ຂ່າວຫຼ້າສຸດ

UMCOR ສະໜັບສະໜູນທຶນຫຼາຍກວ່າ 4 ຕື້ກີບ ເຂົ້າໃນວຽກງານເກັບກູ້ລະເບີດບໍ່ທັນແຕກ

216 23 ກ.ລ. 2019 ຂ່າວໜ້າ​ໜຶ່ງ
UMCOR ສະໜັບສະໜູນທຶນຫຼາຍກວ່າ 4 ຕື້ກີບ ເຂົ້າໃນວຽກງານເກັບກູ້ລະເບີດບໍ່ທັນແຕກ

    ພິ­ທີ​ເຊັນ​ບົດ​ບັນ­ທຶກ​ຄວາມ​ເຂົ້າ­ໃຈ ລະ­ຫວ່າງ​ຫ້ອງ­ການ​ຄະ­ນະ​ກຳ­ມະ­ການ​ຄຸ້ມ​ຄອງ​ແຫ່ງ​ຊາດ ເພື່ອ​ແກ້​ໄຂ​ບັນ­ຫາ​ລະ­ເບີດ​ບໍ່​ທັນ​ແຕກ​ທີ່​ຕົກ​ຄ້າງ​ຢູ່ ສປປ ລາວ (ທຄຊກລ) ແລະ ອົງ­ການ​ເກັບ​ກູ້​ລະ­ເບີດ​ແມັກ ປະ­ຈຳ​ລາວ ສຳ­ລັບ​ໂຄງ­ການ​ກວດ​ກູ້​ລະ­ເບີດ​ເພື່ອ​ສະ­ໜັບ­ສະ­ໜູນ​ການ​ພັດ­ທະ­ນາ​ຊຸມ​ຊົນ​ຢູ່​ເມືອງ​ຍົມ​ມະ​ລາດ ແຂວງ​ຄຳ​ມ່ວນ ການ​ເຊັນ​ບົດ​ບັນ­ທຶກ​ໃນ​ຄັ້ງ​ນີ້​ໄດ້​ມີ​ຂຶ້ນ​ໃນ​ວັນ​ທີ 19 ກໍ­ລະ­ກົດ 2019 ທີ່​ໂຮງ­ແຮມ​ເລີ​ທາດ­ຫຼວງ ລະ­ຫວ່າງ ທ່ານ ໂຈມ​ແຍງ ແພງ​ທອງ​ສະ​ຫວັດ ຫົວ­ໜ້າ​ຫ້ອງ­ການ​ຄະ­ນະ​ກຳ­ມະ­ການ​ຄຸ້ມ​ຄອງ​ແຫ່ງ​ຊາດ ເພື່ອ​ການ​ແກ້​ໄຂ​ລະ­ເບີດ​ບໍ່​ທັນ​ແຕກ​ທີ່​ຕົກ​ຄ້າງ​ຢູ່ ສປປ ລາວ ແລະ ທ່ານ​ນາງ ໂຈ​ແອນ ລາ​ເທີ​ເຣຍ ຜູ້​ຮັກ­ສາ​ການ​ຫົວ­ໜ້າ​ອົງ­ການ​ເກັບ​ກູ້​ລະ ເບີດ​ແມັກ ປະ­ຈຳ​ລາວ ມີ​ທ່ານ ບຸນ​ທວາຍ ສີ​ລິ​ປັນ­ຍາ​ທອງ ຫົວ­ໜ້າ​ພະ​ແນກ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ແຂວງ​ຄຳ​ມ່ວນ ທ່ານ ພາ­ກອນ ແກ້ວ​ມະ­ນີ ຮອງ​ຫົວ­ໜ້າ​ຫ້ອງ​ວ່າ­ການ​ແຂວງ​ຄຳ​ມ່ວນ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ສຳ­ລັບ​ໂຄງ­ການ​ເກັບ​ກູ້​ລະ­ເບີດ​ເພື່ອ​ສະ­ໜັບ­ສະ­ໜູນ​ການ​ພັດ­ທະ­ນາ​ຊຸມ​ຊົນ​ໃນ​ຄັ້ງ​ນີ້ ແມ່ນ​ຈັດ​ຕັ້ງ​ປະ­ຕິ­ບັດ​ໂດຍ ອົງ­ການ​ເກັບ​ກູ້​ລະ­ເບີດ​ແມັກ ປະ­ຈຳ​ລາວ ໂດຍ​ໄດ້​ຮັບ​ທຶນ​ສະ­ໜັບ­ສະ­ໜູນ​ຈາກ ມູນ​ນິ­ທິ ອຳ​ຄໍ( UMCOR ) ຂອງ​ສະ­ຫະ­ລັດ​ອາ​ເມ​ຣິ​ກາ ມູນ​ຄ່າ 500.000 ໂດ​ລາ​ສະ­ຫະ­ລັດ ຫຼື ປະ­ມານ 4,3 ຕື້​ກວ່າ​ກີບ ເພື່ອ​ຈັດ​ຕັ້ງ​ປະ­ຕິ­ບັດ​ກິດ­ຈະ­ກຳ​ການ​ກວດ​ກູ້​ເນື້ອ­ທີ່​ດິນ​ເພື່ອ​ສົ່ງ­ເສີມ​ຄວາມ​ຢູ່​ດີ​ກິນ​ດີ ແລະ ການ​ດຳ­ລົງ​ຊີ­ວິດ​ຂອງ​ປະ­ຊາ­ຊົນ​ໃນ​ເຂດ​ເມືອງ​ຍົມ​ມະ​ລາດ ແຂວງ​ຄຳ​ມ່ວນ ໂດຍ​ສະ­ເພາະ 5 ບ້ານ​ເປົ້າ​ໝາຍ ຄື: ບ້ານ​ຄຳ​ແຮ ຫາງ​ການ ຊຽງ​ດາວ ສ້າງ​ປຸງ​ບອນ ແລະ ບ້ານ​ຕາ​ລາກ ໄລ­ຍະ​ເວ­ລາ​ຈັດ​ຕັ້ງ​ປະ­ຕິ­ບັດ​ເລີ່ມ​ແຕ່​ນີ້​ເຖິງ 31 ສິງ­ຫາ 2020 .

    ການ​ສະ­ໜັບ­ສະ­ໜູນ​ຂອງ​ມູນ​ນິ​ທີ​ດັ່ງ­ກ່າວ ແມ່ນ​ເປັນ​ການ​ປະ­ກອບ­ສ່ວນ​ສຳ­ຄັນ​ຕໍ່​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ການ­ຈັດ­ຕັ້ງ​ຍຸດ​ທະ​ສາດ ວ່າ​ດ້ວຍ​ເສັ້ນ­ທາງ​ຄວາມ​ປອດ​ໄພ 2 ປີ 2020 ເປົ້າ​ໝາຍ​ການ​ພັດ­ທະ­ນາ​ທີ່​ຍືນ​ຍົງ​ໂດຍ​ສະ­ເພາະ ເປົ້າ​ໝາຍ​ທີ 18 ເຊິ່ງ​ເປັນ​ເປົ້າ​ໝາຍ​ທີ່​ປິ່ນ​ອ້ອມ ແລະ ຕິດ​ພັນ​ກັບ​ການ​ລົບ​ລ້າງ​ຄວາມ­ທຸກ​ຍາກ.

ຂ່າວທີ່ກ່ຽວຂ້ອງ