ຂ່າວຫຼ້າສຸດ

ອັດຕາ​ສ່ວນ​ຄົນ​ຫວ່າງ​ງານ​ຢູ່​ໃນ​ອັງກິດ​ຫຼຸດ​ລົງ​ສູ່​ລະດັບ​ຕ່ຳ​ສຸດ​ໃນ​ຮອບ 45 ປີ

125 23 ກ.ລ. 2019 ຂ່າວຕ່າງປະເທດ
ອັດຕາ​ສ່ວນ​ຄົນ​ຫວ່າງ​ງານ​ຢູ່​ໃນ​ອັງກິດ​ຫຼຸດ​ລົງ​ສູ່​ລະດັບ​ຕ່ຳ​ສຸດ​ໃນ​ຮອບ 45 ປີ

   ຕົວ​ເລກ​ທີ່​ຫ້ອງການ​ສະຖິຕິ​ແຫ່ງ​ຊາດ​ອັງກິດ (ONS) ນຳ​ອອກ​ມາ​ປະກາດ​ເມື່ອ​ບໍ່​ດົນ​ມາ​ນີ້ ລະບຸ​ວ່າ ໃນ​ໄລຍະ​ເວລາ​ສາມ​ເດືອນ ຄື​ແຕ່​ເດືອນ​ມີນາ ຫາ​ເດືອນ​ພຶດສະພາ ປີ 2019  ລາຍ​ຮັບ​ຂອງ ຜູ້​ອອກແຮງ​ງານ​ໃນ​ອັງກິດ ຊຶ່ງ​ບໍ່​ລວມ​ເຖິງ​ເງິນເດືອນ ໄດ້​ເພີ່ມ​ຂຶ້ນ 3,6% ເມື່ອ​ທຽບໃສ່​ໄລຍະ ເວລາ​ດຽວ​ກັນ​ຂອງ​ປີ 2018 ນັບ​ວ່າ​ສູງ​ກວ່າ​ລະດັບ​ເພີ່ມ​ຂຶ້ນ 3,4% ໃນ​ໄລຍະ​ເວລາ​ສາມ​ເດືອນ ໂດຍ​ໄລ່​ຮອດ​ເດືອນ​ເມສາ 2019. ຫຼັງ​ຈາກ​ທີ່​ໄດ້​ດັດແກ້​ຕາມ​ເງິນ​ເຟີ້​ແລ້ວ ລະດັບ​ເພີ່ມ​ຂຶ້ນ​ຂອງ​ລາຍ​ຮັບ ຂອງ​ຜູ້​ອອກແຮງ​ງານ ຢູ່​ໃນ​ອັງກິດ ໃນ​ໄລຍະ​ເວລາ​ດັ່ງກ່າວ ແມ່ນ​ຢູ່​ທີ່ 1,7% ຊຶ່ງ​ເປັນຈັງ​ຫວະ​ເພີ່ມ ຂຶ້ນ​ໄວ​ທີ່​ສຸດ ນັບ​ແຕ່​ເດືອນ​ກັນຍາ ປີ 2015 ເປັນຕົ້ນ​ມາ.

      ONS ຍັງ​ໃຫ້​ຮູ້​ວ່າ ອັດຕາ​ສ່ວນ​ຄົນ​ຫວ່າງ​ງານ​ຢູ່​ໃນ​ອັງກິດ ໃນ​ປັດຈຸບັນ​ຢູ່​ທີ່​ລະດັບ 3,8% ຊຶ່ງ​ເປັນ​ລະດັບ​ຕ່ຳ​ສຸດ​ໃນ​ຮອບ 45 ປີ​ທີ່​ຜ່ານ​ມາ (ນັບ​ແຕ່​ປີ 1974 ເປັນຕົ້ນ​ມາ)  ໃນ​ຂະນະ​ທີ່ ອັດຕາ​ສ່ວນ​ຄົນ​ທີ່​ມີ​ວຽກ​ເຮັດ​ງານ​ທຳ ຢູ່​ໃກ້​ກັບ​ລະດັບ​ສູງ​ເປັນ​ສະຖິຕິ​ທີ່ 76% ຂອງ​ຈຳນວນ​ຄົນ​ໃນ​ໄວ ແຕ່ 16-64 ປີ.

     ເຖິງ​ຢ່າງໃດ​ກໍ​ຕາມ ຕົວ​ເລກ​ຂອງ ONS ຍັງ​ສະແດງ​ໃຫ້​ເຫັນ​ວ່າ ຕະຫຼາດ​ວຽກ​ເຮັດ ງານ​ທຳ​ໃນ​ອັງກິດ ພວມ​ປະກົດ​ໃຫ້​ເຫັນ​ເຖິງ​ຄວາມ​ອ່ອນແອ​ລົງ. ພາຍ​ໃນ​ເວລາ​ສາມ​ເດືອນ ໂດຍ​ໄລ່​ຮອດ​ເດືອນ​ພຶດສະພາ ປີ 2019 ມີ​ຕຳແໜ່ງ​ງານ​ໃໝ່​ອອກ​ມາ​ພຽງ​ທີ່​ປະມານ 28.000 ຕຳແໜ່ງ​ງານ ນັບ​ວ່າ​ຕ່ຳ​ກວ່າ​ລະດັບ 222.000 ຕຳແໜ່ງ​ງານ​ໃໝ່ ທີ່​ມີ​ອອກ​ມາ​ໃນ​ໄລຍະ​ເວລາ ແຕ່​ເດືອນ ຕຸລາ - ທັນວາ ປີ 2018. ຈຳນວນ​ຜູ້​ທີ່​ມີ​ວຽກ​ເຮັດ​ງານ​ທຳ​ເຕັມ​ເວລາ ກໍ​ໄດ້​ຫຼຸດ​ລົງ 78.000 ຄົນ ຊຶ່ງ​ເປັນ​ລະດັບ​ຫຼຸດ​ລົງ​ແຮງ​ສຸດ ນັບ​ແຕ່​ປີ 2011 ເປັນຕົ້ນ​ມາ. ໃນ​ຂະນະ​ດຽວ​ກັນ ປະລິມານ​ຕຳແໜ່ງ​ງານ​ຫວ່າງ ທີ່​ຕ້ອງ​ຮັບ​ສະໝັກ​ຄົນ ໃນ​ໄລຍະ​ເວລາ​ແຕ່​ເດືອນ ເມສາ - ມິຖຸນາ ປີ 2019 ໄດ້​ຫຼຸດ​ລົງ​ສູ່​ລະດັບ 827.000 ຕຳແໜ່ງ ໜ້ອຍ​ກວ່າ 19.000 ຕຳແໜ່ງ ເມື່ອ​ທຽບໃສ່ ໄລຍະ​ເດືອນ​ມັງກອນ - ມີນາ ປີ 2019.

ຂ່າວທີ່ກ່ຽວຂ້ອງ