ຂ່າວຫຼ້າສຸດ

ສ ເກົາຫຼີ ທວງ​ໃຫ້ ສ ອາ​ເມ​ຣິ​ກາ ຈ່າຍ​ຄ່າ​ຊົດ​ເຊີຍ​ຄວາມ​ເສຍ​ຫາຍ

463 01 ສ.ຫ. 2019 ຂ່າວຕ່າງປະເທດ
ສ ເກົາຫຼີ ທວງ​ໃຫ້ ສ ອາ​ເມ​ຣິ​ກາ ຈ່າຍ​ຄ່າ​ຊົດ​ເຊີຍ​ຄວາມ​ເສຍ​ຫາຍ

   ເມື່ອ​ວັນ​ທີ 30 ກໍລະກົດ​ທີ່​ຜ່ານ​ມາ ອົງການ​ການ​ຄ້າ​ໂລກ (WTO) ໄດ້​ເປີດເຜີຍ ເອກະສານ​ສະບັບ​ໜຶ່ງ ຊຶ່ງ​ພົວພັນ​ເຖິງ​ເລື່ອງ​ທີ່ ສ ເກົາຫຼີ ທວງ​ຄ່າ​ຊົດ​ເຊີຍ ຄວາມ​ເສຍ​ຫາຍ ດ້ານ​ການ​ຄ້າ​ນຳ ສ ອາ​ເມ​ຣິ​ກາ  ໃນ​ມູນ​ຄ່າ 350 ລ້ານ​ໂດ​ລາ​ສະຫະລັດ​ໃນ​ແຕ່​ລະ​ປີ ຍ້ອນ​ການ​ພິພາດ ດ້ານ​ການ​ຄ້າ​ລະຫວ່າງ​ສອງ​ປະເທດ ຊຶ່ງ​ພົວພັນ​ເຖິງ​ເຫຼັກ​ທໍ່ ຕັ້ງແຕ່​ສະໄໝ​ຂອງ​ປະທານາທິບໍດີ ສ ອາ​ເມ​ຣິ​ກາ ບາ​ຣັກ ໂອ​ບາ​ມາ.

    ເມື່ອ​ປີ 2014 ສ ເກົາຫຼີ ໄດ້​ຍື່ນ​ສະເໜີ​ຕໍ່ WTO ເພື່ອ​ພິຈາລະນາ​ເຖິງ​ບ້ວງ​ພາສີ ຊຶ່ງ ສ ອາ​ເມ​ຣິ​ກາ ປະຕິບັດ​ຕໍ່​ເຫຼັກ​ທໍ່ OCTG ທີ່​ໃຊ້​ເຂົ້າ​ໃນ​ຂະແໜງການ​ນ້ຳມັນ-ແກ​​ັສ. ທາງ​ຝ່າຍ ສ ອາ​ເມ​ຣິ​ກາ ໃຫ້​ຮູ້​ວ່າ ພາສີ​ທີ່​ປະເທດ​ນີ້​ນຳ​ໃຊ້ ແມ່ນ​ເພື່ອ​ສະກັດ​ກັ້ນ ສ ເກົາຫຼີ ໃນ​ການ​ສົ່ງ​ອອກ ທໍ່​ເຫຼັກ OCTG ດ້ວຍ​ລາຄາ​ຖືກ ຢ່າງ​ຜິດ​ກົດໝາຍ.

    ຫຼັງ​ຈາກ​ທີ່ ສ ເກົາຫຼີ ໄດ້​ຮັບ​ໄຊຊະນະ​ສ່ວນ​ໜຶ່ງ​ໃນ​ການ​ຍື່ນ​ຟ້ອງ​ຂອງ​ຕົນ​ຢູ່​ໃນ WTO ແລ້ວ ສ ອາ​ເມ​ຣິ​ກາ ມີ​ເວລາ​ຮອດ​ວັນ​ທີ 12 ກໍລະກົດ​ທີ່​ຜ່ານ​ມາ ເພື່ອ​ປະຕິບັດ​ຕາມ​ການ​ຕັດສິນ. ສ ເກົາຫຼີ ເຫັນ​ວ່າ ສ ອາ​ເມ​ຣິ​ກາ ບໍ່​ໄດ້​ປະຕິບັດ​ຕາມ​ການ​ຕັດສິນ ແລະ ວ່າ​ທາງ​ການ ສ ເກົາຫຼີ ພວມ​ຊອກ​ຫາ ມາດ​ຕະການ​ເພື່ອ​ດຳເນີນ​ການ​ປິດ​ລ້ອມ ທີ່​ເທົ່າໆ​ກັບ​ລະດັບ​ຄວາມ​ເສຍ​ຫາຍ​ດ້ານ​ການ​ຄ້າ ທີ່​ມີ​ຕໍ່​ເຫຼັກ​ທໍ່ OCTG. ໂດຍ​ອີງໃສ່​ຂໍ້​ມູນ​ການ​ຄິດໄລ່​ທີ່​ມີ​ຢູ່​ແລ້ວ​ນັ້ນ ບ້ວງ​ຊົດ​ເຊີຍ​ຄວາມ​ເສຍ​ຫາຍ ຊຶ່ງ ສ ເກົາຫຼີ ນຳ​ສະເໜີ ແມ່ນ​ຢູ່​ທີ່​ປະມານ 350 ລ້ານ​ໂດ​ລາ​ສະຫະລັດ ໃນ​ແຕ່​ລະ​ປີ.

     ສ ເກົາຫຼີ ຄາດ​ວ່າ​ຈະ​ດຳເນີນ​ມາດ​ຕະການ​ປິດ​ລ້ອມ ດ້ວຍ​ວິທີ​ປະຕິບັດ​ພາສີ ກັບ​ສິນຄ້າ ບາງ​ປະເພດ​ຂອງ ສ ອາ​ເມ​ຣິ​ກາ ຊຶ່ງ ສ ເກົາຫຼີ ຈະແຈ້ງ​ໃຫ້​ຮູ້​ໃນຕໍ່ໜ້າ​ນີ້.

ຂ່າວທີ່ກ່ຽວຂ້ອງ