ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 17-07-2019

179 17 ກ.ລ. 2019 ຫົວຂໍ້ຂ່າວອື່ນໆ

    3 ເລື່ອງ​ໃນ​ຄໍ​ລຳ​ປະ­ຈຳ​ວັນ​ນີ້ ປະ­ກອບ​ດ້ວຍ​ຂ່າວ​ທາງ​ການ​ກຳ­ປູ­ເຈຍ​ຈັບ​ກຸມ​ຜູ້​ເຂົ້າ​ເມືອງ​ຢ່າງ​ຜິດ​ກົດ­ໝາຍ ເລື່ອງ​ນິວ​ຊີ​ແລນ​ປະ­ກາດ​ຫ້າມ​ໃຊ້​ຖົງ​ຢາງ ແລະ ເລື່ອງ​ຣັດ​ເຊຍ ລົງ­ໂທດ​ຜູ້​ຈັບ​ນັກ​ຂ່າວ.

    ທີ່ ກຳ­ປູ­ເຈຍ: ຂ່າວ​ຈາກ​ກຳ­ປູ­ເຈຍ​ໃນ​ກາງ​ເດືອນ​ມິ­ຖຸ­ນາ​ປີ​ນີ້ ໃຫ້​ຮູ້​ວ່າ: ເຈົ້າ​ໜ້າ­ທີ່​ຕຳ­ຫຼວດ​ໄດ້​ຈັບ   ກຸມ​ຄົນ​ຈີນ ຈຳ­ນວນ 28 ຄົນ ໃນ​ຖານ​ເຂົ້າ​ປະ­ເທດ​ເພື່ອ​ເຮັດ​ວຽກ​ແບບ​ຜິດ​ກົດ­ໝາຍ ໃນ​ຈຳ­ນວນ 28 ຄົນ​ທີ່​ຖືກ​ຈັບ​ກຸມ​ນັ້ນ ບາງ​ຄົນ​ກໍ​ມີ​ໜັງ­ສື­ຜ່ານ­ແດນ ແຕ່​ບໍ່​ມີ​ເອ­ກະ­ສານ​ອະ­ນຸ­ຍາດ​ອອກ­ແຮງ​ງານ ສ່ວນ​ອີກ​ຈຳ­ນວນ​ໜຶ່ງ​ນັ້ນ​ບໍ່​ມີ​ເອ­ກະ­ສານ​ຕິດ​ມື​ເລີຍ.

