ຂ່າວຫຼ້າສຸດ

ທາງ​ການ​ຮົງ​ກົງ​ກ່າວ​ປະນາມ​ການ​ແຫ່​ຂະ​ບວນ​ທີ່​ຜິດ​ກົດໝາຍ

95 31 ກ.ລ. 2019 ຂ່າວຕ່າງປະເທດ
ທາງ​ການ​ຮົງ​ກົງ​ກ່າວ​ປະນາມ​ການ​ແຫ່​ຂະ​ບວນ​ທີ່​ຜິດ​ກົດໝາຍ

     ວັນ​ທີ 27 ກໍລະກົດ​ທີ່​ຜ່ານ​ມາ ມີ​ຄົນ​ກຸ່ມ​ໜຶ່ງ ໄດ້​ແຫ່​ຂະ​ບວນ​ປະ​ທ້ວງ​ຢ່າງ​ຜິດ​ກົດໝາຍ​ຢູ່​ເຂດ​ຢວນ​ຫຼາງ ໃນ​ເຂດ​ບໍລິຫານ​ພິເສດ​ຮົງ​ກົງ (ຈີນ) ໃນ​ນັ້ນ ມີ​ຜູ້​ປະ​ທ້ວງ​ບາງ​ຄົນ​ຕັ້ງໃຈ​ທຳລາຍ​ຄວາມ​ສະຫງົບ​ໃນ​ສັງຄົມ ທ້າ​ທາຍ​ເກາະ​ຜິດ​ຕໍ່​ກົດໝາຍ.

    ຕໍ່​ເຫດການ​ທີ່​ເກີດ​ຂຶ້ນ​ນັ້ນ ໂຄສົກ​ເຂດ​ບໍລິຫານ​ພິເສດ​ຮົງ​ກົງ ໄດ້​ກ່າວ​ປະນາມ​ຢ່າງ​ແຮງ​ຕໍ່​ການ​ກະທຳ​ດັ່ງກ່າວ ໂດຍ​ໂຄສົກ​ທ່ານ​ນີ້​ກ່າວ​ວ່າ ກ່ອນ​ໜ້າ​ນີ້ ເຈົ້າ​ໜ້າທີ່​ຕຳຫຼວດ​ຮົງ​ກົງ ໄດ້​ອອກ​ແຈ້ງ​ການ ໂດຍ​ຫ້າມ​ບໍ່​ໃຫ້​ມີ​ການ​ໂຮມ​ຊຸມນຸມ ທັງ​ຄັດຄ້ານ​ການ​ແຫ່​ຂະ​ບວນ​ມາ​ແລ້ວ ແຕ່​ຍັງ​ມີ​ກຸ່ມ​ຄົນ​ຈຳນວນ​ໜຶ່ງ​ໄປ​ໂຮມ​ຊຸມນຸມ ແລະ ແຫ່​ຂະ​ບວນ​ຢູ່​ເຂດ​ຢວນ​ຫຼາງ ເຮັດ​ໃຫ້​ອຳນາດ​ການ​ປົກຄອງ​ຮົງ​ກົງ ສະແດງ​ບໍ່​ພໍໃຈ​ຢ່າງ​ຍິ່ງ​ຕໍ່​ກໍ​ລະ​ນີ້​ດັ່ງກ່າວ.

    ໂຄສົກ​ຍັງ​ກ່າວ​ຕື່ມ​ວ່າ ຫຼັງ​ແຫ່​ຂະ​ບວນ​ແລ້ວ ມີ​ຜູ້​ປະ​ທ້ວງ​ໄດ້​ລ່ວງ​ລ້ຳ​ເຂດ​ປ້ອງ​ກັນ​ຂອງ​ເຈົ້າ​ໜ້າທີ່​ຕຳຫຼວດ ດ້ວຍ​ການ​ໃຊ້​ກຳລັງ​ຮຸນ​ແຮງ ທຳລາຍ​ລົດ​ຂອງ​ຕຳຫຼວດ ແລະ ອັດ​ຕັນ​ຖະໜົນ​ຫົນທາງ ອຳນາດ​ການ​ປົກຄອງ​ກ່າວ​ປະນາມ​ຢ່າງ​ຮຸນ​ແຮງ​ຕໍ່​ຜູ້​ປະ​ທ້ວງ ທີ່​ຕັ້ງໃຈ​ທຳລາຍ​ຄວາມ​ສະຫງົບ​ໃນ​ສັງຄົມ ແລະ  ທ້າ​ທາຍ​ເກາະ​ຜິດ​ຕໍ່​ກົດໝາຍ ໃນ​ຂະນະ​ດຽວ​ກັນ ເຈົ້າ​ໜ້າທີ່​ຕຳຫຼວດ​ຈະ​ຕິດຕາມ​ຢ່າງ​ເຄັ່ງ​ຄັດ​ຕໍ່​ຜູ້​ປະ​ທ້ວງ​ທີ່​ເຂົ້າ​ຮ່ວມ​ການເຄື່ອນໄຫວ​ຄັ້ງ​ນີ້.

    ນອກຈາກ​ນັ້ນແລ້ວ ເຈົ້າ​ໜ້າທີ່​ຕຳຫຼວດ​ຮົງ​ກົງ ໄດ້​ເປີດເຜີຍ​ວ່າ ໃນ​ການ​ສະຫຼາຍ​ກຸ່ມ​ຜູ້​ປະ​ທ້ວງ​ຜິດ​ກົດໝາຍ​ນັ້ນ ໄດ້​ຈັບ​ຜູ້​ປະ​ທ້ວງ​ຜູ້​ຊາຍ​ໄດ້ 11 ຄົນ ຊຶ່ງ​ມີ​ອາຍຸ​ຢູ່​ລະຫວ່າງ 18-68 ປີ ໃນ​ຂໍ້​ຫາ​ຖືກ​ສົງໄສ​ໂຮມ​ຊຸມນຸມ​ຢ່າງ​ຜິດ​ກົດໝາຍ ແລະ ມີ​ອາວຸດ​ໄວ້​ໃນ​ຄອບ​ຄອງ ໂຈມ​ຕີ​ຕຳຫຼວດ ແລະ ອື່ນໆ.

ໃນ​ຂະນະ​ດຽວ​ກັນ ໂຄສົກ​ຂອງ​ຫ້ອງການ​ບັນດາ​ບັນຫາ ຮົງ​ກົງ ແລະ ມາ​ເກົາ (HKMAO) ທີ່​ຂຶ້ນ​ກັບ​ລັດຖະບານ​ຈີນ ກ່າວ​ຕໍ່​ກອງ​ປະຊຸມ​ຖະແຫຼງ​ຂ່າວ ເມື່ອ​ວັນ​ທີ 29 ກໍລະກົດ​ນີ້​ວ່າ  ຈີນ​ພວມ​ສືບຕໍ່​ຕິດຕາມ​ຢ່າງ​ເຄັ່ງ​ຄັດ ຕໍ່​ການ​ຜັນ​ແປ​ໄປ​ຂອງ​ສະພາບ​ການ​ຢູ່​ໃນ​ເຂດ​ບໍລິຫານ​ພິເສດ​ຮົງ​ກົງ.

ຂ່າວທີ່ກ່ຽວຂ້ອງ