ເບິ່ງບ້ານເຂົາເອົາບົດຮຽນ 08-08-2019

815 08 ສ.ຫ. 2019 ຫົວຂໍ້ຂ່າວອື່ນໆ

    ຄໍ​ລຳ​ມື້­ນີ້ ເລີ່ມ​ກັບ​ຂ່າວ​ມາດ​ຕະ­ການ​ລົງ­ໂທດ​ຜູ້​ປອມ​ໃບ​ຂັບ​ຂີ່​ທີ່​ຫວຽດ­ນາມ ແລະ ການ​ປ້ອງ​ກັນ​ຂ່າວ​ປອມ​ທີ່​ສິງ­ກະ­ໂປ.

    ທີ່ ຫວຽດ­ນາມ: ມີ​ຂ່າວ​ອອກ​ມາ​ຈາກ​ຫວຽດ­ນາມ ໃນ​ຕົ້ນ​ເດືອນ​ກໍ­ລະ­ກົດ​ປີ​ນີ້ ກ່ຽວ​ກັບ​ມາດ​ຕະ­ການ​ລົງ­ໂທດ​ຜູ້​ຂັບ​ລົດ​ໂດຍ­ສານ​ປະ­ເພດ​ແທກ​ຊີ ທີ່​ໃຊ້​ເລ່­ຫຼ່ຽມ​ເພື່ອ​ໂກງ​ໃບ​ຂັບ​ຂີ່ ໂດຍ​ໄດ້​ກຳ­ນົດ​ໂທດ​ຕັດ​ສິດ​ຂັບ​ລົດ​ເປັນ​ເວ­ລາ 5 ປີ​ເຕັມໆ ມາດ​ຕະ­ການ​ລົງ­ໂທດ​ນີ້​ມີ​ເປົ້າ​ໝາຍ​ປາບ​ປາມ​ການ​ຊື້?ຂາຍ​ໃບ​ຂັບ​ຂີ່​ປອມ ກໍ​ຄື ຮູບ​ການ​ໂກງ​ການ​ສອບ­ເສັງ​ເອົາ​ໃບ​ຂັບ​ຂີ່ ເຊັ່ນ: ການ​ນຳ​ໃຊ້​ເຄື່ອງ­ມື​ເອ​ເລັກ​ໂຕຣ​ນິກ​ຕ່າງໆ ເພື່ອ​ຊ່ວຍ​ໃຫ້​ຜູ້​ຂັບ​ຂີ່​ຜ່ານ​ບັ້ນ​ສອບ­ເສັງ​ຂັບ​ຂີ່​ຕົວ​ຈິງ ຂ່າວ​ບອກ​ວ່າ ໃນ​ໄລ­ຍະ​ຫຼັງໆ​ມາ​ນີ້ ບັນ­ຫາ​ຊື້?ຂາຍ ສໍ້​ໂກງ​ການ​ສອບ­ເສັງ​ເອົາ​ໃບ​ຂັບ​ຂີ່​ໄດ້​ກາຍ­ເປັນ​ເລື່ອງ​ໃຫຍ່ ພາຍ­ຫຼັງ​ທາງ​ການ​ໄດ້ ເພີ່ມ​ຄຳ​ຖາມ​ຂໍ້​ສອບ­ເສັງ​ຈາກ​ຈຳ­ນວນ 450 ຂໍ້ ຂຶ້ນ​ເປັນ 600 ຂໍ້ ອັນ​ໄດ້​ເຮັດ​ໃຫ້­ການ​ສອບ­ເສັງ​ເອົາ​ໃບ​ຂັບ​ຂີ່​ຍາກ​ຂຶ້ນ ເມື່ອ​ຍາກ​ຂຶ້ນ ບັນ­ຫາ​ທີ່​ຕາມ​ມາ ກໍ​ຄື ເກີດ​ມີ​ພວກ​ຫົວ​ໃສ​ໃຈ​ຄົດ​ຜະ­ລິດ​ໃບ​ຂັບ​ຂີ່​ປອມ ເພື່ອ​ເອົາ​ກຳ­ໄລ​ງາມໆ​ເຂົ້າ­ຖົງ ຫຼື ຊອກ​ວິ­ທີ​ຊ່ວຍ​ຜູ້​ສອບ­ເສັງ ດ້ວຍ​ວິ­ທີ​ປອມ​ແປງ​ຕ່າງໆ ເພື່ອ​ແລກ​ກັບ​ເງິນ ແນວ­ໃດ​ກໍ​ດີ ທາງ​ການ​ກ່ຽວ­ຂ້ອງ​ຂອງ​ຫວຽດ­ນາມ ກໍ​ບໍ່​ຍອມ​ອ່ອນ​ຂໍ້​ໃຫ້​ພວກ​ສວຍ­ໂອ­ກາດ​ເດັດ­ຂາດ ໂດຍ​ໄດ້​ປະ­ກາດ​ສຽງ​ແຂງ​ວ່າ ໃຜ​ກໍ​ຕາມ​ທີ່​ຖືກ​ຈັບ​ໄດ້​ໄລ່​ທັນ​ວ່າ​ໃຊ້​ໃບ​ຂັບ​ຂີ່​ປອມ ເພື່ອ​ຂັບ​ລົດ ກໍ​ຈະ​ຖືກ​ຕັດ​ສິດ​ຂັບ​ລົດ​ເປັນ​ເວ­ລາ 5 ປີ ພ້ອມ​ດຽວ​ກັນ ທາງ​ການ​ກໍ​ໄດ້​ປະ­ສານ​ສົມ­ທົບ​ແໜ້ນ​ກັບ​ວົງ​ການ​ສື່​ມວນ​ຊົນ ເພື່ອ​ເຜີຍ­ແຜ່​ລະ­ບຽບ​ການ​ກ່ຽວ​ກັບ​ການ​ຮຽນ​ຂັບ​ລົດ ແລະ ການ​ອອກ​ໃບ​ອະ­ນຸ­ຍາດ​ຂັບ​ຂີ່ ຮຽກ­ຮ້ອງ​ໃຫ້​ທຸກ​ຕົວ​ເມືອງ ແລະ ບັນ­ດາ​ແຂວງ ເຜີຍ­ແຜ່​ຂໍ້​ມູນ​ກ່ຽວ​ກັບ​ສະ­ຖານ­ທີ່​ຮຽນ​ຂັບ​ລົດ ບ່ອນ​ລົງ­ທະ­ບຽນ​ສອບ­ເສັງ​ເອົາ​ໃບ​ຂັບ​ຂີ່ ແລະ ບ່ອນ​ຕໍ່​ອາ­ຍຸ​ໃບ​ຂັບ​ຂີ່ ບັນ­ດາ​ຫ້ອງ­ການ​ຂົນ­ສົ່ງ​ໃນ​ທົ່ວ​ປະ­ເທດ​ໄດ້​ຖືກ​ມອບ​ໝາຍ​ໃຫ້​ເອົາ­ໃຈ­ໃສ່​ຕິດ­ຕາມ​ບໍ່​ໃຫ້​ຜູ້​ສອບ­ເສັງ​ນຳ​ອຸ­ປະ­ກອນ​ສື່­ສານ​ເອ​ເລັກ​ໂຕຣ​ນິກ​ເຂົ້າ​ຫ້ອງ​ສອບ­ເສັງ​ນຳ​ເດັດ­ຂາດ ຂ່າວ​ບອກ​ວ່າ ພາຍ​ໃນ​ເດືອນ​ກໍ­ລະ­ກົດ​ປີ​ນີ້ ຄະ­ນະ​ກຳ­ມະ­ການ​ທາງ​ຫຼວງ​ຫວຽດ­ນາມ ໄດ້​ເຊື່ອມ​ຕໍ່​ຖານ​ຂໍ້​ມູນ​ເຂົ້າ​ກັບ​ກົນ​ໄກ​ຖານ​ຂໍ້​ມູນ​ຂອງ​ຕຳ­ຫຼວດ​ຈາ­ລະ​ຈອນ ເພື່ອ​ຕິດ­ຕາມ​ກ່ຽວ​ກັບ​ໃບ​ຂັບ​ຂີ່ ແລະ ຜູ້​ຂັບ​ຂີ່.

