມີ​ຄວາມ​ພ້ອມ​ເປັນ​ຢ່າງ​ດີ ເພາະ​ໄດ້​ເຝິກ­ຊ້ອມ​ເປັນ​ປະ­ຈຳ ແລະ ໄດ້​ມີ​ການ​ເອົາ­ໃຈ­ໃສ່​ຢ່າງ​ຈິງ​ຈັງ​ຂອງ​ຄະ­ນະ​ຄູ​ເຝິກ ແລະ ການ​ນຳ ເຊິ່ງ​ການ​ເຝິກ­ຊ້ອມ​ໃນ ສປປ ລາວ ຖື​ວ່າ​ດີ​ຂຶ້ນ​ຫຼາຍ ແລະ ມີ​ໂອ­ກາດ​ສ້າງ​ສະ­ຖິ­ຕິ​ໃໝ່​ຂອງ​ຕົວ​ເອງ​ໄດ້ ທີ່​ເຄີຍ​ເຮັດ​ໄດ້ 133 ກິ​ໂລ ໃນ​ງານ​ມະ​ຫະ​ກຳ​ກີ­ລາ​ເອ​ຊຽນ​ພາ​ຣາ​ເກມ ຄັ້ງ​ທີ XII ປີ 2019 ແຕ່​ຢ່າງ­ໃດ​ກໍ​ຕາມ ການ​ແຂ່ງ­ຂັນ​ຊີງ​ແຊັມ​ໂລກ ແນ່­ນອນ​ຕ້ອງ​ມີ​ນັກ­ກີ­ລາ​ເກັ່ງໆ​ເຂົ້າ​ຮ່ວມ​ແຂ່ງ­ຂັນ​ກັນ​ຢ່າງ​ຫຼວງ­ຫຼາຍ ສະ­ນັ້ນ ເຮົາ​ຕ້ອງ​ກຽມ​ຄວາມ​ໃຫ້​ດີ ບໍ່​ໃຈ­ຮ້ອນ ແລະ ຕ້ອງ​ຫຼິ້ນ​ຕາມ ແຜນ­ທີ່​ຄູ​ຝຶກ​ວາງ​ໄວ້ ເພື່ອ​ເຮັດ​ແນວ­ໃດ​ສ້າງ​ຜົນ­ງານ​ໃຫ້​ອອກ​ມາ​ດີ​ທີ່​ສຸດ.

    ສຳ­ລັບ​ການ​ເຂົ້າ​ຮ່ວມ​ແຂ່ງ­ຂັນ​ລາຍ­ການ​ຊີງ​ແຊັມ​ໂລກ 2019 ຖື​ວ່າ​ມີ​ຄວາມ​ສຳ­ຄັນ​ໃນ​ການ​ຍົກ​ລະ­ດັບ​ຄວາມ​ສາ­ມາດ ແລະ ເກັບ​ກ່ຽວ​ປະ­ສົບ​ການ​ຂອງ​ນັກ­ກີ­ລາ​ທັງ 2 ຄົນ ເພື່ອ​ກຽມ​ຄວາມ​ພ້ອມ​ຢ່າງ­ຮອບ­ດ້ານ​ທັງ​ດ້ານ​ຮ່າງ­ກາຍ ແລະ ຈິດ­ໃຈ ກ່ອນ​ເດີນ­ທາງ​ເຂົ້າ​ຮ່ວມ​ງານ​ມະ​ຫະ​ກຳ​ກິ­ລາ​ອາ​ຊຽນ​ພາ​ຣາ​ເກມ ຄັ້ງ​ທີ X ທີ່​ປະ­ເທດ​ຟີ​ລິບ​ປິນ ເປັນ​ເຈົ້າ­ພາບ ລະ­ຫວ່າງ​ວັນ​ທີ 18-25 ມັງ­ກອນ 2020 ແລະ ງານ​ມະ​ຫະ​ກຳ​ກີ­ລາ​ພາ​ຣາ​ແລມ​ປິກ​ເກມ ທີ່​ປະ­ເທດ​ຍີ່­ປຸ່ນ ເປັນ​ເຈົ້າ­ພາບ ລະ­ຫວ່າງ​ວັນ​ທີ 25 ສິງ­ຫາ ຫາ 6 ກັນ­ຍາ 2020.

ຂ່າວທີ່ກ່ຽວຂ້ອງ