ຫາລືຄູ່ຮ່ວມພັດທະນາ ເພື່ອກຽມກອງປະຊຸມໂຕະມົນ ປະຈຳປີ 2019

1.069 09 ສ.ຫ. 2019 ຂ່າວໜ້າ​ໜຶ່ງ
ຫາລືຄູ່ຮ່ວມພັດທະນາ ເພື່ອກຽມກອງປະຊຸມໂຕະມົນ ປະຈຳປີ 2019

    ກະ­ຊວງ​ແຜນ­ການ ແລະ ການ​ລົງ­ທຶນ (ຜທ) ຮ່ວມ​ກັບ​ອົງ­ການ​ສະ­ຫະ​ປະ­ຊາ​ຊາດ ເພື່ອ​ການ​ພັດ­ທະ­ນາ (UNDP) ຈັດ​ກອງ​ປະ­ຊຸມ​ປະ­ທານ ແລະ ປະ­ທານ​ຮ່ວມ​ຂອງ​ໜ່ວຍ​ງານ​ຂະ­ແໜງ ເພື່ອ​ປຶກ­ສາ​ຫາ­ລື​ຄູ່​ຮ່ວມ​ພັດ­ທະ­ນາ ຂຶ້ນ​ວັນ​ທີ 8 ສິງ­ຫາ 2019 ຢູ່​ກະ­ຊວງ​ດັ່ງ­ກ່າວ ໂດຍ​ເປັນ​ປະ­ທານ​ຂອງ​ທ່ານ ກິ​ແກ້ວ ຈັນ­ທະ​ບູ​ຣີ ຮອງ​ລັດ­ຖະ­ມົນ­ຕີ​ກະ­ຊວງ ຜທ ແລະ ທ່ານ​ນາງ Sara Sekkenes ຜູ້​ປະ­ສານ​ງານ UNDP ປະ­ຈຳ​ລາວ ມີ​ບັນ­ດາ​ກະ­ຊວງ ຂະ­ແໜງ­ການ ຄູ່​ຮ່ວມ​ພັດ­ທະ­ນາ ຕາງ­ໜ້າ​ອົງ​ການ­ຈັດ­ຕັ້ງ​ສາ­ກົນ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ກອງ​ປະ­ຊຸມ​ຄັ້ງ​ນີ້ ເປັນ​ກົນ​ໄກ​ປະ­ສານ​ງານ​ທີ່​ສຳ­ຄັນ​ຂອງ​ຂະ​ບວນ​ການ​ໂຕະ­ມົນ ສຳ­ລັບ​ວຽກ​ຮ່ວມ​ມື​ເພື່ອ​ການ​ພັດ­ທະ­ນາ ເຊິ່ງ​ໄດ້​ປຶກ­ສາ​ຫາ­ລື​ກ່ຽວ​ກັບ​ຄວາມ​ຄືບ​ໜ້າ​ໃນ​ການ­ຈັດ­ຕັ້ງ​ຜັນ​ຂະ­ຫຍາຍ​ຜົນ​ກອງ​ປະ­ຊຸມ​ໂຕະ­ມົນ ປະ­ຈຳ​ປີ 2018 ແລະ ກະ­ກຽມ​ກອງ​ປະ­ຊຸມ​ໂຕະ­ມົນ ປະ­ຈຳ​ປີ 2019.

