ຂ່າວຫຼ້າສຸດ

ເຂົ້າພັນສາ ສຶກສາທຳ

1.262 29 ກ.ລ. 2019 ນານາສາລະ

    ຄຳ​ວ່າ​ສຶກ​ສາ​ທຳ​ບ່ອນ​ນີ້ ກໍ​ຄື​ການ​ສຶກ​ສາ​ຫຼັກ​ທຳ​ມະ​ທີ່​ເປັນ​ຄຳ​ສອນ​ຂອງ​ພະ­ພຸດ­ທະ­ເຈົ້າ​ນັ້ນ ຜູ້​ຂຽນ​ມີ​ເຈດ​ຕະ​ນາ​ຫຼີກ­ເວັ້ນ​ພວກ​ເກ່ງ​ພາ­ສາ​ລາວ​ພໍ­ກະ­ເທີນ ເພາະ​ເຄີຍ​ເວົ້າ ຫຼື ຂຽນ​ພາ­ສາ​ລາວ​ແບບ​ງ່າຍ ສື່­ສານ​ໃຫ້​ສັງ­ຄົມ​ໄດ້​ເຂົ້າ­ໃຈ​ກໍ​ອາດ​ມີ​ຊຸມ​ເກ່ງ​ພາ­ສາ​ລາວ ບາງ​ພວກ​ເຂົ້າ­ໃຈ​ແບບ​ຈັບ​ຕົ້ນ​ຊົນ​ປາຍ​ກະ​ບໍ່​ຖືກ ສະ­ແດງ​ອວດ ທັ້ງໆທີ່​ຫຼາຍ​ຄົນ​ທີ່​ເວົ້າ​ເຖິງ​ນັ້ນ​ບໍ່​ຮູ້​ຮອດ​ຮາກ​ທີ່​ມາ​ຂອງ​ພາ­ສາ ແລະ ບໍ່​ເຂົ້າ­ໃຈ​ປັດ​ໄຈ​ແວດ​ລ້ອມ​ວ່າ​ພາ​ສາ­ມັນ​ຂຶ້ນ​ກັບ​ປັດ​ໄຈ​ໃດ​ແນ່.

    ຍາມ​ເຂົ້າ​ພັນ​ສາ ຄົນ​ລາວ​ຫຼາຍ​ຄົນ​ງົດ​ເວັ້ນ​ດື່ມ​ສຸ­ລາ​ຢາ​ເມົາ ຖື​ເປັນ​ຄ່າ​ນິ­ຍົມ​ທີ່​ຄວນ​ຍ້ອງ­ຍໍ​ສົ່ງ­ເສີມ ເພາະ​ການ​ຫຼຸດ­ຜ່ອນ​ການ​ດື່ມ​ເຫຼົ້າ​ເບຍ ນອກ­ຈາກ​ຈະ​ຊ່ວຍ​ໃຫ້​ສຸ­ຂະ­ພາບ​ດີ​ແລ້ວ ຍັງ​ສາ­ມາດ​ຫຼຸດ­ຜ່ອນ​ອຸ­ບັດ ເຫດ​ໄດ້​ນຳ​ອີກ​ທາງ​ໜຶ່ງ ຫວນ​ກັບ​ມາ​ສຶກ​ສາ​ຫຼັກ​ທຳ​ມະ​ເບິ່ງ ເພາະ​ຫຼາຍ​ຄົນ​ໄດ້​ງົດ​ເວັ້ນ​ເຫຼົ້າ​ເບຍ​ແລ້ວ​ເພື່ອ​ໃຫ້​ສົມ​ກັບ​ຖາ­ນະ​ບົດ­ບາດ​ທີ່​ເຮົາ​ເປັນ​ຊາວ​ພຸດ ຢ່າງ​ໜ້ອຍ​ຖ້າ​ຕ່າງ­ປະ­ເທດ ຫຼື ສາ­ສະ­ໜາ​ອື່ນ​ຖາມ​ເຮົາ​ກໍ​ພໍ​ຈະ​ຕອບ​ໄດ້​ວ່າ ພະ­ພຸດ­ທະ­ເຈົ້າ​ໄດ້​ສອນ​ຫຼັກ​ທຳ​ມະ​ໃຫ້​ສາ­ວົກ​ປະ­ຕິ­ບັດ​ມີ​ຫຼັກ​ທຳ​ໃດ​ແນ່ ?.

