ຂ່າວຫຼ້າສຸດ

ຣັດ​ເຊຍ ຈະ​ອອກ​ກົດໝາຍ​ບັງຄັບ​ໃຫ້​ລົງ​ໂປ​ແຣມ​ຊອບ​ແວ​ຂອງ​ປະເທດ​ຕົນ​ໃສ່​ໂທລະສັບ

221 29 ກ.ລ. 2019 ຂ່າວຕ່າງປະເທດ
ຣັດ​ເຊຍ ຈະ​ອອກ​ກົດໝາຍ​ບັງຄັບ​ໃຫ້​ລົງ​ໂປ​ແຣມ​ຊອບ​ແວ​ຂອງ​ປະເທດ​ຕົນ​ໃສ່​ໂທລະສັບ

    ຮ່າງ​ກົດໝາຍ​ໃໝ່​ສະບັບ​ໜຶ່ງ ທີ່​ໄດ້​ນຳ​ສະເໜີ​ເປັນ​ເທື່ອ​ທຳ​ອິດ ຢູ່​ໃນ​ດູ​ມາ​ແຫ່ງ​ຊາດ (ສະພາ​ຕ່ຳ) ຣັດ​ເຊຍ ເມື່ອ​ວັນ​ທີ 18 ກໍລະກົດ​ທີ່​ຜ່ານ​ມາ ລະບຸ​ວ່າ ໂທລະສັບ​ສະມາດ (ສະຫຼາດ) ຕະຫຼອດ​ຮອດ​ຄອມ​ພີວ​ເຕີ ແລະ ໂທລະທັດ​ສະມາດ​ທັງ​ໝົດ ທີ່​ວາງ​ຈຳໜ່າຍ​ຢູ່​ໃນ​ຣັດ​ເຊຍ ນັ້ນ ໃນຕໍ່ໜ້າ​ຈະ​ຕ້ອງ​ໄດ້​ລົງ​ໂປ​ແກຣມ​ຊອບ​ແວ​ບາງ​ລາຍການ​ຂອງ​ປະເທດ​ນີ້​ໃຫ້​ພ້ອມ ເພື່ອ​ເປັນ​ການ​ໜູນ​ຊ່ວຍ​ບັນດາ​ຜູ້​ຜະລິດ​ຊອບ​ແວ​ຢູ່​ພາຍ​ໃນ​ປະເທດ (ຢູ່​ໃນ​ຣັດ​ເຊຍ).

    ຮ່າງ​ກົດໝາຍ​ດັ່ງກ່າວ ຈະ​ອະ​ນະ​ຍາດ​ໃຫ້​ບັນດາ​ເຈົ້າ​ໜ້າທີ່ ປະກອບ​ບັນຊີ​ລາຍ​ຊື່​ບັນດາ​ຊອບ​ແວ​ອອກ​ມາ ທີ່​ບັງຄັບ​ໃຫ້​ຕ້ອງ​ລົງ​ໂປ​ແກຣມ​ໄວ້​ກ່ອນ. ຖ້າ​ຫາກ​ໄດ້​ຮັບ​ການ​ຮັບຮອງ​ແລ້ວ ຮ່າງ​ກົດໝາຍ​ດັ່ງກ່າວ ຈະ​ມີ​ຜົນ​ບັງຄັບ​ໃຊ້ ນັບ​ແຕ່​ເດືອນ​ກໍລະກົດ ປີ 2020 ເປັນຕົ້ນ​ໄປ.

    ຮ່າງ​ກົດໝາຍ​ດັ່ງກ່າວ ກໍ​ນຳ​ສະເໜີ​ການ​ປັບ​ໃໝ​ຕໍ່​ການ​ຈຳ​ໜ່າຍ​​ຍ​ອຸປະກອນ ໂດຍ​ທີ່​ບໍ່​ໄດ້​ລົງ​ໂປ​ແກຣມ​ຊອບ​ແວ​ຂອງ​ຣັດ​ເຊຍ ນັ້ນ​ແຕ່ 50.000 ຮອດ 200.000 ຣຸບ (ເທົ່າ​ກັບ 790-3.170 ໂດ​ລາ​ສະຫະລັດ) ນັບ​ແຕ່​ເດືອນ​ມັງກອນ ປີ 2021 ເປັນຕົ້ນ​ໄປ. ການ​ນຳ​ສະເໜີ​ຮ່າງ​ກົດໝາຍ​ດັ່ງກ່າວ ຈະ​ຖືກ​ກາຍເປັນ​ກົດໝາຍ​ໄດ້​ກໍ​ຕໍ່​ເມື່ອ ດູ​ມາ​ແຫ່ງ​ຊາດ ຮັບຮອງ ແລະ ຫຼັງ​ຈາກ​ນັ້ນ ສະພາ​ສະຫະພັນ (ສະພາ​ສູງ) ແລະ ປະທານາທິບໍດີ ວາ​ລາ​ດີ​ເມຍ ປູ​ຕິນ ໃຫ້​ສັດຕະຍາບັນ.

    ຕະຫຼາດ​ໂທລະສັບ​ມື​ຖື​ຂອງ​ຣັດ​ເຊຍ ໃນ​ຂະນະ​ນີ້ ຖືກ​ຄອບ​ງຳ​ໂດຍ​ບັນດາ​ຜະລິດ​ຕະ​ພັນ​ຂອງ Apple Samsung ແລະ  Huawei.

ຂ່າວທີ່ກ່ຽວຂ້ອງ