ປັກກິ່ງສ້າງສະຖານີ 5G ແລ້ວ 5.285 ແຫ່ງ ເລັງຂະຫຍາຍໃຫ້ປົກຄຸມທັງມະຫານະຄອນ

759 06 ສ.ຫ. 2019 ຫົວຂໍ້ຂ່າວອື່ນໆ

    ສຳ­ນັກ­ງານ​ບໍ­ລິ­ຫານ​ກິດ­ຈະ­ການ​ໂທລະ​ຄົມ­ມະ­ນາ­ຄົມ​ຂອງ​ມະ­ຫາ​ນະ­ຄອນ​ປັກ​ກິ່ງ ເປິດ​ເຜີຍ​ວ່າ ໃນ​ທ້າຍ​ເດືອນ​ມິ­ຖຸ­ນາ 2019 ນະ­ຄອນ­ຫຼວງ​ຂອງ​ຈີນ​ໄດ້​ສ້າງ​ສະ­ຖາ­ນີ​ຖານ 5ຈີ (5G) ທົ່ວ​ເມືອງ​ແລ້ວ​ເຖິງ 5.285 ແຫ່ງ.

    ລາຍ​ງານ​ລະ­ບຸ​ວ່າ ຜູ້​ໃຫ້​ບໍ­ລິ­ການ​ໂທລະ​ຄົມ­ມະ­ນາ­ຄົມ​ລາຍ​ໃຫຍ່​ຂອງ​ປະ­ເທດ 3 ບໍ­ລິ­ສັດ (ໄຊ​ນ່າ ໂມ​ບາຍ, ໄຊ​ນ່າ ເທ​ເທ​ຄອມ ແລະ ໄຊ​ນ່າ ຢູ​ນິ​ຄອມ) ໄດ້​ສ້າງ​ສະ­ຖາ­ນີ​ເຫຼົ່າ​ນີ້​ໃນ​ບໍ­ລິ­ເວນ​ເຂດ​ເມືອງ​ຫຼັກ ສະ­ໜາມ​ບິນ​ນາ­ນາ​ຊາດ​ປັກ​ກິ່ງ​ຕ້າ​ຊິງ ສະ­ຖານ­ທີ່​ຈັດ​ງານ​ມະ​ຫະ​ກຳ​ພືດ​ສວນ ແລະ ສະ­ຖານ­ທີ່​ຈັດ​ງານ​ໂອ​ລິມ​ປິກ​ລະ­ດູ​ໜາວ​ປີ 2022.

    ທ່ານ ຫວັງ ຮຸຍ ຮອງ​ຜູ້­ອຳ­ນວຍ­ການ​ສຳ­ນັກ­ງານ​ບໍ­ລິ­ຫານ​ກິດ­ຈະ­ການ​ໂທລະ​ຄົມ­ມະ­ນາ­ຄົມ​ຂອງ​ມະ­ຫາ​ນະ­ຄອນ​ປັກ​ກິ່ງ ກ່າວ​ວ່າ ເຕັກ​ໂນ​ໂລ​ຊີ 5G ຈະ​ທະ­ວີ​ຄວາມ​ສຳ­ຄັນ​ສຳ­ລັບ​ອິນ​ເຕີ​ເນັດ​ຂອງ​ສັບ­ພະ​ສິ່ງ (Internet of Things) ແລະ ມີ​ຄວາມ​ສຳ­ຄັນ​ເຊິງ​ກົນ­ລະ­ຍຸດ​ສຳ­ລັບ​ເສດ­ຖະ­ກິດ​ດິ​ຈິ​ຕັລ ໃນ​ຖາ­ນະ​ເຄືອ​ຂ່າຍ​ເຊື່ອມ​ຕໍ່​ມື​ຖື ແລະ ການ​ສົ່ງ​ຂໍ້​ມູນ​ຮຸ່ນ​ຕໍ່​ໄປ.

    ນະ­ຄອນ­ຫຼວງ​ຈີນ​ວາງ​ນະ­ໂຍ­ບາຍ​ໃນ​ການ​ຂະ­ຫຍາຍ​ເຄືອ​ຂ່າຍ 5G ໃຫ້​ປົກ​ຄຸມ​ທຸກ​ພື້ນ​ທີ່ ເຊັ່ນ ຍ່ານ​ການ​ຄ້າ ສູນ​ກາງ​ທຸ­ລະ​ກິດ ສູນ​ກາງ​ນະ​ວັດ­ຕະ​ກຳ ເຂດ​ພັດ­ທະ­ນາ​ເສດ­ຖະ­ກິດ ແລະ ເຕັກ​ໂນ​ໂລ​ຊີ ແລະ ສູນ​ຊຸມ​ຊົນ​ຊານ­ເມືອງ.

    ທາງ​ດ້ານ​ທ່ານ ກູ່ ຈິ່ນ​ສີ ຫົວ­ໜ້າ​ວິ­ສະ­ວະ­ກອນ​ປະ­ຈຳ​ສຳ​ນັກ­ເສດ­ຖະ­ກິດ ແລະ ເຕັກ​ໂນ​ໂລ​ຊີ​ຂໍ້​ມູນ​ຂ່າວ­ສານ​ແຫ່ງ​ນະ­ຄອນ­ຫຼວງ​ປັກ​ກິ່ງ​ກ່າວ​ວ່າ ເຕັກ​ໂນ​ໂລ​ຊີ 5G ເມື່ອ​ໃຊ້​ປະ­ກອບ​ກັບ​ລະ­ບົບ​ກ້ອງ​ວົງ​ຈອນ​ປິດ ການ​ຮຽນ​ການ​ສອນ​ຜ່ານ​ເຕັກ​ໂນ​ໂລ​ຊີ​ເໝືອນ​ຄວາມ​ເປັນ​ຈິງ (VR) ແລະ ລະ­ບົບ​ທະ­ນາ­ຄານ​ອັດ​ສະ​ລິ​ຍະ ກໍ​ຈະ​ຊ່ວຍ​ເສີມ​ບົດ­ບາດ​ຂອງ​ປັກ​ກິ່ງ​ໃນ​ການ​ເປັນ​ຫົວ​ຫອກ​ສຳ­ຄັນ​ໃນ​ການ​ພັດ­ທະ­ນາ​ນະ​ວັດ­ຕະ​ກຳ​ໃນ​ຈີນ.

ຂ່າວທີ່ກ່ຽວຂ້ອງ