    ສຶກ​ສາ​ທຳ​ມະ​ໃກ້​ໂຕ ຄື: ສຶກ​ສາ​ໃຫ້​ຮູ້​ເທົ່າ​ທັນ­ຕາ ຫູ ດັງ ລີ້ນ ກາຍ ແລະ ໃຈ ແລະ ຮູບ ສຽງ ກິ່ນ-ລົດ​ຊາດ ສິ່ງ​ສຳ­ຜັດ ແລະ ຄວາມ​ນຶກ​ຄິດ​ທີ່​ມັນ​ແຝງ​ເຈືອ​ປົນ​ດ້ວຍ​ກາມ​ນັ້ນ​ເປັນ​ຂອງ​ຮ້ອນ ຄວາມ​ຮ້ອນ​ນັ້ນ​ມີ​ທັງ​ມາ​ຈາກ​ຂ້າງ​ນອກ ແລະ ຂ້າງ​ໃນ ເຊິ່ງ​ເປັນ​ສິ່ງ​ທີ່​ເຮົາ​ຕ້ອງ​ມີ​ສະ­ຕິ​ປັນ­ຍາ​ກຳ­ນົດ​ໃຫ້​ຮູ້​ທັນ​ວ່າ ມັນ​ມີ​ຕົ້ນ​ເຫດ​ເກີດ​ມາ​ຈາກ​ສາ­ເຫດ​ອັນ​ໃດ​ແທ້ ຍົກ​ຕົວ­ຢ່າງ ຖ້າ​ຄວາມ​ຮ້ອນ​ທີ່​ເກີດ​ມາ​ຈາກ ຣາ​ຄະ ຄື: ກອງ​ໄຟ​ແຫ່ງ​ຄວາມ​ຢາກ​ປົນ​ເປ​ທາງ​ກາມ​ຈົນ​ໜ້າ​ມືດ​ຕາ­ມົວ ເຮັດ​ໃຫ້​ຜູ້​ຖືກ​ຄອບ​ງຳ​ເບິ່ງ​ບໍ່​ເຫັນ​ລະ­ບຽບ​ກົດ­ໝາຍ ແລະ ສິນ​ທຳ ມັນ​ຈຶ່ງ​ເປັນ­ຄວາມ​ຮ້ອນ​ທີ່​ເກີດ​ຈາກ​ໄຟ​ເຜົາ​ຜານ​ສຸມ​ລຸກ​ຢູ່​ໃນ​ໃຈ​ແຫ່ງ​ຄວາມ​ຢາກ​ຫຼິ້ນ​ກິນ​ມ່ວນ​ມົວ­ເມົາ ດັ່ງ­ນັ້ນ ຄວາມ​ຮ້ອນ​ທີ່​ເກີດ​ຈາກ​ໄຟ​ແຫ່ງ​ກິ­ເລດ​ຂອງ ຣາ​ຄະ ເພື່ອ​ສະ­ໜອງ​ຕັນ­ຫາ​ຂອງ​ຕົນ ຖ້າ​ບໍ່​ຮູ້­ຈັກ​ໃຊ້-ບໍ່​ຮູ້­ຈັກ​ຄວບ​ຄຸມ​ໃຫ້​ມັນ​ຖືກ​ທິດ​ທາງ ເໝາະ​ສົມ ຈຶ່ງ​ເປັນ​ເຫດ​ໃຫ້​ຄົນ​ຈິບ­ຫາຍ​ວາຍ​ວອດ​ມາ​ຫຼາຍ​ແລ້ວ ຜູ້​ທີ່​ມີ​ສະ­ຕິ​ປັນ­ຍາ​ຮູ້​ທັນ ຮູ້­ຈັກ​ຫັກ​ຫ້າມ​ຕົວ​ເອງ​ບໍ່​ຕາມ​ໃຈ­ຄວາມ​ຢາກ ເພື່ອ​ມາ​ສະ­ໜອງ​ຕັນ­ຫາ ມີ ຮູບ-ສຽງ-ກິ່ນ-ລົດ​ຊາດ...ເຫຼົ່າ​ນີ້ ຈຶ່ງ​ໄດ້​ຊື່­ວ່າ​ເປັນ​ຜູ້​ມີ​ຫຼັກ​ທຳ​ມະ​ຢຶດ​ໜ່ຽວ​ຈິດ­ໃຈ​ຂອງ​ຕົນ​ບໍ່​ໃຫ້​ຕົກ​ໄປ​ໃນ​ອຳ­ນາດ​ຂອງ​ທີ່​ຕ່ຳ.

    ຜູ້​ຂຽນ​ຈຶ່ງ​ຂໍ​ສັງ​ລວມ​ວ່າ: ເຮົາ​ເປັນ​ຊາວ​ພຸດ ເຖິງ​ເວ­ລາ​ເຂົ້າ​ພັນ​ສາ ບາງ​ຄົນ​ງົດ​ເວັ້ນ​ບໍ່​ດື່ມ​ສຸ­ລາ​ຢາ​ເມົາ (ຖື​ສິນ) ແລ້ວ​ກໍ​ຄວນ​ຮຽນ​ຮູ້ ສຶກ​ສາ​ທຳ​ມະ​ເພື່ອ​ຊຳ­ລະ​ກິ­ເລດ-ຕັນ­ຫາ​ໃນ​ທາງ​ບໍ່​ຖືກ­ຕ້ອງ​ໃຫ້​ເບົາ­ບາງ​ລົງ ແລະ ຂະ­ນະ​ດຽວ​ກັນ ຖ້າ­ວ່າ​ຫຼາຍ​ໜ່ວຍ​ງານ​ໃນ​ສັງ­ຄົມ​ຫາກ​ມີ​ສະ­ຕິ​ເຫັນ​ຄວາມ​ສຳ­ຄັນ​ກໍ​ຄວນ​ໂຄ­ສະ­ນາ​ປຸກ­ລະ­ດົມ​ສົ່ງ­ເສີມ​ໃຫ້​ສັງ­ຄົມ​ໄດ້​ມີ­ຄ່າ​ນິ­ຍົມ​ທີ່​ດີ­ງາມ ເພື່ອ​ຫຼີກ­ເວັ້ນ ຍູ້​ໜູນ​ບໍ­ລິ­ໂພກ​ນິ­ຍົມ​ທີ່​ຈະ​ທຳ​ມາ​ເຊິ່ງ​ການ​ຂາດ­ດູນ​ງົບ​ຂອງ​ຊາດ.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