    ຂ່າວ​ບອກ​ວ່າ: ໜັງ­ສື­ຜ່ານ­ແດນ​ທີ່​ບາງ​ຄົນ​ມີ​ນັ້ນ ທາງ​ເຈົ້າ​ໜ້າ­ທີ່​ຕ້ອງ​ໄດ້​ກວດ­ເບິ່ງ​ຄວາມ​ຖືກ­ຕ້ອງ​ຄັກ­ແນ່​ຕື່ມ ທ່ານ ອຸກ​ໄຮ ເສ­ລາ ຫົວ­ໜ້າ​ກົມ​ສອບ​ສວນ ກະ­ຊວງ​ພາຍ​ໃນ​ກຳ­ປູ­ເຈຍ ໄດ້​ກ່າວ​ກ່ຽວ​ກັບ​ຄະ­ດີ​ນີ້​ວ່າ: “ຖ້າ​ພວກ​ເຂົາ (ຊາວ​ຈີນ) ເຂົ້າ​ປະ­ເທດ​ຢ່າງ​ຖືກ­ຕ້ອງ​ຕາມ​ກົດ­ໝາຍ ພວກ​ເຮົາ​ກໍ​ຈະ​ອະ­ນຸ­ຍາດ​ໃຫ້​ພວກ​ເຂົາ​ຢູ່​ຕໍ່ ແຕ່​ຖ້າ​ພວກ​ເຂົາ​ບໍ່​ມີ​ໃບ​ອະ­ນຸ­ຍາດ​ອອກ­ແຮງ​ງານ ທາງ​ການ​ກໍ​ຈະ​ປະ­ຕິ­ບັດ​ຕາມ​ຫຼັກ­ການ ເພື່ອ​ໃຫ້​ພວກ​ເຂົາ­ເຈົ້າ (ທີ່​ມີ​ໜັງ­ສື­ຜ່ານ­ແດນ) ປະ­ຕິ­ບັດ​ຕາມ​ເງື່ອນ­ໄຂ​ທຸກ​ຢ່າງ​ທີ່​ສອດ­ຄ່ອງ​ກັບ​ກົດ­ໝາຍ​ຂອງ​ພວກ​ເຮົາ ສຳ­ລັບ​ພວກ​ບໍ່​ມີ​ເອ­ກະ­ສານ​ຫຍັງ​ຈັກ​ດີ້​ນັ້ນ ທາງ​ການ​ຈະ​ພົວ­ພັນ​ກັບ​ສະ­ຖານ­ທູດ ສປ ຈີນ ເພື່ອ​ເນ­ລະ­ເທດ​ພວກ​ເຂົາ​ກັບ​ຄືນ​ປະ­ເທດ ການ​ຈັບ​ກຸມ​ຊາວ​ຈີນ​ທັງ 28 ຄົນ ມີ​ຂຶ້ນ​ໃນ​ບັ້ນ​ກວດ­ກາ​ສະ­ຖານ­ທີ່​ກໍ່­ສ້າງ​ຕາມ​ຖະ­ໜົນ ເລກ​ທີ 100 ເຂດ​ວັດ​ພະ­ນົມ ນະ­ຄອນ­ຫຼວງ​ພະ­ນົມ​ເປັນ ໃນ​ວັນ​ທີ 12 ມິ­ຖຸ­ນາ ຜ່ານ​ມາ.

    ທີ່ ນິວ​ຊີ​ແລນ (ນູ​ແວນ​ເຊ​ລັງ): ໃນ​ທີ່​ສຸດ​ທາງ​ການ​ນິວ​ຊີ​ແລນ​ກໍ​ໄດ້​ເອົາ​ວັນ​ທີ 1 ກໍ­ລະ­ກົດ​ປີ​ນີ້ ເປັນ​ມື້​ປະ­ກາດ​ຜະ­ເດັດ​ເສິກ​ກັບ​ຖົງ​ຢາງ​ຊະ­ນິດ​ໃຊ້​ເທື່ອ​ດຽວ​ແລ້ວ​ຖິ້ມ​ໃນ​ຮູບ​ການ​ສັ່ງ​ຫ້າມ ເຊິ່ງ​ຜູ້​ລະ­ເມີດ​ຈະ​ມີ​ໂທດ​ຖືກ​ປັບ​ໃໝ​ສູງ​ສຸດ 1 ແສນ​ໂດ​ລາ​ນິວ​ຊີ​ແລນ (1 ໂດ​ລາ​ສະ­ຫະ­ລັດ ແລກ​ໄດ້ 1,25 ໂດ​ລາ​ນິວ​ຊີ​ແລນ).