    ທ່ານ ກິ​ແກ້ວ ຈັນ­ທະ​ບູ​ຣີ ກ່າວ​ວ່າ: ກອງ​ປະ­ຊຸມ​ໂຕະ­ມົນ ປະ­ຈຳ​ປີ 2019 ຈະ​ໄດ້​ປະ­ກອບ­ສ່ວນ​ຢ່າງ​ໃຫຍ່​ຫຼວງ ໃນ​ການ​ສ້າງ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ 5 ປີ ຄັ້ງ​ທີ IX ການ​ສົນ­ທະ­ນາ​ປຶກ­ສາ​ຫາ­ລື​ຈະ​ອີງ​ຕາມ​ບົດ­ຮຽນ​ທີ່​ຖອດ​ຖອນ​ໄດ້​ຈາກ​ການ​ສະ­ຫຼຸບ​ກາງ​ສະ­ໄໝ ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ 5 ປີ ຄັ້ງ​ທີ VIII ທົບ​ທວນ​ແຫ່ງ​ຊາດ​ແບບ​ສະ­ໝັກ​ໃຈ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ ແລະ ທົບ​ທວນ​ກ່ຽວ​ກັບ​ການ​ຫຼຸດ​ພົ້ນ​ອອກ​ຈາກ​ສະ­ຖາ­ນະ​ພາບ​ປະ­ເທດ​ດ້ອຍ​ພັດ­ທະ­ນາ ສົນ­ທະ­ນາ​ທີ່​ມີ​ລັກ­ສະ­ນະ​ສ້າງ­ສັນ ແລະ ໄດ້​ຮັບ​ຜົນ​ດີ ພ້ອມ​ນີ້ ຍັງ​ຈະ​ສຸມ​ໃສ່​ເພີ່ມ​ທະ­ວີ​ການ​ເປັນ​ຄູ່​ຮ່ວມ ແລະ ການ​ຮ່ວມ​ມື​ກັບ​ຫຼາຍ​ພາກ­ສ່ວນ ເພື່ອ​ໝາກ­ຜົນ​ຂອງ​ການ​ພັດ­ທະ­ນາ ນອກ​ນີ້ ທ່ານ​ຍັງ​ໄດ້​ເນັ້ນ​ເຖິງ​ຄວາມ​ສຳ­ຄັນ​ຂອງ​ຄວາມ​ເປັນ​ເຈົ້າ​ການ​ຂອງ​ລັດ­ຖະ­ບານ ກໍ​ຄື ຄວາມ​ສອດ­ຄ່ອງ ແລະ ກົມ­ກຽວ​ຂອງ​ການ​ຮ່ວມ​ມື​ພັດ­ທະ­ນາ​ຕື່ມ​ອີກ.

    ສຳ­ລັບ​ຜົນ​ກອງ​ປະ­ຊຸມ​ໂຕະ­ມົນ​ປະ­ຈຳ​ປີ​ນີ້ ຈະ​ເປັນ​ບ່ອນ​ອີງ​ໃຫ້​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ 5 ປີ ຄັ້ງ​ທີ VIII ສຳ­ລັບ​ທ້າຍ​ສະ­ໄໝ ການ​ສ້າງ​ແຜນ 5 ປີ ຄັ້ງ​ທີ IX ແລະ ວິ­ໄສ​ທັດ​ດ້ານ​ການ​ພັດ­ທະ­ນາ ຮອດ​ປີ 2030 ແລະ ໃນ­ຕໍ່­ໜ້າ.

    ທ່ານ​ນາງ Sara Sekkenes ໄດ້​ເນັ້ນ​ເຖິງ​ຄວາມ​ສຳ­ຄັນ​ຂອງ​ການ​ປຶກ­ສາ​ຫາ­ລື​ດ້ານ​ເນື້ອ​ໃນ​ນະ­ໂຍ­ບາຍ ທີ່​ມີ​ລັກ­ສະ­ນະ​ເປີດ​ກວ້າງ ກົງ​ໄປ​ກົງ​ມາ ແລະ ຢ່າງ​ຕໍ່​ເນື່ອງ ຈຸດ­ປະ­ສົງ​ຫຼັກ​ຂອງ​ບັນ­ດາ​ໜ່ວຍ​ງານ​ຂະ­ແໜງ­ການ ເພື່ອ​ປຶກ­ສາ​ຫາ­ລື​ຄູ່​ຮ່ວມ​ພັດ­ທະ­ນາ ເພື່ອ​ເຮັດ​ໃຫ້­ການ​ສະ­ໜັບ­ສະ­ໜູນ​ຕ່າງໆ ແລະ ບັນ­ດາ​ຂົງ­ເຂດ ບຸ­ລິ­ມະ­ສິດ​ມີ​ຄວາມ​ກົມ­ກຽວ​ກັນ ເຊິ່ງ​ຈະ​ຊຸກ­ຍູ້ ແລະ ຂະ­ຫຍາຍ​ຜົນ​ໄດ້​ຮັບ​ຈາກ​ການ​ພັດ­ທະ­ນາ​ໃຫ້​ທົ່ວ​ເຖິງ ເຮັດ​ໃຫ້​ໝາກ­ຜົນ​ຂອງ​ການ​ພັດ­ທະ­ນາ​ມີ​ຄວາມ​ຍືນ​ຍົງ​ກວ່າ​ເກົ່າ.

ຂ່າວທີ່ກ່ຽວຂ້ອງ