ໃຊ້ສື່ສ້າງຊາດ

2.337 22 ກ.ລ. 2019 ນານາສາລະ

    ການ​ນຳ​ໃຊ້​ສື່­ສານ​ທັນ​ສະ­ໄໝ​ເພື່ອ​ປະ­ໂຫຍດ​ຂອງ​ຊີ­ວິດ​ນັ້ນ ຖື​ເປັນ​ການ​ພັດ­ທະ­ນາ​ຖືກ​ທາງ ຂະ­ນະ​ດຽວ​ກັນ​ອາດ​ຍັງ​ມີ​ບາງ​ຄົນ ຫຼື ເຈົ້າ​ຂອງ​ບາງ​ເພດ (Page) ທີ່​ບໍ່​ເຂົ້າ­ໃຈ​ເລິກ​ຈະ­ແຈ້ງ​ເຖິງ​ບົດ­ບາດ ແລະ ໜ້າ­ທີ່​ຕົນ​ເອງ ອາດ​ຍັງ​ໃຊ້​ສື່­ສານ​ຕ່າງໆ​ຕາມ­ໃຈ ຫຼື ອວດ​ອ້າງ​ບາ​ລະ​ມີ​ຂອງ​ຕົນ ທັງໆ​ທີ່​ແຕ່​ລະ​ອາ­ຊີບ ຫຼື ພະ­ນັກ­ງານ​ແຕ່​ລະ​ຝ່າຍ​ກໍ​ມີ​ລະ­ບຽບ ແລະ ຈັນ​ຍາ​ບັນ​ຂອງ​ຕົນ​ຫ້າມ​ໄວ້​ລະ­ອຽດ​ຢູ່​ແລ້ວ.

    ຜູ້​ຂຽນ​ຂໍ​ຍົກ​ຕົວ­ຢ່າງ: ອພສ ສູນ​ກາງ ກໍ​ໄດ້​ອອກ​ແຈ້ງ​ການ​ເລກ​ທີ 217/2019 ເພື່ອ​ເຂັ້ມ​ງວດ​ກວດ​ຂັນ​ພະ­ສົງ​ສາ­ມະ­ເນນ ໃຫ້​ໃຊ້​ສື່­ສານ​ອິນ​ເຕີ​ເນັດ​ຢ່າງ​ມີ​ສະ­ຕິ ແລະ ໃຫ້​ເໝາະ​ສົມ​ກັບ​ສາ​ມະ­ນະ​ສາ​ຮູບ ນີ້​ຄື​ເບື້ອງ​ອົງ­ການ​ສົງ​ທີ່​ເພິ່ນ​ເຂັ້ມ​ງວດ ເພື່ອ​ຄວາມ​ເປັນ​ລະ­ບຽບ​ຮຽບ​ຮ້ອຍ ເພາະ​ທຸກ​ມື້­ນີ້​ຜູ້​ບໍ່​ຫວັງ​ດີ​ຕໍ່​ຊາດ ແລະ ສັງ­ຄົມ​ມີ​ຫຼາກ​ຫຼາຍ ບາງ​ກໍ­ລະ­ນີ​ຕ່າງ­ປະ­ເທດ​ກໍ​ມາ​ໃນ​ຮູບ​ແບບ​ພະ­ສົງ ຫຼື ຜູ້­ດີ​ມີ​ຕະ­ກຸນ ຂໍ​ແຕ່​ວ່າ​ຄົບ​ຄົນ​ໃຫ້​ເບິ່ງ​ໜ້າ ຊື້​ຜ້າ​ໃຫ້​ເບິ່ງ​ເນື້ອ​ນໍ !.

