ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 06-08-2019

550 06 ສ.ຫ. 2019 ຫົວຂໍ້ຂ່າວອື່ນໆ

    ຄໍ​ລຳ​ປະ­ຈຳ​ວັນ​ນີ້ ເວົ້າ​ເຖິງ 3 ບັນ­ຫາ​ທີ່​ໜ້າ​ສົນ­ໃຈ ຄື​ເລື່ອງ​ການ​ຕິດ​ຕັ້ງ​ຕູ້​ສູບ­ຢາ ຢູ່​ສິງ­ກະ­ໂປ ການ​ອະ­ນຸ­ຍາດ​ຢູ່​ອາ­ໄສ​ແບບ​ຖາ­ວອນ​ທີ່​ອາ​ຣັບ​ເອ​ເມ​ເຣດ ແລະ ເລື່ອງ​ໂຄງ­ການ​ບໍ­ລິ­ຈາກ​ອາ­ຫານ​ໃຫ້​ຄົນ​ທຸກ ຢູ່​ປອກ​ຕຸຍ​ການ.

    ທີ່ ສິງ­ກະ­ໂປ: ນັບ​ແຕ່​ວັນ​ທີ 1 ມັງ­ກອນ​ປີ​ນີ້​ເປັນ­ຕົ້ນ​ມາ ກົດ­ໝາຍ​ຢາ­ສູບ​ສະ­ບັບ​ປັບ­ປຸງ​ຂອງ​ສິງ­ກະ­ໂປ ໄດ້​ກຳ­ນົດ​ອາ­ຍຸ​ຕ່ຳ​ສຸດ​ຂອງ​ຜູ້​ມີ​ສິດ​ສູບ­ຢາ​ຂຶ້ນ​ເປັນ 19 ປີ ວ່າ​ກັນ​ວ່າ ສິງ­ກະ­ໂປ​ເປັນ​ປະ­ເທດ​ຫົວ​ແຖວ​ໃນ​ໂລກ ທີ່​ມີ​ມາດ​ຕະ­ການ​ເຄັ່ງ​ຄັດ​ໃນ​ການ​ຫ້າມ​ສູບ­ຢາ ສະ­ແດງ​ອອກ​ຢູ່​ບ່ອນ​ວ່າ ໃຜ​ກໍ​ຕາມ​ທີ່​ສູບ­ຢາ​ນອກ​ສະ­ຖານ­ທີ່ ທີ່​ກຳ­ນົດ​ໃຫ້​ສູບ­ຢາ ກໍ​ຈະ​ຖືກ​ຈັບ​ກຸມ​ດຳ­ເນີນ​ຄະ­ດີ ແລະ ຖືກ​ປັບ​ໃໝ​ຂັ້ນ​ຕ່ຳ​ສຸດ 200 ໂດ​ລາ ເຖິງ 1.000 ໂດ​ລາ​ສິງ­ກະ­ໂປ ແລະ ເມື່ອ​ບໍ່​ດົນ​ມາ​ນີ້ ກໍ​ມີ​ຂ່າວ​ວ່າ ບໍ­ລິ­ສັດ​ຊາວ​ເທີນ​ກະ​ໂລບ ຈຳ­ກັດ ທີ່​ໃຫ້​ບໍ­ລິ­ການ​ດ້ານ​ໂລ​ຈິດ​ສະ​ຕິກ (ສະ­ຖານ­ທີ່​ພັກ​ພາ​ອາ­ໄສ) ໄດ້​ຕິດ​ຕັ້ງ​ຕູ້​ສູບ­ຢາ​ສາ­ທາ­ລະ­ນະ​ໃນ​ພື້ນ​ທີ່​ວັນ​ນອດ ຊຶ່ງ​ເປັນ​ຍ່ານ​ໃຈ­ກາງ​ທາງ​ທຸ­ລະ​ກິດ​ຂອງ​ສິງ­ກະ­ໂປ ເພື່ອ​ອຳ­ນວຍ​ຄວາມ​ສະ­ດວກ​ສຳ­ລັບ​ຜູ້​ຕ້ອງ­ການ​ສູບ­ຢາ ຕູ້​ສູບ­ຢາ​ດັ່ງ­ກ່າວ​ນອກ­ຈາກ​ຊ່ວຍ​ແກ້​ບັນ­ຫາ​ແງັນ​ຢາ­ສູບ​ໃຫ້​ບັນ­ດາ​ສິງ​ອົມ​ຄວັນ​ແລ້ວ ຍັງ​ມີ​ປະ­ສິດ­ທິ­ພາບ​ໃນ​ການ​ຮັກ­ສາ​ສິ່ງ­ແວ­ດລ້ອມ ສາ­ມາດ​ປົກ​ປ້ອງ​ຄວັນ​ຢາ­ສູບ​ບໍ່​ໃຫ້​ປິວ​ໄປ​ເຂົ້າ​ປາກ​ເຂົ້າ​ດັງ​ຂອງ​ຜູ້​ບໍ່​ສູບ­ຢາ.

