ລະວັງພິດໄພຂອງກັບໂຟມ

2.376 26 ກ.ລ. 2019 ນານາສາລະ

    ຂ່າວ​ດັງ​ທີ່​ສັງ­ຄົມ​ບ້ານ​ເຮົາ​ສົນ­ໃຈ​ຂ່າວ ເບິ່ງ​ກໍ​ຄື ເລື່ອງ​ການ​ນຳ​ໃຊ້​ສານ​ເຄ​ມີ​ປະ­ກອບ​ໃນ​ການ​ກະ­ເສດ ຫຼື ຜະ­ລິດ​ອາ­ຫານ ເຊິ່ງ​ສົ່ງ​ຜົນ​ໃຫ້​ສິ່ງ­ແວ­ດລ້ອມ​ເປັນ​ພິດ​ໄພ​ຕໍ່​ຜູ້​ໃຊ້ ແລະ ຜູ້​ຢູ່​ອາ­ໄສ​ໃກ້​ຄຽງ ຫຼື ຖ້າ​ກໍ­ລະ­ນີ​ອາ­ຫານ​ກໍ​ສົ່ງ​ຜົນ​ຕໍ່​ສຸ­ຂະ­ພາບ​ໂດຍ​ກົງ ຖ້າ­ວ່າ​ພໍ່­ຄ້າ ແມ່​ຄ້າ​ຫວັງ​ແຕ່​ຜົນ​ກຳ­ໄລ ໂດຍ​ບໍ່​ຄຳ­ນຶງ​ເຖິງ​ສຸ­ຂະ­ພາບ​ຂອງ​ຜູ້​ບໍ­ລິ­ໂພກ ແລະ ຖ້າ​ຫາກ​ການ­ຈັດ­ຕັ້ງ​ກ່ຽວ­ຂ້ອງ​ບໍ່​ລົງ​ກວດ­ກາ​ເປັນ​ປະ­ຈຳ​ກໍ​ອາດ​ເກີດ​ຊ່ອງ​ຫວ່າງ​ຂອງ​ຄົນ​ຄ້າ­ຂາຍ​ສວຍ­ໂອ­ກາດ​ທັນ­ທີ.

    ບັນ­ຫາ​ການ​ນຳ​ໃຊ້​ການ​ເຄ​ມີ ບໍ່​ວ່າ​ໃນ​ອາ­ຊີບ​ໃດ​ກໍ​ຕາມ​ມັນ​ມີ​ແຕ່​ຈະ​ສົ່ງ​ຜົນ​ເສຍ​ຫຼາຍ​ກວ່າ​ຜົນ​ໄດ້ ຍົກ​ຕົວ­ຢ່າງ ຖ້າ­ວ່າ​ສຸ­ຂະ­ພາບ​ຂອງ​ເຍົາ­ວະ​ຊົນ​ລາວ​ບໍ່​ແຂງ­ແຮງ ກໍ​ສົ່ງ​ຜົນ​ຕໍ່​ສະ­ໝອງ ແລະ ການ​ຮຽນ​ຮູ້ ເຮັດ​ໃຫ້​ມີ​ການ​ສູນ​ເສຍ​ຊັບ­ພະ­ຍາ­ກອນ​ທີ່​ຂາດ​ຄຸນ​ນະ​ພາບ ເສຍ­ປຽບ​ໃນ​ວົງ​ການ​ພັດ­ທະ­ນາ​ຕໍ່​ພາກ​ພື້ນ ຜູ້​ຂຽນ​ຍົກ​ຕົວ ຢ່າງ​ສານ­ພິດ​ທີ່​ແຝງ​ຢູ່​ໃນ​ກັບ​ໂຟມ ຫຼື ຖົງ​ຢາງ​ປຼັສ​ຕິກ​ຕ່າງໆ​ທີ່​ນຳ​ໃຊ້​ບັນ­ຈຸ​ອາ­ຫານ ຢ່າ​ລືມ​ວ່າ​ຍັງ​ມີ​ກັບ​ໂຟມ​ບາງ​ປະ­ເພດ ຂຽນ​ຄຳ­ເຕືອນ​ບອກ​ໄວ້​ພ້ອມ ວ່າ​ບໍ່​ຄວນ​ນຳ​ມາ​ໃສ່​ອາ­ຫານ ກໍ­ລະ­ນີ​ຖົງ​ຢາງ​ໃສ່​ອາ­ຫານ​ກໍ​ເຊັ່ນ​ດຽວ​ກັນ ເພາະ​ຖົງ​ຢາງ​ແຕ່​ລະ​ປະ­ເພດ​ກໍ​ມີ​ຄຸນ­ສົມ­ບັດ​ໃນ​ການ​ໃຊ້​ຕ່າງ​ກັນ ເຊິ່ງ​ຝາກ​ເຖິງ​ການ­ຈັດ­ຕັ້ງ​ກ່ຽວ­ຂ້ອງ​ຄວນ​ເຂັ້ມ​ງວດ​ກວດ­ກາ​ຕື່ມ​ເພື່ອ​ຜົນ​ປະ­ໂຫຍດ​ຂອງ​ທຸກ​ຄົນ​ໃນ​ສັງ­ຄົມ.

