ເຜີຍແຜ່ກົດໝາຍວ່າດ້ວຍສຳນັກງານຜູ້ຕາງໜ້າ ສປປ ລາວ ປະຈຳຢູ່ຕ່າງປະເທດ

370 22 ກ.ລ. 2019 ຂ່າວໜ້າ​ໜຶ່ງ
ເຜີຍແຜ່ກົດໝາຍວ່າດ້ວຍສຳນັກງານຜູ້ຕາງໜ້າ ສປປ ລາວ ປະຈຳຢູ່ຕ່າງປະເທດ

    ເພື່ອ​ສ້າງ​ຄວາມ​ຮູ້ ຄວາມ​ເຂົ້າ­ໃຈ​ກ່ຽວ​ກັບ​ທີ່​ຕັ້ງ ພາ­ລະ​ບົດ­ບາດ ສິດ ແລະ ໜ້າ­ທີ່​ຂອງ​ສຳ­ນັກ­ງານ​ຜູ້­ຕາງ­ໜ້າ ກໍ​ຄື ສິດ ແລະ ໜ້າ­ທີ່ ລວມ​ທັງ​ພັນ­ທະ​ຂອງ​ສະ­ມາ­ຊິກ​ຂອງ​ສຳ­ນັກ­ງານ​ຜູ້­ຕາງ­ໜ້າ ແນ­ໃສ່​ເຮັດ​ໃຫ້​ມີ​ຄວາມ​ເປັນ​ເອ­ກະ​ພາບ​ໃນ​ການ­ຈັດ­ຕັ້ງ​ປະ­ຕິ­ບັດ​ກົດ­ໝາຍ​ສະ­ບັບ​ນີ້​ໃຫ້​ຖືກ­ຕ້ອງ ແລະ ມີ​ປະ­ສິດ­ທິ­ພາບ​ສູງ ການ​ສ້າງ ແລະ ຈັດ​ຕັ້ງ​ປະ­ຕິ­ບັດ​ກົດ­ໝາຍ​ດັ່ງ­ກ່າວ ໃນ​ຄວາມ​ເປັນ​ຈິງ​ແມ່ນ​ການ­ຈັດ­ຕັ້ງ​ຜັນ​ຂະ­ຫຍາຍ​ແນວ­ທາງ​ການ​ຕ່າງ­ປະ­ເທດ​ຂອງ​ພັກ “ສັນ­ຕິ­ພາບ ເອ­ກະ­ລາດ ມິດ­ຕະ­ພາບ ການ​ຮ່ວມ​ມື ແລະ ການ​ເຊື່ອມ​ໂຍງ​ບົນ​ພື້ນ­ຖານ​ຫຼັກ­ການ​ເຄົາ­ລົບ​ເຊິ່ງ​ກັນ ແລະ ກັນ ຕ່າງ​ຝ່າຍ​ຕ່າງ​ໄດ້​ຮັບ​ຜົນ​ປະ­ໂຫຍດ ເສີມ​ຂະ­ຫຍາຍ​ສາຍ​ພົວ­ພັນ ແລະ ການ​ຮ່ວມ​ມື​ແບບ​ຫຼາຍ​ທິດ ຫຼາຍ​ຝ່າຍ ແລະ ຫຼາຍ​ລະ­ດັບ” ກໍ​ຄື ການ​ປະ­ຕິ­ບັດ​ນະ­ໂຍ­ບາຍ​ການ​ຕ່າງ­ປະ­ເທດ​ຂອງ ສປປ ລາວ ໃຫ້​ແທດ­ເໝາະ​ກັບ​ສະ­ພາບ​ຄວາມ​ເປັນ​ຈິງ ແຫ່ງ​ການ​ເຊື່ອມ​ໂຍງ​ກັບ​ພາກ​ພື້ນ ແລະ ສາ­ກົນ ກໍ​ຄື ການ​ຮ່ວມ​ມື​ກັບ​ຕ່າງ­ປະ­ເທດ​ຂອງ ສປປ ລາວ ທີ່​ນັບ​ມື້​ນັບ​ເລິກ­ເຊິ່ງ ແລະ ໄດ້​ຮັບ​ການ​ເປີດ​ກວ້າງ ເຊິ່ງ​ໃນ​ໄລ­ຍະ​ຜ່ານ​ມາ ກໍ​ໄດ້​ປະ­ກອບ­ສ່ວນ​ຢ່າງ​ໃຫຍ່​ຫຼວງ​ເຂົ້າ​ໃນ​ພາ­ລະ­ກິດ​ປົກ​ປັກ​ຮັກ­ສາ ແລະ ສ້າງ­ສາ​ພັດ­ທະ­ນາ​ປະ­ເທດ​ຊາດ.

    ວັນ​ທີ 19 ກໍ­ລະ­ກົດ 2019 ຢູ່​ກະ­ຊວງ​ການ​ຕ່າງ­ປະ­ເທດ ໄດ້​ຈັດ​ກອງ​ປະ­ຊຸມ​ເຜີຍ­ແຜ່​ກົດ­ໝາຍ​ວ່າ​ດ້ວຍ​ສຳ­ນັກ­ງານ​ຜູ້­ຕາງ­ໜ້າ ແຫ່ງ ສາ­ທາ­ລະ­ນະ​ລັດ ປະ­ຊາ­ທິ­ປະ­ໄຕ ປະ­ຊາ­ຊົນ​ລາວ ປະ­ຈຳ​ຢູ່​ຕ່າງ­ປະ­ເທດ ໃຫ້​ແກ່​ພະ­ນັກ­ງານ-ລັດ­ຖະ­ກອນ​ຂອງ​ກະ­ຊວງ​ການ​ຕ່າງ­ປະ­ເທດ ເປັນ​ປະ­ທານ​ຂອງ​ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ ກະ­ຊວງ​ການ​ຕ່າງ­ປະ­ເທດ ມີ​ບັນ­ດາ​ຮອງ​ລັດ­ຖະ­ມົນ­ຕີ ຫົວ­ໜ້າ​ກົມ ພະ​ແນກ ແລະ ຕາ​ໜ້າ​ຈາກ​ກົມ​ຕ່າງໆ​ເຂົ້າ​ຮ່ວມ.

