ຂ່າວຫຼ້າສຸດ

ຊັບ​ສິນ​ຂອງ​ຄອບຄົວ​ໂດຍ​ສະເລ່ຍ​ຢູ່​ໃນ​ອົດ​ສະ​ຕຣາ​ລີ ບັນລຸ​ເກີນ​ແດນ 1 ລ້ານ​ໂດ​ລາ

109 23 ກ.ລ. 2019 ຂ່າວຕ່າງປະເທດ
ຊັບ​ສິນ​ຂອງ​ຄອບຄົວ​ໂດຍ​ສະເລ່ຍ​ຢູ່​ໃນ​ອົດ​ສະ​ຕຣາ​ລີ ບັນລຸ​ເກີນ​ແດນ 1 ລ້ານ​ໂດ​ລາ

   ຕົວ​ເລກ​ຂອງ​ອົງການ​ສະຖິຕິ​ອົດ​ສະ​ຕຣາ​ລີ (ABS) ທີ່​ໄດ້​ນຳ​ອອກ​ມາ​ເປີດເຜີຍ​ເມື່ອ​ບໍ່​ດົນ​ມາ​ນີ້ ຊີ້​ໃຫ້​ເຫັນ​ວ່າຊັບ​ສິນ​ຂອງ​ຄອບຄົວ​ໂດຍ​ສະເລ່ຍ​ຢູ່​ໃນ​ອົດ​ສະ​ຕຣາ​ລີ ໄດ້​ເກີນ​ແດນ 1 ລ້ານ​ອົດ​ສະ​​ຕຣາ​ລີ      (ເທົ່າ​ກັບ​ປະມານ 700.000 ໂດ​ລາ​ສະຫະລັດ) ເປັນ​ເທື່ອ​ທຳ​ອິດ​ໃນ​ປະຫວັດສາດ​ຂອງ​​ອົ​ສະ​ຕຣາ​ລີ.

     ໃນ​ຮອບ​ໜຶ່ງ​ທົດ​ສະ​ວັດ​ທີ່​ຜ່ານ​ມາ ໂດຍ​ໄລ່​ຮອດ​ປີ 2017-2018 ຊັບ​ສິນ​ຂອງ​ຄອບຄົວ​ໂດຍ​ສະເລ່ຍ​ຢູ່​ໃນ​ອົດ​ສະ​ຕຣາ​ລີ  ເພີ່ມ​ຂຶ້ນ​ກວ່າ 37% ຂຶ້ນ​ເປັນ 1,02 ລ້ານ​ໂດ​ລາ​ອົດ​ສະ​ຕຣາ​ລີ ທຽບໃສ່​ເກືອບ 749.000 ໂດ​ລາ​ອົດ​ສະ​​ຕຣາ​ລີ ໃນ​ປີ 2005-2006.

     ທ່ານ ບຣູ​​ສ ຮອກ​ແມນ ຊ່ຽວຊານ​ດ້ານ​ເສດຖະກິດ​ຂອງ ABS ເວົ້າ​ວ່າ ມີ​ສອງ​ປັດ​ໄຈ​ຕົ້ນຕໍ ປະກອບ​ເຂົ້າ​ໃນ​ຄວາມ​ຮັ່ງມີ​ຂອງ​ບັນດາ​ຄອບຄົວ​ໃນ​ອົດ​ສະ​ຕຣາ​ລີ ນັ້ນ​ກໍ​ແມ່ນ​ກະ​ສັງຫາລິມະ​ຊັບ (ເຮືອນ​ຢູ່) ແລະ ກອງ​ທຶນ​ບຳນານ.

     ອົດ​ສະ​ຕຣາ​ລີ ເປັນ​ປະເທດ​ທີ່​ມີ 2/3 ຂອງ​ຈຳນວນ​ປະຊາຊົນ ຄອບ​ຄອງ​ທັງ​ໝົດ ຫຼື​ສ່ວນ​ໜຶ່ງ​ຂອງ​ເຮືອນ​ຢູ່ ແລະ ໃນ​ເມື່ອ​ລາຄາ​ທີ່​ດິນ ແລະ ເຮືອນ​ເພີ່ມ​ຂຶ້ນ ກໍ​ນຳໄປ​ສູ່​ການ​ເຮັດ​ໃຫ້​ຍອດ​ຊັບ​ສິນ​ກໍ​ເພີ່ມ​ຂຶ້ນ​ໄປ​ນຳ. ພ້ອມ​ກັນ​ນັ້ນ ຈຳນວນ​ເງິນເດືອນ​ບຳນານ​ທີ່​ຍັງ​ເຫຼືອ​ສະເລ່ຍ​ຂອງ​ຄອບຄົວ ກໍ​ເພີ່ມ​ຂຶ້ນ​ເກືອບ​ທົບ​ສອງ​ເທົ່າ​ຕົວ (90%) ຈາກ 112.500 ໂດ​ລາ​ອົດ​ສະ​ຕຣາ​ລີ ໃນ​ປີ 2005-2006 ຂຶ້ນ​ເປັນ 213.700 ໂດ​ລາ​ອົດ​ສະ​ຕຣາ​ລີ ໃນ​ປີ 2017-2018.

ເຖິງ​ຢ່າງໃດ​ກໍ​ຕາມ ທ່ານ ບຣູ​​ສ ຮອກ​ແມນ ໃຫ້​ຮູ້​ວ່າ ຄວາມ​ເຕີບ​ໂຕ​ຂອງ​ລາຍ​ຮັບ​ໃນ​ທົດ​ສະ​ວັດ​ທີ່​ຜ່ານ​ມາ ຊັກ​ຊ້າ​ຫຼາຍ​ພໍ​ສົມຄວນ ໂດຍ​ທີ່​ລາຍ​ຮັບ​ສະເລ່ຍ​ໃນ​ແຕ່​ລະ​ອາທິດ ຂອງ​ຄອບຄົວ ເພີ່ມ​ຂຶ້ນ​ພຽງ 44 ໂດ​ລາ​ອົດ​ສະ​ຕຣາ​ລີ ຂຶ້ນ​ເປັນ 1.062 ໂດ​ລາ​ອົດ​ສະ​ຕຣາ​ລີ ໃນ​ປີ 2017-2018 ທຽບໃສ່​ລະດັບ​ເພີ່ມ​ຂຶ້ນ 220 ໂດ​ລາ​ອົດ​ສະ​ຕຣາ​ລີ ພາຍ​ໃນ​ສີ່​ປີ ຂຶ້ນ​ເປັນ 1.018 ໂດ​ລາ​ອົດ​ສະ​ຕຣາ​ລີ ໃນ​ປີ 2007-2008.

ຂ່າວທີ່ກ່ຽວຂ້ອງ