ຣັກບີ້ລາວ ຈັດເຝິກທັກສະໃຫ້ເຍົາວະຊົນ 80 ຄົນ

556 23 ກ.ລ. 2019 ວົງຈອນກີລາ
ຣັກບີ້ລາວ ຈັດເຝິກທັກສະໃຫ້ເຍົາວະຊົນ 80 ຄົນ

    ສະ­ຫະ­ພັນ​ກີ­ລາ​ຣັກ​ບີ້​ແຫ່ງ​ຊາດ​ລາວ ຈັດ​ແຄ້ມ​ເຝິກ​ສອນ​ທັກ​ສະ ແລະ ປະ­ສົບ​ການ​ໃຫ້​ເຍົາ­ວະ​ຊົນ ແລະ ນັກ­ກີ­ລາ​ຣັກ​ບີ້​ລາວ 80 ຄົນ ຂຶ້ນ​ວັນ​ທີ 17-20 ກໍ­ລະ­ກົດ 2019 ທີ່​ສູນ​ເຝິກ​ກີ­ລາ​ແຫ່ງ​ຊາດ ບ້ານ​ສີ​ເກີດ ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ ມີ​ອະ­ດີດ​ຕຳ­ນານ​ຮັກ​ບີ້​ລະ­ດັບ​ໂລກ​ທ່ານ David Corkery ນັກ­ກີ­ລາ​ທີມ​ຊາດ​ອຽກ​ລັງ ທ່ານ Todd Clever ນັກ­ກີ­ລາ​ທີມ​ຊາດ​ສະ­ຫະ­ລັດ​ອາ​ເມ​ຣິ​ກາ ທ່ານ ນາງ Grace Davitt ນັກ­ກີ­ລາ​ທີມ​ຊາດ​ອຽກ​ລັງ ແລະ ທ່ານ ນາງ Tamara Taylor ນັກ­ກີ­ລາ​ທີມ​ຊາດ​ອັງ­ກິດ ໄດ້​ຈັດ​ແຄ້ມ​ເຝິກ​ສອນ​ພາຍ​ໃຕ້​ໂຄງ­ການ​ແຄ້ມ​ຫຼິ້ນ​ຕຳ 100 World legends Rugby for life champ ban contact camp ໃຫ້​ນັກ­ກີ­ລາ​ຣັກ​ບີ້ ນະ­ຄອນ­ຫຼວງ​ວຽງ​ຈັນ ແລະ ແຂວງ​ຊຽງ​ຂວາງ.

    ທ່ານ ປີ​ຊາ ວົງ​ເດືອນ​ເພັງ ຜູ້­ອຳ­ນວຍ­ການ​ຝ່າຍ​ພັດ­ທະ­ນາ​ກີ­ລາ​ຣັກ​ບີ້ ສະ­ຫະ­ພັນ​ກີ­ລາ​ຣັກ​ບີ້​ແຫ່ງ​ຊາດ​ລາວ ກ່າວ​ວ່າ: ການ​ຈັດ​ແຄ້ມ​ເຝິກ​ສອນ​ໃຫ້​ແກ່​ນັກ​ກິ­ລາ​ເຍົາ­ວະ​ຊົນ​ຄັ້ງ​ນີ້​ເພື່ອ​ເປັນ​ການ​ສ້າງ​ໂອ­ກາດ​ດີ​ໃຫ້​ກັບ​ເຍົາ­ວະ​ຊົນ ແລະ ນັກ­ກີ­ລາ​ຣັກ​ບີ້​ລາວ​ເຮົາ​ໃຫ້​ໄດ້​ຮຽນ​ຮູ້ ທັກ​ສະ ແລະ ປະ­ສົບ​ການ ຈາກ​ຄູ​ເຝິກ​ທີ່​ເປັນ​ນັກ­ກີ­ລາ​ໃນ​ຕຳ­ນານ​ຂອງ​ກີ­ລາ​ຣັກ​ບີ້​ລະ­ດັບ​ໂລກ ເຊິ່ງ​ເປັນ​ສິ່ງ​ທີ່​ທຸກ​ຄົນ​ຫາ​ຮຽນ​ຮູ້​ໄດ້​ຍາກ ຕະ­ຫຼອດ​ໄລ­ຍະ​ການ​ຈັດ​ແຄ້ມ​ນັກ­ກີ­ລາ​ຈະ​ໄດ້​ຮຽນ​ຮູ້​ທັກ​ສະ​ຕ່າງໆ​ທັງ​ພາກ​ທິດ​ສະ​ດີ ແລະ ການ​ປະ­ຕິ­ບັດ​ຕົວ​ຈິງ ນອກ​ນັ້ນ​ຍັງ​ຈະ​ມີ​ການ​ຈັດ­ການ​ແຂ່ງ­ຂັນ ເພື່ອ​ທົດ​ສອບ​ຄວາມ​ເຂົ້າ­ໃຈ​ຂອງ​ນັກ­ກີ­ລາ​ວ່າ​ໄດ້​ຫຍັງ​ແດ່​ຈາກ​ການ​ຈັດ​ແຄ້ມ​ເຝິກ​ສອນ​ຄັ້ງ​ນີ້.

    ການ​ຈັດ​ແຄ້ມ​ເຝິກ​ສອນ​ນອກ­ຈາກ​ນັກ­ກີ­ລາ​ໄດ້​ຮຽນ​ຮູ້​ທັກ​ສະ ແລະ ປະ­ສົບ​ການ​ຈາກ​ອະ­ດີດ​ນັກ­ກີ­ລາ​ຕຳ­ນານ​ລະ­ດັບ​ໂລກ​ແລ້ວ ສະ­ຫະ­ພັນ​ກີ­ລາ​ຣັກ​ບີ້​ແຫ່ງ​ຊາດ​ລາວ​ຍັງ​ໄດ້​ນຳ​ເອົາ​ຄູ​ເຝິກ​ສອນ​ທີມ​ຊາດ ນັກ­ກີ­ລາ​ທີມ​ຊາດ ແລະ ຄູ​ເຝິກ​ທີ່​ມີ​ປະ­ສົບ​ການ​ສູງ​ຈາກ Tribe 7s ເຊິ່ງ​ເປັນ​ທີມ​ທີ່​ສ້າງ​ນັກ­ກີ­ລາ​ທີມ​ຊາດ ໃຫ້​ແກ່​ທີມ​ຊາດ​ອົດ​ສະ​ຕຣາ​ລີ​ຫຼາຍ​ທີ່​ສຸດ​ກໍ​ຄື ທ່ານ ນາງ Maia ມາ​ແລກ­ປ່ຽນ​ບົດ­ຮຽນ ແລະ ຖ່າຍ​ທອດ​ປະ­ສົບ​ການ​ຕ່າງໆ​ອີກ​ດ້ວຍ.

ຂ່າວທີ່ກ່ຽວຂ້ອງ