ຂ່າວຫຼ້າສຸດ

ພະຍາດທາງໃຈ

2.164 19 ກ.ລ. 2019 ນານາສາລະ

    ພະ­ຍາດ​ທາງ​ໃຈ ຄື: ຄວາມ​ອຶດ­ຫິວ​ທີ່​ບໍ່​ມີ​ຂອບ​ເຂດ​ຈຳ­ກັດ ແລະ ຜູ້​ທີ່​ຖືກ​ພະ­ຍາດ​ນີ້​ຄຸກ​ຄາມ​ຈະ​ຮູ້​ໂຕ ຫຼື ບໍ່ ກໍ​ບໍ່​ສາ­ມາດ​ຫັກ​ຫ້າມ​ຄວາມ​ຢາກ​ນັ້ນ​ໄດ້ ເພາະ​ພະ­ຍາດ​ນີ້​ຈະ​ມີ​ເຍື່ອ​ລໍ້​ຕະ­ຫຼອດ 24 ຊົ່ວ­ໂມງ ນັ້ນ​ຄື: ຈາກ​ສື່​ສັງ­ຄົມ​ອອນ​ລາຍ ພະ­ຍາດ​ທາງ​ໃຈ​ປົວ​ຍາກ ຖ້າ​ຜູ້­ກ່ຽວ​ຍັງ​ລະ­ເມີ​ກັບ​ຄວາມ​ຝັນ​ທີ່​ໄກ​ຫ່າງ​ຈາກ​ພຶດ­ຕິ​ກຳ ເຊັ່ນ: ຢາກ​ລວຍ ຢາກ​ມີ ແຕ່​ໂຕ​ເອງ​ພັດ​ເຊົ່າ​ຫ້ອງ​ແຖວ ຫຼິ້ນ​ກິນ​ຟຸມ​ເຟືອຍ.

    ພະ­ຍາດ​ທາງ​ໃຈ​ປາ­ກົດ​ໃຫ້​ເຫັນ​ໃນ​ລັກ­ສະ­ນະ​ຫຼອກ​ລວງ ຕົວະ​ຕົນ​ເອງ ຫຼື ວ່າ​ເພື່ອ​ຕົວະ​ຄົນ​ອື່ນ ເຊັ່ນ: ເວ­ລາ​ໄດ້​ຂີ່​ລົດ​ໃຫຍ່​ຄັນ​ງາມ​ກໍ​ເຊວ​ຟີ​ອັບ​ເດດ​ປ່ຽນ​ຮູບ​ໜ້າ​ປົກ​ເຟດ ເພື່ອ​ສ້າງ​ພາບ​ພົດ​ໃຫ້​ໂຕ​ເອງ​ດູ​ດີ ມີ​ຖາ­ນະ ເຊິ່ງ​ຄວາມ​ຈິງ​ຖາ­ນະ​ຂອງ​ຕົນ​ເອງ​ກໍ​ຫ່າງ​ໄກ​ກັບ​ວັດ­ຖຸ​ລາ­ຄາ​ແພງ​ຢູ່​ແລ້ວ ຜູ້​ປ່ວຍ​ພະ­ຍາດ​ທາງ​ໃຈ ສ່ວນ​ໜຶ່ງ​ເຂົາ​ກໍ​ຫາ​ເງິນ​ງ່າຍ ເຖິງ​ຈະ​ເຊົ່າ​ຫ້ອງ​ແຖວ​ຢູ່ ແຕ່​ມີ​ຄົນ​ຈ່າຍ​ຄ່າ​ຫ້ອງ ແລະ ຊື້​ໂທລະ­ສັບ​ເຄື່ອງ­ໃຊ້​ລາ­ຄາ​ແພງ​ໃຫ້ ເຮັດ​ໃຫ້​ເພື່ອນ​ຂ້າງ​ຫ້ອງ​ເກີດ​ຄວາມ​ຢາກ​ຕາມ​ກະ­ແສ ພະ­ຍາດ​ທາງ​ໃຈ​ຫາກ​ເກີດ​ກັບ​ໃຜ​ແລ້ວ​ກໍ​ປົວ​ຍາກ ຖ້າ­ວ່າ​ຜູ້­ກ່ຽວ​ບໍ່​ຮູ້​ກຳ​ພືດ​ທີ່​ມາ​ຂອງ​ຕົນ ແລະ ບໍ່​ມີ​ຈິດ​ສຳ­ນຶກ​ວ່າ ຖາ­ນະ​ໝັ້ນ­ຄົງ​ໃນ​ຊີ­ວິດ​ຕ້ອງ​ສ້າງ​ມັນ​ຂຶ້ນ​ມາ​ດ້ວຍ​ນ້ຳ​ແຮງ​ຂອງ​ຕົນ​ເອງ.

