ຂ່າວຫຼ້າສຸດ

ຢູ-18 ທີມຊາດລາວ ຊະນະ ບຣູໄນ ຊີງແຊັມອາຊຽນ

242 12 ສ.ຫ. 2019 ວົງຈອນກີລາ
ຢູ-18 ທີມຊາດລາວ ຊະນະ ບຣູໄນ ຊີງແຊັມອາຊຽນ

    ທັບ​ນັກ­ກີ­ລາ​ບານ­ເຕະ​ຊາຍ ຮຸ່ນ​ອາ­ຍຸ​ບໍ່​ເກີນ 18 ປີ ທີມ​ຊາດ​ລາວ ລົງ​ແຂ່ງ­ຂັນ​ຊີງ​ແຊັມ​ອາ​ຊຽນ 2019 ທີ່​ໂຮ່​ຈີ​ມິງ ສສ ຫວຽດ­ນາມ ນັດ​ທີ 2 ຂອງ​ກຸ່ມ A ໃນ​ວັນ​ທີ 8 ສິງ­ຫາ 2019 ພົບ​ກັບ ຢູ-18 ທີມ​ຊາດ​ບຣູ​ໄນ ຢູ່​ສະ­ໜາມ​ກີ­ລາ​ຊີ​ອານ ໂດຍ​ທີມ​ຊາດ​ລາວ ໄດ້ 3 ຄະ­ແນນ​ຕາມ​ເປົ້າ​ໝາຍ ເອົາ​ຊະ­ນະ  ບຣູ​ໄນ ຫວຸດ ຫວິດ 1-0 ຈາກ​ປະ­ຕູ​ໄຊ​ຂອງ ທະ­ນູ​ທອງ ກຽດ​ນະ​ລົງ​ລົບ ກອງ​ຫຼັງ​ຈາກ​ສະ­ໂມ­ສອນ ວຽງ​ຈັນ ເອັຟ​ທີ ນາ­ທີໆ 21 ແລະ ໃນ​ເກມ​ນີ້ ທີມ​ຊາດ​ລາວ​ຍິງ​ຈຸດ​ໂທດ​ບໍ່​ເຂົ້າ​ໃນ​ທ້າຍ​ເຄິ່ງ​ເວ­ລາ​ທີ​ໜຶ່ງ ເຮັດ​ໃຫ້ ຢູ-18 ລາວ ຊະ­ນະ ຢູ-18 ບຣູ​ໄນ 4 ນັດ​ລວດ​ທີ່​ພົບ​ກັນ​ໃນ​ລາຍ­ການ​ນີ້.

    ການ​ຊະ­ນະ​ນັດ​ນີ້ ເຖິງ​ວ່າ​ຈະ​ບໍ່​ຍິງ​ປະ­ຕູ​ໄດ້​ຫຼາຍ ແຕ່​ເປັນ 3 ຄະ­ແນນ​ທີ່​ລ້ຳ​ຄ່າ ເພື່ອ​ຊີງ​ໂອ­ກາດ​ເຂົ້າ​ຮອບ​ຕໍ່​ໄປ​ກັບ 3 ນັດ​ທີ່​ເຫຼືອ ຫຼັງ​ຈາກ​ນັດ​ທີ​ທຳ​ອິດ​ເສຍ​ໃຫ້ ມຽນ​ມາ 1-3 ເມື່ອ​ວັນ​ທີ 6 ສິງ­ຫາ 2019 ສ່ວນ​ຜົນ​ອີກ​ສອງ​ຄູ່​ໃນ​ກຸ່ມ​ດຽວ​ກັນ ຟິ​ລິບ​ປິນ ເສຍ​ໃຫ້ ມຽນ​ມາ 1-4 ແລະ ຕີ​ມໍ ເລ​ສ​ເຕ ເສຍ​ໃຫ້ ອິນ​ໂດ​ເນ​ເຊຍ 0-4.

    ສະ­ຫຼຸບ​ຕາ­ຕະ­ລາງ​ຄະ­ແນນ​ຜ່ານ​ໄປ 2 ນັດ​ທຸກ​ທີມ​ໃນ​ກຸ່ມ​ນີ້: ອິນ​ໂດ​ເນ​ເຊຍ ແລະ ມຽນ​ມາ ມີ 7 ຄະ­ແນນ ຕີ​ມໍ ແລະ ລາວ ມີ 3 ຄະ­ແນນ ສ່ວນ ບຣູ​ໄນ ແລະ ຟີ​ລິບ​ປິນ ຍັງ​ບໍ່​ມີ​ຄະ­ແນນ ສຳ­ລັບ​ນັດ​ທີ 3 ຂອງ​ກຸ່ມ​ນີ້ ແຂ່ງ­ຂັນ​ໃນ​ວັນ​ທີ 10 ສິງ­ຫາ 2019 ເວ­ລາ 15:30 ໂມງ ຟິ​ລິບ​ປິນ ພົບ ລາວ ມຽນ​ມາ ພົບ ຕີ​ມໍ ເວ­ລາ 15:30 ໂມງ ແລະ ເວ­ລາ 18:30 ໂມງ ບຣູ​ໄນ ພົບ ອິນ​ໂດ​ເນ​ເຊຍ ສ່ວນ​ຜົນ​ແຂ່ງ­ຂັນ​ຈະລາຍ​ງານ​ໃຫ້​ຊາບ​ຕື່ມ.

ຂ່າວທີ່ກ່ຽວຂ້ອງ