ນວ ກຽມສົ່ງ 660 ຊີວິດ ຫວັງທວງຫຼຽນຄຳ ກີລາແຫ່ງຊາດ

478 12 ສ.ຫ. 2019 ວົງຈອນກີລາ
ນວ ກຽມສົ່ງ 660 ຊີວິດ ຫວັງທວງຫຼຽນຄຳ ກີລາແຫ່ງຊາດ

    ກອງ​ປະ­ຊຸມ​ກະ­ກຽມ​ຄວາມ​ພ້ອມ​ຂອງ​ນັກ­ກີ­ລາ ນະ­ຄອນ­ຫຼວງ​ວຽງ​ຈັນ (ນວ) ເພື່ອ​ເຂົ້າ​ຮ່ວມ​ງານ​ມະ​ຫະ​ກຳ​ກີ ລາ​ແຫ່ງ​ຊາດ ຄັ້ງ​ທີ XI ຫຼື ຊຽງ​ຂວາງ ເກມ ຈັດ​ຂຶ້ນ​ວັນ​ທີ 9 ສິງ­ຫາ 2019 ຢູ່​ສຳ­ນັກ­ງານ ອົງ­ການ​ປົກ­ຄອງ ນວ ໂດຍ​ມີ​ທ່ານ ສີ​ຫຸນ ສິດ­ທິ​ລື​ໄຊ ຮອງ​ເຈົ້າ​ຄອງ ນວ ປະ­ທານ​ສະ­ມາ­ຄົມ​ກີ­ລາ-ກາ​ຍະ​ກຳ ນວ ມີ​ບັນ­ດາ​ທ່ານ​ຫົວ­ໜ້າ ພະ​ແນກ-ຮອງ​ຫົວ­ໜ້າ​ພະ​ແນກ ເຈົ້າ­ເມືອງ-ຮອງ​ເຈົ້າ­ເມືອງ ຄະ­ນະ​ສະ­ຫະ­ພັນ​ກີ­ລາ ນວ ເຂົ້າ​ຮ່ວມ.

    ໂອ­ກາດ​ດັ່ງ­ກ່າວ ທ່ານ ສົມ​ພອນ ສອນ​ດາ­ລາ ຮອງ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ​ນວ ກໍ່​ໄດ້​ລາຍ​ງານ​ແຜນ­ການ​ກະ­ກຽມ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ XI ທີ່​ແຂວງ​ຊຽງ​ຂວາງ ເປັນ​ເຈົ້າ­ພາບ ໃນ​ປີ 2020 ໃຫ້​ຊາບ​ວ່າ: ນວ ໄດ້​ມີ​ການ​ກະ­ກຽມ​ບຸ​ຄະ­ລາ​ກອນ ແຜນ​ງົບ­ປະ­ມານ ວຽກ​ງານ​ບໍ­ລິ­ຫານ​ຕ່າງໆ​ໃນ​ປີ 2018 ເພື່ອ​ດຳ­ເນີນ​ໜ້າ​ວຽກ​ຮອບ­ດ້ານ ຈຶ່ງ​ໄດ້​ເປີດ​ກອງ​ປະ­ຊຸມ​ປຶກ­ສາ​ຫາ­ລື ໃນ​ຄັ້ງ​ວັນ​ທີ 12 ທັນ­ວາ 2018 ຜ່ານ​ມາ ແລະ ໄດ້​ສະ­ເໜີ​ແຜນ​ປີ 2019-2020 ປະ­ກອບ​ມີ ເປີດ​ກອງ​ປະ­ຊຸມ​ສະ­ມາ­ຄົມ ເມືອງ ແລະ ພະ­ແນກ­ການ​ທີ່​ຮັບ­ຜິດ­ຊອບ​ກີ­ລາ​ແຕ່​ລະ​ປະ­ເພດ ຂຶ້ນ​ພາຍ​ໃນ​ເດືອນ​ມິ­ຖຸ­ນາ 2019 ກະ­ກຽມ​ແຜມ​ຄົນ ແຜນ​ວຽກ ແລະ ແຜນ​ງົບ­ປະ­ມານ​ຄືນ­ໃໝ່ ແຕ່​ເດືອນ​ມິ­ຖຸ­ນາ ຫາ ກໍ­ລະ­ກົດ 2019 ເດືອນ​ສິງ­ຫາ 2019 ຂຶ້ນ​ທະ​ບຽບ​ຄູ​ເຝິກ ແລະ ນັກ­ກີ­ລາ​ໃຫ້​ໄດ້ 100%.

