ເສີມຂະຫຍາຍບົດບາດຊາວໜຸ່ມ ໃນການພັດທະນາໃຫ້ຍືນຍົງ ແລະ ເຊື່ອມໂຍງກັບພາກພື້ນ

359 22 ກ.ລ. 2019 ຂ່າວໜ້າ​ໜຶ່ງ
ເສີມຂະຫຍາຍບົດບາດຊາວໜຸ່ມ ໃນການພັດທະນາໃຫ້ຍືນຍົງ ແລະ ເຊື່ອມໂຍງກັບພາກພື້ນ

    ກອງ​ປະ­ຊຸມ​ລັດ­ຖະ­ມົນ­ຕີ​ຊາວ​ໜຸ່ມ​ອາ​ຊຽນ​ຄັ້ງ​ທີ 11 ແລະ ກອງ​ປະ­ຊຸມ​ທີ່​ກ່ຽວ­ຂ້ອງ ໄດ້​ໄຂ​ຂຶ້ນ​ຢ່າງ​ເປັນ​ທາງ​ການ​ວັນ​ທີ 19 ກໍ­ລະ­ກົດ 2019 ທີ່​ໂຮງ­ແຮມ​ລາວ​ພລາ​ຊາ ນະ­ຄອນ­ຫຼວງ​ວຽງ​ຈັນ ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ພ້ອມ​ດ້ວຍ​ບັນ­ດາ​ລັດ­ຖະ­ມົນ­ຕີ​ຊາວ​ໜຸ່ມ​ອາ​ຊຽນ ເຈົ້າ​ໜ້າ­ທີ່​ອາ­ວຸ­ໂສ​ອາ​ຊຽນ ແລະ ທູ­ຕາ­ນຸ­ທູດ.

    ທ່ານ ອາ​ລຸນ​ໄຊ ສູນ​ນະ­ລາດ ເລ­ຂາ​ຄະ­ນະ​ບໍ­ລິ­ຫານ​ງານ​ສູນ​ກາງ​ຊາວ​ໜຸ່ມ ປະ­ຊາ­ຊົນ​ປະ­ຕິ­ວັດ​ລາວ​ໄດ້​ກ່າວ​ສະ­ແດງ​ຄວາມ​ຂອບ­ໃຈ​ບັນ­ດາ​ລັດ­ຖະ­ມົນ­ຕີ​ອາ​ຊຽນ ຄູ່​ເຈລະ­ຈາ ປະ­ເທດ​ເພື່ອນ​ມິດ ເຈົ້າ​ໜ້າ­ທີ່​ອາ­ວຸ­ໂສ​ທີ່​ໄດ້​ໃຫ້­ການ​ຮ່ວມ​ມື ແລະ ຊ່ວຍ­ເຫຼືອ​ຄະ­ນະ​ຊາວ​ໜຸ່ມ​ລາວ ໃນ​ການ​ເປັນ​ປະ­ທານ​ກອງ​ປະ­ຊຸມ​ຊາວ​ໜຸ່ມ​ອາ​ຊຽນ​ຄັ້ງ​ນີ້ ພາຍ​ໃຕ້​ຫົວ­ຂໍ້ “ເສີມ​ຂະ­ຫຍາຍ​ບົດ­ບາດ​ຊາວ​ໜຸ່ມ​ໃນ​ການ​ພັດ­ທະ­ນາ​ໃຫ້​ຍືນ​ຍົງ ແລະ ເຊື່ອມ​ໂຍງ​ກັບ​ພາກ​ພື້ນ” ເຊິ່ງ​ກອງ​ປະ­ຊຸມ​ໄດ້​ມີ​ການ​ປຶກ­ສາ​ຫາ­ລື​ແລກ­ປ່ຽນ​ຄວາມ​ຄິດ​ເຫັນ​ທີ່​ໄດ້​ຮັບ​ໝາກ­ຜົນ ແລະ ທັດ­ສະ­ນະ​ທີ່​ສ້າງ­ສັນ​ກ່ຽວ​ກັບ​ຫົວ­ຂໍ້​ຕ່າງໆ​ທີ່​ກວມ​ເອົາ​ໃນ​ຫຼາຍ​ຂົງ­ເຂດ ເພື່ອ​ເພີ່ມ​ທະ­ວີ​ບົດ­ບາດ​ຂອງ​ຊາວ​ໜຸ່ມ​ໃນ​ການ​ປະ­ກອບ­ສ່ວນ​ໃສ່​ການ​ພັດ­ທະ­ນາ​ແບບ​ຍືນ​ຍົງ ແລະ ການ​ເຊື່ອມ​ໂຍງ​ອາ​ຊຽນ ພ້ອມ​ນັ້ນ ເປັນ​ຂີດ​ໝາຍ​ສຳ­ຄັນ​ໃນ​ກອງ​ປະ­ຊຸມ​ຄັ້ງ​ນີ້​ແມ່ນ​ບັນ­ດາ​ລັດ­ຖະ­ມົນ­ຕີ​ຊາວ​ໜຸ່ມ​ອາ​ຊຽນ​ໄດ້​ຮັບ­ຮອງ​ເອົາ​ຖະ­ແຫຼງ­ການ ໂດຍ​ສະ­ເພາະ ໄດ້​ຮັບ­ຮອງ​ເອົາ​ພາ­ລະ​ບົດ­ບາດ​ພາຍ​ໃຕ້​ອາ​ຊຽນ​ຮ່ວມ​ມື ແລະ ບັນ­ດາ​ເອ­ກະ­ສານ​ກ່ຽວ­ຂ້ອງ ເຊິ່ງ​ສະ­ທ້ອນ​ໃຫ້​ເຫັນ​ເຖິງ​ຄຳ​ໝັ້ນ​ຮ່ວມ​ກັນ​ໃນ​ການ​ຮັດ​ແໜ້ນ ສ້າງ​ຄວາມ​ເຂັ້ມ­ແຂງ​ຕໍ່​ຄວາມ​ພະ­ຍາ­ຍາມ ແລະ ການ​ຮ່ວມ​ມື​ໃນ​ການ​ເຮັດ​ໃຫ້​ພາກ​ພື້ນ​ອາ​ຊຽນ ບັນ­ລຸ​ວິ­ໄສ​ທັດ​ປະ­ຊາ​ຄົມ​ອາ​ຊຽນ 2025 ແລະ ເປົ້າໝາຍ​ການ​ພັດ­ທະ­ນາ​ແບບ​ຍືນ​ຍົງ ນອກ​ນັ້ນ ຍັງ​ພິ­ຈາ­ລະ­ນາ​ຮັບ­ຮອງ​ເອົາ​ຖະ­ແຫຼງ­ການ​ຈາກ​ຄະ­ນະ​ຜູ້​ແທນ​ລັດ­ຖະ­ມົນ­ຕີ​ຊາວ​ໜຸ່ມ​ອາ​ຊຽນ ຄັ້ງ​ທີ 11.

