ຂ່າວຫຼ້າສຸດ

ຂ່າວ​ສັ້ນ

894 08 ສ.ຫ. 2019 ຂ່າວຕ່າງປະເທດ
ຂ່າວ​ສັ້ນ

   ຣັດ​ເຊຍ: ຄະນະ​ກຳມະການ​ສືບສວນ​ສອບ​ສວນ​ຂອງ​ຣັດ​ເຊຍ ແຈ້ງ​ໃຫ້​ຮູ້ເມື່ອ​ວັນ​ທີ 6 ສິງຫາ​ນີ້​ວ່າ ມີ​ຜູ້​ເສຍ​ຊີວິດ 1 ຄົນ ແລະ ບາດເຈັບ​ອີກ 8 ຄົນ ຈາກ​ເຫດການ​ລະເບີດ ແລະ ໄຟ​ໄໝ້ ທີ່​ເກີດ​ຂຶ້ນ​ກ່ອນ​ໜ້າ​ນັ້ນ​ໜຶ່ງ​ວັນ ຢູ່​ໃນ​ສາງ​ອາ​ວຸກ​ແຫ່ງ​ໜຶ່ງ ທີ່​ຂຶ້ນ​ກັບ​ຖານ​ທັບ​ຂອງ​ຣັດ​ເຊຍ ຢູ່​ໃນ​ເຂດ ກຣາ​​ສ​ໂນ​ຢາ​​ສກ໌ ໃນ​ເຂດ ຊີ​ເບຣີ. ກ່ອນ​ໜ້າ​ນັ້ນ ເຈົ້າ​ໜ້າທີ່​ໃນ​ທ້ອງຖິ່ນ ແຈ້ງ​ໃຫ້​ຮູ້​ວ່າ ເຫດການ​ລະເບີດ​ດັ່ງກ່າວ ໄດ້​ເຮັດ​ໃຫ້​ມີ​ຜູ້​ຫາຍ​ສາບ​ສູນ 1 ຄົນ ແລະ ບາດເຈັບ​ອີກ 12 ຄົນ ໃນ​ຂະນະ​ທີ່​ປະຊາຊົນ 9.500 ກວ່າ​ຄົນ ທີ່​ອາ​ໃສ​ຢູ່​ໃນ​ບໍລິເວນ​ໃກ້​ກັບ​ທີ່​ເກີດ​ເຫດ ຕ້ອງ​ໄດ້​ອົບ​ພະ​ຍົບ​ອອກ​ໄປ​ຈາກ​ພື້ນ​ທີ່.

    ອາ​ຟະ​ກາ​ນິດ​ສະຖານ: ໂຄສົກ​ຂອງ​ກະຊວງ​ພາຍ​ໃນ​ອາ​ຟະ​ກາ​ນິດ​ສະຖານ ແຈ້ງ​ໃຫ້​ຮູ້​ວ່າ ລະເບີດ​ໜ່ວຍ​ໜຶ່ງ​ໄດ້​ແຕກ​ຂຶ້ນ​ຢູ່​ໃນ​ເຂດ ຄາຍ​ຄາ​ນາ ໃນ​ນະຄອນຫຼວງ ກາ​ບູນ ຂອງ​ອາ​ຟະ​ກາ​ນິດ​ສະຖານ ເມື່ອ​ວັນ​ທີ 6 ສິງຫາ​ນີ້ ໂດຍ​ເປັນ​ການ​ມຸ່ງ​ເປົ້າ​ໃສ່​ລົດ​ຄັນ​ໜຶ່ງ ຂອງ​ກອງ​ກຳລັງ​ຕ້ານ​ຢາ​ເສບ​ຕິດ ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ 2 ຄົນ ແລະ ບາດເຈັບ​ອີກ 7 ຄົນ.

