ຂ່າວຫຼ້າສຸດ

ເກັບຄ່າໂຄສະນາທາງມືຖື

1.527 05 ສ.ຫ. 2019 ນານາສາລະ

    ຄື​ດັ່ງ​ຮູ້​ກັນ​ດີ​ແລ້ວ​ວ່າ ໂທລະ­ສັບ​ມື​ຖື​ແມ່ນ​ເຄື່ອງ­ມື​ສື່­ສານຂອງ​ສ່ວນ​ບຸກ­ຄົນ ຫຼື ການ­ຈັດ­ຕັ້ງ​ທີ່​ໃຊ້​ສຳ­ລັບ​ພົວ­ພັນ​ກັບໝູ່​ເພື່ອນ, ວຽກ​ງານ, ການ­ຈັດ­ຕັ້ງ ຫຼື ຕິດ­ຕາມ​ຂໍ້​ມູນ​ຂ່າວ­ສານ​ທີ່​ຈຳ­ເປັນ​ທັງ​ພາຍ​ໃນ ແລະ ສາ­ກົນ ເພື່ອ​ຮັບ​ໃຊ້​ຊີ­ວິດ​ການ​ເປັນ​ຢູ່ ແລະ ການ​ປົກ​ປັກ​ຮັກ­ສາ ແລະ ສ້າງ­ສາ​ພັດ­ທະ­ນາ​ປະ­ເທດ​ຊາດ​ບ້ານ​ເມືອງ ເຊິ່ງ​ພົວ­ພັນ​ເຖິງ​ສິດ­ທິ​ເສລີ­ພາບ​ຂອງ​ສ່ວນ​ບຸກ­ຄົນ ໂດຍ​ບໍ່​ມີ​ໃຜ​ຈະ​ລ່ວງ​ລະ­ເມີດ​ໄດ້. ດັ່ງ­ນັ້ນ ຜົນ​ປະ­ໂຫຍດ​ຂອງ​ການ​ໃຊ້​ໂທລະ­ສັບ​ມື​ຖື ຈຶ່ງ​ມີ​ຫຼາຍ​ພໍ​ສົມ­ຄວນ ສາ­ມາດ​ພົວ­ພັນ​ກັບ​ຍາດ­ຕິ​ພີ່­ນ້ອງ ຊື້​ຂາຍ​ຫງາຍ​ມື​ກັບເພື່ອນ​ມິດ​ໄດ້​ບໍ່​ວ່າ​ພາຍ​ໃນ ກໍ​ຄື​ທຸກ​ແຈ​ມຸມ​ຂອງ​ໂລກ ໂດຍ​ຜ່ານ​ລະ­ຫັດ​ອຳ­ນວຍ​ຄວາມ​ສະ­ດວກ ຫຼື ແອ​ປ​ແບບ​ຕ່າງໆ. ນອກ­ຈາກ​ນີ້​ຍັງ​ສາ­ມາດ​ໂອ້​ລົມ​ກັນ​ໂດຍ​ສາ­ມາດ​ເຫັນ​ໜ້າ​ຕາ​ຄົນ​ໂຕ​ເປັນໆ​ໄດ້​ຕື່ມ​ອີກ... ນັ້ນ​ໝາຍ​ເຖິງ ຜົນ­ສຳ­ເລັດ​ການ​ພັດ­ທະ­ນາວິ­ຊາ​ການ​ດ້ານ​ການ​ຄົມ­ມະ­ນາ­ຄົມ​ສື່­ສານ​ຂອງ​ຍຸກ​ນີ້​ບາດ­ກ້າວ​ໜຶ່ງ. ດັ່ງ­ນັ້ນ ຈາກ​ໂທລະ­ສັບ​ມື​ຖື​ເຄື່ອງ​ດຽວ​ສາ­ມາດສັ່ງ​ການ, ພົວ­ພັນ​ວຽກ​ງານ, ດຳ­ເນີນ​ທຸ­ລະ​ກິດ​ໄດ້​ສະ­ດວກ ຢ່າງ​ຮ້ອຍ​ແປດ​ພັນ​ປະ­ການ.

