ຂ່າວຫຼ້າສຸດ

ສະພາປະຊາຊົນນະຄອນຫຼວງ ຈະພິຈາລະນາ ແລະ ຮັບຮອງບັນຫາສຳຄັນ

223 23 ກ.ລ. 2019 ຂ່າວໜ້າ​ໜຶ່ງ
ສະພາປະຊາຊົນນະຄອນຫຼວງ ຈະພິຈາລະນາ ແລະ ຮັບຮອງບັນຫາສຳຄັນ

    ກອງ​ປະ­ຊຸມ​ສະ­ໄໝ​ສາ­ມັນ ເທື່ອ​ທີ 7 ຂອງ​ສະ­ພາ​ປະ­ຊາ­ຊົນ ນະ­ຄອນ­ຫຼວງ​ວຽງ​ຈັນ ຈະ​ດຳ­ເນີນ​ໃນ​ວັນ​ທີ 24-26 ກໍ­ລະ­ກົດ 2019 ທີ່​ຫ້ອງ​ປະ­ຊຸມ​ສຳ­ນັກ­ງານ​ອົງ­ການ​ປົກ­ຄອງ ນະ­ຄອນ­ຫຼວງ​ວຽງ​ຈັນ ທ່ານ ສາ­ລະ​ພິດ ສູນ​ວໍ­ລະ​ວົງ ຄະ­ນະ​ປະ­ຈຳ ເລ­ຂາ­ທິ­ການ​ສະ­ພາ​ປະ­ຊາ­ຊົນ ນະ­ຄອນ­ຫຼວງ​ວຽງ​ຈັນ ຖະ­ແຫຼງ​ຂ່າວ​ຕໍ່​ສື່​ມວນ​ຊົນ​ໃນ​ວັນ​ທີ 19 ກໍ­ລະ­ກົດ ນີ້ ວ່າ: ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 7 ຂອງ​ສະ­ພາ​ປະ­ຊາ­ຊົນ ນະ­ຄອນ­ຫຼວງ​ວຽງ​ຈັນ ຈະ​ພິ­ຈາ­ລະ­ນາ ແລະ ຮັບ­ຮອງ ເອົາ​ບັນ­ຫາ​ສຳ­ຄັນ​ພື້ນ­ຖານ​ຂອງ​ນະ­ຄອນ­ຫຼວງ​ວຽງ​ຈັນ.

