ຂ່າວຫຼ້າສຸດ

ຟີ​ລິບ​ປິນ ຈະ​ລົງໂທດ​ໜັກ​ຕໍ່​ພຶດຕິ​ກຳ​ກໍ່ກວນ​ທາງ​ເພດ

128 23 ກ.ລ. 2019 ຂ່າວຕ່າງປະເທດ
ຟີ​ລິບ​ປິນ ຈະ​ລົງໂທດ​ໜັກ​ຕໍ່​ພຶດຕິ​ກຳ​ກໍ່ກວນ​ທາງ​ເພດ

   ເຈົ້າ​ໜ້າທີ່​ຟີ​ລິບ​ປິນ ແຈ້ງ​ໃຫ້​ຮູ້ເມື່ອ​ວັນ​ທີ 15 ກໍລະກົດ​ທີ່​ຜ່ານ​ມາ​ວ່າ ປະທານາທິບໍດີ ຟີ​ລິບ​ປິນ ໂຣດ​ຣີ​ໂກ ດູ​ເຕີ​ເຕ ໄດ້​ລົງ​ນາມ​ປະກາດ​ໃຊ້​ກົດໝາຍ​ວ່າ​ດ້ວຍ​ສາທາລະນະ​ລັດ 11313 ຫຼື​ທີ່​ຮູ້​ກັນ​ວ່າ​ເປັນ ກົດໝາຍ​ວ່າ​ດ້ວຍ​ຊ່ອງ​ຫວ່າງ​ດ້ານ​ຄວາມ​ປອດ​ໄພ ເປັນ​ການ​ລົງໂທດ​ບັນດາ​ເປົ້າ​ໝາຍ ທີ່​ມີ​ພຶດຕິ​ກຳ​ກໍ່ກວນ ຫຼື​ລວນ​ລາມ​ທາງ​ເພດ.

ກົດໝາຍ​ດັ່ງກ່າວ ໄດ້​ຈັດ​ພຶດຕິ​ກຳ​ຕ່າງໆ​ຫຼາຍ​ລາຍການ (ໃນ​ນັ້ນ​ມີ ການ​ຖີວ​ເພື່ອ​ເຢາະ​ເຢີ້ຍ ເບິ່ງ​ຢ່າງ​ຈ້ອງ​ໜ້າ​ຈ້ອງ​ຕາ ຢອກ​ລໍ້​ຢູ່​ຕາມ​ຖະໜົນ​ຫົນທາງ ຫຼື​ຢູ່​ໃນ​ບ່ອນ​ເຮັດ​ວຽກ ຢູ່​ເທິງ​ພາຫະນະ ແລະ ສະຖານທີ່​ສາທາລະນະ ໃນ​ໂຮງຮຽນ ໃນ​ຮ້ານ​ກິນ​ດື່ມ ຫຼື​ຮ້ານ​ອິນ​ເຕີ​ເນັດ ແລະ ອື່ນໆ) ນັ້ນ​ວ່າ​ເປັນ​ການ​ກໍ່ກວນ​ທາງ​ເພດ.

     ກົດໝາຍ​ດັ່ງກ່າວ ກໍ​ໄດ້​ກຳນົດ​ໃຫ້​ບັນດາ​ຮ້ານ​ກິນ​ດື່ມ ຮ້ານ​ອາຫານ ໂຮງ​ສາຍຮູບເງົາ ແລະ ສະຖານທີ່​ສາທາລະນະ​ອື່ນໆ ຕ້ອງ​ໄດ້​ຕິດ​ປ້າຍ​ແຈ້ງ​ເຕືອນ​ທີ່​ສາມາດ​ເບິ່ງ​ໄດ້​ງ່າຍ ໃນ​ນັ້ນ​ມີ​ເລກ​ໝາຍ​ໂທລະສັບ​ສາຍ​ດ່ວນ ເພື່ອ​ສາມາດ​ລາຍ​ງານ​ໄດ້​ຢ່າງ​ໄວວາ ກ່ຽວ​ກັບ​ການ​ກໍ່ກວນ​ທາງ​ເພດ. ຄຽງ​ຄູ່​ກັນ​ນັ້ນ ບັນດາ​ສະຖານທີ່​ດັ່ງກ່າວ ກໍ​ຕ້ອງ​ໄດ້​ຈັດ​ພະນັກງານ ຮັບ​ເອົາ​ການ​ລາຍ​ງານ ຫຼື​ການ​ຈັບ​ກຸມ​ຜູ້​ກະທຳ​ຜິດ.

      ການ​ລົງໂທດ​ຕໍ່​ເປົ້າ​ໝາຍ​ທີ່​ກະທຳ​ຜິດ ແມ່ນ​ປະກອບ​ມີ​ການ​ປັບ​ໃໝ​ເປັນ​ເງິນ ແລະ ຕັດສິນ​ໃຫ້​ຈຳ​ຄຸກ ໂດຍ​ຈະ​ຂຶ້ນ​ກັບ​ລະດັບ​ຄວາມ​ຮ້າຍ​ແຮງ​ຂອງ​ເລື່ອງ​ທີ່​ເກີດ​ຂຶ້ນ.  ສຳລັບ​ຄົນ​ຕ່າງປະເທດ ທີ່​ມີ​ພຶດຕິ​ກຳ​ກໍ່ກວນ​ທາງ​ເພດ ແມ່ນ​ຈະ​ຖືກ​ຂັບ​ໄລ່ (ອອກ​ຈາກ​ຟີ​ລິບ​ປິນ) ຫຼັງ​ຈາກ​ທີ່​ໄດ້​ຈ່າຍ​ຄ່າ​ປັບ​ໃໝ ແລະ ໝົດ​ເວລາ​ການ​ຖືກ​ຈຳ​ຄຸກ.

ຂ່າວທີ່ກ່ຽວຂ້ອງ