ຂ່າວຫຼ້າສຸດ

ກາ​ນາ​ດາ​ຖືກ​ຈັດ​ຢູ່​ໃນ​ອັນ​ດັບ​ຕົ້ນ​ຂອງ​ໝວດ 10 ປະເທດ​ທີ່​ຖ່າຍ​ເທ​ຂີ້​ເຫຍື້ອ​ຫຼາຍ​ສຸດ​ໃນ​ໂລກ

111 23 ກ.ລ. 2019 ຂ່າວຕ່າງປະເທດ
ກາ​ນາ​ດາ​ຖືກ​ຈັດ​ຢູ່​ໃນ​ອັນ​ດັບ​ຕົ້ນ​ຂອງ​ໝວດ 10 ປະເທດ​ທີ່​ຖ່າຍ​ເທ​ຂີ້​ເຫຍື້ອ​ຫຼາຍ​ສຸດ​ໃນ​ໂລກ

   ການ​ຕີ​ລາຄາ​ຂອງ 24/7 Tempo (ຂຶ້ນ​ກັບ​ບໍລິສັດ​ສື່ສານ 24/7 Wall Street ໃນ ສ ອາ​ເມ​ຣິ​ກາ) ໃຫ້​ຮູ້​ວ່າ ບົນ​ພື້ນຖານ​ຂໍ້​ມູນ​ຂອງ​ທະນາຄານ​ໂລກ (WB) ເຫັນ​ວ່າ ກາ​ນາ​ດາ ເປັນ​ປະເທດ​ທີ່​ຖືກ​ຈັດ​ຢູ່​ໃນ​ແຖວ​ໜ້າ ໃນ​ບັນຊີ​ລາຍ​ຊື່ 10 ປະເທດ ທີ່​ຖ່າຍ​ເທ​ຂີ້​ເຫຍື້ອ​ອອກ​ມາ​ຫຼາຍ​ທີ່​ສຸດ​ໃນ​ໂລກ ເມື່ອ​ໃສ່​ຫົວ​ຄົນ ໂດຍ​ທີ່ 10 ປະເທດ​ໃນ​ໝວດ​ດັ່ງກ່າວ ປະກອບ​ມີ ກາ​ນາ​ດາ ບູນ​ກາ​ຣີ ສ ອາ​ເມ​ຣິ​ກາ ເອ​​ສ​ໂຕ​ນີ ແຟງ​ລັງ ອາກ​ເມ​ນີ ຊູ​ແອດ ລຸກ​ຊຳ​ບວກ ອູ​ແກຣນ ແລະ  ແຊກ​ບີ.

     ສະຖິຕິ​ຊີ້​ໃຫ້​ເຫັນ​ວ່າ ປະລິມານ​ຂີ້​ເຫຍື້ອ​ທີ່​ຖ່າຍ​ເທ​ອອກ​ມາ ສະເລ່ຍ​ໃສ່​ຫົວ​ຄົນ​ໃນ​ແຕ່​ລະ​ປີ ຢູ່​ໃນ​ກາ​ນາ​ດາ ແມ່ນ​ຢູ່​ທີ່ 36,1 ໂຕນ. ຍອດ​ປະລິມານ​ຂີ້​ເຫຍື້ອ​ໃນ​ແຕ່​ລະ​ປີ ຢູ່​ໃນ​ກາ​ນາ​ດາ ມີ​ເຖິງ 1,33 ຕື້​ໂຕນ ໃນ​ນັ້ນ ອັດຕາ​ສ່ວນ​ຂີ້​ເຫຍື້ອ​ທີ່​ນຳ​ມາ​ປຸງ​ແຕ່ງ​ໃໝ່ ຢູ່​ທີ່​ລະດັບ 20,6%.

    ໃນ​ຂະນະ​ດຽວ​ກັນ ບູນ​ກາ​ຣີ ຊຶ່ງ​ມີ​ປະຊາກອນ​ພຽງ 7 ລ້ານ​ກວ່າ​ຄົນ ໄດ້​ກາຍເປັນ​ປະເທດ​ທີ່​ຖ່າຍ​ເທ​ຂີ້​ເຫຍື້ອ​ອອກ​ມາ​ຫຼາຍ​ເປັນ​ອັນ​ສອງ​ໃນ​ໂລກ ເມື່ອ​ໄລ່​ໃສ່​ຫົວ​ຄົນ ໂດຍ​ທີ່​ປະລິມານ​ຂີ້​ເຫຍື້ອ​ສະເລ່ຍ​ຂອງ​ແຕ່ລະຄົນ​ໃນ​ແຕ່​ລະ​ປີ ມີ​ເຖິງ 26,7 ໂຕນ ໃນ​ຂະນະ​ທີ່​ອັດຕາ​ສ່ວນ​ການ​ປຸງ​ແຕ່ງ​ຂີ້​ເຫຍື້ອ​ຄືນໃໝ່ ບັນລຸ​ທີ່ 19%.

