ຂ່າວຫຼ້າສຸດ

ຊາວພຸດຮ່ວມໃຈກັນ ໃສ່ບາດຖວາຍສັງຄະທານ ວັນບຸນເຂົ້າພັນສາ

329 17 ກ.ລ. 2019 ຂ່າວໜ້າ​ໜຶ່ງ
ຊາວພຸດຮ່ວມໃຈກັນ ໃສ່ບາດຖວາຍສັງຄະທານ ວັນບຸນເຂົ້າພັນສາ

    ຊາວ​ພຸດ​ທະ​ສາ​ສະ​ນິ​ກະ​ຊົນ​ລາວ ໃນ​ຂອບ​ເຂດ​ທົ່ວ​ປະ­ເທດ ກໍ​ຄື ຢູ່​ນະ­ຄອນ­ຫຼວງ​ວຽງ​ຈັນ ໄດ້​ພ້ອມ​ກັນ​ຮ່ວມ​ທຳ­ບຸນ​ໃສ່​ບາດ​ຖວາຍ​ສັງ­ຄະ​ທານ​ຢູ່​ຕາມ​ວັດ​ແຫ່ງ​ຕ່າງໆ ເນື່ອງ​ໃນ​ໂອ­ກາດ​ວັນ​ບຸນ​ເຂົ້າ​ພັນ​ສາ ກົງ​ກັບ​ມື້​ຂຶ້ນ 15 ຄ່ຳ ເດືອນ 8 ລາວ ເຊິ່ງ​ປີ​ນີ້ ແມ່ນ​ກົງ​ກັບ​ວັນ​ທີ 16 ກໍ­ລະ­ກົດ 2019 ສະ­ເພາະ​ຢູ່​ວັດ​ໂພນ​ໄຊ ເມືອງ​ໄຊ​ເສດ​ຖາ ນະ­ຄອນ­ຫຼວງ​ວຽງ​ຈັນ ມີ​ທ່ານ ສົມ​ສະ­ຫວາດ ເລັ່ງ​ສະ​ຫວັດ ອະ­ດີດ​ຮອງ​ນາ­ຍົກ​ລັດ​ຖະ ມົນ­ຕີ ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ທ່ານ ຖະ­ໜອມ ທຳ​ທອງ ເຈົ້າ­ເມືອງ​ໄຊ​ເສດ​ຖາ ແລະ ຊາວ​ພຸດ​ທະ​ສາ​ສະ​ນິ​ກະ​ຊົນ​ຜູ້​ເຫຼື້ອມ​ໃສ​ສັດ­ທາ​ພຸດ​ທະ​ສາ­ສະ­ໜາ ໄດ້​ຮ່ວມ​ໃຈ​ໃສ່​ບາດ​ຖວາຍ​ສັງ­ຄະ​ທານ ເພື່ອ​ອຸ­ທິດ​ກຸ­ສົນ​ເຖິງ​ດວງ​ວິນ​ຍານ​ຂອງ​ຜູ້​ລ່ວງ​ລັບ​ໄປ​ແລ້ວ​ນັ້ນ​ໃຫ້​ໄປ​ສູ່​ສຸ​ຂະ​ຕິ.

    ບຸນ​ເຂົ້າ​ພັນ​ສາ​ເປັນ​ວັນ​ສຳ­ຄັນ​ອີກ​ວັນ​ໜຶ່ງ​ຂອງ​ພະ​ພຸດ​ທະ​ສາ­ສະ­ໜາ ປີ​ໜຶ່ງ​ມີ​ເທື່ອ​ໜຶ່ງ ແລະ ມີ​ກຳ­ນົດ​ເວ­ລາ​ຈຳ​ພັນ​ສາ 3 ເດືອນ ຫຼື ໜຶ່ງ​ໄຕ​ມາດ ເພື່ອ​ໃຫ້​ບັນ​ພະ​ສິດ ແລະ ຄະ​ຣຶ​ຫັດ​ອຸ​ປາ​ສົກ ອຸ​ປາ​ສິ​ກາ ເຍົາ­ວະ​ຊົນ ຜູ້​ມີ​ຈິດ​ສັດ­ທາ​ໄດ້​ບຳ­ເພັນ​ສິນ​ທານ​ພາ­ວະ­ນາ ແລະ ຖວາຍ​ທານ ເພື່ອ​ປະ­ໂຫຍດ​ຕົນ ປະ­ໂຫຍດ​ຜູ້​ອື່ນ ແລະ ເພື່ອ​ເພີ່ມ​ພູນ​ບຸນ​ກຸ­ສົນ​ຈະ​ຣິ​ຍະ​ສຳ​ມາ​ປະ­ຕິ­ບັດ​ໃຫ້​ເຕັມ​ປ່ຽມ ມີ​ການ​ຖວາຍ​ຜ້າ​ນ້ຳ​ຝົນ ແລະ ຜ້າ​ໄຕ­ຈີ­ວອນ ເປັນ­ຕົ້ນ ພ້ອມ​ນັ້ນ ບຸນ​ເຂົ້າ​ພັນ​ສາ​ຍັງ​ເປັນ​ວັນ​ໜຶ່ງ​ທີ່​ມີ​ຄວາມ​ໝາຍ​ຄວາມ​ສຳ­ຄັນ​ທາງ​ສາ­ສະ­ໜາ​ຂອງ​ຊາວ​ພຸດ​ທີ່​ໄດ້​ພ້ອມ​ກັນ​ສືບ​ທອດ​ກັນ​ມາ​ແຕ່​ດຶກ​ດຳ​ບັນ​ຈົນ​ຮອດ​ປັດ­ຈຸ­ບັນ ແນ­ໃສ່​ເປັນ​ການ​ປົກ​ປັກ​ຮັກ­ສາ​ເສີມ​ຂະ­ຫຍາຍ​ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ຊາດ​ລາວ​ໃຫ້​ຄົນ​ຮຸ່ນ​ໃໝ່​ເກີດ​ໃໝ່​ໃຫຍ່​ລຸນ​ໄດ້​ພ້ອມ​ກັນ​ສືບ​ທອດ​ຕໍ່ໆ​ໄປ​ໃຫ້​ຍືນ​ຍົງ ແລະ ສຳ­ລັບ​ຕອນ​ຄ່ຳ​ແມ່ນ​ຈະ​ໄດ້​ມີ​ການ​ວຽນ­ທຽນ​ຕາມ​ປະ­ເພ­ນີ.

ຂ່າວທີ່ກ່ຽວຂ້ອງ