ຂ່າວຫຼ້າສຸດ

ຈິດສຳນຶກແຫ່ງຄວາມສົງໄສ

1.373 09 ສ.ຫ. 2019 ນານາສາລະ

    ທຳ​ມະ​ຊາດ​ຂອງ​ມະ­ນຸດ ເຖິງ​ແມ່ນ​ວ່າ​ມີ​ຫຼາຍ​ຄັ້ງ​ໃນ​ຊີ­ວິດ ຈະ​ໄດ້​ວາງ​ແຜນ​ທຸກ​ຂັ້ນ​ຕອນ​ໃນ​ການ​ພັດ­ທະ­ນາ​ອາ­ຊີບ​ໄວ້​ດີ​ແລ້ວ ແຕ່​ຈິດ​ສຳ­ນຶກ​ຂ້າງ​ໃນ​ກໍ​ອາດ​ຍັງ​ມີ​ຄວາມ​ສົງ­ໄສ​ເຕັມ​ເອິກ​ວ່າ​ແຜນ­ການ​ທີ່​ວາງ​ໄວ້​ນັ້ນ ຈະ​ສຳ­ເລັດ​ໄດ້​ດີ​ພຽງ​ໃດ ເຊິ່ງ​ຄົງ​ຕົກ​ຢູ່​ໃນ​ກໍ­ລະ­ນີ​ດຽວ​ກັນ​ກັບ​ບ້ານ​ເຮົາ​ທີ່​ສ້າງ​ລັດ​ແຫ່ງ​ການ​ຄຸ້ມ​ຄອງ​ດ້ວຍ​ລະ­ບຽບ​ກົດ­ໝາຍ ເຊິ່ງ​ໄລ­ຍະ​ບໍ່​ດົນ​ມາ​ນີ້​ປາ­ກົດ​ມີ​ນິ­ຕິ​ກຳ​ອອກ​ຈາກ​ລັດ­ຖະ­ບານ ຫຼື ບາງ​ກະ­ຊວງ​ທີ່​ຫ້າມ​ພະ­ນັກ­ງານ​ສວຍ​ໃຊ້​ໜ້າ­ທີ່​ຕຳ­ແໜ່ງ​ຫາ​ຜົນ​ປະ­ໂຫຍດ​ແບບ​ບໍ່​ຊອບ​ທຳ​ຕື່ມ​ອີກ​ເພື່ອ​ຮັດ­ກຸມ.

    ບາງ​ກະ­ຊວງ​ອອກ​ແຈ້ງ​ການ ເຊັ່ນ: ເລື່ອງ​ຫຼິ້ນ​ເຟດ​ບຸກ ບາງ​ກະ­ຊວງ​ອອກ​ແຈ້ງ​ການ​ລະ­ບຽບ​ທີ່​ດິນ...ປະ­ເດັນ​ຈຶ່ງ​ຢູ່​ທີ່​ການ​ນຳ​ເອົາ​ນິ­ຕິ​ກຳ​ໄປ​ຈັດ​ຕັ້ງ​ປະ­ຕິ­ບັດ​ວ່າ​ຈະ​ເກີດ​ດອກ​ອອກ​ຜົນ​ພຽງ​ໃດ ເພາະ​ຖ້າ­ວ່າ​ເຮົາ​ມີ​ກົດ­ໝາຍ​ຄວບ​ຄຸມ ເຮົາ​ມີ​ນະ­ໂຍ­ບາຍ ເຮົາ​ມີ​ແຈ້ງ​ການ​ວາງ​ລະ­ບຽບ​ຄວບ​ຄຸມ ຖື​ເປັນ​ເຄື່ອງ­ມື​ບໍ­ລິ­ຫານ ແລະ ການ​ຄຸ້ມ​ຄອງ​ທີ່​ມີ​ປະ­ສິດ­ທິ­ພາບ​ໄດ້ ຖ້າ­ວ່າ​ການ​ບັງ­ຄັບ​ໃຊ້​ມັນ​ເກີດ​ຄວາມ​ຍຸ­ຕິ​ທຳ​ສຳ­ລັບ​ທຸກ​ຝ່າຍ.