    ແຕ່​ຄຽງ​ຄູ່​ກັບ​ຈຸດ​ດີ​ກໍ​ມີ​ຈຸດ​ອ່ອນຫຼາຍ​ຢ່າງ​ຈົນ​ນັບ​ບໍ່​ຖ້ວນ ເປັນ­ຕົ້ນ: ເກີດ​ການ​ຕົວະ​ຕົ້ມ​ລະ­ຫວ່າງ​ບຸກ­ຄົນ​ກັບ​ບຸກ­ຄົນ ເກີດ​ການ​ໂຈລະ​ກຳ​ຂໍ້​ມູນ ເປົ່າ​ຂ່າວ ສົ່ງ​ຂ່າວ​ປອມ ສ້າງ​ຄວາມ​ປັ່ນ​ປວນ​ໃນ​ສັງ­ຄົມ, ເຊິ່ງ​ບັນ­ຫາ​ນີ້ ອົງ­ການ​ຄຸ້ມ​ຄອງ​ກ່ຽວ­ຂ້ອງ​ ກໍ​ໄດ້​ມີ​ການ​ອອກ​ກົດ­ໝາຍ​ຄຸ້ມ​ຄອງ ເພື່ອ​ຕິດ­ຕາມ​ຄົນ​ບໍ່​ດີ​ຈຳ­ນວນ​ໜຶ່ງ​ທາງ​ພາຍ​ໃນ ແລະ ຕ່າງ­ປະ­ເທດ​ທີ່​ມີ​ພຶດ­ຕິ​ກຳ​ຜິດ​ກົດ­ໝາຍ ເພື່ອ​ນຳ​ມາ​ດຳ­ເນີນ​ຄະ­ດີ​ຕາມ​ຄວາມ​ຜິດ​ດ້ານ​ຕ່າງໆ.

    ສິ່ງ​ທີ່​ເຮົາໆ ທ່ານໆ​ພົບ​ເຫັນ​ທາງ​ໜ້າ​ຈໍ​ໂທລະ­ສັບ​ລາຍ​ວັນ ແລະ ນັບ​ມື້​ນັບ​ຫຼາຍ​ພົ້ນ​ເດັ່ນ​ຂື້ນ​ນັ້ນ: ແມ່ນ​ການ​ໂຄ­ສະ­ນາ​ສິນ­ຄ້າ ບໍ່​ວ່າ​ຈະ​ເປັນ​ໜ່ວຍ​ໂທລະ­ສັບ ສິນ­ຄ້າ​ໃຊ້​ສອຍ​ເສື້ອ​ຜ້າ​ອາ­ພອນ ລົດ​ລາງ ໂມງ ຫຼື ເຄື່ອງ­ໃຊ້​ແບຣນ​ເນມ​ຍີ່­ຫໍ້​ດັງ, ຢາ​ປົວ​ພະ­ຍາດ​ແບບ​ກິນ​ແລ້ວ ຫຼື ໃຊ້​ແລ້ວ​ເຊົາ​ປານ​ປິດ​ຖີ້ມ​ບາດ​ດຽວ​ປຸບ ທັງ​ໝົດ​ນີ້​ລະ­ບາດ​ໜັກ ຍັງ​ບໍ່​ມີ​ອົງ­ການ​ກ່ຽວ­ຂ້ອງ​ມາ​ເປັນ​ກຳ­ມະ­ການ​ກາງ​ວ່າ ສິ່ງ​ນັ້ນ​ດີ ຫຼື ບໍ່​ດີ ນຳ​ເຂົ້າ​ຖືກ​ກົດ­ໝາຍ​ຫຼື​ບໍ່ ຫຼື ຈະ​ປ່ອຍ­ປະ​ລະ­ເລີຍ​ໄປ​ໃຫ້​ພວກ​ສວຍ­ໂອ­ກາດ​ຕົວະ​ຕົ້ມ ຫຼອກ​ລວງ​ປະ­ຊາ­ຊົນ​ຕາມ​ໜ້າ​ຈໍ​ໂທລະ­ສັບ​ຕໍ່ໆໄປຫຼື​ຢ່າງ­ໃດ..