    ເມື່ອ​ວັນ​ທີ 12/2019 ຜ່ານ​ມາ​ນີ້ ທາງ​ຫ້ອງ­ການ​ກະ­ຊວງ​ກະ​ແຫຼງ​ຂ່າວ ແລະ ວັດ­ທະ­ນະ­ທຳ ກໍ​ໄດ້​ອອກ​ແຈ້ງ​ການ​ເລກ​ທີ 256/ຫກ ເລື່ອງ​ການ​ສ້າງ­ຕັ້ງ​ໜ້າ​ຂ່າວ­ສານ​ອອນ​ລາຍ (Social media) ເພື່ອ​ໃຫ້​ທຸກ​ຄົນ​ໃນ​ສັງ­ຄົມ​ເຄື່ອນ​ໄຫວ​ສ້າງ​ຂ່າວ​ອອນ​ລາຍ ຫຼື ພາ­ຫະ­ນະ​ສື່​ຕ່າງໆ ກໍ​ສາ­ມາດ​ເຮັດ​ໄດ້​ຂໍ​ພຽງ​ໃຫ້​ໄດ້​ຮັບ​ອະ­ນຸ­ຍາດ​ຈາກ​ກົມ​ສື່​ມວນ​ຊົນ ກະ­ຊວງ​ຖະ­ແຫຼງ​ຂ່າວ-ວັດ­ທະ­ນະ­ທຳ ແລະ ທ່ອງ​ທ່ຽວ ເພື່ອ​ໃຫ້​ສັງ­ຄົມ​ໄດ້​ປະ­ໂຫຍດ​ຈາກ​ການ​ອ່ານ​ຂ່າວ­ສານ ໃຫ້​ເກີດ​ຄວາມ​ເຂົ້າ­ໃຈ​ໄປ​ໃນ​ທິດ​ທາງ​ດຽວ​ກັນ​ກັບ​ພາກ​ສື່­ສານ​ຂອງ​ລັດ ໂດຍ​ສະ­ເພາະ ກໍ​ແມ່ນ​ຜູ້​ທີ່​ເຮັດ​ໜ້າ­ທີ່​ຕ່າງໆ​ກໍ​ຄວນ​ກຳ​ແໜ້ນ​ລະ­ບຽບ​ກົດ­ໝາຍ​ຂອງ​ພັກ-ລັດ ແລະ ກົດ­ໝາຍ​ສື່​ມວນ​ຊົນ ແລະ ຂໍ້​ຫ້າມ​ຕ່າງໆ​ໄວ້​ແລ້ວ.

    ສຳ­ລັບ​ຝ່າຍ​ກະ­ຊວງ​ປ້ອງ​ກັນ​ຄວາມ​ສະ­ຫງົບ ກໍ​ໄດ້​ອອກ​ຄຳ​ສັ່ງ ເລກ​ທີ 583/ປກສ ລົງ​ວັນ​ທີ 3 ເມ­ສາ 2019 ໂດຍ​ໄດ້​ເນັ້ນ​ຫຼາຍ​ຈຸດ­ປະ­ສົງ​ເພື່ອ​ປົກ​ປັກ​ຮັກ­ສາ ລະ­ບອບ​ປະ­ຊາ­ທິ­ປະ­ໄຕ​ປະ­ຊາ­ຊົນ ສ່ວນ​ເນື້ອ​ໃນ​ກໍ​ມີ​ຂໍ້​ຫ້າມ ເຊັ່ນ: ຫ້າມ​ນາຍ ແລະ ພົນ​ຕຳ­ຫຼວດ​ຖ່າຍ­ຮູບ​ນຸ່ງ​ເຄື່ອງ​ແບບ​ຕິດ​ຊັ້ນ​ປະ­ກອບ​ອາ­ວຸດ​ເຕັກ­ນິກ​ຕ່າງໆ Post ໃນ​ສື່​ຕ່າງໆ... ສ່ວນ​ຕົວ ແລະ ສັງ­ຄົມ​ກໍ​ເຫັນ​ຕາມ​ນຳ​ຂໍ້​ຫ້າມ​ຕ່າງໆ ເພື່ອ​ຄວາມ​ເປັນ​ລະ­ບຽບ​ຂອງ​ສັງ­ຄົມ ເພາະ​ຄຳ​ສັ່ງ​ດັ່ງ­ກ່າວ​ແມ່ນ​ໄດ້​ອອກ​ຂໍ້​ຫ້າມ​ລະ­ອຽດ​ໄວ້​ແລ້ວ ບໍ່​ໃຫ້​ປັ່ນ​ປ່ວນ-ຫຼອກ​ລວງ-ບິດ​ເບືອນ... ສ້າງ​ຄວາມ​ເສຍ​ຫາຍ​ແກ່​ພໍ່​ແມ່​ປະ­ຊາ­ຊົນ​ບັນ­ດາ­ເຜົ່າ.

    ສັງ​ລວມ​ໄດ້​ວ່າ: ສຳ­ລັບ​ພະ­ນັກ­ງານ​ພັກ-ລັດ ແລະ ກຳ­ລັງ ປກສ ຫຼື ອາ­ຊີບ​ອື່ນ​ຕ່າງ​ກໍ​ມີ​ລະ­ບຽບ ແລະ ຂໍ້​ຫ້າມ (ຈັນ​ຍາ​ບັນ) ຂອງ​ຕົນ​ຢູ່​ແລ້ວ ຂໍ​ພຽງ​ແຕ່​ການ­ຈັດ­ຕັ້ງ​ແຕ່​ລະ​ຝ່າຍ​ເຂັ້ມ​ງວດ​ກວດ​ຂັນ​ກັນ​ຄືນ ບາງ­ທີ​ອາດ​ຍັງ​ມີ​ພວກ​ນົກ​ລຶ້ງ​ຜຽກ.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