ອາສາສະໝັກ ສ ເກົາຫຼີ ພ້ອມຊ່ວຍເຝິກແອບ ໃຫ້ນັກກີລາເທຄວັນໂດຕະວັນ

    ສະ­ຫະ­ພັນ​ເທ​ຄວັນ​ໂດ​ແຫ່ງ​ຊາດ​ລາວ ຮ່ວມ​ກັບ​ສະ­ຫະ­ພັນ​ເທ​ຄວັນ​ໂດ​ໂລກ ກໍ​ຄື: ໂຄງ­ການ​ພັດ­ທະ­ນາ​ກີ­ລາ​ເທ​ຄວັນ​ໂດ​ໃຫ້​ເຕີບ​ໃຫຍ່​ຂະ­ຫຍາຍ­ຕົວ​ໄປ​ທົ່ວ​ໂລກ ຫຼື ໂຄງ­ການ TPC ໄດ້​ສົ່ງ​ອາ­ສາ​ສະ­ໝັກ​ໜຸ່ມ​ຈາກ ສ ເກົາ­ຫຼີ ຈຳ­ນວນ 4 ຄົນ ຍິງ 2 ຄົນ ປະ­ກອບ​ມີ​ທ່ານ ປາກ ຊັງ ຮິນ ທ່ານ​ນາງ ຈູນ ຣີ ຢູງ ທ່ານ​ນາງ ຄິມ ຣີ​ຊູ ແລະ ທ່ານ ກິນ ດອງ ວຸກ ມາ​ເຝິກ­ແອບ​ຖ່າຍ​ທອດ​ຄວາມ​ຮູ້​ຄວາມ​ສາ­ມາດ ການ​ຫຼິ້ນ​ກີ­ລາ​ເທ​ຄວັນ​ໂດ​ລະ­ດັບ​ຂັ້ນ​ພື້ນ­ຖານ ແລະ ແລກ­ປ່ຽນ​ວັດ­ທະ­ນະ­ທຳ ໃຫ້​ກັບ​ນັກ­ກີ­ລາ​ສະ­ໂມ­ສອນ​ຕະ​ວັນ ທັງ​ສອງ​ຂາ​ສາ​ຄື: ສະ­ໂມ­ສອນ​ຕະ​ວັນ 1 ທີ່​ສູນ​ກີ­ລາ​ໃນ​ຮົ່ມ ບູ​ໂດ​ລາວ-ຍີ່­ປຸ່ນ ບ້ານ​ອາ​ນຸ ເມືອງ​ຈັນ­ທະ​ບູ​ລີ ແລະ ສະ­ໂມ­ສອນ​ຕະ​ວັນ 2 ທີ່​ສູນ​ການ​ຄ້າ​ໄອ​ເຕັກ ມໍ​ຊັ້ນ 4 ນະ­ຄອນ­ຫຼວງ​ວຽງ​ຈັນ ລະ­ຫວ່າງ​ວັນ​ທີ 18 ກໍ­ລະ­ກົດ ຫາ 18 ສິງ­ຫາ 2019.

    ທ່ານ ເດດ​ດາ​ວົງ ບຸດ​ນາ​ໂຄ ຄູ​ເຝິກ​ກີ­ລາ​ເທ​ຄວັນ​ໂດ​ສະ­ໂມ­ສອນ​ຕະ​ວັນ ໄດ້​ສະ­ແດງ​ຄວາມ​ຂອບ­ໃຈ​ເປັນ​ຢ່າງ​ສູງ​ທີ່​ສະ­ຫະ­ພັນ​ເທ​ຄວັນ​ໂດ​ແຫ່ງ​ຊາດ ແລະ ສະ­ຫະ­ພັນ​ເທ​ຄວັນ​ໂດ​ໂລກ ສົ່ງ​ອາ­ສາ​ສະ­ໝັກ​ມາ​ຊ່ວຍ​ເຝິກ­ແອບ​ຄັ້ງ​ນີ້ ເປັນ­ຕົ້ນ​ແມ່ນ​ການ​ອົບ​ອຸ່ນ​ຮ່າງ­ກາຍ ການ​ເຕະ​ໃນ​ແຕ່​ລະ​ຈັງ­ຫວະ ແລະ ພື້ນ­ຖານ​ການ­ສະ­ແດງ​ກີ­ລາ​ເທ​ຄວັນ​ໂດ ລວມ​ໄປ​ເຖິງ​ການ​ແລກ­ປ່ຽນ​ວັດ­ທະ­ນະ­ທຳ ເຊັ່ນ: ການ​ນຸ່ງ​ຖື ແລະ ການ​ເວົ້າ​ພາ­ສາ​ເກົາ­ຫຼີ​ນຳ​ອີກ ແນວ­ໃດ​ກໍ​ຕາມ ຝາກ​ເຖິງ​ຜູ້​ທີ່​ສົນ­ໃຈ​ຢາກ​ເຝິກ­ແອບ​ກີ­ລາ​ເທ​ຄວັນ​ໂດ ໃນ​ໄລ­ຍະ​ພັກ­ໂຮງ­ຮຽນ​ນີ້ ກໍ​ນັບ​ວ່າ​ເປັນ​ໂອ­ກາດ​ດີ ທີ່​ມີ​ອາ­ສາ​ສະ­ໝັກ ຈາກ ສ ເກົາ­ຫຼີ ໄດ້​ມາ​ຖ່າຍ​ຖອດ​ຄວາມ​ຮູ້​ໃຫ້​ເພາະ​ນັກ­ກີ­ລາ ຈະ​ໄດ້​ເຝິກ­ແອບ​ກັບ​ເຈົ້າ​ຂອງ​ຕົ້ນ​ກຳ­ເນີດ​ກີ­ລາ​ເທ​ຄວັນ​ໂດ​ຢ່າງ​ແທ້​ຈິງ.