    ການ​ສ້າງ​ນິ­ຕິ​ກຳ​ໃນ​ລະ­ບົບ​ກົດ­ໝາຍ ແລະ ການ​ຕິດ­ຕາມ​ກວດ­ກາ​ບັນ­ດາ​ອົງ­ການ​ບໍ­ລິ­ຫານ​ລັດ​ຂັ້ນ ນະ­ຄອນ­ຫຼວງ ວຽງ​ຈັນ ໃນ​ການ­ຈັດ­ຕັ້ງ​ປະ­ຕິ­ບັດ​ລັດ​ຖະ​ທຳ​ມະ­ນູນ ກົດ­ໝາຍ ແລະ ບັນ­ດາ​ນິ­ຕິ​ກຳ​ຕ່າງໆ ລວມ​ເຖິງ​ການ​ຕິດ­ຕາມ​ກວດ­ກາ ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ທາງ​ດ້ານ​ການ­ເມືອງ ການ​ປົກ­ຄອງ  ດ້ານ​ເສດ­ຖະ­ກິດ-ສັງ­ຄົມ ແລະ ວຽກ​ງານ​ງົບ​ປະ ມານ​ແຫ່ງ​ລັດ ໄລ­ຍະ 6 ເດືອນ​ຕົ້ນ​ປີ 2019 ຜ່ານ​ມາ ຂອງ​ນະ­ຄອນ­ຫຼວງ​ວຽງ​ຈັນ ພ້ອມ​ນີ້ ຍັງ​ຈະ​ໄດ້​ພິ­ຈາ­ລະ­ນາ ແລະ ຮັບ­ຮອງ​ເອົາ​ບັນ­ຫາ​ສຳ­ຄັນ​ຕ່າງໆ ເປັນ­ຕົ້ນ ບົດ​ລາຍ​ງານ​ຂອງ​ອົງ­ການ​ປົກ­ຄອງ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ​ທະ ນາ​ເສດ­ຖະ­ກິດ-ສັງ­ຄົມ ແຜນ​ງົບ­ປະ­ມານ​ແຫ່ງ​ລັດ 6 ເດືອນ​ຕົ້ນ​ປີ ແລະ ທິດ​ທາງ​ແຜນ­ການ 6 ເດືອນ​ທ້າຍ​ປີ 2019 ແລະ ສະ­ເໜີ​ດັດ­ແກ້​ງົບ­ປະ­ມານ ປີ 2019 ຂອງ​ນະ­ຄອນ­ຫຼວງ​ວຽງ​ຈັນ ພິ­ຈາ­ລະ­ນາ ແລະ ຮັບ­ຮອງ​ເອົາ​ການ​ສະ­ເໜີ ແຕ່ງ­ຕັ້ງ​ສະ­ມາ­ຊິກ​ອົງ­ການ​ປົກ­ຄອງ​ຕາມ​ການ​ສະ­ເໜີ​ຂອງ​ທ່ານ​ເຈົ້າ​ຄອງ ຮັບ​ຟັງ​ການ​ຊີ້​ແຈງ​ບັນ­ຫາ​ສຳ­ຄັນ ແລະ ພົ້ນ​ເດັ່ນ ເຊັ່ນ: ການ​ແກ້​ໄຂ​ບັນ­ຫາ​ຂໍ້​ຂັດ​ແຍ່ງ​ທີ່​ດິນ​ທົ່ວ​ນະ­ຄອນ­ຫຼວງ​ວຽງ​ຈັນ ຄວາມ​ຄືບ​ໜ້າ​ຂອງ​ການ​ປະ­ຕິ­ບັດ​ໂຄງ­ການ ການ ຊົດ​ເຊຍ​ທີ່​ດິນ ແລະ ສິ່ງ​ປຸກ​ສ້າງ​ໃຫ້​ແກ່​ປະ­ຊາ­ຊົນ​ທີ່​ຖືກ​ຜົນ​ກະ­ທົບ ຄື: ໂຄງ­ການ​ກໍ່­ສ້າງ​ເສັ້ນ­ທາງ​ດ່ວນ ນະ­ຄອນ­ຫຼວງ ວຽງ​ຈັນ ຫາ ບໍ່​ເຕັນ ໄລ­ຍະ​ທີ 1 ນະ­ຄອນ­ຫຼວງ​ວຽງ​ຈັນ ຫາ ວັງ​ວຽງ ແຂວງ​ວຽງ​ຈັນ ໂຄງ­ການ​ກໍ່­ສ້າງ​ເສັ້ນ­ທາງ​ດອນ ນົກ​ຂຸ້ມ ຫາ 450 ປີ ຂອງ​ບໍ­ລິ­ສັດ​ນ້ຳ​ທາ ກໍ່­ສ້າງ​ຂົວ​ທາງ ໂຄງ­ການ​ກໍ່­ສ້າງ​ມະ­ຫາ­ວິ­ທະ­ຍາ­ໄລ ວິ­ທະ­ຍາ­ສາດ​ສຸ­ຂະ­ພາບ ຂອງ​ກະ­ຊວງ​ສາ­ທາ­ລະ­ນະ​ສຸກ ໂຄງ­ການ​ກໍ່­ສ້າງ​ສະ­ໜາມ​ກ໋ອບ​ລ່ອງ​ແທັງ ຂອງ​ບໍ­ລິ­ສັດ​ລົງ­ທຶນ​ວຽງ​ຈັນ ແລະ ອະ​ສັງ​ຫາ ລິ​ມະ​ຊັບ ການ​ອະ­ນຸ­ຍາດ​ໃຫ້​ນັກ​ລົງ­ທຶນ​ຕ່າງ­ປະ­ເທດ​ລົງ­ທຶນ​ປູກ​ກ້ວຍ ຢູ່​ເມືອງ​ໄຊ​ທາ­ນີ ເມືອງ​ນາ​ຊາຍ​ທອງ ເມືອງ​ສັງ​ທອງ ແລະ ເມືອງ​ປາກ​ງື່ມ ມີ​ຜົນ​ດີ ຜົນ​ກະ­ທົບ ແລະ ການ​ຄຸ້ມ​ຄອງ​ການ​ນຳ​ໃຊ້​ສານ​ເຄ​ມີ ບັນ­ຫາ​ໄຟ​ເຍືອງ​ທາງ​ຕາມ​ແຕ່​ລະ ເສັ້ນ­ທາງ ບັນ­ຫາ​ນ້ຳ​ເປື້ອນ​ທີ່​ໄຫຼ​ລົງ​ຮ່ອງ​ແຊງ ສົ່ງ​ກິ່ນ​ເໝັນ​ແກ່​ປະ­ຊາ­ຊົນ​ທີ່​ອາ­ໄສ​ຢູ່​ໃກ້​ຄຽງ ການ​ຕິດ­ຕາມ​ກວດ­ກາ​ການ ປະ­ຕິ­ບັດ​ຄຳ​ສັ່ງ​ຕ່າງໆ​ຂອງ​ອົງ­ການ​ໄອ​ຍະ​ການ​ທີ່​ໄດ້​ອອກ​ໄປ​ແລ້ວ ໄດ້​ຮັບ​ການ​ປະ­ຕິ­ບັດ​ຄື​ແນວ­ໃດ ການ​ຄຸ້ມ​ຄອງ​ກອງ ທຶນ​ບຳ­ບັດ​ຜູ້​ຕິດ​ຢາ​ເສບ​ຕິດ ນະ­ຄອນ­ຫຼວງ​ວຽງ​ຈັນ ແລະ ການ​ຄຸ້ມ​ຄອງ​ຜູ້​ຖືກ​ຫາ ແລະ ນັກ­ໂທດ​ຢູ່​ຄ້າຍ​ຄຸມ​ຂັງ-ດັດ​ສ້າງ ນະ­ຄອນ­ຫຼວງ​ວຽງ​ຈັນ.

ຂ່າວທີ່ກ່ຽວຂ້ອງ