ຂ່າວຫຼ້າສຸດ

ອິ​ສລັງ ເປັນ​ປະເທດ​ທີ່​ມີຄ່າ​ຄອງ​ຊີບ​ສູງ​ທີ່​ສຸດ​ໃນ​ເອີ​ຣົບ

144 29 ກ.ລ. 2019 ຂ່າວຕ່າງປະເທດ
ອິ​ສລັງ ເປັນ​ປະເທດ​ທີ່​ມີຄ່າ​ຄອງ​ຊີບ​ສູງ​ທີ່​ສຸດ​ໃນ​ເອີ​ຣົບ

    ຕົວ​ເລກ​ຈາກ​ອົງການ​ສະຖິຕິ​ເອີ​ຣົບ (Eurostat) ໃຫ້​ຮູ້​ວ່າ ໃນ​ປີ 2018 ລາຄາ​ບໍລິໂພກ​ໂດຍ​ສະເລ່ຍ​ຢູ່​ໃນ​ປະເທດ​ອິ​ສລັງ ສູງ​ກວ່າ 56% ເມື່ອ​ທຽບໃສ່​ສ່ວນ​ທີ່​ຍັງ​ເຫຼືອ​ຂອງ​ທະວີບ​ເອີ​ຣົບ ສົ່ງ​ຜົນ​ໃຫ້​ອິ​ສລັງ ກາຍເປັນ​ປະເທດ​ທີ່​ມີຄ່າ​ຄອງ​ຊີບ​ແພງ​ທີ່​ສຸດ​ໃນ​ເອີ​ຣົບ ແພງ​ກວ່າ​ຢູ່​ໃນ​ສະ​ວິດ (52%) ນອກ​ແວ (48%) ແລະ ດານ​ມາ (38%).

    ຫ້ວຍ​ນ້ຳ​ອຸ່ນ​ຢູ່​ໃນ​ອິ​ສລັງ ບໍ່​ເປັນ​ພຽງ​ລາຍການ​ດຽວ​ເທົ່າ​ນັ້ນ ທີ່​ເຮັດ​ໃຫ້​ນັກ​ທ່ອງ​ທ່ຽວ​ເກີດ​ອາການ “ເຫື່ອ​ແຕກ” ຫາກ​ແຕ່​ວ່າ​ນັບ​ແຕ່​ຄ່າ​ຫ້ອງ​ພັກ​ໃນ​ໂຮງແຮມ ໄປ​ຈົນ​ຮອດ​ໃບ​ບິນ​ເກັບ​ເງິນ​ຄ່າ​ອາຫານ​ທ່ຽງ ແລະ ອື່ນໆ ເກືອບ​ວ່າ​ແພງ​ກວ່າ​ຫຼາຍ ເມື່ອ​ທຽບໃສ່​ປະເທດ​ອື່ນໆ​ໃນ​ເອີ​ຣົບ.

    ເວບ​ໄຊ Numbeo ທີ່​ດຳເນີນ​ການ​ປຽບທຽບ​ລາຄາ​ບໍລິໂພກ ໃຫ້​ຮູ້​ວ່າ ໃບ​ບິນ​ເກັບ​ເງິນ​ຄ່າ​ອາຫານ​ຄ່ຳ​ຄາບ​ໜຶ່ງ ສຳລັບ 2 ຄົນ ຢູ່​ໃນ​ຮ້ານ​ອາຫານ​ໃນ​ອິ​ສລັງ ໂດຍ​ສະເລ່ຍ​ແມ່ນ​ຢູ່​ທີ່​ປະມານ 85 ເອີ​ໂຣ ໃນ​ຂະນະ​ທີ່​ເຫຼົ້າ​ແວງ​ຂວດ​ໜຶ່ງ​ຢູ່​ໃນ​ຮ້ານ​ຄ້າ ມີ​ລາຄາ​ປະມານ 17 ເອີ​ໂຣ ແລະ ໄຂ່​ໜຶ່ງ​ໂຫຼ (12 ໜ່ວຍ) ມີ​ລາຄາ 5 ເອີ​ໂຣ.

