ຂ່າວຫຼ້າສຸດ

ຕັນຫາບໍ່ມີເມືອງພໍ

1.792 17 ກ.ລ. 2019 ນານາສາລະ

    ສອງ​ສັນ­ຍານ​ອັນ­ຕະ­ລາຍ​ທີ່​ສັງ­ຄົມ​ຕ່າງ​ກໍ​ຮູ້​ຢູ່​ແກ່​ໃຈ ນັ້ນ​ຄື: ບັນ­ຫາ​ທີ່​ດິນ ຫຼື ການ​ຍາດ​ແຍ່ງ​ຊັບ​ສິນ​ລະ­ຫວ່າງ​ຄູ່​ກໍ­ລະ­ນີ ແລະ ຄະ­ດີ​ຢ່າ​ຮ້າງ​ມີ​ທ່າ​ອ່ຽງ​ຫຼາຍ​ກວ່າ​ຄະ­ດີ​ໃນ​ສານ ເຊິ່ງ​ທັງ​ສອງ​ສັນ­ຍານ​ຍ່ອມ​ເກີດ​ຈາກ​ປັດ​ໄຈ​ພາຍ​ໃນ ແລະ ພາຍ​ນອກ​ມາ​ກະ­ຕຸກ​ປຸກ​ປັ້ນ​ອາ­ລົມ ແລະ ຄວາມ​ຢາກ​ທີ່​ມີ​ໃນ​ຫົວ­ໃຈ​ຢູ່​ແລ້ວ​ຈົນ​ກາຍ​ເປັນ­ຄວາມ​ໂລບ ຕາມ​ທີ່​ຜູ້​ຂຽນ ແລະ ທ່ານ​ຜູ້​ອ່ານ​ທົ່ວ​ສັງ­ຄົມ​ຄົງ​ຈະ​ຮັບ​ຮູ້​ແລ້ວ​ວ່າ ບ້ານ​ເຮົາ​ສ້າງ​ລັດ​ແຫ່ງ​ກົດ­ໝາຍ ຄື: ການ​ຄຸ້ມ​ຄອງ​ສັງ­ຄົມ​ດ້ວຍ​ກົດ­ໝາຍ ແຕ່​ຄົນ​ເຮົາ​ກໍ​ຍັງ​ລະ­ເມີດ​ລະ­ບຽບ​ກົດ­ໝາຍ...

    ການ​ລະ­ເມີດ​ລະ­ບຽບ​ກົດ­ໝາຍ​ນັ້ນ ຄົງ​ເກີດ​ມາ​ຈາກ​ຄວາມ​ຢາກ​ຂອງ​ຄົນ​ທີ່​ບໍ່​ມີ​ເມືອງ​ພໍ​ໃນ​ຫົວ­ໃຈ​ທີ່​ພຸດ​ທະ​ສາ­ສະ­ໜາ ເອີ້ນ​ວ່າ ຕັນ­ຫາ​ມີ 3 ປະ­ການ.

