ເບິ່ງບ້ານເຂົາເອົາບົດຮຽນ 01-08-2019

1.019 01 ສ.ຫ. 2019 ຫົວຂໍ້ຂ່າວອື່ນໆ

    3 ເລື່ອງ​ໜ້າ​ສົນ­ໃຈ​ໃນ​ວັນ​ນີ້ ລວມ​ມີ ເລື່ອງ​ທາງ​ການ ສ ເກົາ­ຫຼີ ເລີກ​ຮື້​ຮ້ານ​ອາ­ຫານ​ທີ່​ລະ­ເມີດ​ກົດ​ລະ­ບຽບ​ກ່ຽວ​ກັບ​ຄວາມ​ປອດ​ໄພ​ດ້ານ​ອາ­ຫານ ເລື່ອງ ສປ ຈີນ ປາບ​ປາມ​ກຸ່ມ​ແກ້ງ​ອາ​ຊະ​ຍາ​ກຳ ແລະ ເລື່ອງ​ທາງ​ການ​ກຳ­ປູ­ເຈຍ​ກວດ­ກາ​ເອ­ກະ­ສານ​ປອມ​ຂອງ​ຊາວ​ຕ່າງ­ປະ­ເທດ.

    ທີ່ ສ ເກົາ­ຫຼີ: ຂ່າວ​ໃນ​ທ້າຍ​ເດືອນ​ກໍ­ລະ­ກົດ​ປີ​ນີ້ ໃຫ້​ຮູ້​ວ່າ: ກະ­ຊວງ​ຄວາມ​ປອດ​ໄພ​ດ້ານ​ອາ­ຫານ ສ ເກົາ­ຫຼີ ໄດ້​ດຳ­ເນີນ​ບັ້ນ​ເລີກ​ຮື້​ບັນ­ດາ​ຮ້ານ​ອາ­ຫານ​ແຄມ​ທາງ​ທີ່​ລະ­ເມີດ​ກົດ­ໝາຍ​ວ່າ​ດ້ວຍ​ຄວາມ​ສະ­ອາດ ແລະ ຫຼັກ​ອະ­ນາ­ໄມ ຈຳ­ນວນ 37 ຮ້ານ ຮ້ານ​ອາ­ຫານ​ທີ່​ສ້າງ​ບັນ­ຫາ​ເຫຼົ່າ​ນີ້​ບໍ­ລິ­ການ​ອາ­ຫານ​ຈີນ.

    ຂ່າວ​ບອກ​ວ່າ: ນັບ​ແຕ່​ວັນ​ທີ 3 ມິ­ຖຸ­ນາ ຫາ 5 ກໍ­ລະ­ກົດ​ປີ​ນີ້ ທາງ​ກະ­ຊວງ​ຄວາມ​ປອດ​ໄພ​ດ້ານ​ອາ­ຫານ​ໄດ້​ລົງ​ສຳ​ຫຼວດ​ກວດ­ກາ​ຮ້ານ​ອາ­ຫານ​ທັງ​ໝົດ ຈຳ­ນວນ 63 ຫົວ­ໜ່ວຍ ທີ່​ຂາຍ​ອາ­ຫານ​ຈີນ​ແບບ​ກິນ​ໄວ (ມາ­ລາ​ຕັງ-Malatang) ແລະ ພົບ​ວ່າ 37 ຮ້ານ​ໄດ້​ລະ­ເມີດ​ຮ້ານ​ຫຼັກ​ອະ­ນາ­ໄມ ແລະ ລະ­ບຽບ​ການ ໃນ​ນັ້ນ 6 ຮ້ານ​ບໍ່​ມີ​ທະ­ບຽນ​ດຳ­ເນີນ​ທຸ­ລະ​ກິດ 13 ຮ້ານ​ນຳ​ໃຊ້​ເຄື່ອງ​ປະ­ກອບ​ອາ­ຫານ​ທີ່​ບໍ່​ຮູ້​ທີ່​ມາ​ອີກ 10 ຮ້ານ ບໍ່​ໄດ້​ມາດ­ຕະ­ຖານ​ຄວາມ​ສະ­ອາດ.

