ຂ່າວຫຼ້າສຸດ

ສິງກະໂປ​ພະຍາຍາມ​ຮັບ​ມື​ກັບ​ສະພາບ​ນ້ຳ​ທະເລ​ໜູນ​ຂຶ້ນ

139 23 ກ.ລ. 2019 ຂ່າວຕ່າງປະເທດ
ສິງກະໂປ​ພະຍາຍາມ​ຮັບ​ມື​ກັບ​ສະພາບ​ນ້ຳ​ທະເລ​ໜູນ​ຂຶ້ນ

     ສິງກະໂປ​ພວມ​ເພີ່ມ​ທະວີ​ບັນດາ​ມາດ​ຕະການ ເພື່ອ​ຮັບ​ມື​ກັບ​ສະພາບ​ດິນ​ຟ້າ​ອາກາດ ປ່ຽນແປງ​ດ້ວຍ​ບ້ວງ​ເງິນ​ລົງທຶນ  400 ລ້ານ​ໂດ​ລາ​ສິງກະໂປ (ເທົ່າ​ກັບ 294 ລ້ານ​ໂດ​ລາ​ສະຫະລັດ) ເພື່ອ​ບຳລຸງ​ສ້ອມແຊມ ແລະ ຍົກ​ລະດັບ​ລະບົບ​ລະບາຍ​ນ້ຳ ພາຍ​ໃນ​ເວລາ 2 ປີ​ຕໍ່ໜ້າ ແລະ ອີກ 10 ລ້ານ​ໂດ​ລາ​ສິງກະໂປ (ເທົ່າ​ກັບ 7 ລ້ານ​ໂດ​ລາ​ສະຫະລັດ) ໃຫ້​ແກ່​ໂຄງການ​ຄົ້ນຄວ້າ​ລະດັບ​ນ້ຳ​ທະເລ ແຫ່ງ​ຊາດ ພາຍ​ໃນ​ເວລາ 5 ປີ ໂດຍ​ຜ່ານ​ນັ້ນ​ກໍ​ເປັນ​ການ​ຊຸກຍູ້​ການ​ພັດທະນາ​ບັນດາ​ໂຄງການ ເພື່ອ​ສະກັດ​ກັ້ນ​ລະດັບ​ນ້ຳ​ທະເລ​ໜູນ​ຂຶ້ນ.

    ນັບ​ແຕ່​ປີ 2011 ເປັນຕົ້ນ​ມາ ສິງກະໂປ​ໄດ້​ລົງທຶນ​ປະມານ 1,8 ຕື້​ໂດ​ລາ​ສິງກະໂປ (ເທົ່າ​ກັບ 1,3 ຕື້​ໂດ​ລາ​ສະຫະລັດ) ເຂົ້າ​ໃນ​ການ​ຍົກ​ລະດັບ​ລະບົບ​ລະບາຍ​ນ້ຳ ໂດຍ​ໃຫ້​ບຸລິມະສິດ​ເປັນ​ພິເສດ ໃຫ້​ແກ່​ບັນດາ​ເຂດ ທີ່​ມັກ​ເກີດ​ນ້ຳ​ຖ້ວມ​ຂັງ ໃນ​ນັ້ນ​ມີ 254 ຈຸດ​ທີ່​ຖືກ​ນ້ຳ​ຖ້ວມ​ຂັງ ໄດ້​ຮັບ​ການ​ແກ້​ໄຂ ນັບ​ແຕ່​ປີ 2014 ຮອດ​ທ້າຍ​ປີ 2018.

    ສູນ​ຄົ້ນຄວ້າ​ສະພາບ​ດິນ​ຟ້າ​ອາກາດ ທີ່​ຂຶ້ນ​ກັບ​ອົງການ​ອຸຕຸນິຍົມ ອຸ​ທົກ​ກະ​ສາດ ສິງກະໂປ (CCRS) ໃຫ້ການ​ພະຍາກອນ​ວ່າ ໃນ​ກໍລະນີ​ທີ່​ບໍ່​ຄ່ອຍ​ເກີດ​ຂຶ້ນ ກໍ​ຄື​ລະດັບ​ນ້ຳ​ທະເລ​ໂດຍ​ສະເລ່ຍ ໜູນ​ສູງ​ຂຶ້ນ ຄື້ນ​ນ້ຳ​ໜູນ​ສູງ ແລະ ຄື້ນ​ນ້ຳ​ສູງ ເກີດ​ຂຶ້ນ​ພ້ອມໆ​ກັນ ກໍ​ອາດ​ຈະ​ເຮັດ​ໃຫ້​ລະດັບ​ນ້ຳ​ທະເລ ຍຶ່ງ​ຂຶ້ນ​ເກືອບ 4 ແມັດ ເມື່ອ​ທຽບໃສ່​ລະດັບ​ສະເລ່ຍ​ໃນ​ປັດຈຸບັນ ແລະ ເຮັດ​ໃຫ້​ເຂດ​ແຄມ​ຝັ່ງ​ທະເລ ທີ່ຢູ່​ໃນ​ລະດັບ​ຕ່ຳ​ທັງ​ໝົດ ຈົມ​ຢູ່​ໃນ​ນ້ຳ.

ຂ່າວທີ່ກ່ຽວຂ້ອງ