ຂ່າວຫຼ້າສຸດ

ຢູ-14 ດີເຄ ຄ້ວາແຊັມເຕະບານ China Cup 2019

342 07 ສ.ຫ. 2019 ວົງຈອນກີລາ
ຢູ-14 ດີເຄ ຄ້ວາແຊັມເຕະບານ China Cup 2019

    ສະ­ໂມ­ສອນ​ດີ​ເຄ ເອັຟ​ຊີ ຮຸ່ນ​ອາ­ຍຸ​ບໍ່​ເກີນ 14 ປີ ຕົວ​ແທນ​ໜຶ່ງ​ດຽວ​ຈາກ ສປປ ລາວ ບໍ່​ເຮັດ​ໃຫ້​ກອງ​ເຊຍ​ບານ​ຜິດ​ຫວັງ ຫຼັງ​ຈາກ​ໄລ່​ເອົາ​ຊະ­ນະ​ສະ­ໂມ­ສອນ ເສີນ​ໂຈ (ທີມ​ບີ) ຈາກ​ເຈົ້າ­ພາບ 8-0 ໃນ​ວັນ​ທີ 5 ສິງ­ຫາ ນີ້ ຄວ້າ​ແຊັມ​ເຕະ­ບານ​ເຍົາ­ວະ​ຊົນ ລາຍ­ການ China Cup 2019 ທີ່​ເມືອງ​ຣີ​ຈາວ ສປ ຈີນ ໃນ​ລະ­ຫວ່າງ​ວັນ​ທີ 29 ກໍ­ລະ­ກົດ ຫາ 6 ສິງ­ຫາ ນີ້.

    ຢູ-14 ດີ​ເຄ ເອັຟ​ຊີ ລົງ​ສະ­ໜາມ​ແຂ່ງ­ຂັນ 3 ນັດ ໃນ​ຮອບ 4 ທີມ​ສຸດ​ທ້າຍ ເຊິ່ງ​ແຂ່ງ​ແບບ​ພົບ​ກັນ​ໝົດ​ຮອບ​ດຽວ ທີມ​ໃດ​ຊະ­ນະ​ຫຼາຍ​ກວ່າ​ໝູ່ ຫຼື ຜົນ­ງານ​ດີ​ກວ່າ​ໝູ່​ໄດ້​ແຊັມ​ໄປ​ຄອງ ໂດຍ​ຜົນ­ງານ 3 ນັດ​ໃນ​ຮອບ​ນີ້​ຂອງ ດີ​ເຄ ໄລ່​ຖະ​ຫຼົ່ມ ທີມ​ສົງ​ສິ້ງ ວ້າຍ​ກົວ​ຢູ​ເສ້ຍ​ສ້ຽວ 9-0 ຊະ­ນະ ທີມ​ເສີນ​ໂຈ (ທີມ​ເອ) 7-0 ແລະ ຊະ­ນະ ເສີນ​ໂຈ (ທີມ​ບີ) 8-0 ຄວ້າ​ແຊັມ​ມາ​ຄອງ​ດ້ວຍ​ຜົນ­ງານ ຊະ­ນະ 6 ນັດ​ລວດ ນັບ​ມາ​ຕັ້ງ­ແຕ່​ຮອບ​ຄັດ​ເລືອກ ຍິງ​ໄດ້ 57 ປະ­ຕູ ເສຍ​ພຽງ 1 ປະ­ຕູ.

    ສຳ­ລັບ​ຜົນ­ງານ​ຂອງ​ເຍົາ­ວະ​ຊົນ​ລາວ ຢູ-14 ດີ​ເຄ ເອັຟ​ຊີ ໃນ​ຮອບ​ຄັດ​ເລືອກ ຖືກ​ຈັດ​ຢູ່​ກຸ່ມ ເອ ໄລ່​ຖະ​ຫຼົ່ມ​ຄູ່​ແຂ່ງ​ຂາດ​ຮອຍ​ແບບ​ຖະ​ຫຼົ່ມ​ທະ​ລາຍ ຊະ­ນະ ທີມ​ເສີນ​ໂຈ ທິມ​ເອ 10-0 ຖະ​ຫຼົ່ມ ກວນ​ເຊິນ 17-0 ແລະ ຊະ­ນະ ເຈົ້າ­ພາບ ທີມ​ຣີ​ຈາວ 6-1 ເກັບ​ໄຊ 3 ນັດ​ລວດ ມີ 9 ຄະ­ແນນ​ເຕັມ ເປັນ​ອັນ​ດັບ​ທີ 1 ຂອງ​ກຸ່ມ ເອ ຜ່ານ​ເຂົ້າ​ຮອບ​ຮອງ​ຊະ­ນະ​ເລີດ.

    ການ​ແຂ່ງ­ຂັນ​ລາຍ­ການ​ນີ້ ມີ​ການ​ຊີງ​ເຖິງ 7 ຮຸ່ນ​ອາ­ຍຸ ປະ­ກອບ​ມີ: ຢູ-7 ຢູ-8 ຢູ-9 ຢູ-10 ຢູ-11 ຢູ-12 ແລະ ຢູ-14 ໂດຍ​ມີ 81 ທີມ​ເຂົ້າ​ຮ່ວມ ໃນ​ນັ້ນ ສະ­ໂມ­ສອນ ດີ​ເຄ ເອັຟ​ຊີ ເປັນ​ຕົວ​ແທນ 1 ດຽວ ຈາກ ສປປ ລາວ ຖືກ​ເຊີນ​ເຂົ້າ​ຮ່ວມ​ແຂ່ງ­ຂັນ ໃນ​ຮຸ່ນ​ອາ­ຍຸ​ບໍ່​ເກີນ 14 ປີ ມີ 8 ພາກ­ສ່ວນ​ເຂົ້າ​ຮ່ວມ ແບ່ງ​ອອກ​ເປັນ 2 ກຸ່ມ ໂດຍ ດີ​ເຄ ຖືກ​ຈັດ​ຢູ່​ກຸ່ມ A ຮ່ວມ​ກັບ ເສິນ​ໂຈວ ກວນ​ເຊິນ ແລະ ເຈົ້າ­ພາບ ຣີ​ຈາວ ສ່ວນ ກຸ່ມ B ເຈີງ​ໂຈວ​ຈົງ​ເສ້ຍ ຢື້​ຈາວ​ຊິນ​ຍິງ​ຈົງ ຢື້ນ​ຈາວ​ຫຼຽນ​ຕ້າ ແລະ ສົງ​ສິ້ງ ວ້າຍ​ກົວ​ຢູ​ເສ້ຍ​ສ້ຽວ.

ຂ່າວທີ່ກ່ຽວຂ້ອງ