ຂ່າວຫຼ້າສຸດ

ວາງສີລາລຶກ ໂຄງການກໍ່ສ້າງພັດທະນາເຂດເສດຖະກິດ ວັງເຕົ່າ-ໂພນທອງ

319 17 ກ.ລ. 2019 ຂ່າວໜ້າ​ໜຶ່ງ
ວາງສີລາລຶກ ໂຄງການກໍ່ສ້າງພັດທະນາເຂດເສດຖະກິດ ວັງເຕົ່າ-ໂພນທອງ

    ພິ­ທີ​ວາງ​ສີ​ລາ​ລຶກ​ໂຄງ­ການ​ກໍ່­ສ້າງ​ພັດ­ທະ­ນາ​ເຂດ​ເສດ­ຖະ­ກິດ ວັງ​ເຕົ່າ-ໂພນ​ທອງ ເມືອງ​ໂພນ​ທອງ ແຂວງ​ຈຳ­ປາ​ສັກ ຈັດ​ຂຶ້ນ​ວັນ​ທີ 12 ກໍ­ລະ­ກົດ ຜ່ານ​ມາ​ນີ້ ໂດຍ​ມີ​ທ່ານ ຄຳ​ພັນ ພົມ​ມະ​ທັດ ຫົວ­ໜ້າ​ຫ້ອງ​ວ່າ­ການ​ສູນ​ກາງ​ພັກ ທ່ານ ບຸນ​ຖອງ ດີ​ວິ​ໄຊ ເຈົ້າ­ແຂວງ​ຈຳ­ປາ​ສັກ ທ່ານ ອຸ­ດອນ ແກ້ວ​ດວງ​ດີ ປະ­ທານ​ບໍ­ລິ­ສັດ​ດວງ​ດີ​ກໍ່­ສ້າງ​ຂົວ-ທາງ​ຈຳ­ກັດ​ຜູ້​ດຽວ ແລະ ເປັນ​ບໍ­ລິ­ສັດ​ຮ່ວມ​ທຶນ​ພັດ­ທະ­ນາ​ເຂດ​ເສດ­ຖະ­ກິດ ວັງ​ເຕົ່າ-ໂພນ​ທອງ ສາ­ກົນ​ຈຳ­ກັດ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ເຂດ​ເສດ­ຖະ­ກິດ ວັງ​ເຕົ່າ-ໂພນ​ທອງ ແມ່ນ 1 ໃນ 5 ເຂດ​ເສດ­ຖະ­ກິດ​ຢູ່​ແຂວງ​ຈຳ­ປາ​ສັກ ສ້າງ​ຂຶ້ນ​ປີ 2016 ມີ​ເນື້ອ­ທີ່ 253 ເຮັກ­ຕາ ມູນ​ຄ່າ​ການ​ລົງ­ທຶນ 250 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 2.180 ຕື້​ກີບ​ໂດຍ​ການ​ຮ່ວມ​ທຶນ​ຂອງ​ພາກ​ລັດ 30% ເອ­ກະ​ຊົນ 70% ອາ­ຍຸ​ສຳ​ປະ­ທານ 99 ປີ ເປົ້າ​ໝາຍ​ການ​ພັດ­ທະ­ນາ​ປະ­ກອບ​ມີ​ຮ້ານ​ຄ້າ​ປອດ​ພາ­ສີ ສູນ​ການ​ຄ້າ ແລະ ຕະ­ຫຼາດ​ຊາຍ​ແດນ ອະ­ສັງ­ຫາ­ລິ­ມະ​ຊັບ (ບ້ານ​ຈັດ​ສັນ ອາ ຄານ​ການ​ຄ້າ ແລະ ທີ່​ພັກ​ອາ­ໄສ) ທະ­ນາ­ຄານ-ສະ​ຖາ​ບັນ​ການ​ເງິນ ລະ­ບົບ​ການ­ທ່ອງ­ທ່ຽວ ແລະ ໂຮງ­ແຮມ ສູນ​ບໍ­ລິ­ການ​ສາງ​ພັກ​ສິນ­ຄ້າ ເຂດ​ການ​ຜະ­ລິດ​ເພື່ອ​ສົ່ງ​ອອກ ລະ­ບົບ​ພື້ນ­ຖານ​ໂຄງ​ລ່າງ (ບ່ອນ​ບຳ­ບັດ​ນ້ຳ​ເປື້ອນ ກຳ­ຈັດ​ສິ່ງ​ເສດ​ເຫຼືອ ໄຟ­ຟ້າ ນ້ຳ​ປະ­ປາ ແລະ ອື່ນໆ) ເຊິ່ງ​ຈະ​ໃຊ້​ເວ­ລາ​ກໍ່­ສ້າງ 15 ປີ ແບ່ງ​ເປັນ 3 ໄລ­ຍະ ໄລ ຍະ 1 ປີ 2016-2020 ກໍ່­ສ້າງ​ຮົ້ວ​ອ້ອມ ປະ­ຕູ­ໂຂງ ທາງ​ເຂົ້າ-ອອກ ສຳ​ຫຼວດ-ອອກ​ແບບ​ວາງ​ແຜນ-ຜັງ​ກໍ່ ສ້າງ​ພື້ນ­ຖານ​ໂຄງ​ລ່າງ ສາ​ທາ​ລະ​ນຸ​ປະ​ໂພກ ສູນ​ບໍ­ລິ­ການ ສູນ​ບໍ­ລິ­ການ​ລະ­ບົບ​ສາງ​ພັກ​ສິນ­ຄ້າ ສະ­ຖາ­ນີ​ຂົນ­ສົ່ງ​ໂດຍ­ສານ ບ່ອນ​ຈອດ​ລົດ ອາ­ຄານ​ການ​ຄ້າ ແລະ ຕະ­ຫຼາດ​ຊຸມ​ຊົນ ຮ້ານ​ຄ້າ​ປອດ​ພາ­ສີ ແລະ ສຳ­ນັກ­ງານ​ໂຄງ ການ ໄລ­ຍະ 2 ປີ 2021-2025 ສືບ­ຕໍ່​ກໍ່­ສ້າງ​ພື້ນ­ຖານ​ໂຄງ​ລ່າງ ແລະ ສາ​ທາ​ລະ​ນຸ​ປະ​ໂພກ ກໍ່­ສ້າງ ແລະ ນຳ​ໃຊ້​ສູນ​ອາ­ຫານ ແລະ ສູນ​ການ​ຄ້າ ອະ­ສັງ­ຫາ­ລິ­ມະ​ຊັບ ສູນ​ບໍ­ລິ­ການ​ນ້ຳ­ມັນ​ເຊື້ອ​ໄຟ ທະ­ນາ­ຄານ-ສະ​ຖາ​ບັນ​ການ​ເງິນ ກິດ­ຈະ­ການ​ດ້ານ​ການ­ທ່ອງ­ທ່ຽວ ສູນ​ປະ­ຊຸມ ແລະ ວາງ­ສະ­ແດງ ໄລ­ຍະ 3 ປີ 2026-2030 ປະ­ກອບ​ມີ​ເຂດ​ອຸດ­ສາ­ຫະ­ກຳ​ເບົາ​ເພື່ອ​ສົ່ງ​ອອກ (ອຸດ­ສາ­ຫະ­ກຳ​ປຸງ​ແຕ່ງ ໂຮງ­ງານ​ປະ­ກອບ​ເຄື່ອງ​ເອ​ເລັກ​ໂຕຣ​ນິກ ແລະ ເຕັກ​ໂນ​ໂລ​ຊີ).