    ກົດ­ໝາຍ​ສະ­ບັບ​ນີ້ ຈະ​ເປັນ​ບ່ອນ​ອີງ​ອັນ​ສຳ­ຄັນ​ໃຫ້​ແກ່​ບັນ­ດາ​ສຳ­ນັກ­ງານ​ຜູ້­ຕາງ­ໜ້າ​ໃນ​ການ­ຈັດ­ຕັ້ງ ແລະ ການ­ເຄື່ອນ­ໄຫວ ກໍ​ຄື ການ​ຄຸ້ມ​ຄອງ ການ­ເຄື່ອນ­ໄຫວ​ວຽກ​ງານ​ການ​ຕ່າງ­ປະ­ເທດ​ຢູ່​ຕ່າງ­ປະ­ເທດ ແລະ ອົງ​ການ­ຈັດ­ຕັ້ງ​ສາ­ກົນ​ໃຫ້​ລວມ​ສູນ ແລະ ເປັນ​ເອ­ກະ​ພາບ ທັງ​ເປັນ​ການ​ເພີ່ມ​ທະ­ວີ ແລະ ສ້າງ​ຄວາມ​ເຂັ້ມ­ແຂງ​ໃຫ້​ແກ່​ການ​ປະ­ຕິ­ບັດ​ວຽກ​ງານ​ການ​ຄຸ້ມ​ຄອງ​ລັດ​ຂອງ​ຂະ­ແໜງ­ການ​ຕ່າງ­ປະ­ເທດ​ດ້ວຍ​ກົດ­ໝາຍ ແລະ ລະ­ບຽບ​ການ​ເທື່ອ​ລະ​ກ້າວ.

    ກົດ­ໝາຍ​ວ່າ​ດ້ວຍ​ສຳ­ນັກ­ງານ​ຜູ້­ຕາງ­ໜ້າ ແຫ່ງ ສາ­ທາ­ລະ­ນະ​ລັດ ປະ­ຊາ­ທິ­ປະ­ໄຕ ປະ­ຊາ­ຊົນ​ລາວ ປະ­ຈຳ​ຢູ່​ຕ່າງ­ປະ­ເທດ ເປັນ​ກົດ­ໝາຍ​ສະ­ບັບ​ທີ​ສອງ​ຂອງ​ຂະ­ແໜງ­ການ​ຕ່າງ­ປະ­ເທດ ແລະ ເປັນ​ໜຶ່ງ​ໃນ​ບາດ­ກ້າວ​ທີ່​ສຳ­ຄັນ​ຂອງ​ກະ­ຊວງ​ການ​ຕ່າງ­ປະ­ເທດ ໃນ​ການ​ພັດ­ທະ­ນາ​ລະ­ບົບ​ນິ­ຕິ​ກຳ​ຂອງ​ຂະ­ແໜງ­ການ​ຕ່າງ­ປະ­ເທດ ຕາມ​ແນວ­ທາງ​ນະ­ໂຍ­ບາຍ​ຂອງ​ພັກ-ລັດ​ໃນ​ການ​ຄຸ້ມ​ຄອງ​ລັດ​ດ້ວຍ​ກົດ­ໝາຍ​ເທື່ອ​ລະ​ກ້າວ ປະ­ກອບ­ສ່ວນ​ເຂົ້າ​ໃນ​ການ​ປະ­ຕິ­ບັດ​ນະ­ໂຍ­ບາຍ​ການ​ຕ່າງ­ປະ­ເທດ​ຂອງ ສປປ ລາວ ເວົ້າ​ລວມ ເວົ້າ​ສະ­ເພາະ ແມ່ນ​ການ­ເຄື່ອນ­ໄຫວ​ວຽກ​ງານ​ການ​ຕ່າງ­ປະ­ເທດ​ຢູ່​ຕ່າງ­ປະ­ເທດ ໃຫ້​ມີ​ປະ​ສິດ­ທິ​ຜົນ​ສູງ ລວມ​ສູນ ແລະ ເປັນ​ເອ­ກະ​ພາບ​ໃນ​ຂອບ​ເຂດ​ທົ່ວ​ປະ­ເທດ ແນ­ໃສ່​ສ້າງ​ສະ­ພາບ​ແວດ​ລ້ອມ​ພາຍ​ໃນ​ທີ່​ເອື້ອ​ອຳ­ນວຍ ເຊື່ອມ​ໂຍງ​ກັບ​ພາກ​ພື້ນ ແລະ ສາ­ກົນ ຂະ­ຫຍາຍ​ການ​ຮ່ວມ​ມື​ກັບ​ຕ່າງ­ປະ­ເທດ ທັງ​ຍາດ​ແຍ່ງ​ການ​ຊ່ວຍ­ເຫຼືອ ແລະ ດຶງ​ດູດ​ນັກ​ລົງ­ທຶນ​ຈາກ​ຕ່າງ­ປະ­ເທດ ປະ­ກອບ­ສ່ວນ​ອັນ​ສຳ­ຄັນ​ເຂົ້າ​ໃນ​ພາ­ລະ­ກິດ​ປົກ​ປັກ​ຮັກ­ສາ ແລະ ສ້າງ­ສາ​ພັດ­ທະ­ນາ​ປະ­ເທດ​ຊາດ.

ຂ່າວທີ່ກ່ຽວຂ້ອງ