    ໂອ­ກາດ​ດັ່ງ­ກ່າວ ທ່ານ​ຮອງ​ນາ­ຍົກ­ລັດ­ຖະ­ມົນ­ຕີ​ໄດ້​ມີ​ຄຳ​ເຫັນ​ຕໍ່​ກອງ​ປະ­ຊຸມ​ວ່າ: ໄລ­ຍະ​ຜ່ານ​ມາ ການ​ຮ່ວມ​ມື​ໃນ​ຂອບ​ຊາວ​ໜຸ່ມ​ອາ​ຊຽນ​ຂອງ​ພວກ​ເຮົາ ໄດ້​ປະ­ສົບ​ຜົນ­ສຳ­ເລັດ​ຫຼາຍ​ດ້ານ ອັນ​ໄດ້​ປະ­ກອບ­ສ່ວນ​ສຳ­ຄັນ ເຂົ້າ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ແຕ່​ລະ​ປະ­ເທດ​ສະ­ມາ­ຊິກ​ອາ​ຊຽນ ກໍ​ຄື ເຂົ້າ​ໃນ​ການ​ສືບ­ຕໍ່​ສ້າງ​ປະ­ຊາ​ຄົມ​ອາ​ຊຽນ ແຕ່​ຍັງ​ມີ​ຫຼາຍ​ບັນ­ຫາ​ທີ່​ຊາວ​ໜຸ່ມ​ຈະ​ຕ້ອງ​ໄດ້​ພ້ອມ​ກັນ​ເອົາ­ໃຈ­ໃສ່​ຮ່ວມ​ແຮງ​ຊ່ວຍ­ເຫຼືອ ເຊິ່ງ​ກັນ ແລະ ກັນ ລະ­ຫວ່າງ ຊາວ​ໜຸ່ມ​ບັນ­ດາ​ປະ­ເທດ​ສະ­ມາ­ຊິກ​ອາ​ຊຽນ​ເກົ່າ (ອາ​ຊຽນ 6) ແລະ ຊາວ​ໜຸ່ມ​ບັນ­ດາ​ປະ­ເທດ​ສະ­ມາ­ຊິກ​ອາ​ຊຽນ​ໃໝ່ (ກຳ­ປູ­ເຈຍ ລາວ ມຽນ​ມາ ແລະ ຫວຽດ­ນາມ) ດ້ວຍ​ການ​ເພີ່ມ​ການ​ໄປ­ມາ­ຫາ­ສູ່​ກັນ ການ​ຊ່ວຍ­ເຫຼືອ​ສ້າງ​ຂີດ​ຄວາມ​ສາ­ມາດ ການ​ແລກ­ປ່ຽນ​ບົດ­ຮຽນ​ທີ່​ດີ​ນຳ​ກັນ ລວມ​ທັງ​ການ​ຮ່ວມ​ມື​ສະ­ໜິດ​ແໜ້ນ​ກັບ​ຊາວ​ໜຸ່ມ ປະ­ເທດ​ຄູ່​ຮ່ວມ​ເຈລະ­ຈາ​ອາ​ຊຽນ ແລະ ຄູ່​ຮ່ວມ​ມື​ພາຍ​ນອກ​ອື່ນໆ ພ້ອມ​ນັ້ນ ອາດ​ເວົ້າ​ໄດ້​ວ່າ ຊາວ​ໜຸ່ມ​ປຽບ​ເໝືອນ​ກະ­ດູກ​ສັນ­ຫຼັງ​ຂອງ​ຊາດ-ເປັນ​ຜູ້​ອອກ​ໜ້າ​ປະ­ຈັນ­ບານ ປະ­ກອບ­ສ່ວນ​ເຂົ້າ​ໃນ​ທຸກ​ຂະ­ແໜງ­ການ​ວຽກ​ງານ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ປະ­ເທດ​ຊາດ ໄວ​ໜຸ່ມ​ປຽບ     ເໝືອນ​ປັດ​ໄຈ​ຂັບ​ເຄື່ອນ​ໃນ​ທຸກ​ຂົງ­ເຂດ​ການ​ພັດ­ທະ­ນາ ເປັນ​ຕົວ​ເຊື່ອມ​ໂຍງ​ລະ­ຫວ່າງ​ການ​ພັດ­ທະ­ນາ​ປັດ­ຈຸ­ບັນ ແລະ ອະ­ນາ­ຄົດ ລະ­ຫວ່າງ​ປະ­ເທດ​ກັບ​ພາກ​ພື້ນ ລະ­ຫວ່າງ​ພາກ​ພື້ນ​ກັບ​ສາ­ກົນ​ໃຫ້​ມີ​ຄວາມ​ໝັ້ນ­ຄົງ​ຍືນ​ຍົງ ແລະ ວັດ­ທະ­ນາ​ຖາ­ວອນ.