    ທີ່ ສປ ຈີນ: ຂ່າວ​ໜັງ­ສື­ພິມ​ວຽງ​ຈັນ​ທາມ ສະ­ບັບ​ວັນ​ທີ 23 ເດືອນ​ກໍ­ລະ­ກົດ​ປີ​ນີ້ ໄດ້​ເວົ້າ​ກ່ຽວ​ກັບ​ການ​ຈັບ​ກຸມ​ຜູ້​ຕິດ​ຄະ­ດີ​ກໍ່​ອາ​ຊະ​ຍາ​ກຳ​ແບບ​ອັນ­ທະ­ພານ ຈຳ­ນວນ 36.534 ຄົນ ທີ່​ພົວ­ພັນ​ກັບ​ການ​ກໍ່​ອາ​ຊະ​ຍາ​ກຳ ຈຳ­ນວນ 12.345 ກໍ­ລະ­ນີ ນອກ­ຈາກ​ນັ້ນ ທາງ​ຫ້ອງ­ການ​ອົງ­ການ​ໄອ​ຍະ​ການ​ໃນ​ທົ່ວ​ປະ­ເທດ​ຍັງ​ໄດ້​ດຳ­ເນີນ​ຄະ­ດີ​ກັບ​ອີກ 43.063 ຄົນ ໃນ​ຄະ­ດີ​ປະ­ເພດ​ດຽວ​ກັນ​ນີ້ ເຊິ່ງ​ມີ​ທັງ​ໝົດ 6.928 ຄະ­ດີ ທີ່​ເກີດ​ຂຶ້ນ​ໃນ​ໄລ­ຍະ​ດຽວ​ກັນ ຄື: ໃນ 6 ເດືອນ​ຕົ້ນ​ປີ 2019 ນີ້ ສຳ­ລັບ​ຢູ່​ນະ­ຄອນ­ຫຼວງ​ເຈິງ​ຕູ (Chengdu) ແຂວງ​ຊີ​ຈວນ ນັ້ນ ທາງ​ຫ້ອງ­ການ​ໄອ​ຍະ​ການ​ທຸກ​ຂັ້ນ​ຂອງ​ແຂວງ​ໄດ້​ຮັບ​ຄຳ​ສັ່ງ​ບຸ­ລິ­ມະ­ສິດ​ໃຫ້​ເລີກ​ຮື້​ເຄືອ​ຄ່າຍ​ການ​ພົວ­ພັນ ແລະ ປົກ​ປ້ອງ​ກຸ່ມ​ອາ​ຊະ​ຍາ​ກຳ​ທີ່​ມີ​ການ­ຈັດ­ຕັ້ງ​ທັງ​ໝົດ.

    ທີ່ ກຳ­ປູ­ເຈຍ: ໃນ​ລະ­ຫວ່າງ​ກາງ​ເດືອນ​ກໍ­ລະ­ກົດ​ປີ​ນີ້ ທາງ​ກະ­ຊວງ​ພາຍ​ໃນ​ກຳ­ປູ­ເຈຍ ໄດ້​ເປີດ­ເຜີຍ​ບົດ​ລາຍ​ງານ​ກ່ຽວ​ກັບ​ການ​ກວດ­ກາ​ຄຸ້ມ​ຄອງ​ຄົນ​ຕ່າງ­ປະ­ເທດ​ທັງ​ໝົດ ກ່ຽວ​ກັບ​ການ​ພິ­ຈາ­ລະ­ນາ​ຄຳ​ຮ້ອງ​ຂໍ​ສິດ​ຢູ່​ອາ­ໄສ​ແບບ​ຖາ­ວອນ​ຂອງ​ຄົນ​ຕ່າງ­ປະ­ເທດ ແລະ ເພື່ອ​ກວດ­ກາ ແລະ ຍົກ­ເລີກ​ເອ­ກະ­ສານ​ປອມ​ແປງ​ຂອງ​ພວກ​ເຂົາ­ເຈົ້າ.

