ຂ່າວຫຼ້າສຸດ

ໃຫ້ຄວາມຮູ້ໃນການປ້ອງກັນ ພະຍາດຫ່ຽວເຫຼືອງຂອງກ້ວຍ

319 17 ກ.ລ. 2019 ຂ່າວໜ້າ​ໜຶ່ງ
ໃຫ້ຄວາມຮູ້ໃນການປ້ອງກັນ ພະຍາດຫ່ຽວເຫຼືອງຂອງກ້ວຍ

    ສູນ​ປ້ອງ​ກັນ​ພືດ​ສາ­ລະ​ຄຳ ກົມ​ປູກ­ຝັງ​ກະ­ຊວງ​ກະ­ສິ­ກຳ ແລະ ປ່າ­ໄມ້ ໄດ້​ຈັດ​ກອງ​ປະ­ຊຸມ​ວິ­ຊາ​ການ​ກ່ຽວ​ກັບ​ລາຍ​ງານ​ສະ­ພາບ​ການ​ລະ­ບາດ ການ​ປ້ອງ​ກັນ ແລະ ກຳ­ຈັດ​ພະ­ຍາດ​ຫ່ຽວ​ເຫຼືອງ​ກ້ວຍ ຂຶ້ນ​ວັນ​ທີ 11-12 ກໍ­ລະ­ກົດ 2019 ທີ່ ສຳ­ນັກ­ງານ​ປົກ­ຄອງ​ເມືອງ​ວັງ​ວຽງ ແຂວງ​ວຽງ​ຈັນ ເປັນ​ປະ­ທານ​ຂອງ​ທ່ານ ສິ​ຣິ​ພົນ ພິ​ທັກ​ສູນ ຫົວ­ໜ້າ​ສູນ​ປ້ອງ​ກັນ​ພືດ​ສາ­ລະ​ຄຳ ມີ​ຮອງ​ຫົວ­ໜ້າ​ພະ​ແນກ​ກະ­ສິ­ກຳ ແລະ ປ່າ­ໄມ້ ແຂວງ​ສາ­ລະ​ວັນ ຫົວ­ໜ້າ ແລະ ຮອງ​ຂະ­ແໜງ​ປູກ­ຝັງ​ຈາກ 12 ແຂວງ ທົ່ວ​ປະ­ເທດ ພ້ອມ​ດ້ວຍ​ພະ­ນັກ­ງານ​ວິ­ຊາ​ການ​ທີ່​ກ່ຽວ­ຂ້ອງ​ເຂົ້າ​ຮ່ວມ 34 ຄົນ ຍິງ 11 ຄົນ.