    ບົດ​ລາຍ​ງານ​ຂອງ​ຄະນະ​ຂອງ​ສະຫະ​ປະຊາ​ຊາດ ປະຈຳ​ອາ​ຟະ​ກາ​ນິດ​ສະຖານ (UNAMA) ທີ່​ໄດ້​ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 2 ສິງຫາ​ທີ່​ຜ່ານ​ມາ ໃຫ້​ຮູ້​ວ່າ ໃນ​ເດືອນ​ກໍລະກົດ​ທີ່​ຜ່ານ​ມາ ຈຳນວນ​ສາມັນ​ຊົນ​ທີ່​ເສຍ​ຊີວິດ ແລະ ບາດເຈັບ​ຈາກ​ເຫດການ​ຮຸນ​ແຮງ​ຕ່າງໆ​ຢູ່​ໃນ​ອາ​ຟະ​ກາ​ນິດ​ສະຖານ ໄດ້​ຂຶ້ນ​ສູ່​ລະດັບ​ສູງ​ເປັນ​ປະຫວັດ​ການ​ທີ່ 1.500 ກວ່າ​ຄົນ.

    ສາທາລະນະ​ລັດ ປະຊາທິປະໄຕ ກົງ​ໂກ: ສື່ສານ​ໃນ​ທ້ອງຖິ່ນ​ລາຍ​ງານ​ວ່າ ໄດ້​ຄົ້ນ​ພົບ​ຮ່າງ​ຜູ້​ເສຍ​ຊີວິດ​ແລ້ວ 11 ສົບ ແລະ ຍັງ​ມີ​ຜູ້​ຫາຍ​ສາບ​ສູນ​ອີກ​ປະມານ 50 ຄົນ ໃນ​ຂະນະ​ທີ່​ມີ​ຜູ້​ເອົາ​ຊີວິດ​ລອດ​ມາ​ໄດ້ 16 ຄົນ ຈາກ​ອຸບັດເຫດ​ເຮືອ​ຂວ້ຳ​ຢູ່​ໃນ​ແມ່ນ້ຳ​ສາຍ​ໜຶ່ງ ໃນ​ເຂດ​ພາກ​ກາງ ສາທາລະນະ​ລັດ ປະຊາທິປະໄຕ ກົງ​ໂກ. ອຸບັດເຫດ​ດັ່ງກ່າວ ເກີດ​ຂຶ້ນ​ເມື່ອ​ວັນ​ທີ 6 ສິງຫາ​ນີ້ ໃນ​ຂະນະ​ທີ່​ເຮືອ​ລຳ​ໜຶ່ງ ບັນທຸກ​ຜູ້ໂດຍສານ​ເກີນ​ຄວາມ​ສາມາດ​ຮອງ​ຮັບ ເພື່ອ​ມຸ່ງ​ໜ້າ​ໄປ​ຍັງ​ນະຄອນຫຼວງ ກິນ​ຊາ​ຊາ.

    ກ່ອນ​ໜ້າ​ນັ້ນ ໃນ​ເດືອນ​ເມສາ​ທີ່​ຜ່ານ​ມາ ໄດ້​ມີ​ຜູ້​ເສຍ​ຊວິດ 167 ຄົນ ຢູ່​ໃນ​ອຸບັດເຫດ​ການ​ຄົມມະນາຄົມ​ທາງນ້ຳ​ສອງ​ລາຍ ເຮັດ​ໃຫ້​ປະທານາທິບໍດີ​ຂອງ ສາ​ທາ​ລະ​ນັດ ປະຊາທິປະໄຕ ກົງ​ໂກ ຕ້ອງ​ໄດ້​ປະກາດ​ບັງຄັບ​ໃຫ້​ຜູ້ໂດຍສານ​ທີ່​ເດີນທາງ​ດ້ວຍ​ກຳປັ່ນ ເຮືອ​ແພ ຕ້ອງ​ມີ​ກົງ​ເບັງ​ຊູຊີບ.