    “ປະ­ເທດ​ນິວ​ຊີ​ແລນ​ເປັນ​ປະ­ເທດ​ສະ­ອາດ ແລະ ເປັນ​ມິດ​ກັບ​ສິ່ງ­ແວ­ດລ້ອມ ເຊິ່ງ​ນີ້​ລະ​ຄື​ຄວາມ​ພູມ­ໃຈ​ຂອງ​ຊາວ​ນິວ​ຊີ​ແລນ​ທັງ​ປວງ”  ນີ້​ຄື​ຄຳ​ເຫັນ​ຂອງ​ທ່ານ ຢູ່​ຈີ​ນີ້​ເຊນ ລັດ­ຖະ­ມົນ­ຕີ​ກະ­ຊວງ​ສິ່ງ­ແວ­ດລ້ອມ​ນິວ​ຊີ​ແລນ ແນ່­ນອນ​ການ​ສັ່ງ​ຫ້າມ​ໃຊ້​ຖົງ​ຢາງ​ຊະ­ນິດ​ດັ່ງ­ກ່າວ​ແມ່ນ​ເພື່ອ​ປົກ​ປັກ​ຮັກ­ສາ​ສິ່ງ​ທີ່​ເປັນ­ຄວາມ​ພາກ­ພູມ​ໃຈ​ຂອງ​ຄົນ​ໃນ​ປະ­ເທດ​ນີ້.

    ທີ່ ຣັດ​ເຊຍ: ໃນ​ວັນ​ທີ 6 ມິ­ຖຸ­ນາ​ປີ​ນີ້ ມີ​ຂ່າວ​ເດັ່ນ​ດັງ​ຈາກ​ສະ­ຫະ­ພັນ​ຣັດ​ເຊຍ ກ່ຽວ​ກັບ​ການ​ຈັບ​ກຸມ​ທ່ານ ອີ​ວານ​ໂກ​ລູ​ນອບ ນັກ​ຂ່າວ​ທີ່​ເຈາະ​ເລິກ​ກ່ຽວ​ກັບ​ການ​ສືບ­ສວນ​ສອບ​ສວນ​ດ້ານ​ການ​ສໍ້​ລາດ​ບັງ​ຫຼວງ ນັກ​ຂ່າວ​ທ່ານ​ນີ້​ຖືກ​ຈັບ​ໃນ​ຄະ­ດີ “ຄອບ​ຄອງ ແລະ ຄ້າ­ຂາຍ​ຢາ​ເສບ​ຕິດ” ແຕ່​ຜູ້­ກ່ຽວ​ປະ­ຕິ­ເສດ​ເປັນ​ຟືນ​ເປັນ​ໄຟ ໃນ​ທີ່​ສຸດ​ຄຳ​ປະ­ຕິ­ເສດ​ຂອງ​ເຂົາ​ກໍ​ຖືກ​ຄົ້ນ­ຄວ້າ​ທົບ​ທວນ ແລະ ພົບ​ວ່າ​ເຂົາ​ເປັນ​ຄົນ​ບໍ­ລິ­ສຸດ​ແທ້ ສ່ວນ​ການ​ກ່າວ​ຫາ​ເຂົາ​ທັງ​ໝົດ​ນັ້ນ​ເປັນ​ພຽງ​ສາກ​ລະ­ຄອນ​ທີ່​ສ້າງ​ຂຶ້ນ​ເປັນ​ຂໍ້​ອ້າງ​ຊື່ໆ ຍ້ອນ​ແນວ​ນີ້​ເອງ​ເຂົາ​ຈຶ່ງ​ຖືກ​ປ່ອຍ​ຕົວ​ເປັນ​ອິດ­ສະ­ຫຼະ ສ່ວນ​ນາຍ​ຕຳ­ຫຼວດ​ຍົດ​ນາຍ​ພົນ​ຈັດ­ຕະ­ວາ​ສອງ​ຄົນ​ທີ່​ພົວ­ພັນ​ກັບ​ການ​ຈັບ​ກຸມ​ທ່ານ ອີ​ວານ​ໂກ​ລູ​ນອບ ນັ້ນ​ຕ້ອງ​ໄດ້​ຮັບ​ກຳ​ຢ່າງ​ສາ​ສົມ ຄື: ຖືກ​ຂັບ​ໄລ່​ອອກ​ຈາກ​ໜ້າ­ທີ່​ຕຳ­ແໜ່ງ​ຢ່າງ​ອັດ­ຕະ­ໂນ­ມັດ.

ຂ່າວທີ່ກ່ຽວຂ້ອງ