ຂ່າວຫຼ້າສຸດ

ASEAN ກາຍເປັນ​ຄູ່​ຮ່ວມ​ດ້ານ​ການ​ຄ້າ​ໃຫຍ່​ອັນ​ດັບ​ສອງ​ຂອງ​ ຈີນ

118 23 ກ.ລ. 2019 ຂ່າວຕ່າງປະເທດ

   ແຫຼ່ງ​ຂ່າວ​ຈາກ​ປັກ​ກິງ ໃຫ້​ຮູ້​ວ່າ ໃນ 6 ເດືອນ​ຕົ້ນ​ປີ 2019 ສະມາຄົມ​ບັນດາ​ປະເທດ​ອາຊີ ຕາເວັນ​ອອກ​ສ່ຽງ​ໃຕ້ (ASEAN) ໄດ້​ລ້ຳ​ໜ້າ ສ ອາ​ເມ​ຣິ​ກາ ເພື່ອ​ກາຍເປັນ​ຄູ່​ຮ່ວມ​ດ້ານ​ການ​ຄ້າ ໃຫຍ່​ອັນ​ດັບ​ທີ 2 ຂອງ​ຈີນ ໂດຍ​ເປັນ​ຮອງ​ຈາກ​ສະຫະພາບ​ເອີ​ຣົບ (EU) .

    ຕົວ​ເລກ​ຫຼ້າ​ສຸດ​ຈາກ​ສະຫະ​ກົມ​ພາສີ​ຂອງ​ຈີນ ໃຫ້​ຮູ້​ວ່າ ໃນ 6 ເດືອນ​ຕົ້ນ​ປີ 2019 ການ​ຄ້າ​ຂອງ​ຈີນ ກັບ ASEAN ໄດ້​ເພີ່ມ​ຂຶ້ນ 10,5% ບັນລຸ​ມູນ​ຄ່າ​ເກືອບ 2.000 ຕື້​ຢວນ (ເທົ່າ​ກັບ​ປະມານ 294 ຕື້​ໂດ​ລາ​ສະຫະລັດ) ກວມ​ເອົາ 13,5% ຂອງ​ຍອດ​ບໍ​ລິ​ມາດ​ການ​ຄ້າ​ຂອງ​ຈີນ.

    ໃນ​ຂະນະ​ດຽວ​ກັນ ການ​ຄ້າ​ລະຫວ່າງ​ຈີນ ກັບ EU ເພີ່ມ​ຂຶ້ນ 11,2% ເປັນ​ມູນ​ຄ່າ 2.300 ຕື້​ຢວນ (ເທົ່າ​ກັບ 338 ຕື້​ໂດ​ລາ​ສະຫະລັດ) ແລະ ກວມ​ເອົາ 12% ຂອງ​ຍອດ​ບໍ​ລິ​ມາດ ການ​ຄ້າ​ຂອງ​ຈີນ. ນັບ​ແຕ່​ປີ 2004 ເປັນຕົ້ນ​ມາ EU ໄດ້​ລ້ຳ​ໜ້າ ສ ອາ​ເມ​ຣິ​ກາ ກາຍເປັນ​ຄູ່​ຮ່ວມ ດ້ານ​ການ​ຄ້າ​ໃຫຍ່​ອັນ​ດັບ​ໜຶ່ງ​ຂອງ​ຈີນ.

    ໃນ​ຂະນະ​ດຽວ​ກັນ ໃນ 6 ເດືອນ​ຕົ້ນ​ປີ 2019 ການ​ຄ້າ​ຂອງ​ຈີນ ກັບ ສ ອາ​ເມ​ຣິ​ກາ ໄດ້​ຫຼຸດ​ລົງ 9% ໄປ​ຍັງ​ເຫຼືອ​ມູນ​ຄ່າ​ທີ່ 1.800 ຕື້​ຢວນ (ເທົ່າ​ກັບ 264 ຕື້​ໂດ​ລາ​ສະຫະລັດ) ແລະ ກວມ​ເອົາ 12% ຂອງ​ຍອດ​ບໍ​ລິ​ມາດ​ການ​ຄ້າ​ຂອງ​ຈີນ. ໄລ່​ສະເພາະ​ແຕ່​ໃນ​ເດືອນ​ມິຖຸນາ ປີ 2019 ເທົ່າ​ນັ້ນ ການເຄື່ອນໄຫວ​ສົ່ງ​ອອກ​ສິນຄ້າ​ຂອງ​ຈີນ ໄປ​ຍັງ ສ ອາ​ເມ​ຣິ​ກາ ໄດ້​ຫຼຸດ​ລົງ 8% ເມື່ອ​ທຽບໃສ່​ເວລາ​ດຽວ​ກັນ​ຂອງ​ປີ 2018 ໃນ​ຂະນະ​ທີ່​ຈີນ​ນຳ​ເຂົ້າ​ສິນຄ້າ​ຈາກ ສ ອາ​ເມ​ຣິ​ກາ ກໍ​ຫຼຸດ​ລົງ 31%.

ຂ່າວທີ່ກ່ຽວຂ້ອງ