    ອິນ​ເດຍ: ອົງການ​ດັບ​ເພີງ ເດລີ ໃຫ້​ຮູ້​ວ່າ ມີ​ຜູ້​ເສຍ​ຊີວິດ 6 ຄົນ (ໃນ​ນັ້ນ​ມີ​ແມ່ຍິງ ຄົນ ແລະ ເດັກນ້ອຍ 3 ຄົນ) ແລະ ບາດເຈັບ​ອີກ 11 ຄົນ ຢູ່​ໃນ​ເຫດການ​ໄຟ​ໄໝ້ ທີ່​ເກີດ​ຂຶ້ນ​ໃນ​ອາຄານ​ສູງ 5 ຊັ້ນ​ຫຼັງ​ໜຶ່ງ ຢູ່​ໃນ​ເຂດ​ທິດຕາເວັນອອກ​ສ່ຽງ​ໃຕ້​ຂອງ​ເດລີ (ອິນ​ເດຍ) ເມື່ອ​ວັນ​ທີ 6 ສິງຫາ​ນີ້. 

    ຫວຽດນາມ: ຕົວ​ແທນ​ຈາກ​ຄະນະ​ກຳມະການ​ປະຊາຊົນ​ຕາແສງ ກວາງ​ດົງ ເມືອງ​ກວາງ​ແຈກ (ແຂວງ​ກວາງ​ບິງ) ໃນ​ເຂດ​ພາກ​ກາງ​ຫວຽດນາມ ຢັ້ງຢືນ​ໃນ​ວັນ​ທີ 7 ສິງຫາ​ນີ້​ວ່າ ຢູ່​ໃນ​ພື້ນ​ທີ່​ຕາແສງ​ດັ່ງກ່າວ ໄດ້​ເກີດ​ເຫດການ​ທີ່​ມີ​ເດັກນ້ອຍ 3 ຄົນ ເສຍ​ຊີວິດ​ຍ້ອນ​ດຶກ​ນ້ຳ. ເຫດການ​ດັ່ງກ່າວ​ເກີດ​ຂຶ້ນ ໃນ​ວັນ​ທີ 6 ສິງຫາ ເມື່ອ​ເດັກນ້ອຍ 4 ຄົນ ຊວນ​ກັນ​ໄປ​ອາບນ້ຳ​ຢູ່​ໃນ​ໜອງ​ທີ່​ຫ່າງ​ຈາກ​ເຮືອນ ປະມານ 1 ​ກມ. ມີ​ເດັກນ້ອຍ 1 ຄົນ ໄດ້​ກັບ​ເມືອ​ເຮືອນ​ກ່ອນ ໃນ​ຂະນະ​ທີ່​ຍັງ​ອີກ 3 ຄົນ ທີ່​ມີ​ອາຍຸ​ແຕ່ 5 - 7 ປີ ພາກັນ​ອາບນ້ຳ​ຕໍ່ ແລະ ໃນ​ເວລາ​ອາບນ້ຳ ໄດ້​ໄປ​ຕົກ​ໃສ່​ຈຸດ​ທີ່​ນ້ຳ​ເລິກ ພາໃຫ້​ພວກ​ເຂົາ​ດຶກ​ນ້ຳ​ຕາຍ. ຈົນ​ຮອດ​ຫົວຄ່ຳ​ຂອງ​ວັນ​ທີ 6 ສິງຫາ ບັນດາ​ຄອບຄົວ​ທີ່​ບໍ່​ເຫັນ​ລູກ​ກັບ​ມາ​ເຮືອນ ຈຶ່ງ​ໄດ້​ນຳໄປ​ຊອກ​ຫາ ແລະ ກໍ​ໄດ້​ພົບ​ເຫັນ​ເດັກນ້ອຍ​ທັງ​ສາມ​ຕາຍ​ດຶກ​ນ້ຳ​ຢູ່​ໃນ​ໜອງ.

ຂ່າວທີ່ກ່ຽວຂ້ອງ