    ຈັດ​ຢູ່​ໃນ​ອັນ​ດັບ​ສາມ ໃນ​ຕາຕະລາງ​ດັ່ງກ່າວ​ກໍ​ແມ່ນ ສ ອາ​ເມ​ຣິ​ກາ ໂດຍ​ມີ​ປະລິມານ​ຂີ້​ເຫຍື້ອ​ທີ່​ຖ່າຍ​ເທ​ອອກ​ມາ ສະເລ່ຍ​ໃສ່​ຫົວ​ຄົນ​ໃນ​ແຕ່​ລະ​ປີ​ຢູ່​ທີ່ 25,9 ໂຕນ ແລະ ອັດຕາ​ສ່ວນ​ຂີ້​ເຫຍື້ອ​ທີ່​ນຳ​ມາ​ປຸງ​ແຖ່ງ​ຄືນໃໝ່ ບັນລຸ 34,6%. ເຖິງ​ຢ່າງໃດ​ກໍ​ຕາມ ເມື່ອ​ໄລ່​ຕາມ​ຍອດ​ປະລິມານ​ການ​ປ່ອຍ​ຂີ້​ເຫຍື້ອ​ແລ້ວ ສ ອາ​ເມ​ຣິ​ກາ ຖືກ​ຈັດ​ຢູ່​ໃນ​ອັນ​ດັບ​ແຖວ​ໜ້າ ໃນ​ບັນຊີ​ດັ່ງກ່າວ ໂດຍ​ໃນ​ແຕ່​ລະ​ປີ ມີ​ຂີ້​ເຫຍື້ອ​ຖ່ານ​ເທ​ອອກ​ມາ​ເກືອບ 8,5 ຕື້​ໂຕນ.

    ອົງການ​ສິ່ງແວດລ້ອມ​ຂອງ​ສະຫະ​ປະຊາ​ຊາດ (UNEP) ໃຫ້​ຮູ້​ວ່າ ໃນ​ແຕ່​ລະ​ປີ ມີ​ການ​ຜະລິດ​ຂີ້​ເຫຍື້ອ​ປະເພດ​ຢາງ​ອອກ​ມາ ປະມານ 300 ລ້ານ​ໂຕນ ໃນ​ນັ້ນ​ມີ 8 ລ້ານ​ໂຕນ ໄຫຼ​ອອກ​ສູ່​ມະຫາ​ສະໝຸດ​ຕ່າງໆ. ໃນ​ຂະນະ​ດຽວ​ກັນ WB ໃຫ້ການ​ຕີ​ລາຄາ​ວ່າ ໂລກ​ພວມ​ຈົມ​ຢູ່​ໃນ​ຂີ້​ເຫຍື້ອ ໂດຍ​ທີ່​ປະຊາກອນ​ເຕີບ​ໂຕ​ໄປ​ພ້ອມໆ​ກັບ​ການ​ພັດທະນາ​ຕົວ​ເມືອງ ເຮັດ​ໃຫ້​ບໍ​ລິ​ມາດ​ຂີ້​ເຫຍື້ອ​ເພີ່ມ​ຂຶ້ນ​ຢ່າງ​ບໍ່​ຢຸດ​ຢັ້ງ ໂດຍ​ຄາດ​ວ່າ​ຈະ​ເພີ່ມ​ຂຶ້ນ​ເຖິງ 70% ໃນ​ໄລຍະ​ປີ 2016-2050.

    ສະຖິຕິ​ຢ່າງ​ເປັນ​ທາງ​ການ ຂອງ​ສະຫະພາບ​ເອີ​ຣົບ (EU) ໃຫ້​ຮູ້​ວ່າ ປະມານ 30-35% ຂອງ​ຍອດ​ປະລິມານ​ຂີ້​ເຫຍື້ອ ຢູ່​ໃນ​ເກືອບ​ທັງ​ໝົດ​ຂອງ​ບັນດາ​ປະເທດ​ທີ່​ພັດທະນາ​ແລ້ວ ແມ່ນ​ມາ​ຈາກ​ການເຄື່ອນໄຫວ​ກໍ່ສ້າງ.

ຂ່າວທີ່ກ່ຽວຂ້ອງ