    ພະ­ຍາດ​ທາງ​ໃຈ ຈະ​ມີ​ລັກ­ສະ­ນະ​ສ້າງ​ຄ່າ​ນິ­ຍົມ​ໄປ​ໃນ​ໂຕ​ນຳ​ອີກ ເຊັ່ນ: ຄົນ​ບາງ​ປະ­ເພດ​ກໍ​ສ້າງ​ຄຳ​ເວົ້າ ຫຼື ວະ­ລີ​ວ່າ: ຖ້າ​ຂີ່​ລົດ​ໃຫຍ່​ມັນ​ກໍ​ປອດ​ໄພ​ກວ່າ​ລົດ­ຈັກ ລົດ­ຖີບ ເພາະ​ມັນ​ມີ​ເຫຼັກ​ຫຸ້ມ​ກະ­ດູກ​ໄວ້ ຜູ້​ຂຽນ​ເລີຍ​ສົງ­ໄສ​ວ່າ ພວກ​ຕຳ​ແລ້ວ​ໜີ​ບາງ­ທີ​ກໍ​ແມ່ນ​ພວກ​ນີ້ ເພາະ​ປະ­ໝາດ​ໃນ​ການ​ຂັບ​ຂີ່ ຫຼື ຫຼົງ​ຄິດ​ວ່າ​ມີ​ເຫຼັກ​ຫຸ້ມ​ກະ­ດູກ​ແລ້ວ​ກໍ​ຕຳ​ຊະ​ຕຳ​ຊາຍ ພະ­ຍາດ​ທາງ​ໃຈ​ນັ້ນ ມັກ​ແຜ່​ລາມ​ມີ​ອິດ​ທິ​ພົນ​ຕໍ່​ເຍົາ­ວະ​ຊົນ ແລະ ຜູ້​ບໍ່​ໄດ້​ຮັບ​ການ​ສຶກ​ສາ​ພຽງ­ພໍ ບໍ່​ສາ­ມາດ​ແຍກ​ແຍະ​ອອກ​ໄດ້​ວ່າ: ຄຸນ­ຄ່າ​ຊີ­ວິດ​ແທ້​ຈິງ ຫຼື ຖາ­ນະ​ຂອງ​ຕົນ​ນັ້ນ ຕ້ອງ​ສ້າງ​ມັນ​ຂຶ້ນ​ມາ​ດ້ວຍ​ເຫື່ອ­ແຮງ​ຂອງ​ຕົນ.

    ສັງ​ລວມ​ໄດ້​ວ່າ: ເລື່ອງ​ພະ­ຍາດ​ທາງ​ໃຈ​ນັ້ນ ຜູ້​ຂຽນ​ພຽງ​ນຳ​ມາ​ສະ­ເໜີ​ແລກ­ປ່ຽນ ວ່າ​ຄ່າ​ນິ­ຍົມ​ແບບ​ໃດ​ເຮົາ​ຄວນ​ສ້າງ ແລະ ກໍ​ສົ່ງ­ເສີມ​ໃຫ້​ສັງ­ຄົມ​ໄດ້​ເລືອກ​ສັນ ແລະ ກໍ​ເປັນ​ເກາະ​ປ້ອງ​ກັນ​ບໍ່​ໃຫ້​ຫຼົງ​ຜິດ​ກັບ​ຄ່າ​ນິ­ຍົມ ເຫີ່​ວັດ­ຖຸ​ເກີນ​ໄປ ຫຼື ບໍ່​ດັ່ງ­ນັ້ນ ກໍ​ມີ​ຜູ້​ຊາຍ​ບາງ​ກຸ່ມ​ກໍ​ຢາກ​ອວດ​ເບັ່ງ​ວ່າ ຕົນ​ເອງ​ເກ່ງ ສາ­ມາດ​ມີ​ຜູ້​ແສ້​ຜູ້​ສາວ​ຫຼາຍ​ຄົນ​ໄດ້ ຈົນ​ລືມ​ໄປ​ວ່າ ເຮົາ​ຈະ​ໃຫ້​ກຽດ​ຄົນ​ຢູ່​ຄອບ­ຄົວ​ແບບ​ໃດ ? ຜູ້​ຂຽນ​ຈຶ່ງ​ເຫັນ​ວ່າ ເຮົາ​ບໍ່​ຄວນ​ສ້າງ​ບັນ­ຫາ ຫຼື ຄ່າ​ນິ­ຍົມ​ທີ່​ຜິດ­ພາດ​ບົ່ມ​ໄວ້​ຄື​ດັ່ງ​ໄຟ​ໝົກ​ເຖົ່າ.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