    ຫາກ​ເວົ້າ​ເຖິງ​ບັນ­ຫາ​ການ​ແກ້​ໄຂ​ປາ­ກົດ­ການ​ຫຍໍ້­ທໍ້ ທີ່​ເກີດ​ຂຶ້ນ​ກັບ​ພະ­ນັກ­ງານ​ຫຼາຍ​ລະ­ດັບ​ໃນ​ໜ່ວຍ​ງານ​ຂອງ​ລັດ ຄື​ຊິ​ບໍ່​ມີ​ຫຍັງ​ດີກ​ວ່າ­ການ​ນຳ​ໃຊ້​ລະ­ບຽບ​ການ​ທີ່​ມີ​ຢູ່​ແລ້ວ ມາ​ເປັນ​ເຄື່ອງ​ຕັດ­ສິນ ຕ່າງ​ແຕ່​ວ່າ​ວິ­ທີ​ການ​ຈະ​ເດັດ­ຂາດ​ພຽງ​ໃດ​ນັ້ນ ຄົງ​ເປັນ​ສິ່ງ​ທີ່​ສັງ­ຄົມ​ເຝົ້າ​ຕິດ­ຕາມ ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ເຄີຍ​ມີ​ຄຳ​ເຫັນ​ໄວ້​ວ່າ: ຕ້ອງ​ແກ້​ຜູ້​ທີ່​ບໍ່​ຢາກ​ແກ້ ບໍ່​ກ້າ​ແກ້ ຜູ້​ບໍ່​ຈິງ​ໃຈ​ແກ້ ຜູ້​ບໍ່​ມີ​ຄວາມ​ສາ­ມາດ​ແກ້ ຜູ້​ທີ່​ຂັດ­ຂວາງ​ໃນ​ການ​ແກ້ ແລະ ແກ້​ແຕ່​ເທິງ​ລົງ​ຮອດ​ລຸ່ມ ຄຳ​ເວົ້າ​ຂ້າງ​ເທິງ​ນີ້​ຫວັງ​ວ່າ​ຫຼາຍ​ທ່ານ​ຄົງ​ຈະ​ໄດ້​ນຳ​ມາ​ຄິດ​ໄຕ່­ຕອງ ແລະ ຕີ​ຄວາມ​ເບິ່ງ​ວ່າ​ພວກ​ບໍ່​ຢາກ​ແກ້​ໄຂ​ບັນ­ຫາ​ດັ່ງ­ກ່າວ​ນັ້ນ ເປັນ​ຍ້ອນ​ຫຍັງ ?.

    ບໍ່​ຢາກ​ແກ້​ຍ້ອນ​ຢ້ານ​ເສຍ​ຜົນ​ປະ­ໂຫຍດ ອຳ­ນາດ ໜ້າ­ທີ່ ຕຳ­ແໜ່ງ ທີ່​ເຄີຍ​ໄດ້​ຮັບ ແລະ ກຸ່ມ​ປະ­ເພດ​ບໍ່​ກ້າ​ແກ້​ໄຂ ກໍ​ຍ້ອນ​ວ່າ ກຸ່ມ​ເປົ້າ​ໝາຍ​ເປັນ​ຫົວ­ໜ້າ ມີ​ອຳ­ນາດ​ໜ້າ­ທີ່​ຕຳ­ແໜ່ງ​ສູງ​ກວ່າ​ຕົນ ເຂົ້າ​ທຳ­ນອງ​ທີ່​ວ່າ ຕຳ​ນິ​ນາຍ​ພາຍ​ຖົງ​ໜີ ຫຼື ຕຳ​ນິ​ນາຍ​ຕາຍ​ທັງ​ຢືນ ຫຼື ວ່າ​ຍ້ອນ​ຄວາມ​ເຫັນ​ອົກ​ເຫັນ­ໃຈ​ກັນ...ບໍ່​ສາ­ມາດ​ແກ້ ບໍ່​ຈິງ​ໃຈ​ແກ້​ໄຂ...?.

    ຜູ້​ຂຽນ​ຈຶ່ງ​ຂໍ​ສະ­ເໜີ​ເປັນ​ການ​ແລກ­ປ່ຽນ ຫຼັງ​ຈາກ​ໄດ້​ຊອມ​ເບິ່ງ​ວ່າ​ສັງ­ຄົມ​ບ້ານ​ເຮົາ​ມີ​ທັງ​ກົດ­ໝາຍ ນະ­ໂຍ­ບາຍ ແຈ້ງ​ການ ລະ­ບຽບ ຈັນ​ຍາ​ບັນ​ຕ່າງໆ​ເກືອບ​ຄົບ​ຖ້ວນ​ສົມ­ບູນ ແຕ່​ວິ­ທີ​ການ­ຈັດ­ຕັ້ງ​ປະ­ຕິ­ບັດ ລົງ­ໂທດ​ຜູ້​ລະ­ເມີດ​ຈະ​ຈິງ​ຈັງ​ພຽງ​ໃດ​ນັ້ນ ແມ່ນ​ສັງ­ຄົມ​ກຳ­ລັງ​ເຝົ້າ​ຕິດ­ຕາມ.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