    ທ່ານ ຊາ​ເຄັງ ລັດ­ຖະ­ມົນ­ຕີ​ກະ­ຊວງ​ພາຍ​ໃນ​ກຳ­ປູ­ເຈຍ ໄດ້​ມີ​ຄຳ​ເຫັນ​ກ່ຽວ​ກັບ​ບັ້ນ​ກວດ­ກາ​ເພື່ອ​ກຳ­ຈັດ​ເອ­ກະ­ສານ​ປອມ​ແປງ​ຂອງ​ຄົນ​ຕ່າງ­ປະ­ເທດ​ຄັ້ງ​ນີ້​ວ່າ: ມີ​ເປົ້າ​ໝາຍ​ເພີ່ມ​ປະ­ສິດ­ທິ­ພາບ​ໃຫ້​ຂະ​ບວນ​ການ​ປະ­ຕິ­ບັດ​ກົດ­ໝາຍ ແລະ ເພື່ອ​ປ້ອງ​ກັນ​ບໍ່​ໃຫ້​ຄົນ​ຕ່າງ­ປະ­ເທດ​ທີ່​ໄປ​ຕັ້ງ​ຖິ່ນ​ຖານ​ເປັນ​ເວ­ລາ​ດົນ​ນານ​ຢູ່​ກຳ­ປູ­ເຈຍ​ກໍ່​ບັນ­ຫາ​ສັບ­ສົນ​ທີ່​ສົ່ງ​ຜົນ​ກະ­ທົບ​ຕໍ່​ຄວາມ​ໝັ້ນ­ຄົງ ຄວາມ​ເປັນ​ລະ­ບຽບ​ຮຽບ​ຮ້ອຍ ຄວາມ​ປອດ​ໄພ​ໃນ​ສັງ­ຄົມ ກໍ​ຄື ສິດ­ທິ​ມະ­ນຸດ.

    ບົດ​ລາຍ​ງານ​ໄດ້​ໃຫ້​ລາຍ​ລະ­ອຽດ​ວ່າ: ນັບ​ແຕ່​ປີ 1994 ເປັນ­ຕົ້ນ​ມາ ທາງ​ການ​ກຳ­ປູ­ເຈຍ​ໄດ້​ຍົກ­ເລີກ​ເອ­ກະ­ສານ​ປອມ​ແປງ​ສັນ­ຊາດ​ກຳ­ປູ­ເຈຍ​ຂອງ​ຄົນ​ຕ່າງ­ປະ­ເທດ ຈຳ­ນວນ 37.000 ຄົນ ຈາກ 10 ປະ­ເທດ ແຕ່​ພ້ອມ​ດຽວ​ກັນ​ນັ້ນ​ກໍ​ໄດ້​ຮັບ​ເອ­ກະ­ສານ​ຂໍ​ສັນ­ຊາດ​ກຳ­ປູ­ເຈຍ​ຈາກ​ຈຳ­ນວນ​ຊາວ​ຕ່າງ­ປະ­ເທດ 71.991 ຄົນ ກວມ​ເອົາ 32.735 ຄອບ­ຄົວ ເຊິ່ງ​ສ່ວນ​ຫຼາຍ​ແມ່ນ​ຊາວ​ຫວຽດ­ນາມ ຖັດ​ມາ​ແມ່ນ ລາວ ໄທ ມຽນ​ມາ ຈີນ ອິນ​ໂດ​ເນ​ເຊຍ ເນ​ປານ ບັງ​ກະ­ລາ​ເທດ ຕັງ​ຊາ​ນີ ແລະ ເຢຍ​ລະ​ມັນ ໃນ​ປັດ­ຈຸ­ບັນ​ຊາວ​ຕ່າງ­ປະ­ເທດ​ທີ່​ໄດ້​ຮັບ​ບັດ​ອະ­ນຸ­ຍາດ​ຢູ່​ອາ­ໄສ​ທີ່​ກຳ­ປູ­ເຈຍ​ນັ້ນ ມີ​ຫຼາຍ​ກວ່າ 70.000 ຄົນ (ແຫຼ່ງ​ຂ່າວ​ວຽງ​ຈັນ​ທາມ 20/07/2019).

ຂ່າວທີ່ກ່ຽວຂ້ອງ