  1. ກາມ​ມະ​ຕັນ­ຫາ ຄື: ຄວາມ​ຢາກ​ໄຝ່​ສະ­ແຫວງ­ຫາ​ໃນ​ການ​ເສບ​ກາມ ຈົນ​ພາ­ໃຫ້​ຄົນ​ບໍ່​ຢ້ານ​ຜິດ​ສິນ​ທຳ ຫຼື ລະ­ເມີດ​ຮີດ­ຄອງ​ປະ­ເພ­ນີ ເຊິ່ງ​ນຳ​ມາ​ເປັນ​ຄະ­ດີ​ປະ​ຮ້າງ​ໃນ​ສານ ບາງ​ຄົນ​ອ້າງ​ເຫດ­ຜົນ​ເພື່ອ​ຄວາມ​ເທົ່າ​ທຽມ ຫຼື ຄວາມ​ສະ­ເໝີ­ພາບ... ເຫດ­ຜົນ​ຕ່າງໆ​ນາໆວ່າ​ກັນ​ໄປ ແຕ່​ຜົນ​ຮ້າຍ​ທີ່​ຕາມ​ມາ​ນັ້ນ ຄື​ຄວາມ​ສາ­ມັກ­ຄີ​ປອງ​ດອງ​ຂອງ​ຄອບ­ຄົວ ຫຼື ຄວາມ​ອົບ​ອຸ່ນ​ໃນ​ຫົວ­ອົກ​ຂອງ​ພະ­ຍານ​ຮັກ ! .
  2. ພາ­ວະ​ຕັນ­ຫາ​ຄື​ຄວາມ​ຢາກ​ມີ​ຢາກ​ໄດ້ ແລະ ຢາກ​ເປັນ ເຫັນ​ເຂົາ​ມີ​ກໍ​ຢາກ​ມີ ແລະ ຢາກ​ເປັນ​ຢາກ​ໄດ້​ຄື​ເຂົາ ແຕ່​ຫຼົງ​ລືມ​ໄປ​ວ່າ​ທີ່​ມາ​ຂອງ​ຄົນ​ຕ່າງ​ກັນ ຕົ້ນ​ທຶນ​ຊີ­ວິດ​ແຕ່­ລະ­ຄົນ​ຕ່າງ​ກັນ ຈົນ​ເຮັດ​ໃຫ້​ຄວາມ​ຢາກ​ດັ່ງ­ກ່າວ ກາຍ​ເປັນ­ຄວາມ​ໂລບ ຕ້ອງ​ໄດ້​ຄິດ​ຫາ​ວິ­ທີ​ໄຂວ່​ຄວ້າ​ສິ່ງ​ທີ່​ຕ້ອງ­ການ​ນັ້ນ​ມາ​ໃຫ້​ໄດ້ ເຊິ່ງ​ຫຼາຍ​ກໍ­ລະ­ນີ​ກໍ​ຜິດ​ລະ­ບຽບ ແລະ ກົດ­ໝາຍ ແຕ່​ຍອມ​ເຮັດ​ເພື່ອ​ໃຫ້​ໄດ້​ໜ້າ​ຕາ ແລະ ສັກ​ສີ​ທີ່​ໃສ່​ໜ້າ​ກາກ​ເຂົ້າ​ຫາ​ກັນ.
  3. ວິ­ພາ​ວະ​ຕັນ­ຫາ ຄື​ຄວາມ​ບໍ່​ຢາກ​ມີ ບໍ່​ຢາກ​ໄດ້ ແລະ ບໍ່​ຢາກ​ເປັນ​ຕັນ­ຫາ​ຂໍ້​ສຸດ​ທ້າຍ ຄື​ຄວາມ​ບໍ່​ຢາກ ໃຫ້​ມັນ​ເກີດ​ຂຶ້ນ​ກັບ​ຊີ­ວິດ ເຊັ່ນ ບໍ່​ຢາກ​ຍາກ­ຈົນ ບໍ່​ຢາກ​ເກີດ​ມາ​ໜ້າ​ຕາ​ຂີ້­ຮ້າຍ ຫຼື ອາ­ຍຸ​ຫຼາຍ​ຂຶ້ນ ບໍ່​ຢາກ​ຜົມ​ຂາວ ໜັງ​ຫ່ຽວ... ເຊິ່ງ​ຄວາມ​ບໍ່​ຢາກ​ດັ່ງ­ກ່າວ​ຈຶ່ງ​ພາ­ໃຫ້​ຄົນ​ເຮົາ​ສະ­ແຫວງ­ຫາ​ທາງ​ແກ້​ດ້ວຍ​ການ​ສັນ​ຍະ​ກຳ​ອະ​ໄວ​ຍະ​ວະ ຖ້າ​ຖືກ​ມີດ​ໝໍ​ດີ​ລາ­ຄາ​ແພງ​ກໍ​ສົມ​ຫວັງ​ໄປ ແຕ່​ບາງ​ກໍ­ລະ­ນີ​ໂຊກ​ຮ້າຍ ເສີມ​ດັງ​ເນົ່າ​ເປື່ອຍ​ເໝັນ ຄື​ດັ່ງ​ເປັນ​ຂ່າວ​ໃນ​ສື່​ສັງ­ຄົມ​ອອນ​ໄລ​ກໍ​ມີ​ຖົມ​ເຖ​ໄປ.

ສັງ​ລວມ​ໄດ້​ວ່າ: ສັນ­ຍານ​ອັນ­ຕະ­ລາຍ​ດັ່ງ­ກ່າວ​ນັ້ນ ນອກ­ຈາກ​ຈະ​ໃຊ້​ກົດ­ໝາຍ​ຄ້ຳ­ປະ­ກັນ​ແລ້ວ​ຍັງ​ບໍ່​ພຽງ­ພໍ ແຕ່​ຄວນ​ຈະ​ປູກ­ຝັງ​ຈິດ​ສຳ­ນຶກ​ປູກ­ຝັງ​ສິນ​ລະ​ທຳ​ໃສ່​ຫົວ­ໃຈ​ຄົນ​ໄປ​ພ້ອມໆ​ກັນ ເພາະ​ຖ້າ​ຄົນ​ເຮົາ​ເຊື່ອ​ວ່າ ພຶດ­ຕິ​ກຳ​ບໍ່​ດີ​ຈະ​ພາ­ໃຫ້​ລຳ­ບາກ ແລະ ຮັບ​ຜົນ​ຂອງ​ກຳ​ຊົ່ວ ມັນ​ກໍ​ຈະ​ມີ​ສ່ວນ​ຊ່ວຍ​ຫຼຸດ​ບັນ­ຫາ​ສັງ­ຄົມ​ໄດ້​ໃນ​ລະ­ດັບ​ໜຶ່ງ ແລະ ສ້າງ​ເອ­ກະ­ລັກ​ທາງ​ວັດ­ທະ­ນະ­ທຳ​ຂອງ​ຊາດ​ໃຫ້​ເຂັ້ມ­ແຂງ ເພື່ອ​ຕ້ານ­ທານ​ກັບ​ວັດ­ທະ­ນະ­ທຳ​ຈາກ​ພາຍ​ນອກ​ທີ່​ມີ​ທ່າ​ລົບ​ດີ​ກວ່າ​ປະ​ໄປ​ຕາມ​ກະ­ແສ.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