ຂ່າວຫຼ້າສຸດ

ສະພາບ​ໄຂ້ເລືອດອອກ​ຢູ່​ໃນ​ສິງກະໂປ

482 01 ສ.ຫ. 2019 ຂ່າວຕ່າງປະເທດ
ສະພາບ​ໄຂ້ເລືອດອອກ​ຢູ່​ໃນ​ສິງກະໂປ

    ກະຊວງ​ສາທາລະນະ​ສຸກ ແລະ  ອົງການ​ສິ່ງແວດລ້ອມ​ແຫ່ງ​ຊາດ​ສິງກະໂປ ໄດ້​ຮ່ວມ​ກັນ​ຖະແຫຼງ​ຂ່າວ​ໃນ​ວັນ​ທີ 29 ກໍລະກົດ​ທີ່​ຜ່ານ​ມາ​ວ່າ ນັບ​ແຕ່​ຕົ້ນ​ປີ​ນີ້ ມາ​ຮອດ​ວັນ​ທີ 20 ກໍລະກົດ​ທີ່​ຜ່ານ​ມາ ຢູ່​ສິງກະໂປ ມີ​ຜູ້​ເສຍ​ຊີວິດ​ຍ້ອນ​ໄຂ້ເລືອດອອກ​ແລ້ວ 9 ຄົນ ຈາກ​ທີ່​ມີ​ຜູ້​ເປັນ​ພະຍາດ​ດັ່ງກ່າວ 8.020 ຄົນ ໂດຍ​ເພີ່ມ​ຂຶ້ນ 5 ເທົ່າ ເມື່ອ​ທຽບໃສ່​ໄລຍະ​ເວລາ​ດຽວ​ກັນ​ຂອງ​ປີຜ່ານມາ.

     ຖະແຫຼງການ​ລະບຸ​ວ່າ ພຽງ​ແຕ່​ໃນ​ໄລຍະ​ແຕ່​ວັນ​ທີ 30 ມິຖຸນາ ຫາ ວັນ​ທີ 16 ກໍລະກົດ​ປີ​ນີ້ ກໍ​ມີ​ຜູ້​ຊາຍ 4 ຄົນ ອາຍຸ​ລະຫວ່າງ 46 ປີ ຫາ 77 ປີ ເສຍ​ຊີວິດ​ຍ້ອນ​ພະຍາດ​ໄຂ້ເລືອດອອກ. ຖະແຫຼງການ​ລະບຸ​ຕື່ມ​ວ່າ ຜູ້​ເປັນ​ພະຍາດ​ໄຂ້ເລືອດອອກ​ສ່ວນ​ຫຼາຍ​ຈະ​ຟື້ນ​ຟູ​ສຸຂະພາບ​ໄດ້ ແຕ່​ກໍ​ຍັງ​ມີ​ຜູ້​ເປັນ​ພະຍາດ​ບາງ​ຄົນ ອາດ​ຈະ​ເສຍ​ຊີວິດ​ຍ້ອນ​ອາການ​ປະສົມ ໂດຍ​ສະເພາະ​ແມ່ນ​ຜູ້​ເປັນ​ພະຍາດ​ທີ່​ມີ​ອາຍຸ​ສູງ.

    ໃນ​ທຸກໆ​ປີ ອາກາດ​ຢູ່​ສິງກະໂປ ມີ​ທັງ​ຮ້ອນ​ທັງ​ຊຸ່ມ​ໃນ​ໄລຍະ​ແຕ່​ເດືອນ​ມິຖຸນາ ຫາ​ເດືອນ​ຕຸລາ ຈຶ່ງ​ເປັນ​ສາເຫດ​ເຮັດ​ໃຫ້​ຍູງ​ລາຍ​ແຜ່ພັນ​ໄວ​ສົມຄວນ. ປັດຈຸບັນ​ນີ້ ພາກສ່ວນ​ສາທາລະນະ​ສຸກ​ສິງກະໂປ​ພວມ​ໃຊ້​ມາດ​ຕະການ​ກຳຈັດ​ຍູງ ພ້ອມ​ທັງ​ໄດ້​ແຈ້ງ​ເຕືອນ​ປະຊາຊົນ​ຢູ່​ເຂດ​ມັກ​ເກີດ​ພະຍາດ​ໄຂ້ເລືອດອອກ ເພື່ອ​ຍົກ​ສະຕິ​ປ້ອງ​ກັນ​ພະຍາດ​ຂອງ​ປະຊາຊົນ​ໃຫ້​ສູງ​ຂຶ້ນ.

ຂ່າວທີ່ກ່ຽວຂ້ອງ