ຂ່າວຫຼ້າສຸດ

ປ່ອຍ ແລະ ຊ໋ອດປາ

1.410 07 ສ.ຫ. 2019 ນານາສາລະ

    ປ່ອຍ​ປາ ແລະ ຊ໋ອດ​ປາ ມີ​ຄວາມ​ໝາຍ ກົງ­ກັນ­ຂ້າມ​ກັນ​ປານ​ໜ້າ​ມື​ກັບ​ຫຼັງ​ມື, ການ​ປ່ອຍ​ປາ ແມ່ນ​ການ​ເພິ່ມ​ຈຳ­ນວນ​ປາ​ໃຫ້​ຫຼາຍ​ຂື້ນ ຕາມ​ແຫຼ່ງ​ນ້ຳ​ທຳ​ມະ​ຊາດ ທັງ​ແມ່ນ​ຄວາມ​ຫ່ວງ​ໃຍ​ຂອງ​ພັກ-ລັດ­ຖະ­ບານ​ແຫ່ງ ສປ​ປລາວ ທີ່​ຢາກ​ໃຫ້​ທຸກ​ແຫຼ່ງ​ນ້ຳ​ທຳ​ມະ​ຊາດ​ມີ​ປາ​ກໍ​ຄື​ສັດ​ນ້ຳ​ປະ­ເພດ​ຕ່າງໆ ເພື່ອ​ເປັນ​ແຫຼ່ງ​ອາ­ຫານ ບ່ອນ​ຫາ​ຢູ່​ຫາ​ກິນ​ຂອງ​ປະ­ຊາ­ຊົນ ໃນ​ແຕ່​ລະ​ທ້ອງ­ຖິ່ນ ແນ­ໃສ່​ຄວາມ​ໝັ້ນ­ຄົງ​ທາງ​ດ້ານ​ສະ­ບຽງ​ອາ­ຫານ ຄຽງ​ຄູ່​ກັບ​ການ​ສະ­ໜອງ​ຈາກ​ແຫຼ່ງ​ອື່ນໆ.

    ເນື່ອງ​ຈາ​ກວ່າ​ປັດ­ຈຸ­ບັນ ຄົນ​ບໍ່​ດີ​ຈຳ­ນວນ​ໜຶ່ງ ໄດ້​ລະ­ເມີດ​ຂໍ້​ຫ້າມ​ກໍ​ຄື​ລະ­ບຽບ​ການ​ແລະ ກົດ­ໝາຍ​ຂອງ​ບ້ານ​ເມືອງ ໂດຍ​ມຸ່ງ​ໜ້າ​ເຫັນ​ແຕ່​ຜົນ​ປະ­ໂຫຍດ​ສ່ວນ​ຕົວ​ທາງ​ເສດ­ຖະ­ກິດ ຄື​ລ່າ​ປາ​ໃນ​ແຫຼ່ງ​ນ້ຳ​ທຳ​ມະ​ຊາດ, ໃນ​ເວີນ​ວັງ​ສະ­ຫງວນ​ບ່ອນ​ປາ​ຊຸມ ຍາມ​ປາ​ຂື້ນ ຍາມ​ປາ​ລ່ອງ ຫຼື ຫາ​ປາ​ຍາມ​ທີ່​ປາ​ກຳ­ລັງ​ວາງ​ໄຂ່... ໂດຍ​ໃຊ້​ອຸ­ປະ­ກອນ​ການ​ຫາ​ແບບ​ຊ໋ອດ​ດ້ວຍ​ໄຟ­ຟ້າ​ຈາກ​ໝໍ້​ໄຟ ຫຼື ຈາກ​ໝໍ້​ກຳ­ເນີດ​ໄຟ­ຟ້າ​ແບບ​ຕ່າງໆ ອັນ​ເຮັດ​ໃຫ້​ລັດ­ສະ­ໝີ​ການ​ດັບ​ສູນ​ປາ​ທັງ​ນ້ອຍ ແລະ​ໃຫຍ່​ຕາຍ​ເປັນ​ວົງ​ກວ້າງ​ຢ່າງ​ຮາບ​ຄາບ ບໍ່​ຕ່າງ​ຫຍັງ​ກັບ​ການ​ຖີ້ມ​ລະ­ເບີດ ຫຼື ລູກ​ແຕກ​ໃນ​ເມື່ອ​ກ່ອນ ກວ່າ​ບ່ອນ​ນັ້ນ​ຈະ​ຟື້ນ​ຕົວ​ໃຫ້​ປາ​ຢູ່​ອາ­ໄສ​ຄືນ​ໄດ້​ກໍ​ເປັນ​ເວ­ລາ 5-10 ປີ.