    ພາຍ­ຫຼັງ​ໂຄງ­ການ​ນີ້​ສຳ­ເລັດ ລັດ­ຖະ­ບານ​ຈະ​ໄດ້​ຮັບ​ຜົນ​ປະ­ໂຫຍດ​ຈາກ​ການ​ສຳ​ປະ­ທານ​ເນື້ອ­ທີ່​ດິນ​ຂອງ​ຜູ້​ພັດ­ທະ­ນາ ມີ​ລາຍ​ຮັບ​ອາ­ກອນ​ລາຍ​ໄດ້ ອາ­ກອນ​ກຳ­ໄລ​ຈາກ​ຜູ້​ປະ­ກອບ​ການ​ທີ່​ມາ​ລົງ­ທຶນ​ຢູ່​ເຂດ​ດັ່ງ­ກ່າວ ສ້າງ​ວຽກ​ເຮັດ​ງານ​ທຳ​ໃຫ້​ປະ­ຊາ­ຊົນ​ບັນ­ດາ­ເຜົ່າ ແລະ ເປັນ​ເຂດ​ເສດ­ຖະ­ກິດ​ຊາຍ​ແດນ​ເຊື່ອມ​ໂຍງ​ປະ­ເທດ​ໃກ້​ຄຽງ ສ່ວນ​ຜູ້​ພັດ­ທະ­ນາ ແລະ ຜູ້​ລົງ­ທຶນ ຈະ​ໄດ້​ຮັບ​ນະ­ໂຍ­ບາຍ​ຍົກ­ເວັ້ນ​ພາ­ສີ​ອາ­ກອນ ແລະ ວັດ​ສະ​ດຸ​ກໍ່­ສ້າງ​ນຳ​ເຂົ້າ ມີ​ລາຍ​ຮັບ​ຈາກ​ການ​ສຳ​ປະ­ທານ​ດິນ ແລະ ລາຍ​ຮັບ​ຈາກ​ການ​ລົງ­ທຶນ.

ຂ່າວທີ່ກ່ຽວຂ້ອງ