    ພ້ອມ​ດຽວ​ກັນ​ນີ້ ມອບ​ໃຫ້​ບັນ­ດາ​ເມືອງ ພະ­ແນກ­ການ ປະ­ສານ​ກັບ​ສະ­ຫະ­ພັນ​ທີ່​ຕົນ​ຮັບ­ຜິດ­ຊອບ ເພື່ອ​ຂຶ້ນ​ແຜນ​ທົດ​ສອບ​ແຂ່ງ­ຂັນ ແລະ ຄັດ​ເລືອກ​ຕາມ​ເງື່ອນ­ໄຂ ສະ­ຫະ­ພັນ​ໃດ​ທີ່​ເຂັ້ມ­ແຂງ​ສົມ​ທັບ​ເມືອງ ພະ​ແນກ ເລີ່ມ​ເຝິກ­ຊ້ອມ​ແຕ່​ເດືອນ​ກໍ­ລະ­ກົດ 2019 ເປັນ­ຕົ້ນ​ໄປ ສະ­ເໜີ​ທາງ ນວ ຮັບ­ຜິດ­ຊອບ​ໄລ­ຍະ I ແຕ່​ເດືອນ​ກັນ­ຍາ ຫາ ພະ­ຈິກ 2019 ໂດຍ​ຄິດ­ໄລ່​ອັດ­ຕາ​ໃຫ້ 20.000 ກີບ/ຄົນ/ວັນ ໄລ­ຍະ​ທີ II ແຕ່​ເດືອນ​ທັນ­ວາ 2019 ຫາ​ເດືອນ ມັງ­ກອນ 2020 ຄິດ​ໄລ​ອັດ­ຕາ​ໃຫ້ 40.000 ກີບ/ຄົນ/ວັນ ແລະ ຄູ​ເຝິກ 50.000/ຄົນ/ວັນ ໄລ­ຍະ​ທີ III ເລີ່ມ​ແຕ່​ວັນ​ທີ 1 ກຸມ­ພາ ຫາ 5 ມີ­ນາ 2020 ຄິດ­ໄລ່​ອັດ­ຕາ​ໃຫ້ 70.000 ກີບ/ຄົນ/ວັນ ແລະ ຄູ​ເຝິກ 80.000 ກີບ/ຄົນ/ວັນ (ເຂົ້າ​ນອນ​ສູນ) ແລະ ໃນ​ໄລ­ຍະ​ການ​ແຂ່ງ­ຂັນ​ເລີ່ມ​ແຕ່​ວັນ​ທີ 6 ມີ­ນາ ຫາ 1 ເມ­ສາ 2020 (ໄລ­ຍະ​ແຂ່ງ­ຂັນ) ຄິດ­ໄລ່​ໃຫ້ 1 ແສນ​ກີບ/ຄົນ/ວັນ ແລະ ຄາດ​ວ່າ​ຈະ​ສົ່ງ​ຄະ­ນະ​ນຳ ຄູ​ຝິກ ແລະ ນັກ­ກີ­ລາ ນວ ເຂົ້າ​ຮ່ວມ 660 ຊີ­ວິດ ເພື່ອ​ທວງ​ເຈົ້າ​ຫຼຽນ​ຄຳ ຫຼັງ​ຈາກ​ຄັ້ງ​ຜ່ານ​ມາ ຢູ່​ແຂວງ​ອຸ­ດົມ​ໄຊ ປີ 2014 ໄດ້​ອັນ​ດັບ​ທີ 2.

    ນອກ­ຈາກ​ນັ້ນ ຍັງ​ມີ​ນະ­ໂຍ­ບາຍ​ຕໍ່​ຄູ​ເຝິກ ແລະ ນັກ­ກີ­ລາ ຜູ້​ທີ່​ໄດ້​ຮັບ​ຫຼຽນ​ຄຳ ເງິນ ແລະ ທອງ ປະ­ກອບ​ມີ ປະ­ເພດ​ບຸກ­ຄົນ ແລະ 2 ຄົນ​ລົງ​ມາ ຫຼຽນ​ຄຳ 6 ລ້ານ​ກີບ/ຄົນ ຫຼຽນ​ເງິນ 4 ລ້ານ​ກີບ/ຄົນ ແລະ ຫຼຽນ​ທອງ 2 ລ້ານ​ກີບ/ຄົນ ສ່ວນ​ປະ­ເພດ​ທີມ ຫຼື 3 ຄົນ​ຂຶ້ນ​ໄປ ແມ່ນ​ຈະ​ໄດ້​ຮັບ 50% ຂອງ​ຫຼຽນ​ດ່ຽວ.

    ສຳ­ລັບ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ XI ແມ່ນ​ໄດ້​ກຳ­ນົດ​ທັງ​ໝົດ 28 ປະ­ເພດ​ກີ­ລາ ໃນ​ນັ້ນ ນວ ຈະ​ສົ່ງ​ຄົບ​ທຸກ​ປະ­ເພດ ປະ­ກອບ​ມີ​ແລ່ນ-ລານ ບານ­ເຕະ​ຍິງ-ຊາຍ ບານ­ບ້ວງ ຍິງ-ຊາຍ ກະ­ຕໍ້ ເທັນ​ນິດ ປິ່ງ​ປ່ອງ ເປ​ຕັງ ດອກ​ປິກ​ໄກ່ ລອຍ­ນ້ຳ ຍິງ​ປຶນ ໝາກ­ເສິກ ເທ​ຄວັນ​ໂດ ວູ​ຊູ ປັນ​ຈັກ​ສິ​ລັດ ຢູ​ໂດ ຄາ​ຣາ​ເຕ​ໂດ ມວຍ​ສາ­ກົນ ມວຍ​ປ້ຳ ມວຍ​ລາຍ​ລາວ ຊ່ວງ​ເຮືອ ກ໊ອຟ ໝາກ​ຂ່າງ ໜ້າ​ເກັກ ໝາກ​ແລ້ ລົດ­ຖີບ ໂບ​ລິ້ງ ແລະ ສະ­ນຸກ​ເກີ.

ຂ່າວທີ່ກ່ຽວຂ້ອງ