ຢູ-12 ວຽງຈັນ ເຂົ້າຮ່ວມເຕະບານຊູຊີງລິງຄັບ 2019

526 05 ສ.ຫ. 2019 ວົງຈອນກີລາ
ຢູ-12 ວຽງຈັນ ເຂົ້າຮ່ວມເຕະບານຊູຊີງລິງຄັບ 2019

     ທີມ​ນັກ​ເຕະ­ບານ​ຮຸ່ນ​ເຍົາ­ວະ​ຊົນ ອາ­ຍຸ​ບໍ່​ເກີນ 12 ປີ ຫຼື ຢູ-12 ຂອງ​ສະ­ໂມ­ສອນ​ວຽງ​ຈັນ ອາ​ຄາ​ເດ​ມີ້ ເອັຟ​ທີ ຕາງ­ໜ້າ​ເຍົາ­ວະ​ຊົນ​ລາວ ໄດ້​ອອກ​ເດີນ­ທາງ​ວັນ​ທີ 1 ສິງ­ຫາ 2019 ຢູ່​ສະ­ໜາມ​ບິນ​ສາ­ກົນ​ວັດ​ໄຕ ພ້ອມ​ທັງ​ຕັ້ງ​ເປົ້າ​ຈະ​ສູ້​ຊົນ​ເພື່ອ​ປ້ອງ​ກັນ​ແຊັມ​ສະ­ໄໝ​ທີ 3 ໃນ​ການ​ແຂ່ງ­ຂັນ​ເຕະ­ບານ​ລາຍ­ການ ຊູ​ຊີງ​ລິງ​ຄັບ 2019 ຈັດ​ຂຶ້ນ​ທີ່ ສປ ຈີນ ວັນ​ທີ 1-8 ສິງ­ຫາ 2019.

    ໂອ­ກາດ​ນີ້​ທ່ານ ບຸນ​ລັບ ເຄນ​ກິ​ຕິ​ສັກ ຫົວ­ໜ້າ​ຄູ​ເຝິກ ຢູ-12 ຂອງ​ສະ­ໂມ­ສອນ​ວຽງ​ຈັນ​ອາ​ຄາ​ເດ​ມີ້ ເອັຟ​ທີ ໃຫ້​ສຳ­ພາດ​ວ່າ: ນັກ­ກີ­ລາ​ຊຸດ​ນີ້ ເບື້ອງ​ຕົ້ນ​ເຂົ້າ​ຮ່ວມ​ຄັດ​ເລືອກ 20 ຄົນ ແຕ່​ຕາມ​ຕົວ​ຈິງ​ກຳ­ນົດ 15 ຄົນ ແລະ ຄະ­ນະ​ນຳ 3 ຄົນ ເຂົ້າ​ຮ່ວມ​ແຂ່ງ­ຂັນ ຈຸດ​ພິ­ເສດ​ຂອງ​ທີມ​ເນັ້ນ​ຫຼິ້ນ​ລະ­ບົບ​ບານ​ສັ້ນ​ຕໍ່​ບານ​ທີ່​ແນ່­ນອນ ແລະ ຈົບ​ສະ​ກໍ​ທີ່​ສຽບ​ຄົມ ທຸກ​ຄົນ​ມີ​ສັກ­ກະ​ຍະ​ພາບ​ທີ່​ດີ ແລະ ມີ​ຄວາມ​ພ້ອມ​ເຕັມ​ຮ້ອຍ ແລະ ການ​ເຂົ້າ​ຮ່ວມ​ຄັ້ງ​ນີ້ ພວກ​ເຮົາ​ຈະ​ພະ­ຍາ­ຍາມ​ສູ້​ຊົນ​ເຮັດ​ໃຫ້​ດີ​ທີ່​ສຸດ ເພື່ອ​ເຮັດ​ແນວ­ໃດ​ຈະ​ສາ­ມາດ​ປ້ອງ​ກັນ​ແຊັມ​ໄວ້​ໃຫ້​ໄດ້​ອີກ 1 ສະ­ໄໝ.

    ການ​ແຂ່ງ­ຂັນ​ເຕະ­ບານ ຊູ​ຊີງ​ລິງ ຄັບ 2019 ມີ​ບັນ­ດາ​ນັກ­ກີ­ລາ​ທີ່​ຕາງ­ໜ້າ​ໃຫ້​ຊາດ​ໃນ​ຂົງ­ເຂດ​ອາ​ຊຽນ ເຂົ້າ​ຮ່ວມ 9 ທີມ ແລະ ທີມ​ເຈົ້າ­ພາບ ສປ ຈີນ 1 ທີມ ລວມ​ກັນ​ເປັນ 10 ທີມ ແບ່ງ​ອອກ​ເປັນ 2 ກຸ່ມ ແຕ່​ລະ​ກຸ່ມ​ແຂ່ງ­ຂັນ​ພົບ​ກັນ​ໝົດ​ຄັດ​ເອົາ​ທີ 1-2 ຜ່ານ​ເຂົ້າ​ໄປ​ຫຼິ້ນ​ໃນ​ຮອບ​ຕໍ່​ໄປ ສຳ­ລັບ​ກຸ່ມ A ປະ­ກອບ​ມີ ສປ ຈີນ ຟິ​ລິບ​ປິນ ມາ​ເລ​ເຊຍ ສິງ­ກະ­ໂປ ແລະ ລາວ ສ່ວນ​ທີມ B ມີ ຫວຽດ­ນາມ ໄທ ມຽນ​ມາ ອິນ​ໂດ​ເນ​ເຊຍ ແລະ ກຳ­ປູ­ເຈຍ.

ຂ່າວທີ່ກ່ຽວຂ້ອງ