    ຕອນ​ບ່າຍ​ຂອງ​ມື້​ດຽວ​ກັນ ສູນ​ກາງ​ຊາວ​ໜຸ່ມ ປະ­ຊາ­ຊົນ​ປະ­ຕິ­ວັດ​ລາວ​ກໍ​ໄດ້​ສືບ­ຕໍ່​ເປັນ​ເຈົ້າ­ພາບ​ຈັດ​ກອງ​ປະ­ຊຸມ​ລັດ­ຖະ­ມົນ­ຕີ​ຊາວ​ໜຸ່ມ​ອາ​ຊຽນ+ 3 ຄັ້ງ​ທີ 7 ເຊິ່ງ​ໃນ​ນີ້ ກອງ​ປະ­ຊຸມ​ໄດ້​ຮັບ​ຊາບ​ການ​ລາຍ​ງານ​ຄວາມ​ຄືບ​ໜ້າ​ຂອງ​ການ​ຮ່ວມ​ມື​ຕ່າງໆ​ໃນ​ຂອບ​ເຂດ​ວຽກ​ງານ​ຊາວ​ໜຸ່ມ​ອາ​ຊຽນ+3 ລວມ​ທັງ​ແຜນ​ວຽກ​ຊາວ​ໜຸ່ມ​ອາ​ຊຽນ 2016-2020 ທີ່​ມີ​ສ່ວນ​ຮ່ວມ​ໂດຍ​ປະ­ເທດ​ອາ​ຊຽນ+3 ໃນ​ໄລ­ຍະ​ຜ່ານ​ມາ ແລະ ແລກ­ປ່ຽນ​ຄຳ​ຄິດ​ຄຳ​ເຫັນ​ໃນ​ການ​ກຳ­ນົດ​ທິດ​ທາງ​ກ່ຽວ​ກັບ​ການ​ສ້າງ​ແຜນ​ວຽກ​ງານ​ຊາວ​ໜຸ່ມ​ອາ​ຊຽນ​ຫຼັງ​ປີ 2020 ໂດຍ​ອີງ­ໃສ່​ຜົນ​ຂອງ​ການ­ຈັດ­ຕັ້ງ​ປະ­ຕິ­ບັດ​ແຜນ​ວຽກ​ຜ່ານ​ມາ ແລະ ຂົງ­ເຂດ​ບຸ­ລິ­ມະ­ສິດ​ຂອງ​ແຜນ​ວຽກ​ການ​ຮ່ວມ​ມື​ອາ​ຊຽນ+3 ໄລ­ຍະ 2018-2022.

ຂ່າວທີ່ກ່ຽວຂ້ອງ