    ເພື່ອ​ໃຫ້​ຄຳ​ອະທິບາຍ​ເຖິງ​ລາຄາ​ແພງ​ດັ່ງກ່າວ ເຫັນ​ວ່າ​ມີ​ສາມ​ສາເຫດ​ຕົ້ນຕໍ ນັ້ນ​ກໍ​ຄື​ວ່າ ປະຊາກອນ​ຂອງ​ອິ​ສລັງ ມີ​ພຽງ​ປະມານ  355.000 ຄົນ ປະກອບ​ກັບ​ການ​ຂຶ້ນ​ກັບ​ສິນຄ້າ​ນຳ​ເຂົ້າ​ເປັນ​ສ່ວນ​ໃຫຍ່ ແລະ ລະດັບ​ພາສີ​ສູງ​ສຳລັບ​ເຄື່ອງ​ດື່ມ​ປະສົມ​ແອນ​ກໍ​ຮໍ. ໃນ​ຂະນະ​ດຽວ​ກັນ ຂໍ້​ກຳນົດ​ຕ່າງໆ ກໍ​ເປັນ​ອີກ​ສາເຫດ​ໜຶ່ງ ໃນ​ເມື່ອ​ວ່າ​ບັນດາ​ຜະລິດ​ຕະ​ພັນ​ນຳ​ເຂົ້າ ເຊັ່ນ​ວ່າ​ໄຂ່​ດິບ ຫຼື​ນ້ຳ​ນົມ​ທີ່​ຍັງ​ບໍ່​ທັນ​ຜ່ານ​ຂ້າ​ເຊື້ອ ນັ້ນ​ພົບ​ກັບ​ຮົ້ວ​ກີດ​ກັນ​ຢ່າງ​ເຂັ້ມ​ງວດ​ດ້ານ​ພາສີ. ຄຽງ​ຄູ່​ກັນ​ນັ້ນ ອັດຕາ​ແລກປ່ຽນ​ຂອງ​ເງິນ ໂກຣ​ນາ ຂອງ​ອິ​ສລັງ ໃນ​ປີ 2016-2017 ກໍ​ນຳໄປ​ສູ່​ລະດັບ​ຂຶ້ນ​ລາຄາ​ໂດຍ​ລວມ.

     ອົງການ​ສະຖິຕິ​ຂອງ​ອິ​ສລັງ ໃຫ້​ຮູ້​ວ່າ ໃນ​ປີ 2018 ລະດັບ​ເງິນເດືອນ​ໂດຍ​ສະເລ່ຍ​ໃນ​ແຕ່​ລະ​ເດືອນ ຂອງ​ຜູ້​ອອກແຮງ​ງານ​ເຕັມ​ເວລາ​ຜູ້​ໜຶ່ງ ຢູ່​ໃນ​ອິ​ສລັງ ທີ່​ຍັງ​ບໍ່​ທັນ​ເສຍ​ພາສີ ຢູ່​ທີ່ 632.000 ໂກຣ​ນາ (ເທົ່າ​ກັບ​ປະມານ 4.450 ເອີ​ໂຣ ຫຼື 5.000 ໂດ​ລາ​ສະຫະລັດ).

     ດັ່ງນັ້ນ ເຖິງ​ວ່າ​ຄ່າ​ໃຊ້​ຈ່າຍ​ໃຫ້​ແກ່​ການ​ຄອງ​ຊີບ​ມີ​ສູງ​ຢູ່​ໃນ​ອິ​ສລັງ ອາດ​ຈະ​ເຮັດ​ໃຫ້​ເກີດ “ເຫື່ອ​ແຕກ” ສຳລັບ​ນັກ​ທ່ອງ​ທ່ຽວ​ຕ່າງປະເທດ ແຕ່​ວ່າ​ປະຊາຊົນ​ອິ​ສລັງ ພັດ​ໄດ້​ຮັບ​ເງິນເດືອນ​ທີ່​ເໝາະ​ສົມ.

ຂ່າວທີ່ກ່ຽວຂ້ອງ