    ທີ່ ອາ​ຣັບ​ເອ​ເມ​ເຣັດ (ຢູ​ເອ​ອີ): ມີ​ຂ່າວ​ຈາກ​ສະ­ຫະ­ລັດ​ອາ​ຣັບ​ເອ​ເມ​ເຣັດ ຫວ່າງ​ບໍ່​ດົນ​ມາ​ນີ້​ວ່າ ທາງ​ການ​ຂອງ​ປະ­ເທດ​ນີ້​ຈະ​ໃຫ້​ສິດ​ຢູ່​ອາ­ໄສ​ແບບ​ຖາ­ວອນ​ສຳ­ລັບ​ນັກ­ທຸ­ລະ­ກິດ​ຕ່າງ­ປະ­ເທດ​ຈຳ­ນວນ 6.800 ຄົນ ຖ້າ​ພວກ​ເຂົາ­ເຈົ້າ​ມີ​ເງິນ​ລົງ­ທຶນ​ຢູ່ ຢູ​ເອ​ອີ ຈຳ­ນວນ​ລວມ​ກັນ​ເຖິງ 27 ຕື້​ໂດ​ລາ​ສະ­ຫະ­ລັດ ຫາກ​ໄດ້​ຕາມ​ເງື່ອນ­ໄຂ​ນີ້ ເຫຼົ່າ​ນັກ­ທຸ­ລະ­ກິດ​ກໍ​ຈະ​ໄດ້​ຮັບ “ບັດ​ຄຳ” ແລະ ວີ​ຊາ​ໜັງ­ສື­ຜ່ານ­ແດນ​ໄລ­ຍະ​ຍາວ ນະ­ໂຍ­ບາຍ​ມອບ​ສິດ​ຢູ່​ອາ­ໄສ​ແບບ​ຖາ­ວອນ​ໃຫ້​ນັກ­ທຸ­ລະ­ກິດ​ຕ່າງ­ປະ­ເທດ​ນີ້ ແມ່ນ​ນະ­ໂຍ­ບາຍ​ໃໝ່​ຂອງ​ຢູ​ເອ​ອີ ໃນ​ການ​ຊຸກ­ຍູ້​ເສດ­ຖະ­ກິດ ແລະ ຕະ­ຫຼາດ​ອະ­ສັງ­ຫາ­ລິ­ມະ​ຊັບ ທີ່​ໄດ້​ຮັບ​ຜົນ​ກະ­ທົບ​ຈາກ​ບັນ­ຫາ​ລາ­ຄາ​ນ້ຳ­ມັນ​ຕົກ­ຕ່ຳ ແລະ ອີກ​ດ້ານ​ໜຶ່ງ​ກໍ​ເພື່ອ​ຫັນ​ການ​ພັດ­ທະ­ນາ​ໄປ​ສູ່​ຂົ້ວ​ອື່ນ ແທນ​ທີ່​ຈະ​ອາ­ໄສ​ແຕ່​ຕະ­ຫຼາດ​ນ້ຳ­ມັນ​ຄື​ເມື່ອ​ກ່ອນ.