    ດັ່ງ­ນັ້ນ ເມື່ອ​ບໍ່​ຫຼາຍ​ປີ­ຜ່ານ­ມາ​ນີ້ ພັກ-ລັດ ໄດ້​ກຳ­ນົດ​ເອົາ ວັນ​ທີ 13 ກໍ­ລະ­ກົດ​ເປັນ​ວັນ​ປ່ອຍ​ປາ ຫຼື​ສັດ​ນ້ຳ​ອື່ນໆ​ລົງ​ສູ່​ແຫຼ່ງ​ທຳ​ມະ​ຊາດ ໂດຍ​ຖື​ວ່າ​ເປັນ​ວາ­ລະ​ແຫ່ງ​ຊາດ ເພື່ອ​ເຮັດ​ແນວ­ໃດ​ໃຫ້​ແຫຼ່ງ​ນ້ຳ​ທຳ​ມະ​ຊາດ​ດັ່ງ­ກ່າວ​ມີ​ຈຳ­ນວນ​ປາ​ເພິ່ມ​ຂື້ນ ແລະ ມີ​ວິ­ທີ​ບໍ­ລິ­ຫານ​ຈັດ­ການ​ເຮັດ​ໃຫ້​ຈຳ­ນວນ​ປາ​ເພິ່ມ​ຂື້ນ ແລະ ການ​ຫາ​ປາ​ກໍ​ມີ​ລະ­ບຽບ​ແບບ­ແຜນ, ລະ­ດູ​ການ​ຕາມ​ເໝາະ​ສົມ ຕະ­ຫຼອດ​ເຖິງ​ການ​ນຳ​ໃຊ້​ອຸ­ປະ­ກອນ​ເຄື່ອງ­ມື​ທີ່​ໃຊ້​ໃນ​ການ​ຫາ​ບໍ່​ມີ​ລັກ­ສະ­ນະ​ດັບ​ສູນ​ກ້ຽງ. ໃນ​ຄະ­ນະ​ດຽວ​ກັນ ກໍ​ປູກ​ຈິດ​ສຳ­ນຶກ​ປະ­ຊາ­ຊົນ​ໃນ​ທ້ອງ­ຖິ່ນ​ໃຫ້​ຮູ້­ຈັກ ອະ­ນຸ­ລັກ​ຮັກ­ສາ​ເພື່ອ​ເປັນ​ແຫຼ່ງ​ອາ­ຫານ​ສຳ­ຄັນ​ສຳ­ລັບ​ທ້ອງ­ຖິ່ນ​ຕົນ.

    ເພື່ອ​ເຮັດ​ໃຫ້​ປາ​ໃນ​ແຫຼ່ງ​ນ້ຳ​ທຳ​ມະ​ຊາດ ບໍ່​ຂາດ​ຫາຍ​ໄປ​ຢ່າງ​ສິ້ນ​ເຊີງ​ນັ້ນ ສິ່ງ​ສຳ­ຄັນ​ຄື ຕ້ອງ​ກຳ­ຈັດ​ດ້ວຍ​ລະ­ບຽບ ກົດ­ໝາຍ, ຄື​ການ​ຫ້າມ​ນຳ​ເຂົ້າ​ສິນ­ຄ້າ​ຫາ​ປາ​ແບບ​ດັບ​ສູນ​ເຊື້ອ​ຊາດ​ປາ ເປັນ­ຕົ້ນ ອຸ­ປະ­ກອນ​ຊ໋ອດ​ປາ ເຊິ່ງ​ວາງ​ຂາຍ​ກາດ​ເກື່ອນ​ໃນ​ຕະ­ຫຼາດ​ຂາຍ­ເຄື່ອງ​ທົ່ວ​ໄປ ໂດຍ​ເລິ່ມ​ເກືອດ​ຫ້າມ​ແຕ່​ຢູ່​ຊາຍ​ແດນ​ບ່ອນ​ແຫຼ່ງ​ສິນ­ຄ້າ​ມາ ນອກ­ຈາກ​ນີ້ ຖ້າ​ເຫັນ​ຂາຍ​ຢູ່​ຕະ­ຫຼາດ​ບ່ອນ​ໃດ ເຈົ້າ​ໜ້າ­ທີ່​ຕຳ­ຫຼວດ​ສົມ­ທົບ​ເຈົ້າ​ໜ້າ­ທີ່​ກະ­ສິ­ກຳ ກໍ​ຕ້ອງ​ມີ​ມາດ​ຕະ­ການ​ຕາມ​ຄວາມ​ເໝາະ​ສົມ​ວ່າ​ຈະ​ແກ້​ໄຂ​ແນວ­ໃດ ແລະ ແມ່ນ​ກະ​ທັ້ງ​ພົບ​ເຫັນ​ຢູ່​ເຮືອນ​ໃຜ​ກໍ​ໃຫ້​ນຳ​ມາ​ມອບ​ຕໍ່​ເຈົ້າ​ໜ້າ­ທີ່ ໃຜ​ຄອບ​ຄອງ​ອຸ­ປະ­ກອນ​ດັ່ງ­ກ່າວ​ຖື​ວ່າ​ຜິດ​ກົດ­ໝາຍ.

    ເຮັດ​ໄດ້​ແນວ​ນັ້ນ​ຈຶ່ງ​ຈະ​ເອົາ​ຢູ່, ຖ້າ​ບໍ່​ດັ່ງ­ນັ້ນ ການ​ປ່ອຍ​ປາ​ກໍ​ຈະ​ບໍ່​ມີ​ຄວາມ​ໝາຍ ແລະ ອາດ​ເຮັດ​ໃຫ້​ພວກ​ຊ໋ອດ​ປາ ຍັງ​ລອຍ​ນວນ ມີ​ບ່ອນ​ຢືນ​ຢູ່​ໃນ​ສັງ­ຄົມ ແລະ ກາຍ­ເປັນ​ຕົວ​ການ​ຄຸມ​ກຳ­ເນີດ​ປາ​ຕໍ່​ໄປ.

ໂດຍ: ຊຽງ​ເອງ

ຂ່າວທີ່ກ່ຽວຂ້ອງ