ຂ່າວຫຼ້າສຸດ

2/3 ຂອງ​ຈຳນວນ​ປະຊາກອນ​ໂລກ ຈະ​ດຳລົງ​ຊີວິດ​ຢູ່​ໃນ​ຕົວ​ເມືອງ ພາຍ​ໃນ​ປີ 2050

116 23 ກ.ລ. 2019 ຂ່າວຕ່າງປະເທດ
2/3 ຂອງ​ຈຳນວນ​ປະຊາກອນ​ໂລກ ຈະ​ດຳລົງ​ຊີວິດ​ຢູ່​ໃນ​ຕົວ​ເມືອງ ພາຍ​ໃນ​ປີ 2050

    ໃນ​ບົດ​ປາ​ໄສ​ເນື່ອງ​ໃນ​ໂອກາດ​ຄົບຮອບ 25 ປີ ຂອງ​ກອງ​ປະຊຸມ​ສາກົນ ກ່ຽວ​ກັບ​ປະຊາກອນ ແລະ ການ​ພັດທະນາ (ICPD) ນັ້ນ ທ່ານ ອັນໂຕ​ນີ​ໂອ ກູ​ເຕີ​ເຣ​​ສ ເລຂາທິການ​ໃຫຍ່​ຂອງ​ອົງການ​ສະຫະ​ປະຊາ​ຊາດ (​ສປຊ) ແຈ້ງ​ໃຫ້​ຮູ້ເມື່ອ​ວັນ​ທີ 16 ກໍລະກົດ​ນີ້​ວ່າ ຂະ​ບວນ​ການ​ຫັນ​ເປັນ​ຕົວ​ເມືອງ​ສືບຕໍ່​ເກີດ​ຂຶ້ນ ແລະ ດ້ວຍ​ຈັງຫວະ​ການ​ຫັນ​ເປັນ​ຕົວ​ເມືອງ​ທີ່​ເປັນ​ໄປ​ຄື​ດັ່ງ​ປັດຈຸບັນ​ນີ້ ເມື່ອ​ຮອດ​ປີ 2050 ຈະ​ມີ 2/3 ຂອງ​ຈຳນວນ​ປະຊາກອນ​ໂລກ ດຳລົງ​ຊີວິດ​ຢູ່​ໃນ​ເຂດ​ຕົວ​ເມືອງ.

   ທ່ານ ກູ​ເຕີ​ເຣ​​ສ ເວົ້າ​ວ່າ ໃນ 25 ປີ​ທີ່​ຜ່ານ​ມາ ໂລກ​ໄດ້​ມີ​ບາດກ້າວ​ຫຼາຍ​ພໍ​ສົມຄວນ ໃນ​ບັນຫາ​ປະຊາກອນ ແລະ ການ​ພັດທະນາ ຊຶ່ງ​ກ່ອນ​ອື່ນ​ໝົດ ກໍ​ແມ່ນ​ບັນຫາ​ການ​ເພີ່ມ​ຂຶ້ນ​ຂອງ​ປະຊາກອນ. ນັ້ນ​ເປັນ​ຜົນງານ​ຂອງ​ມວນ​ມະນຸດ ເພາະວ່າ ການ​ເພີ່ມ​ຂຶ້ນ​ຂອງ​ປະຊາກອນ ມີ​ຄວາມ​ໝາຍວ່າ​ອາຍຸ​ຍືນ​ຂອງ​ປະຊາຊົນ​ສູງ​ຂຶ້ນ​ກວ່າ​ເກົ່າ ການ​ມີ​ສຸຂະພາບ​ທີ່​ດີ​ກວ່າ​ເກົ່າ ມີ​ຄວາມ​ໝາຍວ່າ​ພື້ນຖານ​ການ​ແພດ ກໍ​ຄື​ເງື່ອນໄຂ​ການ​ດຳລົງ​ຊີວິດ​ມີ​ການ​ພັດທະນາ. ການ​ເພີ່ມ​ຂຶ້ນ​ຂອງ​ປະຊາກອນ ຈະ​ເປັນ​ການ​ປະກອບສ່ວນ ເຂົ້າ​ໃນ​ການ​ເພີ່ມ​ຂຶ້ນ​ໃນ​ການເຄື່ອນໄຫວ​ຜະລິດ ແລະ ການ​ບໍລິໂພກ​ໃນ​ທົ່ວ​ໂລກ. ຄຽງ​ຄູ່​ກັນ​ນັ້ນ ຄວາມ​ສະເໝີພາບ​ລະຫວ່າງ​ເພດ ກໍ​ຄື​ສິດທິ​ຂອງ​ແມ່ຍິງ ກໍ​ມີ​ຄວາມ​ກ້າວໜ້າ​ພໍ​ສົມຄວນ.

     ໃນ​ຂະນະ​ດຽວ​ກັນ ມີ 1/3 ຂອງ​ຈຳນວນ​ແມ່ຍິງ ແລະ ເດັກນ້ອຍ​ເພດ​ຍິງ​ໃນ​ທົ່ວ​ໂລກ ຖືກ​ກະທຳ​ຮຸນ​ແຮງ ຍິ່ງ​ໄປ​ກວ່າ​ນັ້ນ ອັດຕາ​ສ່ວນ​ດັ່ງກ່າວ​ຍັງ​ມີ​ສູງ​ກວ່າ ສຳລັບ​ຢູ່​ໃນ​ເຂດ​ທີ່​ບໍ່​ມີ​ຄວາມ​ໝັ້ນຄົງ. ດັ່ງນັ້ນ ທ່ານ ກູ​ເຕີ​ເຣ​​ສ ຈຶ່ງ​ໄດ້​ຮຽກຮ້ອງ​ໄປ​ຍັງ​ປະຊາ​ຄົມ​ສາກົນ ໃຫ້​ຮ່ວມ​ມື​ກັນ ເພື່ອ​ເຮັດ​ສຳເລັດ​ໜ້າ​ວຽກ​ທີ່​ຍັງ​ຄ້າງ​ຄາ​ຢູ່ ຂອງ​ກອງ​ປະຊຸມ​ສາກົນ ກ່ຽວ​ກັບ​ປະຊາກອນ ແລະ ການ​ພັດທະນາ ທີ່​ໄດ້​ຈັດ​ຂຶ້ນ ເມື່ອ​ປີ 1994 ທີ່​ນະຄອນຫຼວງ​ເລີ​ແກ (ປະເທດ​ເອ​ຢິບ).

    ໃນ​ກອງ​ປະຊຸມ​ສາກົນ ກ່ຽວ​ກັບ​ປະຊາກອນ ແລະ ການ​ພັດທະນາ ເມື່ອ​ປີ 1994 ທີ່​ນະ ຄອນ​ຫຼວງ​ເລີ​ແກ ນັ້ນ ມີ 179 ປະເທດ ແລະ ເຂດ​ແຄວ້ນ ໄດ້​ຮັບຮອງ​ໂຄງການ​ດຳເນີນ​ງານ​ແກ່ຍາວ 20 ປີ (ໄດ້​ຮັບ​ການ​ຕໍ່​ກຳນົດ​ເມື່ອ​ປີ 2010) ໃນ​ນັ້ນ​ໄດ້​ເນັ້ນ​ໜັກ​ເຖິງ​ການ​ພົວພັນ​ອັນ​ແໜ້ນ​ແຟ້ນ ລະຫວ່າງ​ປະຊາກອນ ກັບ​ການ​ພັດທະນາ.

ຂ່າວທີ່ກ່ຽວຂ້ອງ