    ທ່ານ​ຜູ້​ອ່ານ​ອາດ​ສົງ­ໄສ​ວ່າ ກັບ​ໂຟມ​ຜະ­ລິດ​ມາ​ຈາກ​ວັດ­ຖຸ​ຫຍັງ ? ຂໍ​ຕອບ​ໃຫ້​ສັ້ນໆ​ວ່າ ສານ​ທີ່​ປະ­ສົມ​ເຮັດ​ກັບ​ໂຟມ​ນັ້ນ​ແມ່ນ​ສານ​ສະ​ໄຕ​ຣິນ (Styrene) ເຊິ່ງ​ເປັນ​ອັນ­ຕະ­ລາຍ​ຕໍ່​ຮ່າງ­ກາຍ ເພາະ​ປະ­ເທດ​ອາ​ເມ​ຣິ​ກາ​ເອງ​ກໍ​ໄດ້​ປະ­ກາດ​ຂຶ້ນ​ບັນ­ຊີ​ໄວ້​ວ່າ ສານ​ເຄ​ມີ​ດັ່ງ­ກ່າວ​ເປັນ­ສານ​ກໍ່​ມະ​ເຮັງ ປັດ​ໄຈ​ທີ່​ເຮັດ​ໃຫ້​ຜູ້​ບໍ­ລິ­ໂພກ​ໄດ້​ຮັບ​ສານ​ສະ​ໄຕ​ຣິນ​ຈາກ​ກັບ​ໂຟມ 1) ອຸນ­ຫະ­ພູມ​ທີ່​ຮ້ອນ​ຂຶ້ນ ຫຼື ເຢັນ​ລົງ ເຮັດ​ໃຫ້​ສານ​ສະ​ໄຕ​ຣິນ​ຊຶມ​ເຂົ້າ​ສູ່​ອາ­ຫານ​ໄດ້​ສູງ 2) ຖ້າ​ປຸງ​ແຕ່ງ­ອາ­ຫານ​ໂດຍ​ໃສ່​ນ້ຳ­ມັນ ຫຼື ນ້ຳ​ສົ້ມ​ສາຍ​ຊູ​ຈະ​ດູດ​ສານ​ສະ​ໄຕ​ຣິນ​ຈາກ​ກັບ ໂຟມ​ໄດ້​ຫຼາຍ​ກວ່າ​ປົກ­ກະ­ຕິ 3) ຖ້າ​ຊື້​ອາ­ຫານ​ໃສ່​ກັບ​ໂຟມ​ປະ​ໄວ້​ດົນ ອາ­ຫານ​ຈະ​ດູດ​ສານ​ສະ​ໄຕ​ຣິນ​ໄດ້​ຫຼາຍ 4) ມີ​ບາງ​ຮ້ານ​ຕັດ​ຖົງ​ຢາງ​ຮອງ​ອາ­ຫານ​ໃນ​ກັບ​ໂຟມ ຄິດ​ວ່າ​ປອດ​ໄພ​ແລ້ວ ແທ້​ຈິງ​ບໍ່​ແມ່ນ ເພາະ​ນັ້ນ​ຄື​ການ​ຈະ​ໄດ້​ຮັບ​ສານ­ພິດ​ແບບ​ສອງ​ເດັ້ງ ທັງ​ສານ​ສະ​ໄຕ​ຣິນ ແລະ ໄດ​ອອກ​ຊິນ​ຈາກ​ຖົງ​ຢາງ.

    ສັງ​ລວມ​ວ່າ: ພໍ່­ຄ້າ ແມ່​ຂາຍ ຫຼື ການ­ຈັດ­ຕັ້ງ​ກ່ຽວ­ຂ້ອງ​ຄວນ​ໃຫ້​ຄວາມ​ສຳ­ຄັນ​ຕໍ່​ສຸ­ຂະ­ພາບ​ຂອງ​ຄົນ​ໃນ​ຊາດ ເພາະ​ສານ​ກໍ່​ມະ​ເຮັງ​ດັ່ງ­ກ່າວ​ຫາກ​ກິນ​ເຂົ້າ​ໄປ​ຫຼາຍ​ຄັ້ງ ແລະ ຫຼາຍ​ປີ​ຈະ​ມີ​ໂອ­ກາດ​ສູງ​ຕໍ່​ການ​ເກີດ​ມະ​ເຮັງ​ຕ່າງໆ ສານ​ເຄ​ມີ​ນັ້ນ​ມັນ​ສົ່ງ​ຜົນ​ຮ້າຍ​ແບບ​ບໍ່​ຮູ້­ສຶກ​ໂຕ.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