    ໃນ​ຖາ­ນະ​ເປັນ​ບຸກ­ຄົນ​ທີ່​ເປັນ​ເຈົ້າ​ຂອງ​ໃຊ້​ໂທລະ­ສັບ ແລະ ເບີ​ໂທ​ຢ່າງ​ຊອບ​ທຳ ແລະ ຜ່ານ​ມາ​ກໍ​ບໍ່​ເຄີຍ​ຕິດ­ຕໍ່​ໃຫ້​ມາ​ໂຄ­ສະ­ນາ​ໃສ່​ໜ້າ​ຈໍ​ໂທລະ­ສັບ​ຂອງ​ຕົນ ຈຶ່ງ​ຮຽກ­ຮ້ອງ:

    1. ໃຫ້​ຜູ້​ທີ່​ເອົາ​ມາ​ລົງ​ຂ່າວ​ໂຄ­ສະ­ນາ​ ຕ້ອງ​ຖອນ​ການ​ໂຄ­ສະ­ນາ​ອອກ ອອກ​ຈາກ​ທຸກ​ໜ້າ​ຈໍ​ທີ່​ບໍ່​ຕ້ອງ­ການ​ໃຫ້​ມີ.

    2. ອົງ­ການ​ກ່ຽວ­ຂ້ອງ​ຕ້ອງ​ມີ​ວິ­ທີ​ສະ­ກັດ​ກັ້ນ ຄື້ນ​ຄວາມ​ຖີ່ ຫຼື ວິ­ທີ​ການ​ຕ່າງໆ​ທີ່​ນຳ​ເຂົ້າ­ຂໍ້​ມູນ​ຂ່າວ­ສານ​ອັນ​ບໍ່​ຕ້ອງ­ການ​ເຂົ້າ​ມາ.

    3. ຖ້າ​ບໍ່​ດັ່ງ­ນັ້ນ ຕ້ອງ​ເກັບ​ຄ່າ​ໂຄ­ສະ­ນາ​ປະ­ຈຳ​ວັນ​ທີ່​ລົງ​ໃນ​ໜ້າ​ຈໍ​ໂທລະ­ສັບ ຈະ​ແມ່ນ​ຜູ້​ເອົາ​ມາ​ລົງ ຫຼື ເພື່ອນ​ເຟ​ສ​ກໍ​ຕາມ ໂດຍ​ຕັດ​ເອົາ​ຄ່າ​ໂທ​ຂອງ​ເບີ​ສົ່ງ​ມາ ແລ້ວ​ມາ​ຕື່ມ​ໃສ່​ຄ່າ​ໂທ​ຂອງ​ເບີ​ຜູ້​ເສຍ​ຫາຍ ຫຼື ຖືກ​ລົງ​ລາຍ​ວັນ ເພາະ​ການ​ໂຄ­ສະ­ນາ​ຢູ່​ບ່ອນ​ໃດ​ກໍ​ໄດ້​ເສຍ ບໍ່​ແມ່ນ​ຈະ​ສວຍ­ໂອ­ກາດ ແລະ ຖື​ວ່າ​ເປັນ​ການ​ລະ­ເມີດ​ສິດ­ທິ​ສ່ວນ​ບຸກ­ຄົນ.

    ເຮັດ​ໄດ້​ແນວ​ນີ້ ໜ້າ​ຈໍ​ກໍ​ຈະ​ເບົາ­ບາງ​ລົງ ອັນ​ນີ້​ທຸກ​ມື້​ກວ່າ​ຈະ​ເລື່ອນ​ຜ່ານ​ໄປ​ໄດ້ ກໍ​ຮູ້­ສຶກ​ໝຸດ​ໝັດ ແລະ ພໍ​ຢາກ​ຮ້ອງ​ດ່າ (ຂໍ​ໂທດ) ຜູ້​ເອົາ​ມາ​ລົງ​ແທ້ໆ.

ໂດຍ: ຊຽງ​ເອງ

ຂ່າວທີ່ກ່ຽວຂ້ອງ