ຂ່າວຫຼ້າສຸດ

ປາ​ກິດ​ສະຖານ ເປີດ​ທ້ອງຟ້າ​ຄືນໃໝ່​ໃຫ້​ແກ່​ການບິນ​ພົນ​ລະ​ເຮືອນ

150 19 ກ.ລ. 2019 ຂ່າວຕ່າງປະເທດ
ປາ​ກິດ​ສະຖານ ເປີດ​ທ້ອງຟ້າ​ຄືນໃໝ່​ໃຫ້​ແກ່​ການບິນ​ພົນ​ລະ​ເຮືອນ

    ຂໍ້​ມູນ​ຂ່າວສານ ຈາກ​ແຈ້ງ​ການ​ດ້ານ​ການບິນ ທີ່​ໄດ້​ລົງ​ພິມ​ໃນ​ເວບ​ໄຊ ຂອງ​ອົງການ​ການບິນ​ປາ​ກິດ​ສະຖານ ໃຫ້​ຮູ້​ວ່າ ອົງການ​ການບິນ​ຂອງ​ປາ​ກິດ​ສະຖານ ແຈ້ງ​ໃຫ້​ຮູ້ເມື່ອ​ວັນ​ທີ 16 ກໍລະກົດ​ນີ້​ວ່າ ປາ​ກິດ​ສະຖານ ໄດ້​ເປີດ​ເຂດ​ທ້ອງຟ້າ​ຄືນໃໝ່ ໃຫ້​ແກ່​ການບິນ​ພົນ​ລະ​ເຮືອນ​ທຸກໆ​ຖ້ຽວ​ບິນ ແລະ ການ​ຕົກລົງ​ນີ້ ມີ​ຜົນ​ບັງຄັບ​ໃຊ້​ທັນທີ. ການ​ດຳເນີນ​ການ​ດັ່ງກ່າວ​ມີ​ອອກ​ມາ ຫຼັງ​ຈາກ​ທີ່​ປາ​ກິດ​ສະຖານ ຈຳກັດ​ເຂດ​ທ້ອງຟ້າ​ຂອງ​ຕົນ​ເປັນ​ເວລາ​ຫຼາຍ​ເດືອນ ທ່າມກາງ​ທີ່​ເກີດ​ຄວາມ​ເຄັ່ງ​ຕຶງ​ກັບ​ອິນ​ເດຍ.

    ປາ​ກິດ​ສະຖານ ໄດ້​ປິດ​ເຂດ​ທ້ອງຟ້າ ມາ​ແຕ່​ວັນ​ທີ 27 ກຸມພາ​ປີ​ນີ້ ຊຶ່ງ​ມີ​ຂຶ້ນ​ໜຶ່ງ​ມື້ ຫຼັງ​ຈາກ​ທີ່​ກອງທັບ​ອາກາດ​ອິນ​ເດຍ ປະຕິບັດ​ການ​ໂຈມ​ຕີ​ທາງ​ອາກາດ ໃສ່​ຄ້າຍ​ຝຶກ​ຊ້ອມ​ຂອງ​ພວກ​ມື​ປືນ​ແຫ່ງ​ໜຶ່ງ ທີ່​ຕັ້ງ​ຢູ່​ໃນ​ດິນແດນ​ຂອງ​ປາ​ກິດ​ສະຖານ ເພື່ອ​ຕອບ​ໂຕ້​ຕໍ່​ກໍລະນີ​ທີ່​ກຸ່ມ​ມື​ປືນ Jaish-e-Mohammed (JeM) ປະຕິບັດ​ການ​ໂຈມ​ຕີ​ສະລະ​ຊີບ ໃສ່​ຖານ​ທັບ​ຂອງ​ກອງທັບ​ອິນ​ເດຍ ຢູ່​ໃນ​ແຄວ້ນ​​ກັສ​ເມຍ ສົ່ງ​ຜົນ​ໃຫ້​ທະຫານ​ຂອງ​ອິນ​ເດຍ ເສຍ​ຊີວິດ 44 ຄົນ.

​    ກັສ​ເມຍ ເປັນ​ເຂດ​ແຄວ້ນ ທີ່​ມີ​ຊາວ​ມຸ​ສລິມ​ອາ​ໃສ​ຢູ່​ເປັນ​ສ່ວນ​ຫຼາຍ ແລະ ໄດ້​ແບ່ງ​ອອກ​ເປັນ​ສອງ​ສ່ວນ ໂດຍ​ແມ່ນ  ອິນ​ເດຍ ແລະ  ປາ​ກິດ​ສະຖານ​ຄວບ​ຄຸມ​ຄົນ​ລະ​ສ່ວນ. ການ​ພົວພັນ​ລະຫວ່າງ​ສອງ​ປະເທດ​ດັ່ງກ່າວ ມີ​ຄວາມ​ເຄັ່ງ​ຕຶງ​ຢູ່​ເລື້ອຍໆ ຍ້ອນ​ວ່າ​ສອງ​ຝ່າຍ​ຕ່າງ​ກໍ​ປະກາດ​ອຳນາດ​ອະທິປະ​ໄຕ​ຕໍ່​ທົ່ວ​ເຂດ​ດັ່ງກ່າວ.

ຂ່າວທີ່ກ່ຽວຂ້ອງ