ຂ່າວຫຼ້າສຸດ

ມະຫາ​ເສດຖີ ບີ​​ລ ເກດ ຕົກ​ຈາກ​ອັນ​ດັບ​ສອງ​ໃນ​ບັນຊີ​ລາຍ​ຊື່​ຄົນ​ລ້ຳ​ລວຍ

135 23 ກ.ລ. 2019 ຂ່າວຕ່າງປະເທດ
ມະຫາ​ເສດຖີ ບີ​​ລ ເກດ ຕົກ​ຈາກ​ອັນ​ດັບ​ສອງ​ໃນ​ບັນຊີ​ລາຍ​ຊື່​ຄົນ​ລ້ຳ​ລວຍ

    ທ່ານ ເບີ​ນາດ ອາກ​ນາ​ອຸດ (Bernard Arnault) ມະຫາ​ເສດຖີ​ຊາວ​ຝຣັ່ງ ຊຶ່ງ​ເປັນ​ປະທານ ບໍລິຫານ (CEO) ຂອງ​ບໍລິສັດ​ຜູ້​ຜະລິດ​ສິນຄ້າ​ຟູມ​ເຟືອຍ LVMH ລາຍ​ໃຫຍ່​ສຸດ​ຂອງ​ໂລກ ໄດ້​ມີ​ມູນ​ຄ່າ​ຊັບ​ສິນ​ສຸດທິ​ເພີ່ມ​ຂຶ້ນ​ເປັນ 107,6 ຕື້​ໂດ​ລາ​ສະຫະລັດ ແລະ ໄດ້​ມີ​ເກີນ​ມູນ​ຄ່າ​ຊັບ​ສິນ ຂອງ​ມະຫາ​ເສດ​ຖີດ ບີ​​ລ ເກດ (Bill Gates).

    ຍັງ​ບໍ່​ມີ​ຈັກ​ເທື່ອ ພາຍ​ໃນ​ຮອບ 7 ປີ​ທີ່​ຜ່ານ​ມາ ທີ່​ມະຫາ​ເສດຖີ ບີ​​ລ ເກດ ຖືກ​ຈັດ​ຢູ່​ໃນ ອັນ​ດັບ​ຕ່ຳ​ກວ່າ​ອັນ​ດັບ 2 ຢູ່​ໃນ​ຕາຕະລາງ​ຈັດ​ອັນ​ດັບ​ມະຫາ​ເສດຖີ ທີ່​ຈັດ​ທຳ​ໂດຍ Bloomberg Billionaires Index. ແຕ່​ວ່າ​ເລື່ອງ​ນັ້ນ​ໄດ້​ສິ້ນ​ສຸດ​ລົງ​ເມື່ອ​ວັນ​ທີ 16 ກໍລະກົດ​ທີ່​ຜ່ານ​ມາ ເມື່ອ​ມະຫາ ເສດຖີ ເບີ​ນາດ ອາກ​ນາ​ອຸດ ໄດ້​ຍູ້​ໃຫ້ ບີ​​ລ ເກດ ຊຶ່ງ​ເປັນ​ຜູ້​ຮ່ວມ​ກໍ່​ຕັ້ງ ບໍລິສັດ ໄມ​ໂຄຣ​ຊອບ (Microsoft) ລົງ​ໄປ​ຢູ່​ອັນ​ດັບ​ທີ 3.

     ໄລ່​ມາ​ຮອດ​ປັດຈຸບັນ ທ່ານ ເບີ​ນາດ ອາກ​ນາ​ອຸດ ມີ​ມູນ​ຄ່າ​ຊັບ​ສິນ​ສຸດທິ  ຫຼາຍ​ກວ່າ​ທ່ານ ບີ​​ລ ເກດ ທີ່ 200 ລ້ານ​ໂດ​ລາ​ສະຫະລັດ.  ໄລ່​ສະເພາະ​ແຕ່​ຕົ້ນ​ປີ 2019 ເປັນຕົ້ນ​ມາ ມູນ​ຄ່າ​ຊັບ​ສິນ​ຂອງ ທ່ານ ເບີ​ນາດ ອາກ​ນາ​ອຸດ ໄດ້​ເພີ່ມ​ຂຶ້ນ​ອີກ 39 ຕື້​ໂດ​ລາ​ສະຫະລັດ ນັບ​ວ່າ​ເປັນ​ລະດັບ ເພີ່ມ​ຂຶ້ນ​ຂອງ​ບຸກຄົນ ທີ່​ໃຫຍ່​ທີ່​ສຸດ​ໃນ​ຈຳນວນ​ມະຫາ​ເສດຖີ 500 ຄົນ ທີ່  Bloomberg ນຳ​ມາ​ຈັດ ອັນ​ດັບ.

    ແຕ່​ຖ້າ​ຫາກ​ບໍ່​ໄລ່​ເຖິງ​ບ້ວງ​ປະກອບສ່ວນ​ເພື່ອ​ການ​ກຸສົນ ທີ່​ມີ​ເຖິງ 35 ຕື້​ໂດ​ລາ​ສະຫະລັດ ນັ້ນແລ້ວ ມະຫາ​ເສດຖີ ບີ​​ລ ເກດ ຍັງ​ຈະ​ຄົງ​ເປັນ​ຜູ້​ທີ່​ລ້ຳ​ລວຍ​ທີ່​ສຸດ​ໃນ​ໂລກ. ໃນ​ຂະນະ​ດຽວ​ກັນ ມູນ​ຄ່າ​ຊັບ​ສິນ​ສຸດທິ​ຂອງ​ມະຫາ​ເສດຖີ ເຈ​​ຟ ບີ​​ຊອສ (Jeff Bezos) ໃນ​ປີ​ນີ້ ໄດ້​ເພີ່ມ​ຂຶ້ນ​ໜ້ອຍ​ໜຶ່ງ ແລະ ຂຶ້ນ​ເປັນ 125 ຕື້​ໂດ​ລາ​ສະຫະລັດ ແມ້​ກະ​ທັ້ງ​ວ່າ​ໄດ້​ບັນລຸ​ຂໍ້​ຕົກລົງ​ຢ່າ​ຮ້າງ​ເປັນ​ມູນ​ຄ່າ 35 ຕື້​ໂດ​ລາ​ສະຫະລັດ ກັບ​ຜູ້​ເປັນ​ພັນ​ລະ​ຍາ ຄື​ນາງ ນາງ MacKenzie Bezos.

ຂ່າວທີ່ກ່ຽວຂ້ອງ