    ທີ່ ສິງ­ກະ­ໂປ: ໃນ​ຕົ້ນ​ເດືອນ​ພຶດ­ສະ­ພາ​ປີ​ນີ້ ລັດ​ຖະ​ສະ­ພາ​ສິງ­ກະ­ໂປ ໄດ້​ຕົກ­ລົງ​ຮັບ­ຮອງ​ເອົາ​ກົດ­ໝາຍ​ປາບ​ປາມ​ຂ່າວ​ປອມ​ໃນ​ເຄືອ​ຄ່າຍ​ອິນ​ເຕີ​ເນັດ ກົດ­ໝາຍ​ສະ­ບັບ​ນີ້​ໄດ້​ມອບ​ອຳ­ນາດ​ເດັດ­ຂາດ​ໃຫ້​ລັດ­ຖະ­ບານ​ໃນ​ການ​ກຳ­ນົດ​ໃຫ້​ເວັບ​ໄຊ ແລະ ຂ່າວ​ອອນ​ລາຍ​ຕ້ອງ​ເຜີຍ­ແຜ່​ແຕ່​ຂໍ້​ມູນ​ທີ່​ຖືກ­ຕ້ອງ ທັງ​ມີ​ສິດ​ແກ້​ໄຂ​ຂໍ້​ມູນ​ຂ່າວ­ສານ​ທີ່​ຜິດ­ພາດ ຫຼື ບໍ່​ເໝາະ​ສົມ ມີ​ສິດ​ບັງ­ຄັບ​ໃຫ້​ຜູ້​ປະ­ກອບ​ການ​ເຄືອ​ຄ່າຍ​ສັງ­ຄົມ​ອອນ​ລາຍ ເຮັດ​ຂໍ້​ຄຳ­ເຕືອນ​ໃສ່​ຂໍ້​ມູນ​ຂ່າວ­ສານ​ທີ່​ລັດ­ຖະ­ບານ​ເຫັນ​ວ່າ​ບໍ່​ເໝາະ​ສົມ ແລະ ໃຫ້​ລົບ​ລ້າງ​ຂໍ້​ມູນ​ຂ່າວ­ສານ​ທີ່​ລັດ­ຖະ­ບານ​ຖື​ວ່າ​ເປັນ​ຂ່າວ​ປອມ ສຳ­ລັບ​ຜູ້​ລະ­ເມີດ​ກົດ­ໝາຍ​ສະ­ບັບ​ນີ້​ນັ້ນ​ຈະ​ໄດ້​ຮັບ​ໂທດ​ຈຳ​ຄຸກ​ສູງ​ສຸດ 10 ປີ ຫຼື ຖືກ​ປັບ​ໃໝ​ເປັນ​ເງິນ​ສູງ​ສຸດ 1 ລ້ານ​ໂດ​ລາ​ສິງ­ກະ­ໂປ.

ຂ່າວທີ່ກ່ຽວຂ້ອງ