    ທີ່ ປອກ​ຕຸຍ​ການ: ຂ່າວ​ນີ້​ອອກ​ມາ​ເມື່ອ​ກາງ​ປີ 2017 ພຸ້ນ ແຕ່​ຄວນ​ເບິ່ງ​ໄວ້ ເພາະ​ເປັນ​ການ­ເຄື່ອນ­ໄຫວ​ເພື່ອ​ປາກ​ເພື່ອ​ທ້ອງ​ຂອງ​ຄົນ​ທຸກ​ຍາກ ທີ່​ບໍ່​ມີ​ອາ­ຫານ​ຢູ່​ທ້ອງ ນັ້ນ​ກໍ​ຄື ການ­ເຄື່ອນ­ໄຫວ​ເພື່ອ​ການ​ກຸ­ສົນ ຊ່ວຍ​ບໍ່​ໃຫ້​ຄົນ​ຫິວ​ຕາຍ ເລື່ອງ​ມີ​ຢູ່​ວ່າ ທະ­ນາ­ຄານ​ອາ­ຫານ​ຕ້ານ​ຄວາມ​ອຶດ­ຫິວ​ຂອງ​ປອກ​ຕຸຍ​ການ ໄດ້​ເລີ່ມ​ດຳ­ເນີນ​ໂຄງ­ການ​ຮິບ​ໂຮມ​ອາ­ຫານ​ຕາມ​ຮ້ານ​ຊັບ​ພະ​ສິນ­ຄ້າ​ທັງ​ໝົດ​ພາຍ​ໃນ​ປະ­ເທດ ເພື່ອ​ເອົາ​ໄປ​ບໍ­ລິ­ຈາກ​ຕໍ່­ໃຫ້​ຄົນ​ທຸກ​ຍາກ ໃນ​ບັ້ນ​ດັ່ງ­ກ່າວ ທາງ​ທະ­ນາ­ຄານ​ໄດ້​ຮຽກ­ຮ້ອງ​ໃຫ້​ທຸກ​ຄົນ​ຮ່ວມ​ແຮງ​ຮ່ວມ​ໃຈ​ບໍ­ລິ­ຈາກ​ອາ­ຫານ​ທີ່​ເຫຼືອ​ກິນ​ໃຫ້​ທາງ​ທະ­ນາ­ຄານ ແລະ ເປັນ​ເຈົ້າ​ການ​ເຂົ້າ​ຮ່ວມ​ໂຄງ­ການ​ໃນ​ການ​ຮິບ​ໂຮມ​ອາ­ຫານ​ຈາກ​ຮ້ານ​ຊັບ​ພະ​ສິນ­ຄ້າ ຂ່າວ​ບອກ​ວ່າ ພາຍ​ໃນ​ສອງ​ວັນ​ທີ່​ເລີ່ມ​ໂຄງ­ການ​ນັ້ນ ກໍ​ມີ​ຜູ້​ອາ­ສາ​ສະ­ໝັກ​ເຂົ້າ​ຮ່ວມ​ໂຄງ­ການ​ເຖິງ 40.000 ຄົນ ທີ່​ເຮັດ​ໜ້າ­ທີ່​ຊອກ​ອາ­ຫານ​ຈາກ​ຮ້ານ​ຊັບ​ພະ​ສິນ­ຄ້າ ຈຳ­ນວນ 2.000 ແຫ່ງ ເພື່ອ​ເອົາ​ໄປ​ລ້ຽງ​ປາກ​ລ້ຽງ​ທ້ອງ​ຜູ້​ຄົນ​ທີ່​ຫິວ​ໂຫຍ ໃນ​ປະ­ເທດ​ທີ່​ມີ​ຈຳ­ນວນ​ທັງ​ໝົດ ຢ່າງ​ໜ້ອຍ 420.000 ຄົນ ຂ່າວ​ໃຫ້​ຮູ້​ຕື່ມ​ວ່າ ໃນ​ປີ 2016 ທາງ​ທະ­ນາ­ຄານ​ສາ­ມາດ​ຮິບ​ໂຮມ​ອາ­ຫານ​ເພື່ອ​ຄົນ​ຈົນ​ໄດ້​ທັງ​ໝົດ 26 ລ້ານ​ກິ​ໂລ.

ຂ່າວທີ່ກ່ຽວຂ້ອງ