ພົບຫຼາຍແອັບພລິເຄຊັ່ນເທິງ iOS ມີການແຊຣ໌ຂໍ້ມູນສ່ວນຕົວໃຫ້ Facebook

235 18 ກ.ລ. 2019 ຫົວຂໍ້ຂ່າວອື່ນໆ

    ກ່ອນ​ໜ້າ​ນີ້ Apple ອອກ​ໂຄ­ສະ­ນາ “ອັນ​ໃດ​ທີ່­ຢູ່​ເທິງ iPhone ກໍ​ໃຫ້​ມັນ​ຢູ່​ເທິງ iPhone” ແຕ່​ເບິ່ງ​ເໝືອນ​ຈະ​ບໍ່​ເປັນ​ແບບ​ນັ້ນ​ສະ­ເໝີ​ໄປ ຫຼ້າ​ສຸດ ມີ​ລາຍ​ງານ​ວ່າ​ຢ່າງ​ໜ້ອຍ 11 ແອັບ​ພລິ​ເຄ​ຊັນ​ເທິງ iOS ທີ່​ມີ​ການ​ແບ່ງ­ປັນ (ແຊຣ໌) ຂໍ້​ມູນ​ໃຫ້​ກັບ Facebook.

    Wall Street Journal ພົບ​ແອັບ​ພລິ​ເຄ​ຊັນ​ທີ່​ມີ​ການ​ແຊຣ໌ຂໍ້​ມູນ​ສ່ວນ​ຕົວ​ຂອງ​ຜູ້​ໃຊ້​ງານ​ໃຫ້​ກັບ Facebook ເຊິ່ງ​ສ່ວນ​ໃຫຍ່​ເປັນ​ແອັບ​ກ່ຽວ​ກັບ​ສຸ­ຂະ­ພາບ ໄດ້­ແກ່ Flo Period & Ovulation Tracker, BetterMe: Weight Loss Workouts, Breethe, Realtor.com ແລະ Instant Heart Rate: HR Monitor ອີກ​ທັງ​ແອັບ​ພລິ​ເຄ​ຊັ່ນ​ເຫຼົ່າ​ນີ້ ບໍ່​ມີ​ຕົວ​ເລືອກ​ໃຫ້​ຜູ້​ໃຊ້​ງານ​ເລືອກ​ບໍ່​ແຊຣ໌ຂໍ້​ມູນ​ກັບ Facebook ໄດ້ ຫຼື​ບໍ່​ມີ​ການ​ຊີ້​ແຈງ​ຜູ້​ໃຊ້​ງານ​ວ່າ ຂໍ້​ມູນ​ສ່ວນ​ຕົວ​ຂອງ​ຜູ້​ໃຊ້​ງານ​ຢ່າງ body weight (ນ້ຳ­ໜັກ​ຕົວ), menstrual cycles (ຮອບ​ເດືອນ) ຫຼື pregnancy ການ​ຖື­ພາ ມີ​ການ​ແຊຣ໌​ເທິງ​ເຊິ​ຟ​ເວີ​ຂອງ Facebook ແຕ່​ບໍ່​ພຽງ iOS ເທົ່າ​ນັ້ນ ແອັບ​ຂອງ Android ບາງ​ແອັບ​ກໍ​ມີ​ການ​ແຊຣ໌​ສ່ວນ​ສູງ ແລະ ນ້ຳ­ໜັກ​ດ້ວຍ.

    ຫຼາຍ​ແອັບ​ພລິ​ເຄ​ຊັ່ນ​ໃຊ້​ເຄື່ອງ­ມື​ວິ­ເຄາະ​ຂອງ Facebook ທີ່​ຊື່­ວ່າ App Events ເຮັດ​ໃຫ້ Facebook ສາ­ມາດ​ຕິດ­ຕາມ​ກິດ­ຈະ­ກຳ​ຂອງ​ຜູ້​ໃຊ້​ງານ​ໄດ້ ເຊິ່ງ​ນັກ​ພັດ­ທະ­ນາ​ສາ­ມາດ​ສ້າງ custom app events ສຳ­ລັບ​ໃຊ້​ໂຄ­ສະ­ນາ​ໃຫ້​ຖືກ​ໃຈ​ຂອງ​ຜູ້​ໃຊ້​ງານ ເຊິ່ງ​ແນ່­ນອນ​ວ່າ​ຈະ​ມີ​ການ​ສົ່ງ​ຂໍ້​ມູນ​ຂອງ​ຜູ້​ໃຊ້​ງານ​ກັບ​ໄປ​ຍັງ Facebook ເຖິງ​ແມ່ນ​ວ່າ​ຈະ​ບໍ່​ມີ​ການ​ເປິດ​ເຜີຍ​ຂໍ້​ມູນ​ສ່ວນ​ຕົວ­ຢ່າງ​ຊັດ​ເຈນ ແຕ່​ກໍ​ເຮັດ​ໃຫ້ Facebook ສາ­ມາດ​ນຳ­ໄປ​ໃຊ້​ປະ­ໂຫຍດ​ຕໍ່​ໄດ້.

    ຢ່າງ­ໃດ​ກໍ​ຕາມ Facebook ອາດ​ບໍ່​ມີ​ຄວາມ​ຜິດ​ໂດຍ​ກົງ​ຈາກ​ເຫດ­ການ​ລັກ­ສະ­ນະ​ນີ້ ບໍ­ລິ­ສັດ​ມີ​ການ​ຊີ້​ແຈງ​ກັບ​ນັກ​ພັດ­ທະ­ນາ​ແລ້ວ​ວ່າ ຫ້າມ​ມີ​ການ​ແຊຣ໌ຂໍ້​ມູນ​ສ່ວນ​ຕົວ​ຂອງ​ຜູ້​ໃຊ້​ງານ ທັງ​ນີ້ Facebook ຊີ້​ແຈງ​ກັບ Wall Street Journal ວ່າ ນັກ​ພັດ­ທະ­ນາ​ຕ້ອງ​ມີ​ຄວາມ​ຊັດ​ເຈນ ແລະ ແຈ້ງ​ຜູ້​ໃຊ້​ງານ​ວ່າ​ຈະ​ສົ່ງ​ຂໍ້​ມູນ​ອັນ​ໃດ​ໃຫ້ Facebook ແຕ່​ທັງ​ນີ້ Facebook ຢືນ­ຢັນ​ວ່າ ບໍ­ລິ­ສັດ​ບໍ່​ໄດ້​ໃຊ້​ຂໍ້​ມູນ​ສ່ວນ​ຕົວ​ຂອງ​ຜູ້​ໃຊ້​ງານ​ໄປ​ໃນ​ທາງ​ການ​ຄ້າ ເຊັ່ນ​ການ​ສົ່ງ​ໂຄ­ສະ­ນາ​ໃຫ້​ກົງ​ກັບ New Feed ເປັນ­ຕົ້ນ.

ຂ່າວທີ່ກ່ຽວຂ້ອງ