    ໃນ​ໄລ­ຍະ​ຜ່ານ​ມາ ການ​ປູກ​ກ້ວຍ​ຂອງ​ຊາວ​ກະ­ສິ­ກອນ​ໃນ​ຂອບ​ເຂດ​ທົ່ວ​ປະ­ເທດ​ແມ່ນ​ເປັນ​ຂະ​ບວນ​ຟົດ­ຟື້ນ ໂດຍ​ສະ ເພາະ ການ​ປູກ​ກ້ວຍ​ຫອມ​ຈີນ​ຢູ່​ແຂວງ​ພາກ​ເໜືອ ພາກ​ກາງ ແລະ ພາກ​ໃຕ້ ເພື່ອ​ສົ່ງ​ອອກ ລວມ​ເນື້ອ­ທີ່​ປູກ 19.375ເຮັກ­ຕາ ການ​ລົງ­ທຶນ ແລະ ຂະ­ຫຍາຍ​ພື້ນ​ທີ່​ການ​ຜະ­ລິດ ໄດ້​ເຮັດ​ໃຫ້​ມີ​ການ​ນຳ​ເຂົ້າ​ໜໍ່​ພັນ​ກ້ວຍ ແລະ ດິນ​ທີ່​ຕິດ​ມາ​ຈາກ​ໜໍ່​ພັນ ຈາກ ສປ ຈີນ ທີ່​ມີ​ການ​ລະ­ບາດ​ຂອງ​ພະ­ຍາດ​ຫ່ຽວ​ເຫຼືອງ​ຂອງ​ກ້ວຍ ພະ­ຍາດ​ຫ່ຽວ​ເຫຼືອງ​ກ້ວຍ ຫຼື TR4 ນີ້​ແມ່ນ​ມີ​ຜົນ​ກະ­ທົບ​ສູງ​ຕໍ່​ການ​ຜະ­ລິດ​ກ້ວຍ ພື້ນ​ທີ່​ທີ່​ມີ​ການ​ລະ­ບາດ ຕົ້ນ​ກ້ວຍ​ຈະ​ຫ່ຽວ​ເຫຼືອງ ແລະ ຢືນ​ຕົ້ນ​ຕາຍ​ໃນ​ທີ່​ສຸດ ສາ­ມາດ​ອາ­ໄສ​ໃນ​ດິນ​ໄດ້​ຫຼາຍ​ກວ່າ 30 ປີ ແລະ ມີ​ພືດ​ອາ­ໄສ​ຫຼາຍ​ຊະ­ນິດ ເຊັ່ນ: ກ້ວຍ​ຫອມ ກ້ວຍ​ເລັບ­ມື​ນາງ ກ້ວຍ­ນ້ຳ ໄມ້​ປະ­ດັບ ແລະ ຫຍ້າ​ຕ່າງໆ ການ​ກະ­ຈາຍ​ຂອງ​ເຊື້ອ​ແມ່ນ​ມີ​ຫຼາຍ​ທາງ ເຊັ່ນ: ໜໍ່​ພັນ​ທີ່​ນຳ​ມາ​ປູກ ດິນ ນ້ຳ ອຸ­ປະ­ກອນ ລວມ​ເຖິງ​ລະ­ບົບ​ການ​ຈັດ­ການ​ຟາມ ແລະ ອຶ່ນໆ ຈາກ​ຜົນ​ການ​ສຳ​ຫຼວດ​ຂອງ​ສູນ​ປ້ອງ​ກັນ​ພືດ​ໃນ 12 ແຂວງ​ທີ່​ມີ​ການ​ປູກ​ກ້ວຍ​ຫຼາຍ​ທີ່​ສຸດ​ໄດ້​ພົບ​ເຫັນ​ພະ­ຍາດ​ຫ່ຽວ​ເຫຼືອງ​ກ້ວຍ​ລະ­ບາດ​ໃນ​ຈຳ­ນວນ 7 ແຂວງ ໂດຍ​ໃນ​ປີ 2017 ພົບ​ການ​ລະ­ບາດ​ຢູ່​ແຂວງ​ບໍ່​ແກ້ວ ແລະ ແຂວງ​ຫຼວງ​ນ້ຳ​ທາ ມາ​ຮອດ​ປີ 2019 ກໍ​ມີ​ການ​ແຜ່​ໄປ​ສູ່​ພື້ນ​ທີ່​ອື່ນ ຄື: ແຂວງ​ໄຊ​ຍະ​ບູ​ລີ ຫຼວງ​ພະ​ບາງ ອຸ­ດົມ​ໄຊ ວຽງ​ຈັນ ແລະ ນະ­ຄອນ­ຫຼວງ​ວຽງ​ຈັນ ລວມ​ເປີ­ເຊັນ​ການ​ລະ­ບາດ​ທັງ​ໝົດ ທຽບ­ໃສ່​ຈຳ­ນວນ​ແຂວງ​ທີ່​ມີ​ການ​ປູກ​ກ້ວຍ​ທົ່ວ​ປະ­ເທດ ກວມ​ເອົາ 58,33% ເພື່ອ​ໃຫ້​ຫຼຸດ­ຜ່ອນ​ການ​ລະ­ບາດ​ຂອງ​ພະ­ຍາດ​ດັ່ງ­ກ່າວ​ໄປ​ສູ່​ແນວ​ພັນ​ກ້ວຍ​ພື້ນ­ເມືອງ ແລະ ພືດ​ອື່ນໆ ເລັ່ງ​ໃສ່​ການ​ຮັບ­ປະ­ກັນ​ຄວາມ​ໝັ້ນ­ຄົງ​ທາງ​ດ້ານ​ສະ­ບຽງ​ອາ­ຫານ ຄວາມ​ໝັ້ນ­ຄົງ​ທາງ​ດ້ານ​ຊີ­ວະ​ນາໆພັນ​ພືດ ແລະ ເພີ່ມ​ການ​ເຝົ້າ​ລະ­ວັງ​ການ­ລະ­ບາດ­ພະ­ຍາດ​ຫ່ຽວ​ເຫຼືອງ​ຂອງ​ກ້ວຍ​ໄປ​ສູ່​ເຂດ​ພື້ນ​ທີ່​ການ​ຜະ­ລິດ​ອື່ນໆ.

ຂ່າວທີ່ກ່ຽວຂ້ອງ